Dwengi yusrefi fu man wini a strei!

„Ibriwan sma di e teki prati na wan strei e dwengi ensrefi ini ala sani.”​—1 KORENTESMA 9:25.

1. Fa furu sma agri fu du a wani fu Yehovah, soleki fa Efeisesma 4:22-24 e sori?

EFU yu teki dopu leki wan Kotoigi fu Yehovah, dan yu meki ala sma kon sabi taki yu wani teki prati na wan strei pe yu kan kisi têgo libi te fu kaba. Yu agri fu du a wani fu Yehovah. Bifo wi ben gi wi libi abra na Yehovah, dan furu fu wi ben abi fu tyari prenspari kenki kon na ini wi libi so taki wi ben sa man gi wi libi abra na Gado na wan fasi di en feni bun. Wi ben teki a rai di Paulus ben gi Kresten: „Unu musu puru na owru fasi fa wan sma de, di de akruderi a waka nanga a libi di unu ben abi fosi èn di e pori akruderi den bedrigi lostu fu en . . . Unu musu weri a nyun fasi fa wan sma musu de, di ben meki akruderi a wani fu Gado na ini trutru regtfardikifasi nanga loyaalfasi” (Efeisesma 4:22-24). Sobun, bifo wi ben gi wi libi abra na Gado, dan wi ben abi fu tapu nanga wan fasi fu libi di Gado no feni bun.

2, 3. Fa 1 Korentesma 6:9-12 e sori taki wan sma musu kenki na tu fasi efu a wani taki Gado feni en bun?

² Sma di wani tron Kotoigi fu Yehovah musu tapu nanga wan tu sani di den ben gwenti fu du fosi, fu di Gado Wortu e krutu den sani dati krinkrin. Paulus ben kari wan tu fu den na ini en brifi gi den Korentesma: „Nowan huruman, nowan anbegiman fu kruktu gado, nowan sutaman, nowan man di den e hori fu du sani di a no meki fu dati, nowan man di e didon nanga man, nowan fufuruman, nowan sma di abi bigi-ai, nowan drunguman, nowan skempiman, nowan bedrigiman sa kisi a kownukondre fu Gado.” Baka dati a sori taki den fosi yarihondro Kresten ben tyari den kenki kon di ben de fanowdu, fu di a ben taki moro fara: „Èn toku, dati na san sonwan fu unu ben de.” Luku taki na so den ben de, ma den kenki.​—1 Korentesma 6:9-11.

³ Paulus ben sori tu taki a kan de fanowdu fu tyari moro kenki kon, bika a taki moro fara: „Mi abi a reti fu du ala sani, ma a no ala sani bun fu  du” (1 Korentesma 6:12). Sobun, furu sma na ini a ten disi di wani tron Kotoigi fu Yehovah e frustan taki aladi den abi a reti fu du ala sani, toku den no kan du sani di no e tyari wini kon, noso sani di de fu wan syatu pisi ten nomo. Den sani disi kan teki furu ten èn kan puru den prakseri fu sani di de moro prenspari.

4. Kresten di gi densrefi abra na Gado e agri nanga sortu sani di Paulus ben taki?

⁴ Wi e gi wisrefi abra na Gado fu di wisrefi wani dati. Wi no e si en leki wan hebi di wi e teki na wi tapu. Kresten di gi densrefi abra na Gado, e agri nanga san Paulus ben taki, baka di a tron wan disipel fu Krestes: „Fu [Yesus] ede mi si ala sani leki soso sani, èn mi e si den leki wan ipi doti, so taki mi kan abi Krestes” (Filipisma 3:8). Paulus ben de klariklari fu weigri iniwan sani di no ben de prenspari, so taki a ben man du a wani fu Gado.

5. Sortu streilon Paulus lon te na a kaba, èn fa wi kan du a srefi sani tu?

⁵ Paulus ben e dwengi ensrefi na ini a streilon di a ben lon na yeye fasi èn te fu kaba a ben man taki: „Mi feti a heri bun feti, mi lon a streilon te na a kaba, mi hori a bribi. Sensi a ten dati a kownu-ati fu regtfardikifasi poti na wan sei gi mi, di Masra, a regtfardiki krutuman, sa gi mi leki pai tapu a dei dati, ma a no mi wawan, ma sosrefi ala den sma di ben lobi a sori di a ben sori ensrefi” (2 Timoteyus 4:7, 8). Wi sa man taki den srefi wortu disi wan dei? Wi sa man du dati efu wi e tan dwengi wisrefi aladi wi e lon a Kresten streilon fu wi te na a kaba, èn sondro fu tapu.

