„Feni furu prisiri ini Yehovah”

„Feni furu prisiri ini Yehovah . . . , èn a sa gi yu san na ati fu yu e aksi.”​—PSALM 37:4.

1, 2. Suma na a Sma pe trutru koloku de fu feni, èn fa Kownu David ben poti prakseri na a sani disi?

„KOLOKU fu den sma di sabi taki den abi Gado fanowdu, . . . koloku fu den sma di abi sari-ati gi trawan, . . . koloku fu den sma di lobi vrede.” Na so Yesus ben bigin a barinen Bergitaki fu en, èn a ben kari siksi tra fasi tu fa wan sma kan de koloku. Na Evangelie skrifiman Mateyus ben skrifi a tori disi na ini Bijbel (Mateyus 5:3-11). Den wortu fu Yesus e gi wi a dyaranti taki wi kan feni koloku trutru.

² Wan psalm di Kownu David fu owruten Israel skrifi, e poti prakseri na a Sma pe wi kan feni trutru koloku; a Sma disi na Yehovah. „Feni furu prisiri ini Yehovah”, na so David ben taki, „èn a sa gi yu san na ati fu yu e aksi” (Psalm 37:4). Ma fa a kan gi wi „furu prisiri” te wi sabi Yehovah nanga den furu difrenti fasi fu en? Te yu e luku san Yehovah ben du èn san a abi na prakseri fu du ete, dan fa dati e gi yu a howpu taki yu sa kisi „san na ati fu yu e aksi”? Wi sa kisi piki tapu den aksi disi, te wi o luku finifini san skrifi na ini Psalm 37 vers 1 te go miti vers 11.

„No dyarusu”

3, 4. Sortu rai David e gi soleki fa skrifi na ini Psalm 37:1? Fu san ede a bun fu gi yesi na a rai dati na ini a ten disi?

³ Wi e libi na ini ’muilek ten di tranga fu pasa’, èn ogridu lai srefisrefi. Wi si fa den wortu fu na apostel Paulus kon tru: „Ogrisma nanga bedrigisma sa kon moro ogri, aladi den e kori sma èn trawan e kori den” (2 Timoteyus 3:1, 13). A fasi fa ogrisma e libi kan hari wi makriki, fu di a gersi leki den abi wan switi libi èn taki sani e waka heri bun gi den! Ala den sani dati kan puru wi prakseri fu yeye afersi, èn a bakapisi de taki wi no man si sani na wan yoisti fasi moro. Luku fa den wortu na a bigin fu Psalm 37 e warskow wi fu no fadon na ini a tesi disi: „No meki yu ati kon bron nanga den ogrisma. No dyarusu tapu den wan di e du onregtfardiki sani.”

⁴ Ibri dei wi e si, noso e yere na telefisi nanga radio fa wan lo ogri e pasa na heri grontapu. Kruka bisnisman e bedrigi sma, ma den no e kisi strafu fu dati. Ogriman e du san den wani nanga sma di no man du noti teige den. Kiriman e kiri trawan, ma sma no man feni den, noso den e tan sondro fu kisi strafu. Ala den sortu ogridu disi kan meki wi atibron èn den kan trobi wi frustan. Kande wi e dyarusu srefi fu di a gersi leki sani e waka moro bun gi sma di e du ogri. Ma a situwâsi o kon moro bun te wi e atibron? Te wi e dyarusu tapu a sokari switi libi fu ogrisma, dan dati e kenki san o pasa nanga den te fu kaba? Kwetikweti! Èn wi no abi nowan reide fu ’atibron’. Fu san ede?

5. Fu san ede Bijbel e agersi ogrisma nanga grasi?

⁵ A psalm skrifiman e piki: „Bika neleki grasi  den sa pori gowe esi-esi, èn neleki grun nyun grasi den sa drei gowe” (Psalm 37:2). Grun nyun grasi kan moi fu si, ma heri esi a e drei èn a e dede. A srefi sani o pasa tu nanga sma di e du ogri. Aladi a gersi leki den abi wan bun libi, toku a no o tan so fu ala ten. Te den e dede, dan den gudu di den kisi na wan kruka fasi no kan yepi den. Te fu kaba, ibri sma e kisi en pai. „Sondu e pai nanga dede”, na so Paulus ben skrifi (Romesma 6:23). Te fu kaba, ogrisma nanga ala den sma di e du onregtfardiki sani o kisi a „pai” fu den èn notinoti moro. Fu tru, dati na wan soso fasi fu libi!​—Psalm 37:35, 36; 49:16, 17.

