Sma de di wi kan frutrow?

BAKA di a Skotu fu Berlijn ben fadon na ini 1989, dan wan lo kibritori di furu sma no ben sabi ete, kon na krin. Fu gi wan eksempre, Lydia * ben kon sabi taki na ini a pisi ten fu a Socialisme na ini Owstu Doisrikondre, dan a Stasi, wan spesrutu grupu fu skowtu, ben abi wan buku pe den ben skrifi ala den inibere tori fu en. Lydia ben fruwondru di a yere fu a buku disi, ma a ben skreki srefisrefi di a kon sabi suma ben fruteri a Stasi ala den sani dati. Lydia en eigi masra ben du dati, a sma di a ben musu man frutrow dorodoro.

Robert ben de wan owru man di ben „abi kefalek furu lespeki nanga warderi” gi en datra, èn a ben e „frutrow en srefisrefi”, na so a koranti The Times fu London ben skrifi. Sma taki dati a datra ben abi „lobi nanga switifasi”. Ne Robert dede wantronso. A ben siki na en ati? Noso na wan berurtu a kisi? Nôno. Ondrosukuman kon frustan taki a datra ben kon luku Robert na en oso, èn sondro taki Robert noso en famiri ben sabi, dan a datra ben gi en wan spoiti di kiri en. Soleki fa a sori, dan a datra di kiri en ben de wan sma di Robert ben e frutrow dorodoro.

Lydia nanga Robert ondrofeni takru bakapisi fu di den ben poti frutrow na ini sma di no ben de fu frutrow. A no ala leisi wan sma e ondrofeni den sortu takru bakapisi disi. Toku a e pasa furu tron taki sma e du sani nanga wi di e meki taki wi no e frutrow den moro. Wan barinen organisâsi na ini Doisrikondre di e ondrosuku sani, ben aksi sma efu oiti wan mati di den ben e frutrow ben meki den fesi fadon, noso ben du wan hati sani nanga den. Na ini a buku Allensbacher Jahrbuch der Demoskopie 1998-2002, den sori taki a sani dati pasa nanga 86 procent fu den sma di den ben aksi. Kande yusrefi ondrofeni wan srefi sortu sani. Dati meki a no musu fruwondru wi taki a koranti Neue Zürcher Zeitung fu Switserland ben taki na ini 2002 dati „na ini den gudu Westsei kondre, a de so furu yari kaba taki sma no e frutrow makandra moro”.

A e teki ten fosi wi frutrow wan sma, ma wi kan lasi a frutrow dati wantronso

San na frutrow? Soleki fa wan wortubuku e taki, dan frutrow wani taki „fu bribi taki sma de opregti, taki den no sa lei gi yu, èn taki den no sa du wan sani fu espresi di e hati yu”. A e teki ten fosi wi frutrow wan sma, ma wi kan lasi a frutrow dati wantronso. Furu sma ben ondrofeni kaba taki trawan di den ben e frutrow ben du sani di hati den. Dati meki wi no musu fruwondru taki sma e frede fu frutrow trawan. Wan ondrosuku di ben tyari kon na doro na Doisrikondre na ini 2002 ben sori taki „moro mendri leki 1 fu ibri 3 yongusma e frutrow tra sma”.

Wi kan aksi wisrefi: ’Wi kan frutrow sma trutru? A bun fu frutrow trawan, aladi wi sabi taki den kan du wan sani di e hati wi?’

[Futuwortu]

[Prenspari pisi na tapu bladzijde 3]

Wan ondrosuku ben tyari kon na krin taki 86 procent fu den sma di den ben aksi wan tu sani, ben ondrofeni taki sma di den ben e frutrow ben du wan hati sani nanga den