Aksi fu leisiman

Na sortu fasi Esekièl tron wan „babawman” na a ten di feanti ben lontu èn pori Yerusalem?

Fu taki en leki fa a de, dan Esekièl ben tron wan babawman fu di a no ben abi nowan enkri sani fu taki moro tapu a profeiti boskopu fu Yehovah di a ben fruteri kaba.

A profeiti Esekièl ben bigin a diniwroko fu en leki wan getrow waktiman gi den Israelsma di ben de na ini katibo na ini Babilon. Disi ben de na ini „a di fu feifi yari fu a katibo fu Kownu Yoyakin”; namku na ini 613 b.G.T. (Esekièl 1:2, 3). Gado ben fruteri Esekièl tapu a di fu tin dei fu a di fu tin mun fu a yari 609 b.G.T., taki den Babilonsma ben o bigin lontu Yerusalem fu teki en abra (Esekièl 24:1, 2). San ben o de a bakapisi fu a feti fu teki a foto abra? A ben o de so taki Yerusalem nanga den sma di no ben abi bribi èn di ben e libi na ini a foto ben sa man wai pasi gi den sani disi? Esekièl, di ben de leki a waktiman, ben tyari a krin krutu boskopu fu Yehovah kaba, èn a no ben de fanowdu fu taki moro sani soso fu gi a boskopu moro krakti. Esekièl kon tron neleki wan babawman fu di a no ben o taki noti moro fu a lontu di den ben lontu Yerusalem.​—Esekièl 24:25-27.

Sowan siksi mun baka a pori fu Yerusalem na ini 607 b.G.T., wan man di ben lowe gowe fu a foto dati ben tyari nyunsu fu a pori fu a santa foto gi Esekièl. Na a pisi ten dati Esekièl ben de na ini Babilon. A mofoneti bifo a loweman kon, Yehovah ’ben opo a mofo fu Esekièl . . . , èn a no ben man hori en mofo moro’ (Esekièl 33:22). Esekièl no ben de neleki wan babawman moro.

Esekièl ben babaw trutru na ini a ten dati? A de krin fu si taki dati no ben de so, bika srefi baka di a ben kon de leki wan „babawman”, a ben fruteri profeititori di ben de spesrutu gi den birti kondre, di ben breiti srefisrefi taki Yerusalem ben fadon (Esekièl, den kapitel 25-32). Wan pisi ten na fesi di Esekièl ben dini leki profeiti nanga waktiman kaba, dan Yehovah ben fruteri en: „Yu tongo mi wani fu plak na yu tapusei mofo èn seiker yu sa kon babaw, èn gi den, yu no sa tron wan man di e gi piri-ai, bika den de wan oso di opo densrefi teige mi. Èn te mi e taki nanga yu, dan mi sa opo yu mofo” (Esekièl 3:26, 27). Te Yehovah no ben abi boskopu gi Israel, dan Esekièl ben musu tan neleki wan babawman ini tori fu a nâsi dati. Esekièl ben abi a frantwortu fu taki san Yehovah ben wani en fu taki, ma soso na a spesrutu ten di Yehovah ben wani en fu du dati. A babaw di Esekièl ben babaw e sori taki a no ben abi primisi fu fruteri profeititori na den Israelsma.

A disiten waktiman grupu, den salfu Kresten, ben e warskow sma gi a pori fu Krestenhèit, di wi kan agersi nanga Yerusalem. Te a „bigi banawtu” kon èn te „Babilon a Bigiwan”, a grontapumakti fu falsi bribi, pori gowe, dan a salfu Esekièl grupu no sa abi noti moro fu taki fu a kaba fu Krestenhèit, di de a moro bigi pisi fu a grontapumakti Babilon a Bigiwan.​—Mateyus 24:21; Openbaring 17:1, 2, 5.

Iya, a dei sa kon te a salfu fikapisi nanga den kompe fu den sa kon de neleki wan babawman; den no sa abi noti moro fu taigi Krestenhèit. Disi sa pasa te „den tin tutu” nanga „a werdri meti” sa pori Babilon a Bigiwan, èn te den sa meki a de nanga sososkin (Openbaring 17:16). Ma disi no wani taki dati Kresten sa babaw trutru. Leki fa densrefi sabi, dan den sa prèise Yehovah èn den sa taki fu en ibri dei „na ini ala geslakti di e kon”.​—Psalm 45:17; 145:2.