Ondrofenitori

Mi kisi leri fu Yehovah sensi mi yongu yari

SOLEKI FA RICHARD ABRAHAMSON FRUTERI

„Ke Gado, yu leri mi fu sensi mi yongu yari, èn te nanga now mi e tan fruteri fu den moi wroko fu yu.” Meki mi fruteri fu san ede den wortu fu Psalm 71:17 wani taki furu gi mi.

NA INI 1924, mi mama, Fannie Abrahamson, ben miti den Bijbel Ondrosukuman, soleki fa sma ben kari Yehovah Kotoigi na ini a ten dati. Mi ben abi wán yari nomo na a pisi ten dati. Aladi mi mama ben e leri a waarheid fu Bijbel, a bigin go na den birtisma fu fruteri den san a ben e leri. A ben e leri mi, mi bigi brada nanga mi bigi sisa sosrefi. Bifo mi ben man leisi, a ben yepi mi fu hori furu bijbeltekst na ede di e taki fu den blesi di Gado Kownukondre sa tyari.

Mi gebore èn mi gro kon bigi na ini a foto La Grande, na ini a distrikt Oregon, na Amerkankondre. Na ini den yari baka 1920, a grupu fu Bijbel Ondrosukuman na ini a foto disi, ben abi soso wan tu uma nanga pikin. Aladi a grupu fu wi ben de farawe, toku den pelgrim, noso opziener di e reis ben kon fisiti wi wan noso tu leisi wan yari. Den brada disi ben hori lezing di ben gi wi deki-ati, den ben go makandra nanga wi na ini na oso-fu-oso wroko, èn den ben sori switifasi gi pikin-nengre. Wan tu fu den lobi brada disi ben de Shield Toutjian, Gene Orrell, nanga John Booth.

Na ini 1931, nowan fu wi ben man go na a kongres na Columbus, na ini Ohio, pe den Bijbel Ondrosukuman ben teki a nen Yehovah Kotoigi. Den kompani, soleki fa wi ben kari den gemeente na a ten dati, nanga den grupu di ben de farawe, no ben man de na a kongres. Dati meki den ben kon makandra na ini augustus na wan presi na ini a birti drape fu teki a prenspari bosroiti taki den ben o teki a nen disi. A pikin grupu fu wi na ini La Grande ben teki a nen disi. Baka dati, na ini 1933 wan spesrutu wroko ben de fu prati a pikin buku De Crisis. Mi ben hori wan Bijbel takimakandra na  ede èn fu a fosi tron mi wawan ben gi kotoigi oso fu oso.

Na ini den yari baka 1930, sma ben gens a wroko fu wi moro nanga moro. Fu man kakafutu gi a sani dati, dan den kompani ben prati na ini pikin grupu di ben hori pikin konmakandra. Wán, noso tu leisi wan yari den grupu disi ben go na ini wan spesrutu sortu preikiwroko di wi ben kari grupu preikiwroko. Na den konmakandra disi wi ben kisi leri fa wi ben kan preiki na difrenti fasi èn wi ben leri fa fu handri na wan lespeki fasi nanga den skowtu te den ben o hori wi. Nofo tron den Kotoigi ben musu go na fesi skowtu krutu, noso na fesi krutubangi. Fu man sabi san wi ben musu taki, dan wi ben leri den sani di skrifi na ini wan papira di ben nen Order of Trial. Disi ben meki taki wi ben de srekasreka te wi ben kisi gens.

Mi ben kon lobi a waarheid fu Bijbel sensi mi ben yongu

Safrisafri mi kon frustan èn warderi a waarheid fu Bijbel nanga a howpu di Bijbel e gi fu libi fu têgo na grontapu na ondro a tiri fu a Kownukondre fu Gado na hemel. Na ini a ten dati wi no ben kisi a deki-ati fu dopu, boiti efu wan sma ben abi a howpu fu go na hemel fu tiri nanga Krestes (Openbaring 5:10; 14:1, 3). Ma toku mi ben kisi a deki-ati taki efu mi ben bosroiti na ini mi ati fu du a wani fu Yehovah, dan a ben o fiti fu teki dopu. Sobun mi teki dopu na ini augustus 1933.

