„Sori taki unu de nanga tangi”

„Meki a vrede fu Krestes tiri na ati fu unu . . . Sori taki unu de nanga tangi.”​—KOLOSESMA 3:15.

1. Sortu bigi difrenti de fu si na mindri a Kresten gemeente, nanga a grontapu di de na ini a makti fu Satan?

DEN 94.600 gemeente fu Yehovah Kotoigi na heri grontapu, lai nanga sma di de nanga tangi trutru. Ibri konmakandra e bigin èn e kaba nanga wan begi di e sori taki den de nanga tangi gi den sani di Yehovah du. Te Kotoigi e kon makandra fu anbegi èn fu abi prisiri demakandra, dan furu tron wi e yere den e taki „grantangi”. Yonguwan nanga owruwan, sosrefi den wan di tron Kotoigi no so langa ete, nanga den wan di de Kotoigi wan langa pisi ten kaba, den alamala e sori taki den de nanga tangi (Psalm 133:1). Disi de heri tra fasi leki den furu sma di e denki densrefi nomo, sma ’di no sabi Yehovah èn di no e gi yesi na a bun nyunsu’! (2 Tesalonikasma 1:8) Wi e libi na ini wan grontapu di no de nanga tangi srefisrefi. A sani disi no e fruwondru wi te wi e prakseri suma na a gado fu a grontapu disi, namku Satan Didibri. En na a sma di e gi trawan deki-ati fu denki densrefi nomo, èn a heimemre nanga a trangayesi fu en de krin fu si na ini a libisma libimakandra!​—Yohanes 8:44; 2 Korentesma 4:4; 1 Yohanes 5:19.

2. Na sortu warskow wi musu poti prakseri, èn sortu aksi wi sa luku now?

² Den sma fu a grontapu fu Satan e lontu wi na ala sei, èn fu dati ede wi musu luku bun ala ten taki wi no kon abi den takru fasi fu den. Na ini a fosi yarihondro, na apostel Paulus ben memre den Kresten fu Efeise na a sani disi: „Wan ten unu ben waka . . . akruderi a seti fu sani fu a grontapu disi, akruderi a tiriman fu a makti fu a loktu, a yeye di e wroko now na ini den manpikin fu trangayesi. Iya, na mindri den wi alamala ben tyari wisrefi wan leisi akruderi  den lostu fu wi skin, fu di wi ben du den sani di a skin nanga den prakseri ben wani, èn trutru wi ben de pikin fu atibron, neleki den trawan” (Efeisesma 2:2, 3). Na so a de tu nanga furu sma na ini a ten disi. Ma fa wi kan de nanga tangi ala ten? Sortu yepi Yehovah e gi? Sortu sani wi kan du fu sori taki wi de nanga tangi trutru?

Fu san ede wi musu de nanga tangi

3. Fu san ede wi de nanga tangi gi san Yehovah du?

³ Yehovah Gado na wi Mekiman èn a Sma di gi wi libi, sobun na en wi musu gi tangi, spesrutu te wi e prakseri wan tu fu den furu difrenti kado di a gi wi bogobogo (Yakobus 1:17). Ibri dei wi e taki Yehovah tangi dati wi de na libi (Psalm 36:9). Te wi e luku lontu wi, dan wi e si furu buweisi fu sani di Yehovah meki, soleki a son, a mun, nanga den stari. Yehovah seti grontapu nanga ala sani di wi skin abi fanowdu fu man tan na libi, a moksi difrenti sortu gas na so wan koni fasi taki wi man hari blo, èn a heri naturu e drai na so wan fasi taki ala sani e waka bun. Te wi e prakseri fu ala den sani disi, dan wi e si trutru taki wi de na bigi paiman na wi hemel Tata. „Yusrefi du furu wondruwroko gi wi, o Yehovah, mi Gado”, na so Kownu David ben singi, „èn yu e prakseri wi trutru; nowan sma de leki yu. Te mi ben sa wani fu fruteri èn taki fu den wondruwroko fu yu, den kon de so furu, moro leki mi man fruteri.”​—Psalm 40:5.