6. San wi e leri fu Psalm 37:1, 2?

⁶ Sobun, wi musu broko wi ede nanga a bun libi fu ogrisma di de fu wan syatu pisi ten nomo? Disi na san wi e leri fu den fosi tu vers fu Psalm 37: Noiti no meki a sokari bun libi fu den puru yu fu a bosroiti di yu teki fu dini Yehovah. Na presi fu dati, tan poti ala yu prakseri na den blesi nanga marki na yeye fasi.​—Odo 23:17.

„Frutrow tapu Yehovah èn du bun”

7. Fu san ede wi musu frutrow tapu Yehovah?

⁷ A psalm skrifiman e gi wi a deki-ati: „Frutrow tapu Yehovah èn du bun” (Psalm 37:3a). Te wi de nanga furu broko-ede èn srefi te wi e tweifri, dan a de fanowdu fu poti ala wi frutrow na ini Yehovah. Na En e gi wi a dyaranti taki a sa kibri wi bun na yeye fasi. Moses ben skrifi: „Iniwan sma di e tan na ini a kibripresi fu a Moro Heiwan, sa feni wan tanpresi na ini a kowru presi fu na Almaktiwan” (Psalm 91:1). Te wi e broko wi ede fu di wi e si taki kruktudu e kon moro furu na ini a sistema disi, dan a de tumusi prenspari taki wi frutrow moro tapu Yehovah. Efu wi drai wi futu kisi mankeri, dan wi e breiti te wan mati e kon yepi wi. Na a srefi fasi, wi abi a yepi fu Yehovah fanowdu te wi e meki muiti fu waka na wan getrow fasi.​—Yesaya 50:10.

8. Te wi abi wan prati na a Kresten diniwroko, dan fa dati sa yepi wi fu no broko wi ede tumusi nanga a sokari bun libi fu ogrisma?

⁸ Wan sani di kan yepi wi fu no broko wi ede nanga a sokari bun libi fu ogrisma, na fu tan suku èn tan yepi den sma di wi kan agersi nanga skapu, so taki den kan kon sabi soifri san Yehovah abi na prakseri fu du. Fu di wi e si taki moro nanga moro ogridu e pasa, meki wi musu du ala san wi man fu yepi trawan. „No frigiti fu du bun èn fu prati sani nanga trawan”, na so na apostel Paulus ben taki, „bika den sortu ofrandi dati e plisi Gado srefisrefi.” A moro „bun” sani di wi kan du, na fu prati a tumusi bun nyunsu fu Gado Kownukondre nanga trawan. Fu tru, a preikiwroko di wi e du na wan „srakti-ofrandi fu prèise”.​—Hebrewsma 13:15, 16; Galasiasma 6:10.

9. Di David ben taigi sma fu libi na grontapu, dan san a ben wani taki nanga den wortu dati?

⁹ David e taki moro fara: „Libi na grontapu, èn handri nanga getrowfasi” (Psalm 37:3b). Na ini den dei fu David, „grontapu” ben de a pisi kontren di Yehovah ben gi Israel, namku a Pramisi Kondre. Di Salomo ben de kownu, dan a Pramisi Kondre ben de a pisi fu Dan na noordsei te go miti Berseiba na zuidsei. Disi ben de a tanpresi fu Israel (1 Kownu 4:25). Awinsi pe wi e libi na ini a ten disi, wi e angri fu si a ten te a heri grontapu sa tron wan paradijs. Na ini a nyun grontapu dati, regtfardikifasi sa de. Aladi wi e wakti a ten dati, wi e kisi kibri na yeye fasi.​—Yesaya 65:13, 14.

10. San na a bakapisi te wi e „handri nanga getrowfasi”?

 ¹⁰ San o de a bakapisi te wi e „handri nanga getrowfasi”? Wan odo di skrifi nanga yepi fu santa yeye, e taki so: „Wan man di e du sani na wan getrow fasi sa kisi furu blesi” (Odo 28:20). Te wi e tan preiki a bun nyunsu na wan getrow fasi gi iniwan sma, awinsi pe wi e libi, dan seiker wi sa kisi blesi fu Yehovah. Fu eksempre, 40 yari pasa Frank nanga en wefi Rose bigin pionier na ini wan foto na a noordsei fu Skotland. Na a ten dati, a pikin grupu fu sma di ben teki leri fu waarheid no ben wani arki moro. A pionier trowpaar disi no lasi-ati, ma den bigin preiki gi sma èn meki disipel. Now a foto dati abi wan gemeente di e gro moro nanga moro. Yehovah blesi a getrowfasi fu a trowpaar disi trutru. Nanga sakafasi Frank e taki: „A moro bigi blesi di wi kisi na taki wi de na waarheid ete èn taki Yehovah man gebroiki wi te now ete.” Iya, te wi e „handri nanga getrowfasi”, dan wi e kisi furu blesi èn wi e warderi dati trutru.

