Wi alamala musu teki bosroiti

„WAN fu den moro muilek sani di de, na fu teki bosroiti èn fu dati ede a de wan trutru prenspari sani efu wan sma man du dati”, na so Napoleon Bonaparte, a kèiser fu Fransikondre fu a di fu 19 yarihondro, ben taki. Kande yu e agri nanga san a man disi taki, fu di furu tron sma e si en leki wan prenspari sani te den man du san den wani na ini den eigi libi. Ma, sma kon si sosrefi taki a de wan tumusi muilek sani fu teki bosroiti.

Ala sma musu teki bosroiti, awinsi dati makriki noso muilek. Ibri dei wi musu teki bosroiti. Te wi e opo mamanten, wi musu bosroiti sortu krosi wi o weri, san wi o nyan a mamanten dati, èn fa wi o du den furu tra sani a dei dati. Furu fu den bosroiti disi di wi e teki no de so prenspari. Furu tron wi no e sidon denki bun fu den sortu bosroiti disi. Wi no e broko wi ede te neti fu di wi e aksi wisrefi efu wi teki wan koni noso wan don bosroiti na ini den sortu afersi disi di no de so prenspari.

Na a tra sei, son bosroiti di wi e teki kan abi furu krakti tapu tra sani na ini wi libi. Na ini a ten disi, furu yongusma musu bosroiti sortu wroko den sa du. Kande den musu bosroiti na sortu skoro den musu go èn omeni skoroleri den musu teki. Te fu kaba, furu fu den sa musu teki a bosroiti efu den o trow noso efu den o tan sondro fu trow. Den wan di e teki a bosroiti fu trow musu aksi densrefi a sani disi: ’Mi owru nofo fu trow èn mi abi nofo ondrofeni? Suma mi wani leki patna, noso san de moro prenspari, suma mi abi fanowdu leki patna?’ A bosroiti disi kan abi bun furu krakti tapu wi libi.

Na ini afersi di de tumusi prenspari wi musu teki koni bosroiti, fu di dati abi furu fu du nanga a koloku fu wi. Son sma e denki kande taki den man teki den sortu bosroiti disi èn kande den no wani teki yepi di e gi na ini a tori disi. Dati na wan koni sani fu du? Meki wi go luku.

[Sma di abi a reti fu a prenki na tapu bladzijde 3]

Napoleon: Fu a buku The Pictorial History of the World