Wan grontapu sondro ogridu ini a ten di de na wi fesi

PRUBERI fu si a sani disi na yu fesi: wan grontapu sondro ogriman! A no ben o de fanowdu fu abi skowtu, strafu-oso, noso diri nanga dangra krutu sistema di e krutu ogriman. A ben o de wan grontapu pe ibriwan sma ben o lespeki a libi nanga den sani di tra sma abi. Yu e denki taki disi na wan anansitori? Kande yu e prakseri dati, ma a moro bun ten disi na soifri san a Bijbel e pramisi wi. Luku san den Buku fu Bijbel e taki na fesi ini a tori fu ogridu nanga tra takrudu di de na a grontapu disi.

Ini a buku Psalm wi e leisi: „No atibron nanga den ogrisma. No dyarusu tapu den wan di e du onregtfardikifasi. Bika neleki grasi den sa pori gowe esi-esi, èn neleki grun nyun grasi den sa drei gowe. Ma den safri-atisma srefi sa abi grontapu leki a gudu fu den, èn trutru den sa feni switi prisiri na ini vrede di sa de pasa marki” (Psalm 37:1, 2, 11). Fu tru, nowan sma kan tapu Yehovah fu meki a pramisi disi kontru, èn sosrefi ala den tra pramisi fu En di e gi wi deki-ati trutru.

A fasi fa Yehovah sa tyari den blesi disi kon, sa de nanga yepi fu a Kownukondre fu En. Na ini a Wi Tata Begi, Yesus Krestes ben leri den bakaman fu en fu begi taki a Kownukondre disi musu kon èn taki a wani fu Gado musu du „na grontapu leki fa a e pasa na hemel” (Mateyus 6:9, 10). Heri esi, te a Kownukondre dati o tiri, dan nowan sma na grontapu sa du ogri fu di den pôti, fu di trawan e kwinsi den, noso fu di sma e prakseri densrefi nomo. Na presi fu dati a Wortu fu Gado e taki: „Siri-nyanyan sa de bogobogo na grontapu; na tapu na ede fu den bergi sani sa de pasa marki” (Psalm 72:16). Fu tru, Yehovah Gado no sa tapu fu gi ala sma na grontapu soso bun sani. San de moro prenspari, na taki libisma sa abi lobi gi Gado nanga tra sma, èn noiti moro ogridu sa bruya a grontapu disi.