„A Wortu fu Gado abi krakti trutru!”

„A WORTU fu Gado de libilibi èn a abi krakti” (Hebrewsma 4:12). A Kalender van Jehovah’s Getuigen 2003, e sori taki a Wortu fu Gado abi krakti trutru. A e poti prakseri na siksi ondrofenitori fu sma di e libi na difrenti kondre na grontapu. Na ondro na edeprakseri „Fosi nanga now”, a kalender e sori fa a wroko fu Yehovah Kotoigi e yepi sma fu tyari densrefi na wan krin fasi, e meki sma tapu nanga gwenti di ben e pori den libi, e tranga na osofamiri-libi fu den, èn e meki den kisi wan krosibei banti nanga Gado.

Wan tu sma ben seni brifi kon fu sori den warderi gi a kalender fu 2003. Disi na san wan tu fu den ben skrifi:

„A kalender disi na wan buweisi gi tru Kresten taki trawan de neleki den di musu feti wan tranga feti gi a bribi. Now den kan luku den fowtow, di sa yepi den fu memre den kenki di wan tu sma tyari kon na ini den eigi libi.”​—Steven fu Amerkankondre.

„Mi ben wani skrifi a syatu brifi disi nomonomo fu sori unu taki a kalender fu 2003 naki mi ati trutru. Noiti ete wan kalender ben abi so furu krakti na mi tapu. A kalender disi nanga den ondrofenitori na ini sa de wan fu den sani di mi e tyari ala ten ini mi preikiwroko tas, so taki mi kan sori sma a libilibi èn tumusi moi buweisi fu a krakti di Bijbel kan abi tapu sma.”​—Marc fu Belgia.

„A kalender naki mi ati srefisrefi. Pikinmoro mi krei, di mi leisi èn di mi kon frustan fa Yehovah kenki a libi fu den sma disi. Leki bakapisi fu dati, dan mi ben kisi a deki-ati fu tan tyari kenki kon na ini mi eigi libi. Now mi e firi trutru taki mi de wan pisi fu a bradafasi di de na heri grontapu.”​—Mary fu Amerkankondre.

„Yesus ben sari srefisrefi di a ben si taki a no ben e go so bun nanga na ipi na yeye fasi. Grantangi taki unu waka baka na eksempre fu Krestes, fu di unu poti prakseri na den ondrofenitori disi di de ini a kalender fu a yari 2003. Noiti ete ini mi libi wan kalender meki mi krei.”​—Cassandra fu Amerkankondre.

„Di mi ben abi 11 yari mi bigin smoko; bakaten mi ben e gebroiki drugs. Furu tron mi ben e prakseri fu kiri misrefi. Di mi kon leri sabi Yehovah, dan mi kisi yepi fu tapu nanga den takru gwenti dati. A kalender disi prenspari gi mi srefisrefi. Den eksempre fu den brada nanga sisa di de na heri grontapu e gi mi krakti. Now mi sabi taki a no mi wawan de ini a strei disi èn taki a moro prenspari sani na taki wi musu lobi Yehovah èn taki wi musu du a diniwroko fu en nanga wi heri ati.”​—Margaret fu Polen.

„Iya, a Wortu fu Gado abi krakti trutru! Di mi kisi a kalender fu 2003, dan mi ben musu hori misrefi fu no krei. Den ondrofenitori disi, makandra nanga den fowtow e tranga mi bribi srefisrefi.”​—Darlene fu Amerkankondre.

„A fasi fa den sma disi ben e libi fosi, gersi a fasi fa mi ben e libi fosi. Yehovah gi mi a krakti fu tapu nanga takru gwenti di mi no ben o man basi nanga mi eigi krakti. Grantangi gi den ondrofeni tori disi.”​—William fu Amerkankondre.