Wi musu dwengi wisrefi fu du bun

6. San a wani taki fu dwengi wisrefi, èn na sortu tu fasi wi abi fu du dati?

⁶ Den Hebrew nanga Griki wortu na ini Bijbel di vertaal nanga „fu dwengi yusrefi” wani taki dati wan sma abi a makti noso a krakti fu man basi en skin. Furu tron den wortu disi e sori go na wan sma di e dwengi ensrefi fu no du ogri. Ma a no de fu taki dati wi musu man dwengi wisrefi tu fu du bun sani. Furu tron, sondu e meki taki libisma wani du sani di no bun, sobun wi abi fu dwengi wisrefi na tu fasi (Preikiman 7:29; 8:11). Aladi wi e dwengi wisrefi fu no du ogri, wi musu dwengi wisrefi tu fu du bun. Fu taki en leti, wan fu den moro bun fasi fu no du ogri, na fu dwengi wisrefi fu du bun.

7. (a) Fu san wi musu begi, soleki fa David ben du dati? (b) Fu sortu sani wi musu prakseri dipi efu wi wani dwengi wisrefi moro nanga moro?

⁷ A de krin, taki efu wi wani libi soleki fa wi ben pramisi Gado di wi gi wisrefi abra na en, dan a de prenspari taki wi e dwengi wisrefi. Wi musu begi soleki fa David ben du dati: „Meki na ini mi, srefi wan soifri ati, o Gado, èn poti na ini mi wan nyun yeye, wan di de stanfaste” (Psalm 51:10). Wi kan denki dipi fu den wini di wi o kisi te wi e dwengi wisrefi fu no du sani di no fiti, noso sani di e gi wi mankeri. Prakseri fu den problema di wi kan kisi te wi no e wai pasi gi den  sortu sani dati: wi kan kisi seryusu problema nanga a gosontu fu wi, a banti di wi abi nanga trawan kan pori, èn wi kan dede frukufruku kaba. Na a tra sei, prakseri fu den furu wini di yu kan kisi te yu e libi na a fasi fa Yehovah wani. Ma fu di wi sabi taki wi na sondu sma, meki wi no musu frigiti taki wi ati kan kori wi (Yeremia 17:9). Wi musu abi a fasti bosroiti fu dwengi wisrefi te wi ati e suku fu kori wi taki a no de so prenspari fu libi akruderi den markitiki fu Yehovah.

8. San ondrofeni leri wi? Gi wan eksempre.

⁸ Ondrofeni leri furu fu wi taki furu tron a sondu skin e suku fu tapu wi te wi wani dini Gado fayafaya. Teki fu eksempre, a Kownukondre preikiwroko. Yehovah e prisiri te libisma wani fu teki prati na a wroko disi di e gi sma libi (Psalm 110:3; Mateyus 24:14). Gi furu fu wi a no ben makriki fu leri fu preiki na publiki. Wi ben abi fu dwengi wi skin, kande te now ete wi abi fu „fon” en èn „tyari en leki wan srafu”, na presi fu gi en pasi fu du san a wani.​—1 Korentesma 9:16, 27; 1 Tesalonikasma 2:2.

„Ini ala sani”?

9, 10. San a wani taki ’fu dwengi wisrefi ini ala sani’?

⁹ A rai di Bijbel e gi wi fu ’dwengi wisrefi ini ala sani’, e sori taki wi musu du moro leki fu dwengi wisrefi fu no atibron esi-esi noso fu no du hurudu. Kande wi feni taki wi sabi basi den firi disi kaba, èn wi kan breiti srefisrefi efu wi man du dati trutru. Ma fa a de nanga tra situwâsi na ini wi libi pe wi no man si so krin taki wi abi fu dwengi wisrefi? Fu eksempre, kon meki wi taki dati wi e tan na ini wan gudu kondre èn moro furu fu den sma drape gudu srefisrefi. A no ben o de wan koni sani fu leri wisrefi fu no gebroiki wi moni somarso? A de wan bun sani gi papa nanga mama fu leri den pikin fu den taki den no musu bai ala san den e si soso fu di wenkri e seri en, noso fu di na wan moi sani, noso fu di den abi a moni fu bai en. A no de fu taki dati efu papa nanga mama wani taki den pikin fu den teki a leri disi, dan densrefi musu gi wan bun eksempre tu.​—Lukas 10:38-42.

