’Gebroiki Gado Wortu na wan reti fasi’

„Du ala san yu man fu sori yusrefi leki wan sma di Gado feni bun, wan wrokoman di no abi fu syen fu noti èn di e gebroiki a wortu fu waarheid na wan reti fasi.”​—2 TIMOTEYUS 2:15.

1, 2. (a) Fu san ede wrokoman abi wrokosani fanowdu? (b) Sortu wroko Kresten e du, èn fa den e sori taki den e suku a Kownukondre fosi?

WROKOMAN abi wrokosani fanowdu fu man du a wroko fu den. Ma dati no wani taki dati den kan gebroiki iniwan wrokosani fu du a wroko dati. Wan wrokoman abi a yoisti wrokosani fanowdu, èn a musu gebroiki en na wan reti fasi. Fu gi wan eksempre, te yu e bow wan pikin maksin, dan yu abi moro leki wan amra nanga spikri fanowdu fu man spikri tu planga kon na wan. Yu musu sabi tu fa fu naki a spikri na so wan fasi taki a no e boigi. Wan sma di no sabi fa fu gebroiki wan amra no ben o man naki wan spikri na ini wan pisi udu, èn a sma kan kisi atibron srefi fu a sani dati. Ma te wi e gebroiki wrokosani na wan reti fasi, dan wi sa man du a wroko fu wi bun.

² Wi leki Kresten abi wan wroko fu du. A wroko disi na wan tumusi prenspari wroko. Yesus Krestes ben gi den bakaman fu en deki-ati fu ’suku a kownukondre fosi’ (Mateyus 6:33). Fa wi kan du dati? Wan fasi fa wi kan du dati, na taki wi musu wroko fayafaya fu fruteri sma fu a Kownukondre, èn wi musu meki disipel. Wan tra fasi fa wi kan suku a Kownukondre, na taki a diniwroko fu wi musu abi en rutu na ini a Wortu fu Gado. A di fu dri fasi, na taki wi musu tyari wisrefi na bun fasi (Mateyus 24:14; 28:19, 20; Tori fu den Apostel 8:25; 1 Petrus 2:12). Fu man du a Kresten diniwroko disi bun èn fu man prisiri nanga a wroko dati, dan wi abi den yoisti wrokosani fanowdu èn wi musu sabi fa fu gebroiki den na wan reti fasi. Na apostel Paulus di ben de wan heri bun eksempre leki wan Kresten wrokoman e sori wi fa fu du dati, èn a ben gi tra Kresten deki-ati fu teki na eksempre fu en (1 Korentesma 11:1; 15:10). We dan, san wi kan leri fu Paulus, di ben du a srefi wroko leki wi?

Paulus ben de wan fayafaya Kownukondre preikiman

3. Fu san ede wi kan taki dati na apostel Paulus ben de wan fayafaya Kownukondre preikiman?

³ Fa Paulus ben du a wroko fu en? A no de fu taki dati a ben de wan fayafaya wrokoman. Paulus ben du ala san a ben man fu prati a bun nyunsu na bun furu kondre na ini a kontren fu a Mindrikondre Se. Na apostel disi di ben e preiki doronomo, ben sori fu san ede a ben preiki a Kownukondre so fayafaya:  „We, efu mi e preiki a bun nyunsu, dan mi no kan meki bigi fu dati, bika a plekti de na mi tapu fu du dati. Fu tru, helu fu mi efu mi no preiki a bun nyunsu!” (1 Korentesma 9:16) A de so taki Paulus ben wani kibri en eigi libi wawan? Nôno. A no ben de wan sma di ben e prakseri ensrefi nomo. Na presi fu dati, a ben wani taki tra sma ben musu kisi wini tu fu a bun nyunsu. A ben skrifi: „Mi e du ala sani gi a bun nyunsu, so taki mi kan teki prati na en nanga trawan.”​—1 Korentesma 9:23.

4. San na a moro prenspari wrokosani di Kresten wrokoman e gebroiki?

⁴ Na apostel Paulus no ben de wan wrokoman di ben denki tumusi furu fu ensrefi; a ben sabi taki a ben abi moro leki en eigi koni fanowdu fu man du a wroko. Neleki fa wan temreman abi wan amra fanowdu, na so Paulus ben abi a yoisti wrokosani fanowdu fu meki a waarheid fu Gado teki rutu na ini na ati fu den sma di ben e arki en. San ben de a moro prenspari wrokosani di a ben e gebroiki? Dati ben de Gado Wortu, den Santa Buku fu Bijbel. Wi e gebroiki Bijbel tu leki a moro prenspari wrokosani fu meki disipel.