Di mi ben abi 12 yari, a skoromisi fu mi ben si taki mi ben man taki bun na publiki. Fu dati ede a ben aksi mi mama fu seti sani so taki mi ben kan kisi moro leri fa fu taki moro bun na publiki. Mi mama ben denki taki disi ben kan yepi mi fu du mi diniwroko gi Yehovah moro bun. Wan yari langa, a ben wasi den krosi fu a misi di ben leri mi fu taki moro bun, èn na so a ben pai gi a leri di mi ben kisi. A leri di mi kisi ben yepi mi na ini mi diniwroko. Di mi ben abi 14 yari, mi ben kisi reuma èn moro leki wan yari langa mi no ben man go na skoro.

Na ini 1939, wan furuten dinari di nen Warren Henschel ben kon na a kontren fu wi. * A ben de leki wan bigi brada gi mi na yeye fasi, èn heri dei a ben tyari mi go na ini a preikiwroko. Syatu baka dati a yepi mi fu bigin na ini a fakansi pionierwroko. Disi ben de wan fasi fu du furuten diniwroko fu wan syatu pisi ten nomo. Na ini a waran pisi ten fu a yari dati, a grupu fu wi ben tron wan kompani. Warren ben dini leki fesiman opziener èn mi ben de a fesiman fu a Waktitoren-studie. Mi ben dini leki fesiman opziener di Warren gowe fu go dini na Bethel, na a internationaal edekantoro fu Yehovah Kotoigi na ini Brooklyn, New York.

Mi bigin nanga a furuten diniwroko

Di mi kisi moro frantwortu leki fesiman opziener, dan dati gi mi moro deki-ati fu go na ini a gewoon pionierwroko. Sobun, di mi ben abi 17 yari èn mi ben kaba nanga a di fu dri klas fu middelbaar skoro, dan mi go na ini a gewoon pionierwroko. Mi papa no ben abi a srefi bribi leki wi, ma a ben sorgu bun gi na osofamiri fu wi èn a ben de wan man di ben hori ensrefi na hei gronprakseri. A ben wani taki mi ben musu go na hei skoro. Ma a ben taki dati mi kan du san mi wani solanga a no abi fu gi mi moni fu pai gi wan presi fu tan èn fu bai nyanyan sani. Sobun mi bigin nanga a pionierwroko tapu 1 september 1940.

Di mi ben o gowe fu oso, dan mi mama meki  mi leisi Odo 3:5, 6: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti.” Fu tru, mi kisi furu wini fu di mi frutrow tapu Yehovah ala ten.

Syatu baka dati, mi go makandra nanga Joe nanga Margaret Hart fu du diniwroko na mindri fu a noordsei pisi fu a foto Washington. Difrenti sani ben de fu feni na ini a kontren drape. Bigi pisi gron ben de drape pe sma ben e kweki kaw nanga skapu. Boiti dati, presi ben de di ben de spesrutu gi den ingi, èn furu pikinpikin foto nanga dorpu ben de tu. Bifo a waran pisi ten fu a yari 1941, mi kisi a wroko fu dini leki fesiman opziener na ini a gemeente na Wenatchee, na ini Washington.

Na tapu wan fu den konmakandra fu wi na ini a foto Walla Walla, na ini Washington, mi ben dini leki dienst-yepiman èn mi ben musu gi den sma di ben kon na ini a zaal wan switikon. Mi ben si fa wan yongu brada no ben man sreka a geluid, aladi a ben e meki muiti fu du dati. Fu dati ede mi taigi en taki mi o du a wroko fu en èn dan en ben kan du a wroko fu mi. Di a regionaal dinari, Albert Hoffman, kon baka èn a si taki mi no ben du a wroko di mi kisi fu du, dan nanga switifasi a sori mi o prenspari a de fu du a wroko di mi ben kisi, teleki mi kisi wan tra wroko fu du. Sensi a ten dati mi tan memre a rai fu en.