¹⁰ Te wi e leri fu libi sondro wan sani di wi wani, dan dati kan yepi wi fu dwengi wisrefi moro bun. Disi kan meki wi kisi moro warderi tu gi den sani di wi abi èn wi sa frustan trawan moro bun te den musu libi nanga wan tu sani nomo, no fu di densrefi wani libi so, ma fu di den no man tra fasi. A tru taki wan libi sondro pranpran de kontrari a fasi fa furu sma e denki, namku taki „yu musu sorgu yusrefi bun”, noso taki „yu e frudini den moro bun sani di de”. Bisnisman e meki reklame na telefisi nanga radio pe den e sori sma taki solanga den wani wan sani, den musu suku fu kisi en wantewante. Ma den e du disi soso fu di den wani taki sma bai den sani di den e seri. A situwâsi disi kan gens a muiti di wi e meki fu dwengi wisrefi. Wan tijdschrift fu wan gudu kondre na Europa ben taki: „Efu pôtisma di e libi na ini tumusi takru situwâsi musu feti nanga densrefi kaba fu no kisi takru lostu, dan prakseri o muilek a sa de gi gudusma na ini den gudu kondre fu dwengi densrefi!”

11. Fu san ede a e gi wini te wi e leri fu libi soso nanga den sani di wi abi fanowdu? San e meki en muilek fu libi na so wan fasi?

¹¹ Efu a muilek gi wi fu si a difrenti na mindri san wi wani èn san wi abi fanowdu trutru, dan a kan de wan bun sani fu seti sani na so wan fasi taki wi no du lawlaw sani. Fu eksempre, efu wi wani dwengi wisrefi fu no bai sani somarso, dan kande wi kan bosroiti fu no borgu sani, noso kande wi kan teki pikinso moni nomo te wi e go na wenkri. Memre taki Paulus ben taki dati „wan sma e kisi furu wini te a e dini Gado fayafaya, ma a musu de tevrede nanga san a abi”. A ben sori taki: „Wi no tyari noti kon na grontapu èn wi no man teki noti fu en tyari gowe tu. Fu dati ede, efu wi abi nyanyan, krosi nanga wan presi fu tan, dan wi musu de tevrede nanga den sani disi” (1 Timoteyus 6:6-8). Wi de tevrede? Te wi e libi soso nanga den sani di wi abi fanowdu, dan wi no sa abi den broko-ede di e kon te wi e du noso e bai ala san wi wani. Efu wi wani leri fu libi na so wan fasi, dan wi o abi fu dwengi wisrefi. Ma wi sa kisi bun bakapisi te wi e du disi.

12, 13. (a) Na sortu fasi wi abi fu dwengi wisrefi na Kresten konmakandra? (b) Na sortu tra fasi wi abi fu dwengi wisrefi tu?

 ¹² Te wi e go na Kresten konmakandra, kring konmakandra, nanga kongres, dan wi kan dwengi wisrefi na wan spesrutu sortu fasi tu. Fu eksempre, wi musu dwengi wisrefi fu no prakseri tra sani aladi a konmakandra e hori (Odo 1:5). Kande wi abi fu dwengi wisrefi fu no hari tra sma prakseri fu di wi e syusyu nanga den wan di e sidon na wi sei, na presi taki wi e poti ala wi prakseri na a takiman. Kande wi abi fu dwengi wisrefi fu seti ala sani na so wan fasi taki wi e doro biten na den konmakandra. Boiti dati, a kan tu taki wi abi fu dwengi wisrefi fu poti ten na wan sei fu sreka wisrefi gi den konmakandra èn fu teki prati na den.