5. Boiti taki wi e leisi noso e taki nomo san skrifi na ini Bijbel, dan san wi musu du moro fu man de bun leriman?

⁵ Paulus ben sabi taki efu a ben wani gebroiki a Wortu fu Gado na wan reti fasi, dan a ben musu du moro leki fu leisi noso fu taki nomo san skrifi na ini. Paulus ben e pruberi fu „overtoigi” sma (Tori fu den Apostel 28:23). Fa a ben du dati? Paulus ben gebroiki Bijbel na wan bun fasi fu overtoigi sma, so taki den ben kan teki a Kownukondre waarheid. A ben taki-go-taki-kon nanga den. Paulus ben de na ini a snoga na ini Efeise, pe a ben „taki nanga den sma fu pruberi fu overtoigi den taki a kownukondre fu Gado de trutru”, èn a du dati dri mun langa. A ben de so taki „wan tu fu den ben trangayesi, den no ben wani bribi”, ma trawan fu den ben arki. Paulus ben preiki na ini Efeise, èn leki bakapisi fu dati „a wortu fu Yehovah tan gro srefisrefi èn a ben tan abi furu krakti na tapu sma”.​—Tori fu den Apostel 19:8, 9, 20.

6, 7. Fa Paulus gi a diniwroko fu en glori, èn fa wi kan du dati tu?

⁶ Paulus ben de wan fayafaya Kownukondre preikiman di ben ’gi a diniwroko fu en glori’ (Romesma 11:13). Fa a ben du dati? A no ben suku biginen gi ensrefi; èn a no ben syen fu meki ala sma kon sabi en leki wan sma di ben wroko makandra nanga Gado. Na presi fu dati, a ben si a diniwroko fu en leki a moro bigi grani di a ben kan abi. Paulus ben gebroiki Gado Wortu nanga koni èn a ben abi bun bakapisi. Fu di a wroko fu en ben abi bun bakapisi, meki trawan ben kisi deki-ati fu du a diniwroko fu den moro bun. Disi na wan tra fasi fa Paulus ben gi a diniwroko fu en glori.

⁷ Neleki Paulus, wi leki preikiman kan gi a wroko fu wi glori te wi e gebroiki a Wortu fu Gado doronomo èn te wi e gebroiki en bun. Na ini ala den difrenti fasi fu preikiwroko di wi e du, wi musu suku fu prati wan sani fu Bijbel nanga so furu sma leki wi man. Fa wi kan du disi na wan fasi di sa overtoigi sma? Poti prakseri na dri prenspari fasi fa yu kan du dati: (1) Taki fu Gado Wortu na wan fasi di e meki a sma kisi lespeki gi dati. (2) Fruklari na wan lespeki fasi san Bijbel e taki, èn sori san dati abi fu du nanga a sani di yu wani leri a sma. (3) Gebroiki Bijbel fu taki-go-taki-kon nanga a sma na wan fasi di e overtoigi en.

8. Sortu wrokosani wi abi na ini a ten disi fu preiki a Kownukondre, èn fa yu gebroiki den?

⁸ Kownukondre preikiman na ini a ten disi abi wrokosani di Paulus no ben abi na a ten di a ben e du a diniwroko fu en. Den wrokosani disi na buku, tijdschrift, brochure, strooibiljet, traktaat, cassette, nanga video lolo. Na ini a yarihondro di pasa, preikiman ben e gebroiki kotoigikarta, gramofon, oto nanga boksu na tapu di ben e bari a boskopu, èn sosrefi radio programa. A no de fu taki dati Bijbel na a moro prenspari wrokosani di wi e gebroiki, èn wi musu gebroiki a warti wrokosani disi bun èn na wan fasi di fiti.

A diniwroko fu wi musu abi en rutu na ini a Wortu fu Gado

9, 10. San wi kan leri fu a rai di Paulus ben gi Timoteyus fu a fasi fa a ben musu gebroiki Gado Wortu?

