Yonguwan, waka na wan fasi di warti gi Yehovah

SON Kresten yonguwan ben musu gowe libi den famiri èn a gemeente fu den gi wan pisi ten. Sonwan ben du disi fu di den go du moro na ini a diniwroko fu den. Trawan ben musu gowe libi den oso fu di den no ben teki sei na ini afersi fu a grontapu disi (Yesaya 2:4; Yohanes 17:16). Na ini son kondre, „Caesar” ben strafu den yonguwan disi di hori den soifri retifasi. Den ben musu go na strafu-oso, noso den ben musu wroko gi lanti. *​—Markus 12:17; Titus 3:1, 2.

Te den yonguwan disi de na strafu fu di den no teki sei na ini afersi fu a grontapu disi, dan a kan taki sma e sroto den gi wan langa pisi ten makandra nanga tra yonguwan di e du ogri nanga tranga. Yonguwan di no e tan na oso moro fu wan tra reide ede, musu wroko sosrefi na presi pe sma abi wan doti fasi fu libi. Den yongu Kresten disi noso trawan di musu wroko na presi pe sma abi wan doti fasi fu libi, kan abi bun bakapisi te den e kakafutu gi tesi. Fa den kan du dati aladi den e meki muiti fu ’tan waka na wan fasi di warti na ini Gado ai’? (1 Tesalonikasma 2:12) Fa den papa nanga mama fu yonguwan kan yepi den fu sreka densrefi gi iniwan sortu muilek situwâsi di kan miti den?​—Odo 22:3.

Tyalensi di yonguwan e kisi

„A ben de wan muilek sani gi mi èn mi ben e fredefrede pikinso di mi no ben de moro na mi papa nanga mama di ben e kibri mi gi takrudu èn di mi no ben de moro na ondro a tiri fu den lobi-ati owruman di sabi mi bun”, na so Tákis di abi 21 yari taki di a ben musu tan 37 mun langa na wan tra presi. * A e taki moro fara: „Son tron, mi ben e firi brokosaka srefisrefi.” Pétros di abi 20 yari, ben musu tan wan tra presi moro leki tu yari langa. A e taki: „Fosi tron na ini mi libi misrefi ben musu bosroiti sortu prisiriten mi ben o abi èn sortu mati mi ben o abi, èn a no ala den bosroiti di mi teki ben de koni bosroiti.” A e taki moro fara: „Son leisi mi ben e frede pikinso taki mi kon kisi moro fri fu du sani fu di dati e tyari moro bigi frantwortu kon.” Tássos, wan Kresten owruman di e miti furu tron nanga Kresten yonguwan di de na ini den sortu situwâsi disi, e taki: „Den yonguwan abi speri di no de na bribi. Den speri disi e taki dotitaki, den e opo densrefi teige trawan, èn den e du ogri. Den sani disi kan abi krakti tapu den yonguwan di no abi ondrofeni.”

Den yonguwan disi e libi èn e wroko na mindri sma di no e lespeki den gronprakseri fu Bijbel. Den musu luku bun fu no fadon na ini a tesi fu waka baka den speri fu den di e tyari densrefi na wan doti fasi èn di e du sani di no de akruderi Bijbel (Psalm 1:1; 26:4; 119:9). Kande a sori taki a muilek fu studeri doronomo, fu go na den konmakandra, èn fu go na a preikiwroko (Filipisma 3:16). A no makriki sosrefi fu poti marki na yeye fasi èn fu doro den marki disi.

A no de fu taki dati getrow Kresten yonguwan wani fu plisi Yehovah nanga a fasi fa den e tyari densrefi èn nanga a fasi fa den e taki. Na wan getrow fasi den e pruberi fu gi yesi na a moi kari di den hemel Tata e gi den, namku: „Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi” (Odo 27:11). Den sabi taki a fasi fa den e tyari densrefi abi krakti tapu a fasi fa trawan e si Yehovah nanga en pipel.​—1 Petrus 2:12.

 Den yonguwan disi de fu prèise fu di den e meki muiti fu de leki den brada fu a fosi yarihondro. Paulus ben begi gi den brada disi di a ben taki: „Waka na wan fasi di warti gi Yehovah, fu plisi en dorodoro, aladi unu e tan tyari froktu ini ibri bun wroko . . . so taki unu kan horidoro krinkrin èn so taki unu kan abi langa pasensi nanga prisiri” (Kolosesma 1:9-11). Bijbel e gi difrenti eksempre fu yonguwan di ben abi frede gi Gado. Den yonguwan disi ben tan waka na wan fasi di warti gi Gado, aladi den ben de na presi di den no ben sabi èn pe sma di ben e anbegi falsi gado no ben e handri den na wan switi fasi.​—Filipisma 2:15.

