Getrow Kresten uma na warti anbegiman fu Gado

„Moifasi kan de wan bedrigi sani, èn moi skin kan de wan soso sani; ma na uma di e frede Yehovah, na a wan di e kisi prèise gi ensrefi.”​—ODO 31:30.

1. O ten wan sma moi gi Yehovah, èn fa grontapu abi wan heri tra denki fu dati?

GI GRONTAPU, wan moi sma na wan sma di abi moi skin noso wan moi fesi, spesrutu efu na wan umasma. Ma gi Yehovah, wan moi sma na wan sma di abi moi fasi noso maniri, èn o moro wan sma e kon owru, o moro moi fasi a kan kon abi (Odo 16:31). Fu dati ede, Bijbel e gi uma a deki-ati: „Unu no musu meki a moi fu unu de na dorosei nomo fu di unu e brei un wiwiri, e weri gowtu sani, noso fu di unu e weri moi krosi. Ma a moi fu unu musu de fu si na a fasi fa un ati de, namku na ini moi sani di no man pori, sani di abi fu du nanga wan tiri èn safri fasi, bika den sani disi warti srefisrefi na Gado ai.”​—1 Petrus 3:3, 4.

2, 3. Fa umasma ben yepi fu panya a bun nyunsu na furu presi na ini a fosi yarihondro? Fa Bijbel ben taki disi na fesi kaba?

² Furu uma di Bijbel e taki fu den ben e tyari densrefi na a moi fasi disi di de fu prèise trutru. Na ini a fosi yarihondro, sonwan fu den uma disi ben abi a grani fu yepi Yesus nanga den apostel fu en (Lukas 8:1-3). Bakaten, Kresten uma ben tron fayafaya preikiman; trawan ben de wan bigi yepi fu di den ben e horibaka gi Kresten man, soleki na apostel Paulus, di ben e teki fesi na ini a gemeente. Tra uma ben lobi en srefisrefi fu teki sma na den oso; den ben gi a gemeente okasi srefi fu hori konmakandra na ini na oso fu den.

³ Bijbel ben taki na fesi taki Yehovah ben o gebroiki uma na wan tumusi aparti fasi fu meki den pramisi fu en kon tru. Fu eksempre, Yoèl 2:28, 29 ben taki na fesi dati mansma nanga umasma, yonguwan nanga owruwan ben o kisi santa yeye èn den ben o prati a bun nyunsu fu a Kownukondre. A profeititori dati bigin kon tru na a Pinksterfesa 33 G.T. (Tori fu den Apostel 2:1-4, 16-18). Sonwan fu den uma di ben salfu nanga santa yeye, ben kisi a krakti fu man du aparti sani, soleki fu taki profeititori (Tori fu den  Apostel 21:8, 9). Den getrow sisa disi ben de leki wan bigi grupu fu fetiman na yeye fasi. Den ben e du a preikiwroko fayafaya èn na so wan fasi den ben yepi fu panya a Kresten bribi esi-esi na furu presi na ini a fosi yarihondro. Fu taki en leti, na a ten fu 60 G.T., na apostel Paulus ben skrifi taki a bun nyunsu „ben preiki gi ala sma na ondro hemel”.​—Kolosesma 1:23.

Den kisi prèise fu di den ben abi deki-ati, faya, nanga switifasi

4. Fu san ede Paulus ben abi leti fu prèise wan tu uma fu a Kresten gemeente na ini a fosi yarihondro?

⁴ Na apostel Paulus ben de wan fu den sma di ben e warderi a preikiwroko di son uma spesrutu ben e du. Na ini a ten disi sosrefi, Kresten opziener e warderi a preikiwroko di den uma e du fayafaya. Wan tu uma di Paulus ben kari na den nen ben de ’Trifeina nanga Trifosa, umasma di e wroko tranga gi Masra’, nanga ’Persis, a lobiwan fu wi, bika a ben wroko furu ini Masra’ (Romesma 16:12). Paulus ben skrifi tu taki Eodia nanga Sentike ben „strei sei na sei nanga [en] gi a bun nyunsu” (Filipisma 4:2, 3). Preskela nanga en masra Akwila ben e wroko makandra nanga Paulus tu. Preskela nanga Akwila „ben tyari den eigi libi kon ini kefar” fu yepi Paulus, èn dati meki Paulus skrifi: „A no mi wawan, ma ala den gemeente fu den trakondre sma e taigi den tangi.”​—Romesma 16:3, 4; Tori fu den Apostel 18:2.

