Uma di prisiri na ati fu Yehovah

„Meki Yehovah blesi yu fu a fasi fa yu e tyari yusrefi, èn yu musu kisi wan tumusi bun pai fu Yehovah.”​—RUT 2:12.

1, 2. Sortu wini wi kan kisi te wi e prakseri fu den Bijbel eksempre fu uma di prisiri na ati fu Yehovah?

FU DI tu uma ben e frede Gado, meki den weigri fu gi yesi na wan Farao. Fu di wan huru-uma ben abi bribi, meki a poti en libi na ini kefar fu kibri tu spion fu Israel. Fu di wan uma sori koni nanga sakafasi na ini wan muilek situwâsi, meki a ben man kibri a libi fu furu sma èn a ben man tapu a salfuwan fu Yehovah fu no kisi brudu-paiman. Fu di wan weduwe di ben de mama fu wan boi, ben abi bribi na ini Yehovah Gado, èn fu di a ben lobi fu teki sma na en oso, meki a gi wan profeiti fu Gado a lasti nyanyan di a ben abi. Disi na wan tu fu den furu eksempre na ini Bijbel fu uma di prisiri na ati fu Yehovah.

² A fasi fa Yehovah ben handri nanga den sortu uma disi èn den blesi di a ben gi den, e sori san na a moro prenspari sani di e plisi en, namku a yeyefasi fu wan sma, awinsi na wan man noso wan uma. Na ini a grontapu disi, sma e poti ala den prakseri na densrefi èn na gudu wawan. Fu dati ede a de wan tyalensi fu poti yeye afersi na a fosi presi na ini wi libi. Ma neleki den milyunmilyun uma di e frede Gado èn di de wan bigi pisi fu a pipel fu Gado na ini a ten disi, na so wisrefi kan poti yeye afersi na a fosi presi na ini wi libi tu. Den sortu Kresten uma disi e sori bribi, den e handri nanga koni, den lobi fu teki sma na den oso, èn den abi tra moi fasi tu neleki den uma fu san Bijbel e taki dati den ben e frede Gado. A no de fu taki dati Kresten mansma sosrefi, wani sori den srefi fasi leki den uma fu owruten di de wan bun eksempre. Fu kon sabi fa wi kan sori den fasi disi moro bun, dan meki wi luku moro fini san Bijbel e fruteri fu den uma di wi ben taki fu den na a bigin.​—Romesma 15:4; Yakobus 4:8.

Uma di ben weigri fu gi yesi na wan Farao

3, 4. (a) Fu san ede Sifra nanga Pua weigri fu gi yesi na Farao di a gi den a komando fu kiri ibri nyun-gebore manpikin fu Israel? (b) Fa Yehovah blesi den tu uma disi fu di den ben sori deki-ati nanga frede gi En?

³ Syatu baka a di fu Tu Grontapufeti, dan wan tu krutu ben hori na ini Neurenberg na Doisrikondre fu strafu den wan di ben kiri ipi-ipi sma na ini a feti dati. Furu fu den sma di ben kisi strafu ben taki dati den no ben abi fowtu, bika den feni taki den ben du den ogri-ati sani dati soso fu di den ben kisi a komando fu du so. Ma agersi den sma disi now nanga tu Israel uma, Sifra nanga Pua. Den tu uma disi ben e libi na ini owruten Egepte èn den ben abi a wroko fu yepi uma di de fu meki pikin. Na a ten dati, wan ogri-ati Farao ben de tiriman fu Egepte, ma Bijbel no e kari a nen fu en. Fu di a Farao disi ben frede taki den Hebrewsma ben o kon moro furu leki den Egeptesma, meki a gi Sifra nanga Pua a komando fu kiri ibri nyun-gebore Hebrew manpikin. San den uma du di den kisi na ogri-ati komando dati? „Den no ben du san a kownu fu Egepte ben taigi den, ma den ben meki den manpikin tan na libi.” Fu san ede den uma disi no ben frede Farao? Fu di den „ben frede a tru Gado”.​—Exodus 1:15, 17; Genesis 9:6.