4. Fu san ede wi musu taki Yehovah tangi fu a prisiri demakandra di wi abi na ini den gemeente fu wi?

⁴ Aladi den futuboi fu Yehovah na ini a ten disi no e libi na ini wan paradijs di wi kan si nanga ai, toku den e prisiri fu de na ini wan yeye paradijs. Na ini den Kownukondre zaal fu wi, èn na den kongres nanga kring konmakandra fu wi, wi e si fa den Kresten brada nanga sisa fu wi e sori den froktu fu a yeye fu Gado. Iya, te Kotoigi e preiki gi sma di no sabi furu fu Gado, dan sonwan fu den e sori den sma san Paulus ben taki na ini en brifi gi den Galasiasma. Den e sori fosi san na „den wroko fu a skin” èn den e aksi den arkiman fa den e denki fu a tori dati (Galasiasma 5:19-23). Nofo tron den arkiman e agri wantewante taki den wroko fu a skin de krin fu si na ini a libisma libimakandra fu a ten disi. Te den e sori den arkiman san na den froktu fu a yeye fu Gado èn te den e gi den wan kari fu kon na a Kownukondre zaal na ini a birti fu den, dan drape den arkiman e si nanga den eigi ai fa Kotoigi e sori den froktu, noso den fasi dati. Heri esi furu fu den e taki: „Gado de trutru  na un mindri” (1 Korentesma 14:25). Èn disi no de fu si na ini a Kownukondre zaal wawan. Awinsi pe yu e go, yu o si taki iniwan fu den moro leki siksi milyun Kotoigi fu Yehovah na sma di e prisiri èn di de koloku. Fu tru, a demakandra disi e gi wi deki-ati, èn dati na wan tra reide fu san ede wi musu taki Yehovah tangi, bika en na a sma di e gi wi en santa yeye san e meki taki wi kan abi a prisiri demakandra disi.​—Sefanya 3:9; Efeisesma 3:20, 21.

5, 6. Fa wi kan sori taki wi de nanga tangi gi a lusu-paiman, a moro bigi kado di Gado gi wi?

⁵ A moro bigi kado, a moro volmaakti presenti di Yehovah gi wi, na en Manpikin, Yesus, di ben gi en libi leki srakti-ofrandi fu frulusu wi. „Efu disi na fa Gado lobi wi”, na so na apostel Yohanes skrifi, ’dan wisrefi abi a plekti fu lobi makandra’ (1 Yohanes 4:11). Iya, wi e sori taki wi de nanga tangi gi a lusu-paiman te wi e sori lobi nanga warderi gi Yehovah, èn sosrefi te wi e libi na wan fasi di e sori taki wi lobi tra sma tu.​—Mateyus 22:37-39.

⁶ Te wi e luku fa Yehovah ben e handri nanga Israel fu owruten, dan wi sa si moro fasi fa wi kan sori taki wi de nanga tangi. Yehovah ben leri en pipel furu sani na ini a Wet di a ben gi den nanga yepi fu Moses. „Ini a Wet yu kan si frafra san na sabi nanga waarheid”, èn na so wi kan leri furu sani di sa yepi wi fu gi yesi na a rai fu Paulus: „Sori taki unu de nanga tangi.”​—Romesma 2:20; Kolosesma 3:15.

Dri sani di wi kan leri fu a Wet fu Moses

7. Fa a seti fu a di fu tin pisi ben gi den Israelsma na okasi fu sori warderi gi san Yehovah ben du gi den?

⁷ Na ini a Wet fu Moses, Yehovah ben seti dri sani di ben gi den Israelsma na okasi fu sori trutru warderi gi a bun-ati fu en. A fosi sani, na taki den ben musu gi a di fu tin pisi. A di fu tin pisi fu den sani di den ben prani, makandra nanga „a di fu tin pisi fu na ipi meti di den ben abi” ben musu tron „wan santa sani gi Yehovah” (Lefitikus 27:30-32). Te den Israelsma ben e gi yesi, dan Yehovah ben e gi den furu blesi. „’Tyari ala den di fu tin pisi kon na ini a maksin, so taki nyanyan kan kon na ini mi oso; èn grantangi, tesi mi nanga dati’, Yehovah fu den legre taki, ’efu mi no sa opo den sroisi fu hemel gi unu èn trutru kanti wan blesi kon na unu tapu teleki nowan sani e mankeri moro.’”​—Maleaki 3:10.