5, 6. Na sortu fasi Preskela na wan moi eksempre gi sisa na ini a ten disi?

⁵ San ben meki taki Preskela ben abi so wan faya nanga deki-ati? Tori fu den Apostel 18:24-26 e tyari a tori disi kon na krin. Drape wi e leisi taki Preskela ben horibaka gi en masra di ben e yepi Apolos, wan bun takiman, fu kon frustan den nyun tori fu waarheid di ben kon na krin. Soleki fa a sori, dan Preskela ben de wan fayafaya studenti fu Gado Wortu èn fu den leri fu den apostel. Leki bakapisi fu dati, a ben kon kisi tumusi moi fasi di ben meki a tron wan warti sma gi Yehovah èn gi en masra, èn a ben de wan bigi yepi sosrefi na ini a fosi Kresten gemeente. Na so den furu Kresten sisa di e wroko tranga na ini a ten disi, na warti sma sosrefi. Den e studeri Bijbel fayafaya èn den e teki a yeye nyanyan di Yehovah e gi nanga yepi fu a „getrow basya”.​—Lukas 12:42.

⁶ Akwila nanga Preskela ben sori switifasi trutru fu di den ben lobi fu teki sma na den oso. Paulus ben e tan na den oso, aladi a ben e wroko makandra nanga den fu meki tenti fu seri na ini Korente (Tori fu den Apostel 18:1-3). Di a trowpaar disi froisi go na Efeise èn baka dati na Rome, dan den tan sori Kresten switifasi gi fisitiman èn den ben gi a gemeente na okasi srefi fu hori konmakandra na ini na oso fu den (Tori fu den Apostel 18:18, 19; 1 Korentesma 16:8, 19). Nimfa nanga Maria, a mama fu Yohanes Markus, ben du a srefi sani tu fu di den gi a gemeente okasi fu hori konmakandra na ini na oso fu den.​—Tori fu den Apostel 12:12; Kolosesma 4:15.

Uma di de wan bigi yepi na ini a ten disi

7, 8. Sortu bun nen furu Kresten uma abi fu di den e du santa diniwroko na ini a ten disi? Sortu dyaranti den abi?

⁷ Neleki fa a ben de na ini a fosi yarihondro, na so a de tu na ini a ten disi, taki getrow Kresten uma de prenspari fu meki den pramisi fu Gado kon tru, spesrutu na ini a preikiwroko. Den uma disi abi wan bun nen fu tru! Luku na eksempre fu Gwen di dini Yehovah na wan getrow fasi moro leki 50 yari teleki a kon lasi libi na ini 2002. En masra e taki: „Ala sma na ini a foto pe wi ben e tan ben sabi Gwen leki wan fayafaya preikiman. A ben e si ibri libisma leki wan sma di ben kan nyan bun fu a lobi fu Yehovah èn fu den sani di A pramisi. A ben de getrow na Gado, na en organisâsi, èn na wi osofamiri. Na wan lobi-ati fasi a ben tan gi wi deki-ati te wi ben e firi brokosaka. Ala den sani disi ben de wan bigi yepi gi mi nanga den pikin fu wi na ini a moi èn switi libi di wi ben abi makandra. Wi e misi en trutru.” Gwen nanga en masra ben trow 61 yari langa.

⁸ Tin dusundusun Kresten uma di trow èn trawan di no trow, e dini leki pionier nanga zendeling. Den sisa disi de tevrede nanga den sani di den abi fanowdu na ini den aladei libi, aladi den  e prati a Kownukondre boskopu na furu difrenti presi, fu bigi foto pe furu sma e libi te go miti farawe presi pe wanwan sma nomo e libi (Tori fu den Apostel 1:8). Furu fu den bosroiti fu no abi wan oso fu densrefi èn fu no kisi pikin, so taki den man du moro na ini a diniwroko fu Yehovah. Na wan getrow fasi, sonwan fu den e horibaka gi a masra fu den, so taki a masra kan dini leki opziener di e reis. Dusundusun tra sisa e dini na den Bethel-oso na heri grontapu. A no de fu taki dati den uma disi di gi densrefi fu dini Gado, de sosrefi na mindri „den warti sani fu ala den pipel” di e furu na oso fu Yehovah nanga glori.​—Hagai 2:7.

9, 10. Fa memre fu difrenti osofamiri sori taki den e warderi a moi eksempre di Kresten wefi nanga mama e gi?