⁹ Fa wi kan gebroiki Gado Wortu na wan fasi di e tyari bun bakapisi kon? Wi musu gi yesi na den wortu di Paulus ben taigi Timoteyus di ben wroko  makandra nanga en. A ben taki: „Du ala san yu man fu sori yusrefi leki wan sma di Gado feni bun, wan wrokoman di no abi fu syen fu noti èn di e gebroiki a wortu fu waarheid na wan reti fasi” (2 Timoteyus 2:15). San a wani taki fu „gebroiki a wortu fu waarheid na wan reti fasi”?

¹⁰ A Griki wortu di vertaal leki ’gebroiki na wan reti fasi’, wani taki trutru „koti langalanga”, noso „fu koti wan pasi langalanga”. A Griki wortu dati de fu feni soso na ini a pisi fu den Griki Buku fu Bijbel pe Paulus ben gi Timoteyus rai. Wi ben kan gebroiki a srefi Griki wortu dati tu te wi wani taki fu wan sma di e plugu wan pasi langalanga na ini wan gron. A ben o de wan syen trutru gi wan gronman di abi ondrofeni efu a ben plugu wan kron pasi. Paulus ben memre Timoteyus taki efu a ben wani de „wan wrokoman di no abi fu syen fu noti”, dan a no ben kan leri sma nowan enkri tra sani, leki den tru leri fu Gado Wortu nomo. Timoteyus no ben musu meki en eigi denki abi krakti tapu den sani di a ben e leri sma. Den sani di a ben e preiki èn ben e leri sma, ben musu de soifri akruderi Bijbel (2 Timoteyus 4:2-4). A sani disi ben o yepi reti-ati sma fu si sani soleki fa Yehovah e si sani, èn a ben o yepi den sosrefi fu no teki den leri noso a denki fu grontapu abra (Kolosesma 2:4, 8). Preikiman na ini a ten disi musu gi sma leri na a fasi dati tu.

Wi musu tyari wisrefi na wan bun fasi

11, 12. Fa a fasi fa wi e tyari wisrefi e yepi wi fu gebroiki a Wortu fu Gado na wan reti fasi?

¹¹ Boiti taki wi e gebroiki a Wortu fu Gado na wan reti fasi fu di wi e fruteri sma fu den tru tori na ini, wi musu du moro ete. Wi musu tyari wisrefi akruderi a Wortu disi. Fu di „wi e wroko makandra nanga Gado”, meki wi no musu de wrokoman di abi hoigrifasi (1 Korentesma 3:9). Gado Wortu e taki: „Yu di e gi trawan leri, yu no e gi yusrefi  leri dan? Yu di e preiki gi sma ’No fufuru’, yu e fufuru? Yu di e taigi sma ’No du sutadu’, yu e du sutadu? Yu di sori taki yu e teige kruktugado, yu e fufuru sani puru ini den tempel?” (Romesma 2:21, 22) Fu dati ede, wan fasi fa wi leki wrokoman fu Gado na ini a ten disi kan gebroiki a Wortu fu Gado na wan reti fasi, na te wi e gi yesi na a rai disi: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti.”​—Odo 3:5, 6.

¹² San wi kan fruwakti te wi e gebroiki a Wortu fu Gado na wan reti fasi? Luku sortu krakti a Wortu fu Gado kan abi tapu a libi fu reti-ati sma.

Gado Wortu kan kenki sma

13. San kan pasa nanga wan sma te a e du san Gado Wortu e taki?

¹³ Te sma e bribi taki a boskopu na ini Bijbel na Gado Wortu, dan a boskopu disi abi so wan bigi krakti na den tapu, taki a e yepi den fu tyari kenki kon na ini den libi. Paulus ben si san Gado wortu ben du nanga sma, èn a ben si a bun krakti di a wortu disi ben abi tapu den sma di ben tron Kresten na ini Tesalonika fu owruten. Fu dati ede a ben taigi den sma disi: „Wi e taki Gado tangi doronomo tu, bika di unu yere Gado wortu di wi fruteri unu, dan unu no ben teki a wortu leki a wortu fu libisma, ma leki a wortu fu Gado, èn na dati a de trutru; a wortu dati e wroko tu na ini unu di e bribi” (1 Tesalonikasma 2:13). Gi den Kresten dati, iya, gi ala tru bakaman fu Krestes, a pikinso koni di libisma abi na notinoti srefi te wi e gersi en nanga a kefalek bigi koni fu Gado (Yesaya 55:9). A ben de so taki ’aladi furu pina ben miti den Tesalonikasma, toku den ben teki a wortu nanga a prisiri di santa yeye e gi’, èn fu dati ede den tron eksempre gi tra bribiman.​—1 Tesalonikasma 1:5-7.