Na ini augustus 1941, Yehovah Kotoigi sreka sani fu hori wan bigi kongres na Sint Louis, na ini Missouri. Joe nanga Margaret Hart ben poti wan daki na a baki fu a truck fu den èn den poti bangi na inisei. Ala nanga ala wi ben de nanga neigi pionier, èn wi ben rei 2400 kilometer na ini a truck dati fu go na Sint Louis. A ben teki so wan wiki fu doro drape èn sosrefi wan wiki fu drai kon baka. Skowtu ben taki dati sowan 115.000 sma ben de na a kongres. Aladi a kan taki so furu sma no ben de drape, toku a nomru fu sma ben musu de moro leki den 65.000 Kotoigi di ben de na ini Amerkankondre na a pisi ten dati. A kongres ben gi wi trutru deki-ati na yeye fasi.

Mi e go dini na Bethel na ini Brooklyn

Di mi ben doro baka na Wenatchee, mi kisi wan brifi pe mi kisi a kari fu go dini na Bethel na ini Brooklyn. Di mi doro drape tapu 27 oktober 1941, dan den brada tyari mi go na a kantoro fu Nathan H. Knorr. A brada disi ben de na opziener fu a wrokopresi pe den buku ben e meki. Na wan switi fasi a fruteri mi fa sani e du na Bethel èn a sori mi taki a de prenspari fu tan abi wan bun banti nanga Yehovah efu mi wani abi wan koloku libi drape. Baka dati, den brada tyari mi go na a presi pe den e seni den publikâsi gowe. Drape mi ben musu tai den dosu di ben abi publikâsi na ini, so taki den ben kan seni den gowe.

Tapu 8 yanuari 1942, Joseph Rutherford dede. A brada disi ben teki fesi na ini a wroko fu Yehovah Kotoigi di e du na heri grontapu. Baka feifi dei, den driktoro fu a Genootschap ben teki Brada Knorr fu du a wroko disi go doro. W. E. Van Amburgh, di ben wroko wan langa pisi ten kaba leki sekretarsi na a kantoro fu a Genootschap di e sorgu gi moni afersi, ben meki a sani disi bekènti na a Bethelfamiri. A ben taki: „Mi kan memre di C. T. Russell dede [na ini 1916] èn di J. F. Rutherford kon na ini en presi. Masra ben tan go doro fu tiri a wroko fu En èn a wroko ben go na fesi. Now,  mi de seiker taki a wroko sa go na fesi nanga Nathan H. Knorr leki presidenti, fu di a de a wroko fu Masra, a no de a wroko fu libisma.”

Na ini februari 1942, a nyun Theokrasia Diniwroko-skoro ben o bigin. A skoro disi ben de spesrutu fu leri den sma na Bethel fa den man ondrosuku sani moro bun na ini Bijbel, fa den man orga ala den pisi fu wan tori, èn fa den man tyari dati kon na krin gi trawan na wan bun fasi. Fu di mi ben kisi leri kaba fa fu taki na publiki, meki heri esi mi ben go na fesi tapu a skoro disi.

No langa baka dati, mi ben kisi a wroko fu go dini na a Dienst Afdeling pe den e luku a diniwroko fu Yehovah Kotoigi na ini Amerkankondre. Na ini a srefi yari dati, den brada bigin baka nanga wan seti di ben de fosi kaba. Den dinari ben musu go fisiti den gemeente fu Kotoigi. Fosi, den ben kari den brada disi ’dinari fu den brada’. Baka wan pisi ten den kon kisi a nen kringopziener. Na ini a waran pisi ten fu a yari 1942, sani ben seti na Bethel fu leri brada fa den kan du a sortu diniwroko disi. Mi ben abi a grani fu de wan fu den brada disi di ben kisi leri. Wan sani di mi man memre heri bun na san Brada Knorr, di ben de wan fu den leriman, ben taigi wi. A ben sori wi wan prenspari penti, namku: „No pruberi fu plisi libisma. Efu yu e du dati, dan yu sa si taki te fu kaba, yu sa plisi nowan sma te fu kaba. Plisi Yehovah, èn yu sa plisi ala sma di lobi Yehovah.”