⁴ Iya, den uma disi ben suku kibri na Yehovah, èn Yehovah fu en sei, ben kon de leki „wan skelt” gi den fu di a kibri den gi na atibron fu Farao (2 Samuel 22:31; Exodus 1:18-20). Ma dati no ben de a wan-enkri fasi fa Yehovah blesi den. A blesi Sifra nanga Pua fu di den ala tu ben kon kisi wan osofamiri fu densrefi. Boiti dati, Yehovah gi den uma disi grani tu fu di a meki sma  skrifi na ini en Wortu fa den uma ben nen èn san den ben du. Na so fasi, milyunmilyun sma di ben o gebore bakaten ben o man leisi fu den uma disi, ma a nen fu a Farao lasi gowe krinkrin.​—Exodus 1:21; 1 Samuel 2:30b; Odo 10:7.

5. Fa furu Kresten uma na ini a ten disi sori taki den de leki Sifra nanga Pua, èn fa Yehovah sa blesi den?

⁵ Uma leki Sifra nanga Pua de na ini a ten disi? Iya, den de! Ibri yari, furu fu den sortu uma disi e preiki a Bijbel boskopu di e kibri sma libi. Sondro fu frede, den e preiki na ini kondre pe „a komando fu a kownu” no e gi den pasi fu du dati. Toku den e tan preiki, awinsi den kan go na strafu-oso èn lasi den libi srefi (Hebrewsma 11:23; Tori fu den Apostel 5:28, 29). Fu di den deki-ati uma disi lobi Gado nanga tra sma, meki nowan sma kan tapu den fu prati a bun nyunsu fu Gado Kownukondre nanga trawan. Fu dati ede, furu Kresten uma e kisi gens nanga frufolgu (Markus 12:30, 31; 13:9-13). Neleki fa Yehovah ben si ala san Sifra nanga Pua ben du, na so a e si ala san den bun uma na ini a ten disi e du èn fa den e sori deki-ati. Yehovah sa sori taki a lobi den fu di a sa poti a nen fu den na ini en „buku fu libi”, èn a o tan drape solanga den horidoro te na a kaba.​—Filipisma 4:3; Mateyus 24:13.

Wan uma di ben e huru fosi, prisiri na ati fu Yehovah

6, 7. (a) San Rakab ben sabi fu Yehovah nanga en pipel, èn sortu krakti a sabi disi ben abi na en tapu? (b) Fa Gado Wortu e gi grani na Rakab?

⁶ Na ini a yari 1473 b.G.T., wan huru-uma di ben nen Rakab ben libi na ini a foto Yeriko, na ini a kondre Kanan. Soleki fa a sori, dan Rakab ben sabi furu tori. Di tu spion fu Israel ben kon suku kibri na en oso, dan Rakab ben man fruteri den fa Israel ben kon fri fu katibo na ini Egepte na wan wondru fasi. Rakab ben sabi a tori disi finifini aladi a sani dati ben pasa sowan 40 yari na fesi kaba! A ben sabi tu taki no so langa pasa, Israel ben wini den kownu fu den Amorietsma, namku Sihon nanga Og. Luku sortu krakti den tori disi ben abi na en tapu. A taigi den spion: „Mi sabi seiker taki Yehovah sa gi unu a kondre, . . . bika Yehovah, un Gado, na Gado na ini hemel na loktu èn na grontapu na ondro” (Yosua 2:1, 9-11). Iya, di Rakab yere fu Yehovah èn fu den sani di Yehovah ben du gi Israel, dan dati ben naki en ati èn a kon kisi bribi na ini en.​—Romesma 10:10.

 ⁷ A bribi fu Rakab ben gi en deki-ati fu du wan sani. „Nanga vrede” a teki den spion kon na ini en oso èn a ben du san den spion taigi en so taki a ben kan kisi frulusu te Israel ben o kon feti nanga Yeriko (Hebrewsma 11:31; Yosua 2:18-21). Wi kan de seiker taki den sani di Rakab du fu sori taki a ben abi bribi, ben prisiri na ati fu Yehovah, bika Yehovah ben meki a Kresten disipel Yakobus skrifi a nen fu Rakab na ini Bijbel, makandra nanga a di fu Abraham, a mati fu Gado, so taki Kresten ben kan teki en leki eksempre. Yakobus skrifi: „Na so a de tu di a huru-uma Rakab ben teki den boskopuman na ini en oso, èn a ben meki den waka wan tra pasi gowe. Fu di Rakab du disi, meki Gado taki dati a ben de wan regtfardiki sma tu, a no so?”​—Yakobus 2:25.

