Aksi fu leisiman

Fu suma Yehovah ben e taki na ini Genesis 3:22, di a ben taki „wan fu wi”?

Soleki fa a sori, dan di Yehovah Gado ben taki, „libisma tron leki wan fu wi na ini a sabi di a sabi bun nanga ogri”, dan a ben e taki fu ensrefi nanga en wán-enkri gebore Manpikin (Genesis 3:22). Meki wi luku fu san ede wi kan taki dati.

Yehovah ben taki den wortu disi baka di a ben taki sortu strafu a fosi libisma trowpaar ben o kisi. Son sma e taki dati den wortu „wan fu wi”, na wan fasi fa sma di abi makti gwenti taki. Fu eksempre, te wan libisma kownu taki „wi no e prisiri”, dan a e sori taki en na a sma di no e prisiri. Ma a Bijbel sabiman Donald E. Gowan e taki fu Genesis 1:26 nanga Genesis 3:22 dati ’na Owru Testamenti no e horibaka gi a denki taki a wortu „wi”, e sori go na Gado wawan fu di a abi bigi makti, noso taki a e sori go na wan Gado di de wan sortu Dri-wánfasi. . . . Nowan fu den denki disi man fruklari krin san den wortu „wan fu wi” wani taki na ini Genesis 3:22.’

Son sma e feni taki Yehovah ben e taki fu Satan Didibri, di ben bosroiti gi ensrefi san na „bun nanga ogri” èn di ben meki den fosi libisma du a srefi sani tu. Ma a sani dati no kan, bika dyaso Yehovah ben gebroiki den wortu „wan fu wi”. Satan no ben de moro na ini a grupu fu getrow engel fu Yehovah, sobun a no ben kan de wan fu den sma di ben de na a sei fu Yehovah.

Gado ben e taki dyaso fu wan fu den getrow engel? Dati wi no kan taki krin. Ma, den srefi sortu wortu di skrifi na ini Genesis 1:26 nanga Genesis 3:22, e tyari wan tu sani kon na krin. Na ini Genesis 1:26, wi e leisi taki Yehovah ben taki: „Meki wi meki libisma akruderi a prenki fu wi.” Nanga suma a ben e taki dyaso? Na apostel Paulus ben taki fu a yeye di ben tron a volmaakti man Yesus, taki: „En na a prenki fu a Gado di wi no kan si, a fosi geborewan fu ala den sani di Gado meki; bika nanga yepi fu en ala tra sani ben meki na ini hemel nanga na grontapu” (Kolosesma 1:15, 16). Iya, a de krin fu frustan taki na ini Genesis 1:26, Yehovah ben e taki nanga en wán-enkri gebore Manpikin, a „tumusi bun wrokoman” di ben de na en sei di a ben e meki hemel nanga grontapu (Odo 8:22-31). Den wortu na ini Genesis 3:22 di gersi den wortu di skrifi na ini Genesis 1:26, e sori taki Yehovah ben taki ete wan tron nanga a sma di ben de moro krosibei fu en leki iniwan tra sma, namku en wán-enkri gebore Manpikin.

Soleki fa a sori, dan a wán-enkri gebore Manpikin fu Gado ben sabi san ’bun èn san ogri’. Fu di a ben abi wan krosibei banti nanga Yehovah bun langa kaba, meki a kon sabi a denki, den gronprakseri, nanga den markitiki fu en Papa heri bun. Yehovah ben sabi taki en Manpikin ben sabi ala den sani disi èn a ben sabi taki a ben o tan getrow na den sani disi. Fu dati ede, a kan taki Yehovah ben gi en Manpikin a makti fu du son sani sondro fu aksi en leki papa. Sobun, na ini son afersi a Manpikin ben man sabi èn a ben man bosroiti gi ensrefi san bun èn san ogri. Toku Yesus ben de heri tra fasi leki Satan, Adam, nanga Efa, fu di den bosroiti di a ben teki no ben de teige den markitiki fu Yehovah.