Den brada ben bigin nanga a seti fu a kringwroko na ini oktober 1942. Sonwan fu wi na Bethel ben du a wroko disi tapu satra nanga sonde èn wi ben fisiti den gemeente di no ben de moro fara leki 400 kilometer fu New York City. Wi ben luku tapu den raportu fu den gemeente fa den ben du na ini a preikiwroko èn omeni sma ben e kon na den konmakandra. Wi ben hori konmakandra nanga den wan di ben abi frantwortu na ini a gemeente, wi ben hori wán noso tu lezing, èn wi ben go na ini a preikiwroko nanga den Kotoigi fu a gemeente.

Na ini 1944, mi ben de wan fu den brada fu a Dienst Afdeling di ben seni go na ini a kringwroko fu wan pisi ten fu siksi mun. Mi ben go na den distrikt Delaware, Maryland, Pennsylvania, nanga Virginia. Bakaten mi ben fisiti den gemeente na ini Connecticut, Massachusetts, nanga Rhode Island gi wan tu mun. Di mi drai go baka na Bethel, mi ben wroko afudei na ini a kantoro makandra nanga Brada Knorr nanga en sekretarsi Milton Henschel. Drape mi kon sabi fa a wroko fu wi na heri grontapu e du. Mi ben wroko sosrefi afudei na a kantoro fu a Genootschap di e sorgu gi moni afersi. A brada di ben abi a frantwortu drape ben de W. E. Van Amburgh èn Grant Suiter ben yepi en. Baka dati, na ini 1946, mi kisi a frantwortu fu wan tu kantoro na Bethel.

Bigi kenki na ini mi libi

Di mi ben fisiti den gemeente na ini 1945, mi kon sabi Julia Charnauskas na ini a foto Providence, na Rhode Island. Na mindri fu a yari 1947 wi ben wani trow. Mi ben lobi a Bethel diniwroko trutru, ma na a ten dati sani no ben seti so, taki yu ben kan tyari a trowpatna fu yu fu kon dini drape tu. Sobun, na ini yanuari 1948 mi ben gowe fu Bethel èn mi nanga Julia (mi e kari en Julie) trow. Mi ben feni wan afudei wroko na ini wan wenkri na ini Providence, èn wi bigin pionier makandra.

Na ini september 1949, mi kisi a kari fu du a kringwroko na noord-westsei fu Wisconsin. Disi ben de wan bigi kenki gi mi nanga Julie, fu di wi ben musu preiki moro furu na ini pikin foto nanga boitipresi pe sma e meki èn e seri sani fu merki, soleki botro nanga kasi. A kowru pisi ten fu a yari ben tan langa èn a ben kowru srefisrefi. Boiti dati, furu wiki langa a ben kowru moro leki -20 graden Celsius, èn furu snew ben fadon. Wi no ben abi wan oto. Ma ala ten sani ben seti so taki wan sma ben kan rei wi nanga oto go na a tra gemeente.

Syatu baka di mi bigin nanga a kringwroko, wi ben abi wan kring konmakandra. Mi kan memre ete fa mi ben luku finifini efu den brada ben du ala den sani na a kring konmakandra na wan bun fasi. Ma disi ben meki taki den brada ben e senwe-senwe pikinso. Sobun a distriktopziener, Nicholas Kovalak, taigi mi na wan switi fasi taki den brada drape ben sabi fa den e seti den eigi sani gi a kring konmakandra, èn taki mi no abi fu pruberi fu du ala sani finifini. Sensi a ten dati, a rai disi yepi mi na ini difrenti sortu diniwroko di mi du.