8. Fa Yehovah blesi Rakab fu di a ben sori bribi èn ben gi yesi na En?

⁸ Yehovah ben blesi Rakab na difrenti fasi. Wan fasi, na taki Yehovah ben du wan wondru fu kibri a libi fu Rakab nanga di fu ala den sma di ben kon suku kibri na Rakab oso, namku „na osofamiri fu en papa nanga ala den sma fu en”. Baka dati, Yehovah gi den pasi fu tan „na mindri Israel” èn den Israelsma ben musu si den leki den eigi kondreman (Yosua 2:13; 6:22-25; Lefitikus 19:33, 34). Ma Rakab ben kisi moro blesi. Yehovah ben gi Rakab a grani sosrefi fu tron wan afo fu Yesus Krestes. Dati na wan heri moi fasi fa Yehovah sori lobi bun-ati gi wan Kanan uma di ben e anbegi falsi gado fosi! *​—Psalm 130:3, 4.

9. Fa son uma na ini a ten disi kan kisi deki-ati fu a fasi fa Yehovah handri nanga Rakab èn nanga son Kresten uma fu a fosi yarihondro?

⁹ Sensi a fosi yarihondro te na ini a ten disi, son Kresten uma de leki Rakab fu di den tapu nanga a hurulibi di den ben e libi, so taki den kan plisi Gado (1 Korentesma 6:9-11). A no de fu taki dati sonwan fu den gro kon bigi na wan presi di de leki Kanan fu owruten, pe hurudu ben lai èn pe sma ben e si dati leki wan aladei sani srefi. Ma toku, a bribi di den uma disi kon kisi fu di den teki soifri sabi fu Bijbel, meki taki den kenki a libi fu den (Romesma 10:17). Fu dati ede, wi kan taki fu den uma disi taki „Gado no e syen te den e kari en a Gado fu den” (Hebrewsma 11:16). Dati na wan bigi grani trutru!

Wan uma di kisi blesi fu di a ben handri nanga koni

10, 11. San ben pasa na mindri Nabal nanga David, di meki taki Abigaèl teki a bosroiti fu du wan sani?

¹⁰ Furu getrow uma fu owruten ben sori a koni fu den na wan tumusi moi fasi. Dati meki den ben de warti sma gi a pipel fu Yehovah. Wan fu den uma disi ben de Abigaèl, a wefi fu a gudu Israelman Nabal di ben abi furu gron. Fu di Abigaèl ben handri nanga koni, meki a ben man kibri a libi fu furu sma, èn a ben man tapu David, di ben o tron kownu fu Israel, fu no kisi brudu-paiman. Wi kan leisi a tori fu Abigaèl na ini 1 Samuel kapitel 25.

¹¹ A tori e bigin so: David nanga den bakaman fu en seti kampu krosibei pe den skapu fu Nabal de, èn fu di Nabal na wan Israelsma leki densrefi, meki den e luku den skapu fu en dei nanga neti. Nabal no e pai den fu du dati, sobun  na bun-ati fu den meki den e luku den skapu. Te a nyanyan fu David e kaba, dan a e seni tin yongu man go na Nabal fu aksi en nyanyan. Now Nabal e kisi na okasi fu sori warderi gi san David du èn a e kisi na okasi sosrefi fu gi David grani leki a salfuwan fu Yehovah. Ma Nabal no e du dati srefisrefi. Nanga bigi atibron a e kosi David èn a e seni den yongu man gowe nanga leigi anu. Te David yere san pasa, dan a e tyari 400 fetiman kon na wán fu go feti nanga Nabal. Abigaèl e yere fu na ogri-ati sani di a masra fu en du èn esi-esi a e seti sani na wan koni fasi fu kowru na atibron fu David. A e seni furu nyanyan gi David, èn baka dati ensrefi e go na David.​—Vers 2-20.

12, 13. (a) Fa Abigaèl sori taki a koni, èn taki a de getrow sosrefi na Yehovah èn na en salfuwan? (b) San Abigaèl du di a drai kon na oso baka, èn fa sani waka moro fara nanga en?

¹² Te Abigaèl e miti David, dan nanga sakafasi a e aksi David pardon èn na so fasi a e sori taki a abi dipi lespeki gi a salfuwan fu Yehovah. „Sondro misi Yehovah sa meki wan oso di e tan gi mi masra, bika mi masra e feti den orloku fu Yehovah”, na so Abigaèl e taki, èn a e taki tu dati Yehovah sa poti David leki fesiman fu Israel (Vers 28-30). Na a srefi ten, Abigaèl e sori furu deki-ati fu di a e taigi David dati efu a no man hori ensrefi, dan na atibron fu en sa meki a kisi brudu-paiman (Vers 26, 31). A sakafasi, a dipi lespeki, nanga a krin denki fu Abigaèl e meki David kisi ensrefi. David e piki en: „Blesi fu Yehovah, a Gado fu Israel, di seni yu kon fu miti mi a dei disi! Blesi fu a koni fasi fa yu tyari yusrefi, èn blesi fu yu, di hori mi a dei disi fu no kisi brudu-paiman.”​—Vers 32, 33.