⁹ A tru taki furu Kresten uma abi fu sorgu gi na osofamiri fu den; ma toku den e poti Kownukondre afersi na a fosi presi na ini den libi (Mateyus 6:33). Wan pionier sisa di no trow ben skrifi: „Wan fu den prenspari reide fu san ede mi tron wan pionier na fu di mi mama abi wan tranga bribi èn a de wan moi eksempre gi mi. Fu taki en leti, a ben de wan fu den moro bun pionier patna di mi ben abi.” Wan masra e taki disi fu en wefi di de mama fu feifi umapikin di gro kon bigi kaba: „Ala ten na oso fu wi ben krin èn ala sani ben seti moi. Mi wefi, Bonnie, no ben poti tumusi furu pranpran na ini na oso, ma soso wan tu sani nomo so taki wi osofamiri ben man poti ala prakseri na yeye afersi. Bonnie ben sabi seti moni tori tu. Dati meki 32 yari langa, mi ben e wroko wan tu dei na ini a wiki nomo, so taki mi ben kan gi moro ten na wi osofamiri èn na yeye afersi. A wefi fu mi leri den pikin tu o prenspari a de fu wroko tranga. Soso prèise mi man prèise en.” Now, a masra disi nanga en wefi e dini na a edekantoro fu Yehovah Kotoigi.

¹⁰ Wan masra e skrifi fu en wefi, wan mama fu tu pikin di gro kon bigi kaba: „Den moro moi sani di mi lobi fu Susan na taki a abi trutru lobi gi Gado èn gi tra sma. Boiti dati, a e hori tra sma na prakseri, a e firi gi sma, èn a de opregti trutru. Ala ten a feni taki wi musu gi Yehovah den moro bun sani di wi abi; disi na wan prenspari sani di a e suku fu du na ini en libi leki futuboi fu Gado èn leki mama.” Fu di Susan horibaka gi en masra, meki en masra ben man teki wan tu frantwortu na en tapu na ini a gemeente. A e dini leki owruman, leki pionier, a e teki presi gi a kringopziener, èn a de wan memre fu na Ati-oso Kontakti Komte. Iya, den sortu uma disi de warti sma trutru gi a masra fu den, gi tra Kresten, èn spesrutu gi Yehovah!​—Odo 31:28, 30.

Warti uma di no abi masra

11. (a) Fa Yehovah sori taki a wani dati ala sani e waka bun nanga getrow uma, spesrutu nanga weduwe? (b) Sortu dyaranti Kresten weduwe nanga tra getrow sisa di no abi masra, kan abi?

¹¹ Furu tron, Yehovah sori taki a wani dati ala sani e waka bun nanga weduwe (Deuteronomium 27:19; Psalm 68:5; Yesaya 10:1, 2). A no kenki. A e tan poti furu prakseri na weduwe èn na mama di no abi masra. A e poti prakseri sosrefi na uma di bosroiti fu no trow èn uma di no feni wan bun Kresten masra ete (Maleaki 3:6; Yakobus 1:27). Efu yu na wan fu den uma di e dini Yehovah na wan getrow fasi sondro taki wan Kresten patna e horibaka gi yu, dan yu kan abi a dyaranti taki yu de wan warti sma ini Gado ai.

12. (a) Fa son Kresten sisa e sori taki den de getrow na Yehovah? (b) Nanga sortu firi son sisa fu wi e feti?

¹² Luku fu eksempre wi getrow Kresten sisa di  no trow bika den e gi yesi na a rai fu Yehovah fu trow „soso na ini Masra” (1 Korentesma 7:39; Odo 3:1). Gado Wortu e gi den a dyaranti: „Nanga wan sma di de loyaal, [Yehovah] sa handri na wan loyaal fasi” (2 Samuel 22:26). Ma toku a no makriki gi furu fu den fu tan sondro fu trow. Wan sisa e taki: „Mi teki a bosroiti fu trow soso na ini Masra, ma mi krei furu tron te mi ben e si fa den mati fu mi trow nanga bun Kresten man, aladi mi de mi wawan ete.” Wan tra sisa e taki: „Mi dini Yehovah 25 yari kaba. Mi abi a fasti bosroiti fu tan getrow na en, ma furu tron mi e firi sari fu di mi wawan de.” A e taki moro fara: „Sisa leki mi e angri fu kisi deki-ati fu trawan.” Fa wi kan yepi den getrow sisa disi?