¹³ Te wi e leri fu dwengi wisrefi na ini den pikinpikin sani, dan wi sa man dwengi wisrefi na ini den moro bigi sani tu (Lukas 16:10). Sobun, a de wan bun sani srefisrefi te wi e dwengi wisrefi fu leisi Gado Wortu nanga den Bijbel publikâsi doronomo, fu studeri den, èn fu denki dipi fu den sani di wi leri! A de wan koni sani tu te wi e dwengi wisrefi fu no teki wan wroko di no fiti gi Kresten, èn fu no abi takru mati, fu no abi takru fasi noso gwenti, noso fu no du sani di e teki a ten di wi ben sa man gebroiki fu dini Gado! Te wi tan abi furu fu du na ini a diniwroko fu Yehovah, dan wi sa man kibri wisrefi heri bun gi sani di ben sa man meki wi drifi gowe fu a yeye paradijs fu Yehovah en organisâsi na heri grontapu.

Tron lepi sma fu di yu e dwengi yusrefi

14. (a) Fa pikin musu leri fu dwengi densrefi? (b) Sortu wini a kan abi te wan pikin e leri frukufruku kaba fa fu dwengi ensrefi?

¹⁴ Ala sma sabi taki wan watrawatra beibi no man dwengi ensrefi. Sabiman di ondrosuku fa pikin-nengre e tyari densrefi, ben tyari wan traktaat kon na doro pe skrifi: „Wan sma no e gebore nanga a fasi fu man dwengi ensrefi èn a no e kisi a fasi disi wantronso. Papa nanga mama musu leri èn yepi den nyofi pikin fu den fu man dwengi densrefi. . . . Nanga yepi fu a papa nanga mama fu den, pikin e leri fu dwengi densrefi moro nanga moro na ini den yari di den e go na skoro.” Di sma ondrosuku wan grupu fu pikin di abi fo yari, dan a kon na krin taki moro furu fu den pikin di leri fu dwengi densrefi „gro kon tron tini di e fiti densrefi moro esi na difrenti situwâsi, den de moro pôpi, den abi moro deki-ati fu pruberi nyun sani, den de seiker fu san den e du, èn den de fu frutrow”. Den pikin di no leri fu dwengi densrefi „ben tron sma di furu tron no ben abi mati, den ben e bruya esi-esi èn den ben tranga-ede. Den no ben man nanga tumusi furu  broko-ede èn den ben frede fu pruberi nyun sani.” A de krin, taki efu wan pikin wani gro kon tron wan bigisma di sabi fa fu fiti ensrefi na difrenti sortu situwâsi, dan a musu leri fu dwengi ensrefi.

15. Te wi no man dwengi wisrefi, dan san dati e sori? Ma sortu marki wi musu abi, soleki fa Bijbel e sori?

¹⁵ Na a srefi fasi, te wi wani tron lepi Kresten, dan wi abi fu leri fu dwengi wisrefi tu. Te wi no man dwengi wisrefi, dan disi e sori taki na yeye fasi wi de nyofi pikin ete. Bijbel e gi wi a deki-ati fu ’tron bigisma ini a fasi fa wi e denki’ (1 Korentesma 14:20). A marki fu wi na fu „kon de wán na ini a bribi èn abi a soifri sabi fu a Manpikin fu Gado, teleki wi tron bigisma, teleki wi gro kon bigi èn kon lepi na ini Krestes”. Fu san ede? „So taki wi no sa de leki nyofi pikin moro di sma e fringi go-kon neleki fa den skwala fu se e du dati, fu di sma e kon bruya wi nanga ala sortu leri di de leki winti di e wai wi go na ala sei fu di sma no sa bedrigi wi nanga ala sortu leri èn den no sa kori wi nanga den lei di den e sidon prakseri” (Efeisesma 4:13, 14). A de krin, taki efu wi wani abi wan bun yeyefasi, dan a de tumusi prenspari fu dwengi wisrefi.