¹³ Te Abigaèl e drai go na oso baka, dan a e teki deki-ati fu taigi en masra taki a gi David nyanyan. Ma te a e feni en masra, dan ’a drungu te a no man drungu moro’. Sobun, Abigaèl e wakti teleki en masra de nanga krin frustan, dan a e taigi en masra san a du. Fa Nabal e teki a tori disi? A e skreki so te taki a no man du noti moro; a kan taki a kon lan srefi. Tin dei na baka, Gado e meki Nabal dede. Te David e yere taki Nabal dede, dan a e aksi Abigaèl fu trow nanga en fu di a lobi Abigaèl trutru èn fu di a abi bigi lespeki gi en. Abigaèl e agri fu trow nanga David.​—Vers 34-42.

Yu kan de leki Abigaèl?

14. Sortuwan fu den fasi fu Abigaèl wi ben sa wani sori moro bun?

¹⁴ Yu e si wan tu fasi fu Abigaèl di yu leki mansma noso umasma wani sori moro bun? Kande yu wani handri nanga moro koni te problema e kon. Noso kande yu wani taki na wan korostu èn koni fasi na ini situwâsi pe trawan e bruya. We, efu yu wani dati, dan fu san ede yu no e taki nanga Yehovah fu a tori disi? Yehovah pramisi fu gi koni, sabi, nanga krin frustan na ala sma di e „tan aksi na ini bribi”.​—Yakobus 1:5, 6; Odo 2:1-6, 10, 11.

15. Spesrutu na ini sortu situwâsi a de prenspari gi Kresten uma fu sori den fasi fu Abigaèl?

¹⁵ A de prenspari taki wan uma sori den moi fasi fu Abigaèl, spesrutu efu a abi wan masra di no de na bribi èn di no e broko en ede tumusi nanga Bijbel gronprakseri. Kande a masra e dringi pasa marki. Wi howpu taki den sortu masra disi sa kenki den fasi fu den. Furu masra kenki fu di a wefi fu den sori switifasi nanga bigi lespeki gi den, èn fu di a wefi tyari ensrefi na wan krin fasi.​—1 Petrus 3:1, 2, 4.

16. Awinsi fa a situwâsi de na oso, toku wan Kresten sisa kan sori taki a banti di a abi nanga Yehovah na a moro prenspari sani gi en. Fa a kan du dati?

¹⁶ Awinsi sortu problema yu abi na oso, memre taki ala ten Yehovah de klariklari fu horibaka gi yu (1 Petrus 3:12). Sobun, meki muiti fu kon tranga na yeye fasi. Begi fu kisi koni nanga wan korostu ati. Iya, kon kisi wan moro krosibei banti nanga Yehovah. Yu kan du dati te yu e studeri Bijbel doronomo, te yu e begi, te yu e denki dipi fu san yu leri, èn te yu abi demakandra nanga tra Kresten. Aladi a masra fu Abigaèl no ben e si sani soleki fa Gado e si sani, toku Abigaèl tan lobi Gado èn a tan lespeki a salfu futuboi fu En. A ben e handri akruderi regtfardiki markitiki. Srefi na ini wan osofamiri pe a masra na wan getrow futuboi fu Gado, wan Kresten wefi e frustan taki ensrefi abi fu du furu muiti fu kon tranga èn fu tan  tranga na yeye fasi. A tru taki Bijbel e taki dati a masra abi a frantwortu fu sorgu gi en wefi na yeye fasi èn na skin fasi, ma te fu kaba, na a wefi srefi abi fu tan wroko gi en „eigi frulusu nanga frede èn nanga beifi”.​—Filipisma 2:12; 1 Timoteyus 5:8.

A ben kisi ’a blesi fu wan profeiti’

17, 18. (a) Sortu aparti tesi a weduwe fu Sarfat ben kisi tapu a bribi fu en? (b) San a weduwe disi du di Elia aksi en wan sani, èn fa Yehovah blesi en fu a sani di a ben du?