8. Fa a seti fu den friwani bijdrage ben difrenti fu a seti fu a di fu tin pisi?

⁸ A di fu tu sani di Yehovah ben seti, boiti a seti fu a di fu tin pisi, na taki den Israelsma ben kan gi friwani bijdrage. A ben meki Moses taigi den Israelsma: „Te unu doro na ini a kondre pe mi e tyari unu, a musu de so taki te unu e nyan iniwan fu a brede fu a kondre, dan un musu gi Yehovah tu.” Den ben musu teki pikinso fu den fosi nyanyan di den ben koti, èn te den ben miri en tron wan sortu ’grofu blon’, dan den ben musu meki ’lontu kuku leki linga’ fu „gi Yehovah”. Ala pikin nanga bakapikin ben  musu du a sani disi. Luku taki Yehovah no ben taki omeni fu den fosi nyanyan den ben musu gi (Numeri 15:18-21). Ma te den Israelsma ben gi wan sani fu sori a warderi fu den, dan den ben abi a dyaranti taki Yehovah ben o blesi den. Na ini a tempel fisyun fu Esekièl wi e si taki wan srefi sortu sani ben seti. Wi e leisi: „Den fosiwan fu ala den fosi lepi froktu èn ibriwan fu ala den difrenti sani di unu gi komoto fu ala san unu gi, na fu den priester den sa tron; èn den fosi nyanyan di unu miri tron grofu blon, un musu gi na den priester, so taki blesi sa kon tapu un oso.”​—Esekièl 44:30.

9. San Yehovah leri den Israelsma di a ben taki dati den no ben musu koti ala nyanyan na a gron fu den?

⁹ A di fu dri sani di Yehovah ben seti, na taki den Israelsma no ben musu koti ala nyanyan di den ben prani. „Te un pipel e koti a nyanyan fu a gron”, na so Gado ben taki, „dan un no musu koti ala a nyanyan na a lanki fu a gron, èn un no musu piki den nyanyan di tan abra. Sosrefi, un no musu piki den droifi di tan abra na ini un droifidyari, èn un no musu piki den droifi di panya na ini un droifidyari. Un musu libi den gi den mofinawan èn gi den tra-kondresma di e tan na ini un kondre. Mi na Yehovah, un Gado” (Lefitikus 19:9, 10). Dyaso, Yehovah no ben taki tu omeni nyanyan den ben musu libi. Ibri Israelsma ben musu bosroiti gi ensrefi omeni nyanyan a ben o libi gi den mofinasma. A koni Kownu Salomo taki nanga reti: „A sma di e yepi den mofinawan e leni Yehovah, èn A sa pai en gi san a du” (Odo 19:17). Na so wan fasi Yehovah ben e leri en pipel taki den musu abi sari-ati nanga den wan di no ben abi en so bun èn taki den ben musu yepi den tu.

10. San ben de a bakapisi gi a pipel fu Israel te den no ben sori warderi?

¹⁰ Yehovah ben blesi den Israelsma te den ben e gi a di fu tin pisi, te den ben e gi friwani bijdrage, èn te den ben e du sani fu yepi den pôtiwan. Ma te a pipel fu Israel no ben sori warderi, dan Yehovah no ben e blesi den moro. A bakapisi ben de taki rampu miti den èn te fu kaba den go na ini katibo (2 Kroniki 36:17-21). San wi kan leri fu disi dan?

Fa wi kan sori taki wi de nanga tangi

11. San na a moro prenspari fasi fa wi kan sori taki wi de nanga tangi gi san Yehovah du?

¹¹ A moro prenspari fasi fa wi kan prèise Yehovah èn sori taki wi de nanga tangi, abi fu du nanga wan „ofrandi” tu. A tru taki wi leki Kresten no de na ondro a Wet fu Moses èn wi no abi fu tyari meti noso gron-nyanyan leki ofrandi (Kolosesma 2:14). Ma toku, na apostel Paulus ben gi den Hebrew Kresten a rai disi: „Meki wi tyari wan srakti-ofrandi fu prèise gi Gado ala ten, dati wani taki, a froktu fu wi mofobuba di e meki en nen bekènti na publiki” (Hebrewsma 13:15). Te wi e gebroiki a koni fu wi èn sosrefi den sani di wi abi, fu tyari wan ofrandi fu prèise gi Yehovah, dan wi kan sori taki wi de nanga tangi trutru gi den sani di wi lobi-ati hemel Tata, Yehovah Gado du gi wi. Wi kan du dati te wi de na ini a preikiwroko, noso te wi de na mindri „den ipi sma di kon makandra” leki Kresten brada nanga sisa (Psalm 26:12). Te wi e du disi, dan san wi kan leri fu den fasi fa den Israelsma ben musu sori warderi gi den sani di Yehovah du?