„Yehovah ben de nanga Yosef”

Yosef, a lobi manpikin fu Yakob nanga Rakel, ben yongu ete di a ben de farawe fu en oso pe a ben kisi kibri fu en papa di ben abi frede gi Gado. A ben seri leki srafu go na ini katibo na Egepte. Yosef ben de wan tumusi bun eksempre fu wan yonguman di ben e wroko tranga, di sma ben kan frutrow, èn di ben e tyari ensrefi na wan bun fasi. Aladi a ben de wan srafu fu Potifar, wan man di no ben e anbegi Yehovah, toku Yosef ben e wroko bun èn a ben e wroko fayafaya so taki te fu kaba en masra ben poti en leki basi fu ala den afersi fu na oso (Genesis 39:2-6). Yosef tan hori en soifri retifasi na Yehovah, èn leki bakapisi fu dati a ben musu go na strafu-oso. Ma di a ben de drape, dan a no ben taki: „Fu san ede mi musu hori mi soifri retifasi ete?” Srefi na ini strafu-oso a ben sori bun fasi, èn heri esi a kisi a wroko fu luku fa sani ben musu waka na ini a strafu-oso (Genesis 39:17-22). Gado blesi en, èn soleki fa a skrifi na ini Genesis 39:23 dan „Yehovah ben de nanga Yosef”.

Fu di Yosef ben de fara fu en famiri di ben abi frede gi Gado, meki a ben kan de makriki gi en fu tyari ensrefi neleki fa den heiden sma fu a presi drape ben e tyari densrefi. A ben kan libi na a srefi fasi leki den sma fu Egepte di no ben tyari densrefi na wan krin fasi! Na presi fu du dati, a ben tan hori ensrefi na den gronprakseri fu Gado èn a ben tan tyari ensrefi na wan krin fasi aladi a kisi bun hebi tesi. Di a wefi fu Potifar ben tan dwengi en ibri tron baka fu go didon nanga en, dan nanga wan fasti bosroiti a ben piki en taki: „Fa mi ben kan du a bigi ogri disi èn trutru sondu na Gado?”​—Genesis 39:7-9.

Na ini a ten disi, yongu Kotoigi musu gi yesi na den gronprakseri fu Bijbel di e warskow gi takru kompe, prisiriten di no bun, seks buku nanga seks felem, nanga doti poku. Den sabi taki „den ai fu Yehovah de na ibri presi, aladi den e luku den takruwan èn den bunwan”.​—Odo 15:3.

Moses ben weigri fu „prisiri nanga wan sondu libi”

Moses gro kon bigi na ini na oso fu Farao pe den sma ben e anbegi falsi gado èn pe den ben e broko den ede soso nanga prisiri nomo. Bijbel e taki disi fu Moses: „Fu di Moses ben abi bribi . . . a ben weigri fu sma kari en a manpikin fu na umapikin fu  Farao, a ben frukisi fu nyan pina nanga a pipel fu Gado na presi fu prisiri nanga wan sondu libi di de fu wan syatu pisi ten nomo.”​—Hebrewsma 11:24, 25.

Wan sma kan kisi wan tu winimarki fu a matifasi di a abi nanga grontapu, ma den sa de fu wan syatu pisi ten nomo. A grontapu disi sa tan fu wan syatu pisi ten nomo èn wan sma kan kisi den winimarki disi teleki a grontapu disi kon na wan kaba (1 Yohanes 2:15-17). A no ben sa de moro bun fu teki na eksempre fu Moses? Bijbel e taki dati „a ben tan stanfaste neleki a ben e si a Sma di wi no man si” (Hebrewsma 11:27). A ben tan poti prakseri na den sani di a ben leri fu den afo fu en di ben abi frede gi Gado. Ala ten a ben suku fu horibaka gi den sani di Yehovah abi na prakseri èn a moro prenspari marki na ini en libi ben de fu du a wani fu Gado.​—Exodus 2:11; Tori fu den Apostel 7:23, 25.