„Feni furu prisiri ini Yehovah”

11, 12. (a) Fa wi kan „feni furu prisiri ini Yehovah”? (b) Nanga sortu marki yu kan studeri, èn san kan de a bakapisi efu yu e du dati?

¹¹ Efu wi wani kisi wan moro tranga banti nanga Yehovah èn efu wi wani tan abi frutrow na ini en, dan wi musu „feni furu prisiri ini Yehovah” (Psalm 37:4a). Fa wi kan du dati? Na presi fu poti tumusi furu prakseri na den problema di wi abi, wi musu poti ala wi prakseri na Yehovah, aladi a kan de wan muilek sani gi wi fu du dati. Wan fasi fa wi kan poti prakseri na Yehovah, na te wi e teki ten fu leisi en Wortu (Psalm 1:1, 2). Yu e prisiri te yu e leisi Bijbel? A sa gi yu prisiri te yu e leisi nanga a marki fu kon sabi moro fu Yehovah. Baka te yu leisi wan pisi, dan aksi yusrefi: ’San a pisi disi leri mi fu Yehovah?’ Kande a sa de wan yepi fu abi wan buku noso wan pisi papira fu skrifi sani te yu e leisi. Ibri tron te yu e denki dipi fu wan pisi di yu leisi, dan skrifi wan tu sani di o memre yu na wan fu den tumusi moi fasi fu Gado. Na ini wan tra psalm, David ben singi: „Meki den wortu fu mi mofo nanga den dipi prakseri fu mi ati kon de wan prisiri na yu fesi, o Yehovah, mi Klepston èn mi Frulusuman” (Psalm 19:14). Te wi e poti prakseri na a Wortu fu Gado na a fasi disi, dan Yehovah e „prisiri” nanga dati, èn wisrefi e prisiri tu.

¹² Fa wi kan kisi prisiri te wi e studeri èn e denki dipi fu Gado Wortu? Wi kan poti leki marki fu kon leri sabi someni leki wi man fu Yehovah nanga den fasi fu en. Den buku A moro bigi man di oiti ben libi nanga Nader dicht tot Yehovah * e taki fu someni sani di e meki wi kon de nanga tangi na ati. Wi kan denki dipi fu den sani dati. David e gi regtfardikisma a dyaranti taki te den e du disi, dan Yehovah ’sa gi den san na ati fu den e aksi’ (Psalm 37:4b). A ben musu de so taki a dyaranti disi ben meki taki na apostel Yohanes skrifi den wortu disi: „Disi na san wi sabi seiker fu en, taki awansi san wi e aksi akruderi a wani fu en, a e yere wi. Efu wi sabi taki a e yere wi, awansi san wi e aksi, dan wi sabi taki wi sa kisi den sani di wi e aksi, fu di wi e aksi en den sani disi.”​—1 Yohanes 5:14, 15.

13. Fa a Kownukondre preikiwroko go na fesi na ini furu kondre na ini den lasti yari di pasa?

¹³ A moro prisiri sani gi wi leki sma di e hori den soifri retifasi, na fu sori taki Yehovah abi a reti fu tiri hemel nanga grontapu (Odo 27:11).  Wi ati e furu nanga prisiri te wi e yere fu a bigi muiti di wi brada nanga sisa du fu preiki na ini kondre pe den tiriman ben tapu a preikiwroko fosi. Wi e wakti fayafaya fu si na sortu tra presi ete wi sa de fri fu du a preikiwroko bifo a seti fu sani disi kon na wan kaba. Furu futuboi fu Yehovah e libi na ini kondre pe den man du a Kresten wroko fu den na wan fri fasi. Drape den e preiki fayafaya gi studenti, gi sma di lowe fu tra kondre, èn gi tra sma di kon libi wan pisi ten na den kondre disi pe den de fri fu abi den eigi bribi. Wi howpu trutru taki te den sma disi drai go baka na den eigi kondre, den sa tan meki a leti fu waarheid skèin, awinsi bigi dungru na yeye fasi e meki en muilek fu preiki gi sma. ​—Mateyus 5:14-16.