12. San a seti fu a di fu tin pisi kan leri wi fu a frantwortu di wi abi leki Kresten?

¹² Na a fosi presi, wi si taki a seti fu a di fu tin pisi ben de wan sani di ala Israelsma ben musu fu du; ibriwan fu den ben abi a plekti fu du disi doronomo. Leki Kresten, wi abi a frantwortu fu teki prati na a preikiwroko èn fu go na den Kresten konmakandra. Disi na sani di ibriwan fu wi musu fu du. Na ini a prenspari profeititori di Yesus ben taki fu a ten fu a kaba, a ben taki krin: „A bun nyunsu disi fu a kownukondre o preiki na ala sma na heri grontapu, so taki ala kondre kan yere dati, èn dan a kaba o kon” (Mateyus 24:14; 28:19, 20). Gado ben meki na apostel Paulus skrifi disi fu den Kresten konmakandra: „Meki wi poti ai na makandra, so taki wi e tranga makandra fu sori lobi èn fu du bun wroko, fu no libi a kon di wi e kon makandra, soleki fa sonwan abi a gwenti fu du, ma fu gi makandra deki-ati, èn dati moro furu, fu di unu e si a dei e kon krosibei” (Hebrewsma 10:24, 25). Wi e sori taki wi de nanga tangi gi san Yehovah du, te wi  e prisiri nanga a frantwortu di wi abi fu preiki, fu gi leri, èn fu abi demakandra doronomo nanga wi brada nanga sisa na den gemeente konmakandra. Wi musu si den sani disi leki wan bigi grani.

13. San wi kan leri fu den seti pe den Israelsma ben kan gi friwani bijdrage èn pe den no ben musu koti ala nyanyan na a gron fu den?

¹³ Wi kan kisi wini tu te wi e luku den tu tra seti di ben gi den Israelsma na okasi fu sori a warderi fu den, namku a seti fu friwani bijdrage èn a seti pe den no ben musu koti ala nyanyan na a gron fu den. Den sani disi ben de heri tra fasi leki a seti fu a di fu tin pisi, di ben sori soifri omeni den ben musu gi. Te den Israelsma ben e gi bijdrage èn te den ben go koti nyanyan na gron, dan Yehovah no ben taki omeni den ben musu gi. Na presi fu dati, den seti disi ben gi wan futuboi fu Yehovah na okasi fu sori o dipi a warderi fu en ben de. Na a srefi fasi, wi e frustan taki ibri futuboi fu Yehovah abi a prenspari frantwortu fu teki prati na a preikiwroko èn fu go na den Kresten konmakandra. Ma a de so taki wi de klariklari fu du den sani disi, èn wi e du den nanga wi heri ati? Wi e si den sani disi leki okasi fu sori warderi gi ala den sani di Yehovah du gi wi? Wi e du ala san wi man fu teki prati na den sani disi? Noso wi e si ala den sani disi leki wan plekti nomo di wi musu du? A no de fu taki dati wi musu piki den aksi disi gi wisrefi. Na apostel Paulus ben taki en so: „Meki ibriwan sma buweisi san na en eigi wroko, èn dan a sa abi wan reide fu prisiri fu ensrefi wawan, èn no te a teki ensrefi gersi nanga a tra sma.”​—Galasiasma 6:4.

14. San Yehovah e fruwakti fu wi te wi e du diniwroko gi en?

¹⁴ Yehovah Gado sabi a situwâsi fu wi heri bun. A sabi san wi man èn san wi no man du. Awinsi den futuboi fu Yehovah e tyari bigi ofrandi noso pikin ofrandi, toku A e warderi en te den e du disi nanga den heri ati. A no e fruwakti taki wi alamala musu gi a srefi, èn wi alamala no man gi a srefi tu. Di Paulus ben e taki nanga den Kresten fu Korente fu gi bijdrage, dan a taigi den: „Bika efu wan sma firi kaba fu gi wan sani, dan a bun spesrutu efu a e gi san a abi; a no musu gi san a no abi” (2 Korentesma 8:12). A gronprakseri disi e fiti heri bun tu na ini wi diniwroko gi Gado. A no te wi e du furu na ini a diniwroko, dan wi e plisi Yehovah, ma na a fasi fa wi e du a wroko, dati de prenspari gi en. A wani taki wi musu du a wroko nanga prisiri èn nanga wi heri ati.​—Psalm 100:1-5; Kolosesma 3:23.

 Kweki èn tan abi faya gi a pionierwroko

15, 16. (a) San a pionierwroko abi fu du nanga a warderi di wi abi? (b) Fa den wan di no man pionier kan sori taki den abi faya gi a pionierwroko?

¹⁵ Wan moi fasi fu sori taki wi de nanga tangi gi san Yehovah du, na fu go na ini a furuten diniwroko. A sani disi e gi furu prisiri. Furu getrow futuboi fu Yehovah tyari bigi kenki kon na ini den libi, so taki den man gi moro ten fu dini en. Den du disi fu di den lobi Yehovah èn fu di den abi warderi gi a lobi bun-ati di a e sori. Sonwan fu den man dini leki gewoon pionier di e gebroiki sowan 70 yuru ibri mun fu preiki a bun nyunsu èn fu leri sma a waarheid. Trawan di de na ini tra situwâsi pe den no man du so furu, e seti den libi na so wan fasi taki ten na ten den man wroko leki yepipionier di e preiki 50 yuru wan mun.