Te yonguwan di abi frede gi Gado de na wan presi pe sma no e du a wani fu Gado èn no e handri na wan switi fasi, dan den yonguwan disi kan kisi wan moro bun banti nanga Yehovah te den e studeri. Na so wan fasi den sa kon leri sabi moro bun suma na „a Sma di wi no man si”. Yonguwan sa man tan poti prakseri na yeye afersi te den abi furu fu du na ini a Kresten diniwroko. Den sa man tan du disi te den e go doronomo na den konmakandra èn na a preikiwroko (Psalm 63:6; 77:12). Den musu meki muiti fu abi a srefi tranga bribi nanga tranga howpu leki a di fu Moses. Den musu meki muiti fu poti ala den prakseri na Yehovah èn fu du sani di e plisi en. Te den du dati, dan den sa prisiri fu de en mati.

A prèise Gado nanga den sani di a ben taki

Wan tra yonguwan di gi wan bun eksempre di a ben de farawe fu oso, ben de a meisje fu Israel di ben de na ini katibo na den Siriasma na ini a ten fu Elisa, a profeiti fu Gado. A meisje disi ben tron na uma-futuboi fu a wefi fu Naman, a legre edeman fu Siria di ben abi gwasi. A ben taigi en misi: „Efu mi masra ben de nomo na fesi a profeiti di de na Samaria! Dan a ben o dresi en fu a gwasi fu en.” Fu di a meisje ben gi kotoigi, meki Naman ben go na Elisa na ini Israel èn a ben kon krin fu a gwasi siki. Boiti dati, Naman ben tron wan anbegiman fu Yehovah.​—2 Kownu 5:1-3, 13-19.

Na eksempre fu a meisje disi e sori o prenspari a de dati yonguwan e taki na wan fasi di e gi Gado grani, srefi efu den no de nanga den papa nanga  mama. Efu a meisje disi ben abi a gwenti fu „taki don sani” noso „fisti sani”, dan yu denki taki a ben o firi ensrefi switi fu taki wan bun sani, soleki fa a ben du di na okasi opo kon? (Efeisesma 5:4; Odo 15:2) Níkos, wan yonguman di abi sowan 20 yari ben go na strafu-oso fu di a no ben teki sei na ini grontapu afersi. A e memre taki: „Mi ben de nanga wan tu tra yongu brada na ini wan strafu-oso pe wi ben musu wroko na wan gron. Wi no ben abi papa noso mama di ben e luku wi èn wi no ben abi a gemeente sosrefi. Dan mi kon si taki den tori fu san wi ben e taki no ben bun. Wi ben e taki na wan fasi di no ben e prèise Yehovah kwetikweti.” Koloku Níkos nanga trawan kisi yepi fu arki a rai fu Paulus di abi fu du nanga a tori disi, namku: „Hurudu nanga ala sortu libi di no krin noso bigi-ai unu no musu taki srefi fu den na un mindri, soleki fa a e fiti santa sma.”​—Efeisesma 5:3.

Yehovah ben de wan trutru sma gi den

Na eksempre fu den dri Hebrew mati fu Danièl na ini Babilon fu owruten e sori krin taki a gronprakseri di Yesus ben gi de tru, namku taki te wan sma getrow na ini pikin sani, dan dati sa meki taki a de getrow na ini bigi sani (Lukas 16:10). Di den ben kisi fu du nanga a problema taki den ben musu nyan sani di no ben de akruderi a Wet fu Moses, dan den ben kan denki taki den no ben kan du nowan enkri tra sani leki fu nyan fu di den ben de na ini katibo na ini wan tra kondre. Ma, aladi a ben kan gersi leki a sani disi no de so prenspari, toku den teki a pikin sani disi leki wan seryusu sani èn den kisi blesi! Den ben de moro gosontu èn den ben koni moro ala den trawan di ben tan nyan fu den switisani fu a kownu aladi den ben de na ini katibo. A no de fu taki dati den kisi tranga fu di den ben de getrow na ini pikin sani, bika di den kisi fu du nanga wan moro bigi tesi fu boigi gi wan falsi gado, den weigri fu brokokindi.​—Danièl 1:3-21; 3:1-30.

Yehovah ben de wan trutru sma gi den dri yonguman disi. Aladi den no ben de na den oso èn den no ben de na a presi pe den ben e anbegi Gado, toku den ben abi a fasti bosroiti fu tan sondro flaka fu grontapu (2 Petrus 3:14). A banti di den ben abi nanga Yehovah ben de so warti gi den taki den ben de klariklari fu gi den libi.