„Lolo yu pasi go na tapu Yehovah”

14. Sortu buweisi de taki wi kan frutrow tapu Yehovah trutru?

¹⁴ A e gi wi furu trowstu fu sabi taki wi kan kon fri fu broko-ede nanga tra sani di de leki hebi di e kwinsi wi! Fa so? „Lolo yu pasi go na tapu Yehovah, èn frutrow na en tapu”, na so David e taki, èn a e taki moro fara „èn ensrefi sa handri” (Psalm 37:5). Na ini den gemeente fu wi, furu buweisi de di e sori taki wi kan frutrow tapu Yehovah fu horibaka gi wi ala ten (Psalm 55:22). Den wan di de na ini a furuten diniwroko, efu na pionier, opziener di e reis, zendeling, noso friwani wrokoman na Bethel, den alamala kan taki nanga overtoigi dati Yehovah e sorgu den trutru. Fu san ede yu no e taki nanga den furuten dinari di yu sabi èn aksi den fa Yehovah yepi den? A no de fu taki dati yu sa yere furu ondrofenitori di e sori taki Yehovah e gi yepi na ini muilek ten srefi. Ala ten a e sorgu taki sma e kisi san den abi fanowdu.​—Psalm 37:25; Mateyus 6:25-34.

15. Fa a regtfardikifasi fu Gado pipel e skèin so taki ala sma man si dati?

¹⁵ Te wi e poti ala wi frutrow na ini Yehovah, dan wi kan ondrofeni san a psalm skrifiman e taki moro fara: „Fu tru, a sa meki a regtfardikifasi fu yu kon de fu si leki a leti srefi, èn a retidu fu yu leki mindridei” (Psalm 37:6). Furu tron sma e taki takru fu wi leki Kotoigi fu Yehovah. Ma Yehovah e opo den ai fu den opregtiwan fu meki den kon si taki wi e preiki fu di wi lobi Yehovah nanga tra sma. Na a srefi ten, ala sma man si a reti fasi fa wi e tyari wisrefi, awinsi furu sma e taki takru fu wi. Yehovah e gi wi krakti fu horidoro ondro iniwan sortu gens noso frufolgu  di wi e kisi. A bakapisi de taki a regtfardikifasi fu Gado pipel e skèin leki a son na mindridei.​—1 Petrus 2:12.

„Tan tiri . . . wakti fayafaya”

16, 17. Soleki fa skrifi na ini Psalm 37:7, dan now na a ten gi sortu sani, èn fu san ede?

¹⁶ Now a psalm skrifiman e taki den wortu disi: „Tan tiri na fesi Yehovah èn wakti fayafaya tapu en. No atibron nanga iniwan sma di e meki wan bun libi gi ensrefi, nanga a man di e du san a abi na prakseri” (Psalm 37:7). Dyaso David e sori taki a de tumusi prenspari gi wi fu abi pasensi èn fu wakti teleki Yehovah du wan sani. Wi no musu krutukrutu fu di a kaba fu a seti fu sani disi no kon ete. Yehovah sori moro sari-ati nanga pasensi leki san wi ben fruwakti fosi, a no so? Wi kan sori now taki wisrefi tu e wakti nanga pasensi aladi wi e tan preiki a bun nyunsu fayafaya bifo a kaba kon? (Markus 13:10) Now a no a ten fu du don sani di kan meki wi lasi a prisiri fu wi èn sosrefi a kibri di wi e kisi na yeye fasi. Now na a ten fu meki moro muiti fu kakafutu gi na ogri krakti fu a grontapu fu Satan. Now na a ten tu fu tan tyari wisrefi na wan krin fasi, èn noiti wi musu du wan sani di kan pori a bun nen di wi abi na Yehovah. Meki wi tan puru iniwan doti prakseri na wi ede. Efu wi na umasma, dan meki wi luku bun taki wi no abi demakandra nanga mansma, noso nanga umasma srefi, na wan fasi di no fiti. Mansma sosrefi musu luku bun fu no du dati tu.​—Kolosesma 3:5.

¹⁷ „Libi atibron na wan sei èn gowe libi hebi atibron”, na a rai di David e gi wi. „No sori taki yu ati e kon faya soso fu du ogri. Bika den ogrisma srefi sa koti puru, ma den wan di e howpu tapu Yehovah na den wan di sa abi grontapu leki a gudu fu den” (Psalm 37:8, 9). Iya, nanga ala frutrow wi kan fruwakti a ten te Yehovah sa puru ala ogridu èn sosrefi den sma di e du ogri na grontapu, èn a ten dati de so krosibei kaba.

„Ete wan syatu pisi ten”

18, 19. Sortu deki-ati yu e kisi fu Psalm 37:10?