14, 15. O bigi a krakti fu a boskopu fu Gado Wortu de, èn fu san ede dati de so?

¹⁴ A Wortu fu Gado abi furu krakti, neleki a Sma di skrifi en, Yehovah. A wortu disi e komoto fu „a libi Gado”, a wan di „meki hemel nanga grontapu” fu di a ben taki so, èn a wortu dati ala ten ’abi bun bakapisi na ini san a e seni en go fu du’ (Hebrewsma 3:12; Psalm 33:6; Yesaya 55:11). Wan Bijbel sabiman ben taki: „Gado no e du sani tra fasi leki san skrifi na ini a Wortu fu en. A no e du neleki a wortu dati a no fu en, neleki a wortu no abi noti fu du nanga en. . . . Fu dati ede, ala ten te Gado e taki a wortu, a wortu dati abi krakti; bika a de na ini wánfasi nanga a libi Gado.”

¹⁵ O bigi a krakti fu a boskopu fu Gado Wortu de? A krakti fu a boskopu dati bigi srefisrefi. Paulus ben skrifi nanga leti: „A wortu fu Gado de na libi, a abi krakti èn a srapu moro wan feti-owru di e koti na tu sei; a e koti go so dipi taki a e prati sili nanga yeye srefi, èn a e prati den skrufu fu a skin nanga a bonyo fatu fu den; a man si krin san sma e prakseri èn san de ini den ati.”​—Hebrewsma 4:12.

16. Fa Gado Wortu kan kenki wan sma dorodoro?

¹⁶ A boskopu na ini Gado Wortu „srapu moro wan feti-owru di e koti na tu sei”. Fu dati ede a man boro go moro dipi leki iniwan tra wrokosani di libisma meki. A Wortu fu Gado e boro go te na ini na ati fu wan sma. A kan kenki a fasi fa a sma de, fu di a kan abi krakti tapu a fasi fa a sma e denki èn tapu den sani di a lobi, so taki a sma e tron wan bun wrokoman di e tyari ensrefi na wan fasi di Gado feni bun. Dati na wan krakti wrokosani trutru!

17. Fruteri fa Gado Wortu e kenki sma.

¹⁷ A Wortu fu Gado e tyari kon na krin fa wan sma de trutru na ini en ati, èn dati de tra fasi leki a denki di a sma abi fu ensrefi, noso leki san a wani trawan fu si (1 Samuel 16:7). Srefi wan takru sma kan meki son leisi taki sma no e kon sabi fa a de trutru, fu di a e du neleki a lobi fu yepi trawan, noso a kan du neleki a lobi Gado. Ogri sma e handri na wan hoigri fasi fu di den wani du takru sani. Sma di abi heimemre e du neleki den abi sakafasi, aladi den e angri fu kisi glori fu sma. Ma te Gado Wortu e tyari kon na krin san de trutru na ini na ati fu wan sma, èn efu a sma dati abi sakafasi, dan a Wortu disi kan yepi en fu kenki a fasi fa a ben de fosi èn fu „tron wan nyun sma, so taki [a] kan kon de soleki fa Gado wani, nanga trutru regtfardikifasi èn loyaalfasi” (Efeisesma 4:22-24). Den leri fu Gado Wortu kan kenki fruleigi sma kon tron Kotoigi fu Yehovah di abi deki-ati, èn den kan tron fayafaya Kownukondre preikiman sosrefi.​—Yeremia 1:6-9.

18, 19. Gebroiki wan ondrofenitori na ini paragraaf disi, noso wan sani di yusrefi ondrofeni na ini a preikiwroko, fu sori fa a waarheid fu Bijbel kan kenki a denki fu wan sma.

 ¹⁸ A krakti di a Wortu fu Gado abi fu kenki sma e du bun gi sma na ala sei. Fu gi wan eksempre, Kownukondre preikiman fu Phnom Penh, na Kambodya, ben preiki tu leisi wan mun na ini a distrikt Kompong Cham. Wan uma di ben de domri fu a distrikt dati, yere fa tra domri ben taki takru sani fu Yehovah Kotoigi, èn fu dati ede a seti sani fu miti den Kotoigi a tra leisi te de ben o kon na ini a distrikt dati. Na uma disi tan poti wan lo aksi gi den Kotoigi, èn den aksi disi ben abi fu du nanga fesadei. Na uma ben arki bun di den Kotoigi ben e taki-go-taki-kon nanga en nanga yepi fu Bijbel. Ne a bari: „Now mi sabi taki den sani di den tra domri e taki fu unu no tru! Den taki dati unu no e gebroiki Bijbel, ma na dati wawan unu gebroiki a mamanten disi!”