13. (a) San wi e leri fu na eksempre fu den wan di ben e fisiti na umapikin fu Yefta? (b) Na sortu tra fasi wi kan sori taki wi e broko wi ede nanga den sisa na ini wi gemeente di no trow?

¹³ Wan fasi fa wi kan yepi den de fu si na ini wan eksempre fu owruten. Di na umapikin fu Yefta teki a bosroiti fu no trow so taki a ben man gi ensrefi fu dini Yehovah, dan a pipel ben frustan taki so wan bosroiti no ben de wan makriki sani fu du. San den ben du fu gi en deki-ati? „Ibri yari den umapikin fu Israel ben abi a gwenti fu go prèise na umapikin fu Yefta, a Gileadsma, fo dei na ini a yari” (Krutuman 11:30-40). Nanga wi heri ati, wi sosrefi musu prèise den sisa di no trow èn di e tan gi yesi na a wet fu Gado. * San na wan tra fasi fa wi kan sori taki wi e broko wi ede nanga den? Wi kan aksi Yehovah na ini begi fu yepi den lobi sisa disi, so taki den kan tan du a diniwroko fu den na wan getrow fasi. Den abi reti fu sabi taki Yehovah nanga a heri Kresten gemeente lobi den èn e warderi den trutru.​—Psalm 37:28.

Fa mama di no abi masra kan abi bun bakapisi

14, 15. (a) Fu san ede Kresten mama di no abi masra musu aksi Yehovah fu yepi den? (b) Fa mama di no abi masra kan handri akruderi den begi fu den?

¹⁴ Kresten uma di musu sorgu den pikin den wawan, e kisi fu du nanga furu problema. Ma toku, den kan aksi Yehovah fu yepi den fu kweki den pikin akruderi Bijbel gronprakseri. A tru, taki efu yu wawan musu kweki den pikin, dan yu no sa man yepi den nanga ala sani. Ma toku, efu yu abi bribi èn efu yu e aksi Yehovah fu yepi yu, dan yu o si taki Yehovah sa yepi yu trutru fu man tyari den furu frantwortu di yu abi. Fu gi yu wan eksempre: Prakseri taki yu abi wan hebi tas nanga nyanyan sani di yu bai na wenkri, èn yu abi fu tyari en go na yu kamra di de omeni sodro hei. Yu ben o feti e kren omeni trapu, aladi wan lift de krosibei di kan tyari yu go na sodro? Kwetikweti! Na a srefi fasi, te yu abi problema di e gi yu furu broko-ede, dan no pruberi fu tyari den yu wawan, ma aksi Yehovah fu yepi yu. Fu taki en leti, ensrefi e gi yu a kari fu suku yepi na en. Psalm 68:19 e taki: „Blesi fu Yehovah, di e tyari a  lai gi wi ala dei.” Na ini 1 Petrus 5:7 sosrefi, yu e kisi a kari fu trowe ala yu broko-ede tapu Yehovah, ’bika a e sorgu gi yu’. Sobun, te problema nanga broko-ede de leki wan hebi gi yu, dan trowe den hebi dati tapu yu hemel Tata èn du dati „doronomo”.​—1 Tesalonikasma 5:17; Psalm 18:6; 55:22.

¹⁵ Fu eksempre, efu yu na wan mama, dan a no de fu taki dati yu e broko yu ede nanga a krakti di den pikin na skoro kan abi tapu den pikin fu yu, noso den tesi di den pikin fu yu kan kisi fu di den e tyari densrefi na wan reti fasi (1 Korentesma 15:33). Yu abi leti fu broko yu ede. Ma yu kan begi fu den sortu sani disi tu. Fu taki en leti, fosi den pikin fu yu e go na skoro, dan yu kan begi makandra nanga den fu den sortu sani disi. Kande yu kan du disi baka te unu luku a deitekst makandra. Te yu e begi, dan du disi nanga yu heri ati èn taki fu spesrutu sani, bika dati kan abi furu krakti tapu a denki fu den pikin fu yu. Wan moro moi sani, na taki yu sa kisi blesi fu Yehovah te yu abi pasensi èn te yu e teki ten fu poti en Wortu na ini na ati fu den pikin fu yu (Deuteronomium 6:6, 7; Odo 22:6). Memre taki „den ai fu Yehovah de na tapu den regtfardikiwan, èn den yesi fu en e arki den tranga begi fu den”.​—1 Petrus 3:12; Filipisma 4:6, 7.