Yehovah no sa drai baka gi yu

Wi kan frustan taki te yonguwan no de nanga den sma di den lobi èn di den e frutrow, dan den kan abi a firi taki den no sabi san fu du, èn den kan fredefrede pikinso. Ma den kan kakafutu gi  den tesi di den e kisi fu di den sabi seiker taki „Yehovah no sa drai en baka” gi den (Psalm 94:14). Efu den yonguwan disi e ’pina fu di den e du san de regtfardiki’, dan Yehovah sa yepi den fu tan waka tapu „a pasi fu regtfardikifasi”.​—1 Petrus 3:14; Odo 8:20.

Ala ten baka Yehovah ben tranga Yosef, Moses, a meisje fu Israel di ben de wan srafu, nanga den dri getrow Hebrew yonguwan èn a ben gi den furu blesi sosrefi. Na ini a ten disi a e gebroiki en santa yeye, en Wortu, nanga en organisâsi fu tan yepi den wan di e „feti a tumusi bun feti fu bribi” fu di a paiman di den sa kisi na „têgo libi” (1 Timoteyus 6:11, 12). Fu tru, wan sma man waka na wan fasi di warti gi Yehovah, èn disi na wan koni sani fu du.​—Odo 23:15, 19.

[Futuwortu]

[Faki na tapu bladzijde 25]

PAPA NANGA MAMA​—SREKA DEN PIKIN FU UNU!

„Leki peiri na ini na anu fu wan tranga man, na so den manpikin fu den yongu yari de” (Psalm 127:4). Wan peiri no sa sutu wan sani fu ensrefi. Na wan koni fasi wan sma musu sutu a peiri so taki a kan doro na a sani di a musu sutu. Na a srefi fasi a de tu efu den pikin no e kisi a yoisti leri fu papa nanga mama. Te den no de na oso moro, dan den no sa de srekasreka gi den sani di e pasa na ini a libi.​—Odo 22:6.

Yonguwan lobi fu handri soleki fa den e firi, noso den e brokokindi „gi den lostu di yongusma abi” (2 Timoteyus 2:22). Bijbel e warskow: „A tiki nanga piri-ai na sani di e gi koni; ma te den libi wan boi sondro fu poti prakseri na en, dan a sa gi en mama syen” (Odo 29:15). Efu papa nanga mama no e poti skotu gi wan yonguwan, dan te a pikin no de na oso moro, a no sa de srekasreka gi den tesi fu a libi.

Na wan krin fasi èn na wan koni fasi Kresten papa nanga mama musu sori den pikin fu den san na den problema, san na den tesi, èn den sani na ini a libi di den kan fruwakti na ini a seti fu sani disi. Papa nanga mama no musu broko den pikin saka, ma den kan sori den yonguwan nanga sortu muilek situwâsi den kan kisi fu du te den no e libi na oso moro. A leri disi makandra nanga a koni di Gado e gi, sa gi ’koni na den wan di no abi ondrofeni, èn a sa gi wan yonkuman sabi nanga frustan’.​—Odo 1:4.

Papa nanga mama musu poti den markitiki fu Gado èn den gronprakseri fu en dipi na ini den ati fu den pikin, so taki den sa man sabi san fu du te den e kisi problema na ini a libi. Te papa nanga mama e studeri doronomo nanga na osofamiri, te den e hori takimakandra pe den pikin man taki ala san de tapu den ati, èn te den e broko den ede trutru nanga a tanbun fu den pikin, dan dati na prenspari sani di kan meki taki sani waka bun nanga den pikin. Papa nanga mama musu kweki den pikin na a yoisti fasi nanga yepi fu a leri di Gado e gi. Te den e gi leri, dan a musu fiti na a yonguwan, na so fasi den sa sreka den pikin fu den fa fu teki den eigi bosroiti bakaten na ini a libi. Te papa nanga mama e gi den pikin fu den na eksempre, dan den sa si taki wan sma man de na ini grontapu aladi a no de wan pisi fu grontapu.​—Yohanes 17:15, 16.

[Prenki na tapu bladzijde 23]

Son Kresten yonguwan ben musu gowe libi den oso

[Prenki na tapu bladzijde 24]

Yonguwan kan teki na eksempre fu Yosef fu tan tyari densrefi na wan yoisti fasi fu di den e kakafutu gi sani di kan kori den

[Prenki na tapu bladzijde 26]

Teki na eksempre fu a meisje fu Israel di ben de wan srafu èn di ben prèise Yehovah nanga den sani di a ben taki