Aksi fu leisiman

Fu san ede Elisa aksi fu kisi „tu pisi” fu a yeye fu Elia?

Leti bifo Elia ben kaba a wroko di a ben du leki profeiti na ini Israel, dan a moro yongu profeiti Elisa ben aksi en: „Grantangi, meki a de so taki tu pisi fu yu yeye sa kon na mi tapu” (2 Kownu 2:9). Te wi e luku a sani disi na wan yeye fasi, dan a gersi taki Elisa ben aksi tu pisi, neleki fa wan fosi gebore manpikin ben e kisi dati (Deuteronomium 21:17). Wan syatu luku fu a tori sa tyari kon na krin san ben pasa èn a sa yepi wi fu leri wan sani fu san ben pasa.

Soleki fa Yehovah ben taigi Elia, dan a profeiti ben salfu Elisa leki a sma di ben o teki a wroko fu en abra (1 Kownu 19:19-21). Sowan siksi yari Elisa ben dini Elia leki wan getrow dinari èn a ben teki a fasti bosroiti fu du dati te na a kaba. Srefi tapu a lasti dei di Elia ben dini leki wan profeiti na ini Israel, Elisa tan wroko sei na sei nanga a leriman fu en. Awinsi fa Elia ben aksi Elisa fu no waka moro na en baka, toku a moro yongu profeiti ben taki dri leisi: „Mi no sa libi yu” (2 Kownu 2:2, 4, 6; 3:11). Iya, Elisa ben e si a moro owru profeiti leki a papa fu en na yeye fasi.—2 Kownu 2:12.

Ma Elisa no ben de a wán-enkri manpikin di Elia ben abi na yeye fasi. Elia nanga Elisa ben abi demakandra nanga wan grupu man di sma ben sabi leki „den manpikin fu den profeiti” (2 Kownu 2:3). A tori di skrifi na ini a buku Tu Kownu e sori taki den „manpikin” disi ben abi wan bun banti sosrefi nanga Elia, a papa fu den na yeye fasi (2 Kownu 2:3, 5, 7, 15-17). Ma leki a sma di salfu fu teki a presi fu Elia, Elisa ben de a moro prenspari wan fu den manpikin di Elia ben abi na yeye fasi, a ben de leki a fosi geborewan. Na ini owruten Israel, a fosi gebore manpikin ben e kisi tu pisi fu a gudu fu en papa, aladi ibriwan fu den tra manpikin ben kisi wán pisi nomo. Dati meki Elisa ben aksi tu pisi fu a yeye gudu fu Elia.

Fu san ede Elisa aksi a sani disi na a spesrutu momenti dati? A du dati bika a ben o bigin nanga wan hebi wroko, namku fu teki a wroko abra fu Elia di ben e dini leki profeiti na ini Israel. Elisa ben sabi taki, efu a ben o teki a hebi wroko disi na en tapu, dan a ben o abi krakti fanowdu di en leki libisma ben e mankeri. Na Yehovah wawan ben kan gi en krakti na yeye fasi. A ben musu de sondro frede neleki fa Elia ben de (2 Kownu 1:3, 4, 15, 16). Fu dati ede a ben aksi fu kisi tu pisi fu a yeye fu Elia, namku deki-ati nanga a firi fu „trutru dyarusu gi Yehovah”. Nanga yepi fu santa yeye, sma kan kisi den tu moi fasi disi (1 Kownu 19:10, 14). San Elia ben piki en?

Elia ben sabi taki Elisa ben aksi en wan sani di a no ben kan gi en, wan sani di Gado wawan abi a reti fu gi en. Sobun, nanga sakafasi Elia piki en taki: „Yu aksi wan muilek sani. Efu yu e si mi te mi teki puru fu yu, dan a sa pasa na a fasi dati nanga yu” (2 Kownu 2:10). Èn na so Yehovah sorgu taki Elisa si fa Elia opo go na loktu na ini wan bigi winti (2 Kownu 2:11, 12). Na so Elisa kisi a sani di a ben aksi. Yehovah gi en a krakti na yeye fasi di a ben abi fanowdu fu man du a nyun wroko fu en èn fu kakafutu gi den tesi di ben o kon na tapu en pasi.

Na ini a ten disi, den salfu Kresten (son tron den e kari a grupu disi na Elisa grupu) nanga tra dinari fu Gado, kan kisi furu deki-ati fu a Bijbel tori disi. Son leisi wi kan firi brokosaka èn wi kan firi taki wi no bun nofo te wi e kisi wan nyun grani na ini na organisâsi, noso wi kan lasi-ati pikinso fu horidoro na ini a preikiwroko te furu sma e sori wan mi-no-ke fasi noso te sma e gens wi na ini wi kontren. Ma efu wi aksi Yehovah fu yepi wi, dan a sa gi wi a santa yeye fu en te wi abi fu du nanga tyalensi èn te sani e kenki na ini wi libi (Lukas 11:13; 2 Korentesma 4:7; Filipisma 4:13). Iya, neleki fa Yehovah ben gi Elisa krakti di a ben kisi moro frantwortu, na so a sa yepi wi alamala, yonguwan nanga owruwan, fu du a diniwroko fu wi nanga bun bakapisi.—2 Timoteyus 4:5.