16, 17. (a) San wan manpikin taki fu a lobi di en mama sori? (b) Fa a fasi fa a mama ben e si yeye afersi ben abi krakti tapu den pikin fu en?

¹⁶ Luku na eksempre fu Olivia, wan mama di abi siksi pikin. Syatu baka di a meki a lasti pikin, en masra di no de na bribi, gowe libi na osofamiri. Toku, Olivia teki a frantwortu fu kweki den pikin soleki fa Gado wani. Darren, a manpikin fu Olivia, abi 31 yari now, èn a e dini leki owruman nanga pionier. A ben abi sowan 5 yari di en papa gowe libi den. Boiti den broko-ede fu sorgu na osofamiri, Olivia ben kisi ete wan tra problema fu di Darren ben kon kisi wan seryusu siki di e trobi en te now ete. Nanga en pikin-nengreten na prakseri, Darren e skrifi: „Mi kan memre ete fa mi ben sidon na ati-oso e wakti mi mama. Mi ben e angri fu si en. Ala dei a ben abi a gwenti fu kon sidon na mi sei èn fu leisi Bijbel gi mi. Baka dati a ben e singi a Kownukondre singi, ’Grantangi Yehovah’. * Te na a dei fu tide, mi lobi a singi dati moro leki iniwan fu den tra Kownukondre singi.”

¹⁷ Fu di Olivia frutrow tapu Yehovah èn fu di a lobi en trutru, meki a kisi bun bakapisi leki wan mama di no abi masra (Odo 3:5, 6). A moi fasi fa a tyari ensrefi ben de fu si na den marki di a ben poti gi en pikin. „Ala ten mi mama ben gi wi deki-ati fu poti leki marki fu go du furuten diniwroko”, na so Darren e taki. „Leki bakapisi fu dati, fo fu den feifi sisa fu mi e du furuten diniwroko. Ma toku, noiti mi mama no meki bigi fu  a sani disi. Mi e du ala muiti fu de leki en.” A tru taki a no ala pikin de leki den di fu Olivia di gro kon tron bigisma di e dini Gado te now ete. Ma te wan mama e du muiti fu libi akruderi Bijbel gronprakseri, dan a kan abi a dyaranti taki Yehovah sa yepi en èn a sa horibaka gi en na wan lobi-ati fasi.​—Psalm 32:8.

18. Fa wi kan sori taki wi e warderi a Kresten gemeente di Yehovah e gebroiki fu yepi wi?

¹⁸ Furu tron, Gado e horibaka gi wi nanga yepi fu a Kresten gemeente di e gi yeye nyanyan doronomo. Boiti dati, a e gebroiki den Kresten brada nanga sisa, èn den „presenti ini libisma” di lepi na yeye fasi (Efeisesma 4:8). Getrow owruman e wroko tranga fu gi ala sma na ini a gemeente deki-ati, aladi den e meki muiti spesrutu fu yepi „sma di de na nowtu, dati wani taki fu sorgu gi pikin di no abi papa nanga mama moro èn gi uma di den masra dede kaba” (Yakobus 1:27). Sobun, tan krosibei fu Gado pipel, no gowe libi den so taki yu kon de yu wawan.​—Odo 18:1; Romesma 14:7.

Sakafasi​—Wan tumusi moi fasi fu abi

19. Fu san ede a wefi no lagi moro en masra te a e saka ensrefi na en ondro? Sortu eksempre fu Bijbel e horibaka gi disi?

¹⁹ Yehovah ben meki na uma fu fiti na a man (Genesis 2:18). Fu dati ede, te a wefi e saka ensrefi na ondro en masra, dan dati no wani taki dati a lagi moro en. Na presi fu dati, a seti disi e gi na uma grani fu di a e gi en pasi fu gebroiki den koni di a abi, soleki fa Gado wani. Odo kapitel 31 e taki fu furu difrenti sani di wan bun wefi fu owruten Israel ben e du. A ben e yepi den wan di de na nowtu, a ben e prani droifidyari, èn a ben e bai gron. Iya, ’na ati fu en eiginari ben poti frutrow na ini en, èn wini no ben e mankeri’.​—Vers 11, 16, 20.

20. (a) Fa wan Kresten uma musu si den koni di Gado gi en? (b) Sortu moi fasi Ester ben abi, èn fa Yehovah ben man gebroiki en fu dati ede?