Fa wi kan leri fu dwengi wisrefi

16. Fa Yehovah e gi wi yepi?

¹⁶ Efu wi wani leri fu dwengi wisrefi, dan wi abi yepi fu Gado fanowdu, èn wi kan kisi a yepi dati tu. A Wortu fu Gado de leki wan volmaakti spikri di e sori wi sortu kenki wi musu tyari kon, èn a e gi wi rai fa wi kan du dati (Yakobus 1:22-25). Lobi-ati brada nanga sisa de klariklari fu yepi wi tu. Kresten owruman e sori taki den e frustan a situwâsi fu wi èn den e gi wi yepi. Yehovah srefi de klariklari fu gi wi en santa yeye efu wi e aksi fu dati na ini begi (Lukas 11:13; Romesma 8:26). Fu dati ede, meki wi teki ala den yepi disi nanga prisiri. Kande den rai na tapu bladzijde 21 sa de wan yepi gi yu.

17. Sortu deki-ati Odo 24:16 e gi wi?

¹⁷ A de wan trowstu fu sabi taki Yehovah e warderi den muiti di wi e meki te wi e pruberi fu plisi en! Disi musu gi wi deki-ati fu tan meki muiti fu dwengi wisrefi moro nanga moro. Awinsi o furu leisi wi e meki fowtu, toku wi no musu lasi-ati noiti. „A regtfardikiwan kan fadon seibi tron srefi, èn seiker a sa opo tanapu” (Odo 24:16). Ibri tron te wi plisi Yehovah, wi kan breiti nanga wisrefi. Wi kan de seiker taki Yehovah breiti nanga wi tu. Wan Kotoigi fruteri taki bifo a ben gi en libi abra na Yehovah, dan ibri tron te a no ben smoko wan wiki langa, a ben bai wan bun sani gi ensrefi nanga a moni di a ben man kibri fu di a dwengi ensrefi fu no bai sikaret.

18. (a) A dwengi di wi musu dwengi wisrefi abi fu du nanga san? (b) Sortu dyaranti Yehovah e gi wi?

¹⁸ A moro prenspari sani di wi musu hori na prakseri, na taki a dwengi di wi musu dwengi wisrefi abi fu du nanga wi frustan èn nanga den firi fu wi. Te wi e luku den wortu fu Yesus, dan wi kan si taki disi de so: „Iniwan sma di e tan luku wan uma fu kisi tranga lostu gi en, du sutadu kaba na ini en ati” (Mateyus 5:28; Yakobus 1:14, 15). A sma di leri fu basi en frustan èn den firi fu en, sa feni en moro makriki fu basi en heri skin. Fu dati ede, meki wi teki wan moro fasti bosroiti fu no du nowan ogri èn fu no prakseri srefi fu den sani dati. Efu wi e kisi takru prakseri, dan wi musu puru den na wi ede wantewante. Wi kan wai pasi gi tesi efu wi e begi, aladi wi e tan poti prakseri na Yesus (1 Timoteyus 6:11; 2 Timoteyus 2:22; Hebrewsma 4:15, 16). Te wi e meki muiti fu du so, dan wi e gi yesi na a rai fu Psalm 55:22: „Trowe yu hebi na tapu Yehovah, èn ensrefi sa horibaka gi yu. Noiti a sa meki taki a regtfardikiwan e degedege.”

Yu e memre disi ete?

• Na sortu tu fasi wi musu dwengi wisrefi?

• San a wani taki fu dwengi yusrefi „ini ala sani”?

• A studie disi e gi wan tu rai fa fu dwengi wisrefi, ma sortuwan fu den rai hari yu prakseri trutru?

• Ini sortu sani wi musu leri fu dwengi wisrefi fosi?

[Aksi fu a tori disi]

[Faki/​Prenki na tapu bladzijde 21]

Fasi fa yu kan dwengi yusrefi moro bun

• Leri fu dwengi yusrefi na ini den moro pikin sani

• Denki dipi fu den wini di yu kan kisi now èn na ini a ten di e kon efu yu e dwengi yusrefi

• Kakafutu gi sani di Gado no feni bun èn meki muiti fu du sani di e plisi en

• Puru takru prakseri na yu ede wantewante

• Furu yu frustan nanga sani di e gi yu deki-ati na yeye fasi

• Teki a yepi di lepi Kresten kan gi

• Wai pasi gi situwâsi di kan tron wan tesi gi yu

• Te tesi miti yu, dan begi Gado fu yepi yu

[Prenki na tapu bladzijde 18, 19]

Wi man du bun sani efu wi man dwengi wisrefi