¹⁷ A fasi fa Yehovah sorgu wan pôti weduwe na ini a ten fu a profeiti Elia, e sori taki A e warderi en trutru te sma e gebroiki a krakti nanga den sani di den abi, fu horibaka gi a tru anbegi. Na ini den dei fu Elia, dreiten ben hori fu wan langa pisi ten èn leki bakapisi fu dati furu sma ben de nanga angri. A srefi sani disi ben miti wan weduwe nanga en manpikin di ben e libi na ini a foto Sarfat. Leti na a momenti di den ben de fu nyan a lasti nyanyan di den ben abi, dan wan fisitiman kon. A ben de a profeiti Elia. A aksi a weduwe wan tumusi aparti sani. Aladi Elia ben sabi na ini sortu problema na uma disi ben de, toku a aksi na uma fu baka „wan pikin lontu kuku” gi en, nanga a lasti blon nanga oli di na uma disi ben abi. Ma Elia taki tu: „Bika disi na san Yehovah, a Gado fu Israel taki: ’A bigi watrakan nanga blon srefi no sa kon drei, èn a pikin watrakan nanga oli srefi no sa kon leigi teleki a dei di Yehovah sa gi wan tranga alen na tapu a gron.’”​—1 Kownu 17:8-14.

¹⁸ San yu ben o du efu wan sma ben aksi yu so wan aparti sani? Soleki fa a sori, dan a weduwe fu Sarfat ben sabi taki Elia ben de a profeiti fu Yehovah, sobun „a du soleki fa Elia taki”. San Yehovah du fu di na uma disi du bun gi Elia? Na wan wondru fasi Yehovah ben sorgu taki na uma, en manpikin, nanga Elia ben abi nyanyan na ini a dreiten (1 Kownu 17:15, 16). Iya, Yehovah ben gi a weduwe fu Sarfat ’a blesi fu wan profeiti’, aladi a no ben de wan Israelsma (Mateyus 10:41). A Manpikin fu Gado ben prèise na uma disi tu fu di a ben gebroiki en leki wan eksempre gi den sma fu Nasaret, a foto pe a ben gro kon bigi. A ben du disi fu di den sma drape no ben abi bribi.​—Lukas 4:24-26.

19. Na sortu fasi furu Kresten uma na ini a ten disi e sori taki den abi a srefi fasi leki a weduwe fu Sarfat èn fa Yehovah e si den uma disi?

¹⁹ Na ini a ten disi, furu Kresten uma abi a srefi fasi leki a weduwe fu Sarfat. Fu eksempre, ibri wiki, Kresten sisa e opo den doro gi opziener di e reis nanga a wefi fu den. Furu fu den sisa disi pôti èn musu sorgu gi na osofamiri fu den, ma toku den e du ala san den man fu yepi trawan. Tra sisa e kari furuten dinari fu kon nyan nanga  den, den e yepi sma di de na nowtu, noso na tra fasi den e gebroiki a krakti fu den nanga den sani di den abi fu horibaka gi a Kownukondre wroko (Lukas 21:4). Yehovah e si ala den sani di den e du? Seiker! „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den.”​—Hebrewsma 6:10.

20. San wi sa luku na ini na artikel di e kon?

²⁰ Na ini a fosi yarihondro, furu uma di ben e frede Gado ben abi a grani fu yepi Yesus nanga den apostel fu en. Na ini na artikel di e kon wi sa si fa den uma disi ben prisiri na ati fu Yehovah, èn wi sa luku eksempre fu uma na ini a ten disi di e dini Yehovah nanga den heri ati, srefi na ini muilek situwâsi.

[Futuwortu]

Luku baka san wi leri

• Fa den uma di kari dyaso ben prisiri na ati fu Yehovah?

• Sifra nanga Pua

• Rakab

• Abigaèl

• A weduwe fu Sarfat

• Fa wi kan kisi wini te wi e denki dipi fu den eksempre di den uma disi gi? Gi wan eksempre.

[Aksi fu a tori disi]

[Prenki na tapu bladzijde 9]

Furu getrow uma tan dini Gado aladi „a komando fu a kownu” ben taki dati den no musu du dati

[Prenki na tapu bladzijde 10]

Fu san ede Rakab na wan moi eksempre fu wan sma di abi bribi?

[Prenki na tapu bladzijde 10]

Sortuwan fu den fasi fu Abigaèl yu wani abi?

[Prenki na tapu bladzijde 12]

Furu Kresten uma na ini a ten disi abi a srefi fasi leki a weduwe fu Sarfat