¹⁸ „Ete wan syatu pisi ten èn na ogri sma no sa de moro; èn yu sa luku seiker na a presi pe a ben de, èn a no sa de” (Psalm 37:10). Den wortu dati e gi wi deki-ati trutru aladi wi e doro a kaba fu a sistema disi èn sosrefi a kaba fu den rampu di pasa fu di sma no wani teki a tiri fu Yehovah! Ala sani di libisma seti fu tiri densrefi ben abi takru bakapisi. Èn heri esi wi e doro a ten pe ala sma sa de ondro a tirimakti fu Gado baka, iya ondro wan trutru theokrasia, namku a Kownukondre fu Yehovah na ini anu fu Yesus Krestes. A Kownukondre sa tiri ala afersi na grontapu èn a sa puru ala sma di de teige en.​—Danièl 2:44.

¹⁹ Na ini a nyun grontapu na ondro a tiri fu Gado Kownukondre, yu no sa feni nowan „ogrisma”, awinsi fa yu o suku. Iya, esi-esi Yehovah sa puru iniwan sma di e opo ensrefi teige en na a ten dati. Nowan sma sa de drape di feni taki Gado no abi reti fu tiri, èn nowan sma sa de tu di e weigri fu saka ensrefi na ondro a tiri fu Gado. Ala yu birtisma sa de sma di e suku fu plisi Yehovah. Wi no sa abi fu frede noti; wi no sa abi fu poti sroto na wi doro, noso isri na den fensre fu wi oso. Wi no sa abi fu frede fu frutrow trawan èn noti no sa pori a koloku libi fu wi!​—Yesaya 65:20; Mika 4:4; 2 Petrus 3:13.

20, 21. (a) Suma na den „safri-ati sma” fu Psalm 37:11, èn pe den e feni ’vrede pasa marki’? (b) Sortu blesi wi sa kisi te wi e teki na eksempre fu a Moro Bigi David?

²⁰ Na a ten dati, „den safri-ati sma sa abi grontapu leki a gudu fu den” (Psalm 37:11a). Ma suma na den „safri-ati sma” disi? A wortu di vertaal leki „safri-ati”, e kon fu wan wortu di wani taki „fu kwinsi, fu meki a saka ensrefi, noso fu gi syen”. Iya, „den safri-ati sma” na den  sma di e wakti nanga sakafasi tapu Yehovah, di sa tyari wan kaba kon na ala kruktudu di den ondrofeni, èn a sa seti sani kon reti baka gi den. „Trutru den sa feni switi prisiri na ini vrede di sa de pasa marki” (Psalm 37:11b). Nownow kaba wi e feni vrede pasa marki na ini a yeye paradijs di abi fu du nanga a tru Kresten gemeente.

²¹ Aladi wi no kon fri fu problema ete, toku wi e yepi makandra èn wi e trowstu den wan di e firi brokosaka. A sani disi e tyari vrede kon na mindri a pipel fu Yehovah èn dati e gi den trutru prisiri. Na wan lobi-ati fasi, den brada di poti na wroko leki skapuman e sorgu wi na yeye fasi, èn son tron den e sorgu srefi taki wi abi san wi abi fanowdu na ini wi aladei libi. Disi e yepi wi fu horidoro te wi e kisi tesi fu di wi e du san regtfardiki (1 Tesalonikasma 2:7, 11; 1 Petrus 5:2, 3). A vrede disi na wan warti sani fu tru! Wi abi a howpu tu fu libi fu têgo na ini vrede na ini a Paradijs di de fu kon. Fu dati ede, meki wi de leki a Moro Bigi David, Krestes Yesus. A ben de fayafaya fu du a wani fu Yehovah, èn dati meki a ben man du en diniwroko na wan getrow fasi te na a kaba (1 Petrus 2:21). Te wi e du a srefi leki Yesus, dan wi sa tan koloku èn wi sa prèise wi Gado, Yehovah, di e gi wi furu prisiri.

[Futuwortu]

Yu kan gi piki?

• San yu leri fu Psalm 37:1, 2?

• Fa yu kan „feni furu prisiri ini Yehovah”?

• Sortu buweisi de taki wi kan frutrow tapu Yehovah?

[Aksi fu a tori disi]

[Prenki na tapu bladzijde 9]

Kresten ’no e dyarusu tapu den wan di e du onregtfardiki sani’

[Prenki na tapu bladzijde 10]

„Frutrow tapu Yehovah èn du bun”

[Prenki na tapu bladzijde 11]

Feni furu prisiri ini Yehovah fu di yu e leri someni leki yu man fu en

[Prenki na tapu bladzijde 12]

„Den safri-ati sma srefi sa abi grontapu leki a gudu fu den”