Na ini 1950, mi kisi wan wroko di mi ben musu du fu wan syatu pisi ten nomo. Mi ben abi a frantwortu fu sorgu gi sribipresi gi den sma di ben kisi wan kari fu kon na a fosiwan fu den furu bigi kongres  di wi ben hori na ini a Yankee Stadium na New York City. A kongres ben de wan prisiri sani trutru, fu a bigin te na a kaba. Sma ben kon fu 67 kondre èn a moro hei nomru fu sma di ben de drape, ben de wan heimarki fu 123.707! Baka a kongres, dan mi nanga Julie go baka na ini a kringwroko. Wi ben de koloku na ini a kringwroko. Ma wi ben feni taki wi musu gi wisrefi fu du iniwan sortu fasi fu furuten diniwroko. Sobun, ibri yari wi ben gi wi nen fu go na Bethel èn fu go na ini a zendelingwroko. Na ini 1952 wi ben prisiri di wi kisi a kari fu go na a di fu 20 klas fu a Waktitoren Bijbelskoro Gilead. Drape wi ben kisi leri fa fu du a zendelingwroko.

Wi e go dini na tra kondre

Di wi kaba nanga a skoro na ini 1953, dan wi ben kisi a wroko fu go dini na Ingrisikondre. Drape mi ben du a distriktwroko na a zuidsei fu Ingrisikondre. Mi nanga Julie ben prisiri trutru fu du a distriktwroko. Ma wi no ben du a wroko disi wan yari ete, di wi ben kisi a kari fu go dini na Deinsikondre, èn wi ben fruwondru srefisrefi fu disi. Wan nyun opziener ben de fanowdu di ben musu luku a wroko na a bijkantoro fu Deinsikondre. Fu di mi ben de na ini Ingrisikondre di de krosibei fu Deinsikondre, èn mi ben kisi leri na ini Brooklyn fa fu du a wroko disi, meki den seni mi go fu yepi den brada drape. Wi ben go nanga boto na Bakrakondre, èn fu drape wi go nanga wan loko na Kopenhagen, na ini Deinsikondre. Wi doro drape tapu 9 augustus 1954.

Wan fu den problema di ben musu lusu drape, na taki wan tu brada di ben abi frantwortu no ben wani teki a tiri fu na edekantoro na ini Brooklyn. Sosrefi, dri fu den fo sma di ben vertaal den publikâsi fu wi na ini Deinsitongo, ben gowe fu Bethel. Te fu kaba den dri sma disi no ben wani sabi noti moro fu Yehovah Kotoigi. Ma Yehovah  ben piki den begi fu wi. Tu pionier, Jørgen nanga Anna Larsen, di ben du vertaalwroko fu wan syatu pisi ten, ben gi densrefi fu du a wroko disi. Na so fasi wi ben kan go doro fu vertaal ala den tijdschrift fu wi na ini Deinsitongo, sondro taki wan tijdschrift ben misi fu vertaal. Te now ete Jørgen nanga Anna de na Bethel na ini Deinsikondre, èn Jørgen e dini now leki fesiman fu a Bijkantoro Komte.

Wan sani di ben gi wi deki-ati trutru na ini den yari dati, na taki Brada Knorr ben fisiti wi doronomo. A ben teki en ten fu sidon taki nanga ibri sma, èn a ben fruteri ondrofenitori di ben meki wi kon frustan fa wi ben man lusu den problema. Na wan fu den fisiti fu en na ini 1955, a bosroiti ben teki taki wi musu bow wan nyun bijkantoro nanga wan presi pe wi ben man meki tijdschrift gi Deinsikondre. Wi ben bai wan gron na wan boitipresi, noordsei fu Kopenhagen èn na ini a waran pisi ten fu a yari 1957 wi froisi go na ini a nyun gebow. Di Harry Johnson nanga en wefi Karin ben kaba nanga a di fu 26 klas fu Gilead, den go na Deinsikondre. Den no ben de drape so langa ete di den yepi wi fu seti sani na a presi pe wi ben meki buku, so taki wi ben kan bigin meki den publikâsi.