¹⁶ Ma fa a de nanga den furu tra futuboi fu Yehovah di no man dini leki gewoon pionier noso yepipionier? Den kan sori taki den de nanga tangi fu di den e kweki èn tan abi faya gi a pionierwroko. Fa den kan du dati? Den kan gi deki-ati na den wan di man pionier, den kan yepi den pikin fu den fu poti en leki marki fu go na ini a furuten diniwroko, èn den kan teki prati fayafaya na a preikiwroko so furu leki den man. A muiti di wi e meki na ini a preikiwroko abi furu fu du nanga a warderi di wi abi gi san Yehovah du gi wi kaba, san a e du gi wi nownow, èn san a sa du gi wi ete.

Fa fu sori nanga den „warti sani” fu wi taki wi de nanga tangi

17, 18. (a) Fa wi kan sori nanga den „warti sani” fu wi taki wi de nanga tangi? (b) San Yesus ben taki fu a moni di a weduwe ben poti, èn fu san ede a taki dati?

¹⁷ „Gi Yehovah grani nanga den warti sani fu yu”, na so Odo 3:9 e taki, „èn nanga den fosiwan fu ala den gron-nyanyan fu yu.” Futuboi fu Yehovah no abi fu gi a di fu tin pisi moro. Na presi fu dati, Paulus ben skrifi a gemeente na ini Korente: „Meki ibri sma gi soleki fa a bosroiti na ini en ati; a no musu du dati efu a no wani èn sma no musu dwengi en, bika Gado lobi wan sma di e gi sani nanga prisiri” (2 Korentesma 9:7). Te wi e gi moni noso tra sani fu horibaka gi a Kownukondre preikiwroko na heri grontapu, dan dati e sori tu taki wi de nanga tangi. Trutru warderi sa meki wi du disi doronomo. Kande wi kan poti pikinso moni na wan sei ibri wiki, neleki fa den fosi Kresten ben du.​—1 Korentesma 16:1, 2.

¹⁸ A no te wi e gi bun furu moni, dan dati e sori taki wi de nanga tangi gi san Yehovah du. Na presi fu dati, wi e sori taki wi de nanga tangi te wi e gi sani nanga wi heri ati. Yesus ben taki fu a sani disi di a ben e luku fa sma ben e poti moni na ini den monikisi na a tempel. Di Yesus si fa wan pôti weduwe ben poti „tu pikin pisi moni di no abi furu waarde”, dan a taki: „Fu tru, mi e taigi unu: A weduwe disi, aladi a pôti, toku a ben poti moro na ini leki ala den sma disi. Bika den alamala ben poti presenti na ini fu san ben tan abra, ma na uma disi, fu a pina fu en, ben poti na ini ala san a ben abi fanowdu fu tan na libi.”​—Lukas 21:1-4.

19. Fu san ede a bun fu luku baka na sortu fasi wi e sori taki wi de nanga tangi?

¹⁹ A studie disi yepi wi fu si fa wi kan sori taki wi de nanga tangi. Disi musu gi wi alamala deki-ati fu go luku baka na sortu fasi wi e sori warderi. Wi kan tyari moro srakti-ofrandi fu prèise na Yehovah? Noso wi kan du moro fu horibaka gi a Kownukondre wroko na heri grontapu nanga yepi fu den gudu noso tra sani di wi abi? Te wi e du san wi man, dan wi kan de seiker taki wi lobi-ati Tata, Yehovah, di lobi fu gi sani, sa prisiri te wi e sori en taki wi de nanga tangi.

Yu e memre disi ete?

• Fu sortu sani wi musu taki Yehovah tangi?

• San wi kan leri fu den seti di den Israelsma ben abi, namku fu gi a di fu tin pisi, fu gi friwani bijdrage, èn fu no koti ala nyanyan na den gron?

• Fa wi kan kisi faya gi a pionierwroko?

• Fa wi kan gebroiki den „warti sani” fu wi fu taki Yehovah tangi?

[Aksi fu a tori disi]

[Prenki na tapu bladzijde 15]

’Ibri bun presenti nanga ibri volmaakti kado e kon fu hemel’

[Prenki na tapu bladzijde 16]

Sortu dri sani di wi kan leri fu a Wet, wi e si dyaso?

[Prenki na tapu bladzijde 18]

Sortu srakti-ofrandi wi kan tyari?