²⁰ Wan uma di abi sakafasi èn di abi frede gi Gado no e opo ensrefi teige en masra èn a no e strei nanga en masra tu (Odo 16:18). A no e suku fu plisi ensrefi fu di a e feti baka grontapu sani. Ma na presi fu dati, a e gebroiki den koni di Gado gi en, funamku fu yepi trawan, soleki en osofamiri, tra Kresten, birtisma, èn spesrutu fu du a wani fu Yehovah (Galasiasma 6:10; Titus 2:3-5). Luku a Bijbel eksempre fu Ester, a wefi fu wan kownu. Aladi a ben moi srefisrefi, toku a no ben abi bigifasi èn a ben saka ensrefi na ondro en masra (Ester 2:13, 15). Di Ester trow, a ben de heri tra fasi leki Vasti, a wefi di Kownu Ahasferos ben abi fosi. Ester ben sori dipi lespeki gi en masra (Ester 1:10-12; 2:16, 17). Srefi baka di Ester tron a wefi fu a kownu, a ben e arki na wan lespeki fasi fa en neef Mordekai, di ben owru moro en, ben e denki fu son tori. Ma dati no wani taki dati Ester ben e frede sma! Sondro frede a ben tyari kon na krin dati Haman, wan ogri-ati man di ben abi furu makti, ben wani kiri ala Dyu. Na wan aparti fasi Yehovah gebroiki Ester fu kibri a libi fu En pipel.​—Ester 3:8–4:17; 7:1-10; 9:13.

21. Fa wan Kresten uma kan tron wan moro warti sma gi Yehovah?

²¹ A de krin taki na ini owruten èn sosrefi na ini a ten disi, uma di frede Gado sori taki den gi den heri libi na Yehovah èn na a anbegi fu en. Fu dati ede, uma di e frede Gado de warti sma ini Yehovah ai. Kresten sisa, meki Yehovah gebroiki en santa yeye fu kenki unu kon tron wan moro bun „prapi” di de „srekasreka gi ibri bun wroko” (2 Timoteyus 2:21; Romesma 12:2). Gado Wortu e taki fu den warti anbegiman disi: „Gi en fu a froktu fu en anu, èn meki den wroko fu en prèise en, srefi na den portu” (Odo 31:31). Meki dati de so nanga ibriwan fu unu.

[Futuwortu]

Yu e memre disi ete?

• Fa son Kresten uma fu a fosi yarihondro sori taki den ben de warti sma ini Yehovah ai?

• Fa furu sisa na ini a ten disi meki densrefi tron warti sma gi Gado?

• Na sortu fasi Yehovah e horibaka gi mama nanga tra sisa di no abi masra?

• Fa wan uma kan sori taki a e lespeki a seti taki a man na a edeman fu na osofamiri?

[Aksi fu a tori disi]

[Faki na tapu bladzijde 17]

DENKI DIPI FU DEN EKSEMPRE DISI

Yu wani luku ete wan tu eksempre fu getrow uma di Bijbel e kari na den nen? Efu yu wani, dan grantangi leisi den tekst di kari na ondrosei. Te yu e denki dipi fu den difrenti uma di kari dyaso, dan pruberi fu si gronprakseri di yu kan gebroiki moro bun na ini yu libi.​—Romesma 15:4.

◆ Sara: Genesis 12:1, 5; 13:18a; 21:9-12; 1 Petrus 3:5, 6.

◆ Israel uma di ben lobi fu gi sani: Exodus 35:5, 22, 25, 26; 36:3-7; Lukas 21:1-4.

◆ Debora: Krutuman 4:1–5:31.

◆ Rut: Rut 1:4, 5, 16, 17; 2:2, 3, 11-13; 4:15.

◆ Na uma fu Sunem: 2 Kownu 4:8-37.

◆ A Fenisia uma: Mateyus 15:22-28.

◆ Marta nanga Maria: Markus 14:3-9; Lukas 10:38-42; Yohanes 11:17-29; 12:1-8.

◆ Tabita: Tori fu den Apostel 9:36-41.

◆ Den fo umapikin fu Filipus: Tori fu den Apostel 21:9.

◆ Feibe: Romesma 16:1, 2.

[Prenki na tapu bladzijde 15]

Yu e prèise getrow sisa di no trow èn di e tan gi yesi na a wet fu Gado?

[Prenki na tapu bladzijde 16]

Fu sortu spesrutu sani yu kan taki na ini begi fosi den pikin e go na skoro?