Wi ben orga sani moro bun fu hori bigi kongres na ini Deinsikondre, èn san ben yepi tu na taki mi ben sabi fa fu orga sani fu di mi ben du dati kaba na den kongres na ini Amerkankondre. Na ini 1961 wi ben hori wan bigi internationaal kongres na ini Kopenhagen pe sma ben kon fu moro leki 30 kondre. A heimarki fu sma di ben de na a kongres ben de 33.513. Na ini 1969, wi ben hori a moro bigi kongres na ini Scandinavia, èn a moro hei nomru fu sma di ben de na a kongres ben de 42.073!

Na ini 1963, mi kisi a kari fu go na a di fu 38 klas fu Gilead. A skoro disi ben teki tin mun langa èn a ben de spesrutu fu gi leri na sma di e wroko na den bijkantoro. A ben de wan prisiri sani fu de baka nanga a Bethelfamiri na ini Brooklyn èn fu kisi deki-ati fu den ondrofenitori fu den sma di wroko drape furu yari langa fu sorgu gi den afersi na a edekantoro.

Baka a skoro disi, mi drai go baka na Deinsikondre fu go doro nanga den frantwortu di mi ben abi drape. Boiti dati, mi kisi a grani fu dini leki zone opziener. Mi ben fisiti difrenti bijkantoro na a westsei nanga a noordsei fu Europa fu gi den sma di e wroko drape deki-ati èn fu yepi den so taki den kan du den wroko moro bun. No so langa pasa, mi ben du a wroko disi na West Afrika nanga den Kribisi èilanti.

Na ini den yari baka 1970, den brada fu Deinsikondre bigin suku wan moro bigi presi pe den ben kan du moro vertaalwroko èn pe den ben kan meki moro publikâsi. Den ben feni wan moi pisi gron di de sowan 60 kilometer na a westsei fu Kopenhagen. Makandra nanga trawan, mi ben yepi fu teken èn seti a nyun presi disi. Mi nanga Julie ben wani srefisrefi fu go tan na a moi nyun presi disi makandra nanga a Bethelfamiri. Ma sani no ben go soleki fa wi ben fruwakti.

Wi e drai go baka na Brooklyn

Na ini november 1980, mi nanga Julie kisi a kari fu go na Bethel na ini Brooklyn fu go dini drape. Wi ben doro drape na a bigin fu yanuari 1981. Na a ten dati wi ben abi moro leki 55 yari. A no ben makriki gi wi fu gowe libi den lobi brada nanga sisa fu wi na ini Deinsikondre èn fu drai go baka na Amerkankondre, fu di wi ben dini pikinmoro afu fu wi libiyari drape. Ma wi no ben tan poti prakseri na pe wi ben wani libi. Na presi fu dati, wi ben pruberi fu poti prakseri na a nyun wroko èn den nyun tyalensi di wi ben o kisi.

Wi doro na Brooklyn èn wi seti ala den sani fu wi. Julie ben kisi a srefi sortu wroko di a ben du na ini Deinsikondre, namku fu skrifi den sani di abi fu du nanga moni afersi. Mi ben go wroko na  a Skrifiman Afdeling pe mi ben yepi fu poti tapu schema sortu publikâsi o tyari kon na doro. Syatu baka 1980, bigi kenki kon na a fasi fa wi ben e wroko na Brooklyn. Wi no ben gebroiki skrifimasyin moro èn wi no ben e meki den publikâsi moro nanga plaat di ben meki fu loto. Ma now wi ben e gebroiki computer nanga kefalek masyin fu meki den publikâsi. Mi no ben sabi nowan sani fu computer, ma mi ben sabi pikinso fa fu orga sani èn fa fu wroko nanga sma.

Syatu baka dati, moro sma ben de fanowdu na a presi pe wi e sreka den fowtow nanga prenki gi buku nanga tijdschrift. Disi wi ben musu du, fu di wi bigin meki den publikâsi nanga prenki èn nanga fowtow di abi kloru. Aladi mi no ben sabi fa fu meki den moi prenki nanga fowtow, toku mi ben man yepi fu orga sani. Sobun, neigi yari langa mi ben abi a grani fu abi a frantwortu na a presi dati.