¹⁹ Na uma disi tan hori takimakandra nanga den Kotoigi, aladi sma ben warskow en taki den ben o puru en leki domri. A fruteri wan mati fu en taki a ben abi Bijbel takimakandra nanga den Kotoigi, èn a mati disi bigin studeri Bijbel nanga den sosrefi. A mati fu en ben prisiri so te nanga den sani di a ben e leri, taki na wan fu den seremonia fu a kerki pe a e go, a taigi tra kerkiman: „Un kon studeri Bijbel nanga Yehovah Kotoigi!” Wan syatu pisi ten baka dati, na uma di ben de domri fosi, nanga tra sma sosrefi, bigin studeri Bijbel nanga Yehovah Kotoigi.

20. Fa na ondrofenitori fu wan uma na ini Gana e sori taki a Wortu fu Gado abi krakti?

²⁰ A tori fu Paulina, wan uma na ini Gana, e sori tu taki a Wortu fu Gado abi krakti. Wan furuten Kownukondre preikiman ben studeri Bijbel nanga en nanga yepi fu a buku Sabi di e tjari joe go na têgo libi. * Paulina no ben de a wan-enkri wefi fu en masra, èn a ben si taki a ben musu tyari wan kenki kon na ini a situwâsi disi. Ma Paulina en masra èn sosrefi ala sma fu en eigi famiri ben gens en na wan ogri-ati fasi. Paulina en granpapa di ben de wan krutuman nanga wan kerki owruman, drai den wortu fu Mateyus 19:4-6, fu di a ben wani Paulina fu kenki en prakseri. A krutuman ben du neleki a ben sabi seiker san den tekst disi ben wani taki, ma Paulina si heri esi taki na so Satan ben drai den wortu fu Bijbel tu di a ben tesi Yesus Krestes (Mateyus 4:5-7). Paulina ben memre ete san Yesus ben taki krinkrin fu a trowlibi, namku taki Gado ben meki wán man nanga wán uma; a no ben meki wán man nanga tu noso moro uma. Boiti dati, Yesus ben taki tu dati a no den dri sma, ma den tu sma, ben musu tron wán skin. Paulina tan hori ensrefi na a bosroiti di a ben teki, èn te fu kaba a ben kan broko trow nanga en masra di ben abi ete wan tra wefi. Syatu baka dati, Paulina tron wan dopu Kownukondre preikiman.

Tan gebroiki a Wortu fu Gado na wan reti fasi

21, 22. (a) Sortu fasti bosroiti wi leki Kownukondre preikiman wani abi? (b) San wi sa luku na ini na artikel di e kon?

²¹ Iya, a Wortu fu Gado na wan krakti wrokosani di wi kan gebroiki fu yepi trawan fu tyari kenki kon na ini den libi, so taki den kan kon krosibei fu Yehovah (Yakobus 4:8). Neleki fa koni wrokoman e gebroiki wrokosani fu abi bun bakapisi, na so wi musu abi a fasti bosroiti tu fu du ala san wi man fu gebroiki Gado Wortu, Bijbel, na wan koni fasi te wi e du a wroko di Gado gi wi leki Kownukondre preikiman.

²² Fa wi kan gebroiki Bijbel moro bun na ini a wroko di wi abi fu meki disipel? Wan fasi fa wi kan du dati, na fu tron leriman di man overtoigi trawan. Grantangi luku na artikel di e kon, bika a e taki fu difrenti fasi fa wi kan meki trawan kon sabi a Kownukondre boskopu, èn fa wi kan yepi den fu teki a boskopu disi tu.

[Futuwortu]

Yu e memre disi ete?

• Sortu wrokosani Kownukondre preikiman kan gebroiki?

• Na sortu fasi Paulus ben de wan eksempre leki wan Kownukondre wrokoman?

• San a wani taki fu gebroiki a Wortu fu Gado na wan reti fasi?

• Sortu krakti a Wortu fu Yehovah abi?

[Aksi fu a tori disi]

[Prenki na tapu bladzijde 10]

Wan tu wrokosani di Kresten e gebroiki fu du a Kownukondre preikiwroko