Na ini 1992, mi kisi a frantwortu fu yepi na a Uitgevers Komte fu a Tiri Skin èn mi ben go wroko na a kantoro di e sorgu gi moni afersi. Te now ete mi e dini drape èn mi e luku den sani di abi fu du nanga den moni afersi fu Yehovah Kotoigi.

Mi e du diniwroko sensi mi yongu yari

Nanga pasensi Yehovah gi mi leri sensi mi yongu yari. A tan gi mi leri na ini ala den 70 yari di mi gi misrefi fu du diniwroko gi en. A du dati nanga yepi fu en Wortu, Bijbel èn nanga yepi fu brada di de na ini a kefalek moi organisâsi fu En. Mi nyan bun fu den moro leki 63 yari di mi de na ini a furuten diniwroko, èn moro leki 55 yari fu a ten dati mi de nanga mi getrow wefi Julie. Fu tru, mi e firi taki Yehovah blesi mi trutru.

Na ini 1940, di mi ben gowe libi oso fu go na ini a pionierwroko, dan mi papa ben spotu mi fu di mi teki so wan bosroiti. A ben taki: „Mi boi, te yu e gowe fu oso fu go du disi, dan no denki taki yu kan kon baka fu suku yepi na mi.” Na ini ala den yari dati, noiti mi ben abi fu du dati. Na wan switi fasi Yehovah ben sorgu gi den sani di mi ben abi fanowdu, èn furu tron a ben du dati nanga yepi fu wi Kresten brada nanga sisa. Bakaten, mi papa ben kon kisi lespeki gi a wroko fu wi, èn a ben meki muiti srefi fu leri a waarheid fu Bijbel bifo a dede na ini 1972. Mi mama di ben abi a howpu fu libi na ini hemel, ben tan go doro fu dini Yehovah na wan getrow fasi teleki a dede na ini 1985, di a ben abi 102 yari.

Aladi wi ben kisi problema na ini a furuten diniwroko, toku mi nanga Julie noiti ben prakseri fu libi a wroko di wi kisi fu du. Ala ten Yehovah ben horibaka gi a bosroiti di wi teki fu tan go doro nanga a diniwroko. Srefi di mi papa nanga mama ben kon owru èn di den ben abi yepi fanowdu, dan mi sisa, Victoria Marlin, ben teki a frantwortu na en tapu èn nanga switifasi a sorgu gi den. Wi de nanga tangi na ati fu di a yepi den na wan lobi-ati fasi. Na so wi ben man tan go doro nanga a furuten diniwroko.

Julie tan horibaka gi mi na ini ala den wroko di wi ben du, fu di a ben si disi leki wan pisi fu a gi di a gi ensrefi abra na Yehovah. Aladi mi abi 80 yari now èn mi abi wan tu problema nanga mi gosontu, toku mi e firi taki Yehovah blesi mi trutru. Mi kisi furu deki-ati fu a psalm skrifiman. Baka di a ben taki fa Gado leri en sensi en yongu yari, a ben begi en taki: ’Srefi teleki mi kon owru, ke Gado, no gowe libi mi, teleki mi kan fruteri den sma di sa kon ete fu a makti fu yu.’​—Psalm 71:17, 18.

[Futuwortu]

[Prenki na tapu bladzijde 20]

Nanga mi mama na ini 1940, di mi bigin pionier

[Prenki na tapu bladzijde 21]

Makandra nanga Joe nanga Margaret, nanga suma mi ben pionier

[Prenki na tapu bladzijde 23]

Tapu a trowdei fu wi na ini yanuari 1948

[Prenki na tapu bladzijde 23]

Na ini 1953, makandra nanga den sma di ben de na ini a klas fu wi na Gilead. Fu a kruktu-anusei go na leti-anusei: Don nanga Virginia Ward, Geertruida Stegenga, Julie, nanga mi

[Prenki na tapu bladzijde 23]

Na ini 1961, nanga Frederick W. Franz nanga Nathan H. Knorr na Kopenhagen, na ini Deinsikondre

[Prenki na tapu bladzijde 25]

Nanga Julie now