De srekasreka gi a dei fu Yehovah
De srekasreka gi a dei fu Yehovah
„Unu musu de srekasreka tu, bika a Manpikin fu libisma o kon na wan yuru di unu no ben prakseri.”—MATEYUS 24:44.
1. Fu san ede wi musu poti prakseri na a dei fu Yehovah?
A SA de wan dei fu feti nanga atibron, fu sari nanga pen, fu dungru nanga pina. A „bigi èn frede dei” fu Yehovah sa kon tapu na ogri seti fu sani disi trutru, neleki fa a Frudu ben sungu na ogri grontapu na ini a ten fu Noa. A sa kon seiker. Ma toku, „ibriwan sma di e kari a nen fu Yehovah, sa kisi kibri” (Yoèl 2:30-32; Amos 5:18-20). Gado sa pori den feanti fu en èn a sa kibri en pipel. A profeiti Sefanya ben poti krakti tapu a prenspari dei disi, fu di a taki: „A bigi dei fu Yehovah de krosibei. A de krosibei, èn a e hasti ensrefi fu tru” (Sefanya 1:14). Ma o ten Gado sa tyari a krutu disi kon?
2, 3. Fu san ede a de tumusi prenspari taki wi e sreka wisrefi gi a dei fu Yehovah?
2 „Nowan sma sabi a dei nanga a yuru dati; srefi den engel fu hemel nanga a Manpikin no sabi; ma soso a Tata sabi”, na so Yesus ben taki (Mateyus 24:36). Fu di wi no sabi soifri o ten a dei fu Yehovah sa kon, meki a de prenspari taki wi poti prakseri na den wortu fu a yaritekst fu 2004: „Tan na ai . . . De srekasreka.”—Mateyus 24:42, 44.
3 Yesus ben sori fa den sma di de srekasreka sa tyari kon na wán wantronso fu kisi kibri, aladi trawan o libi na baka. A ben taki: „Tu man o de na ini den gron: a wan den o teki tyari gowe, a trawan den o libi na baka; tu uma o mara nanga na anumiri: a wan den o teki tyari gowe èn a trawan den o libi na baka” (Mateyus 24:40, 41). Fa a o de nanga wi te a tumusi prenspari ten dati doro? Wi o de srekasreka, noso a dei o kisi wi sondro taki wi fruwakti dati? A fasi fa a o de nanga wi abi furu fu du nanga den sani di wi e du now. Efu wi wani de srekasreka gi a dei fu Yehovah, dan wi musu luku bun taki wi no e kisi a denki di furu sma abi now. Boiti dati, wi musu du muiti tu fu no fadon na ini wan spesrutu sortu situwâsi na yeye fasi, èn wi musu luku bun gi spesrutu fasi fu libi.
Luku bun nanga wan mi-no-ke fasi
4. Fa den sma fu a ten fu Noa ben e tyari densrefi?
4 Prakseri den dei fu Noa. „Nanga bribi Noa, baka di a ben kisi wan warskow fu Gado fu sani di a no ben si ete, ben sori taki a ben abi frede gi Gado èn ben bow wan ark fu kibri na osofamiri fu en”, na so Bijbel e taki (Hebrewsma 11:7). Na ark ben o de wan aparti sani gi den sma fu a ten dati, èn den ben o man si en krinkrin. Boiti dati, Noa ben de „wan preikiman fu regtfardikifasi” (2 Petrus 2:5). Ma toku, a bow-wroko nanga a preikiwroko fu Noa no ben meki den sma kenki a fasi fa den ben e libi. Fu san ede? Fu di den ben „nyan, den ben dringi, man ben trow èn sma ben gi umasma fu trow”. Den sma gi suma Noa ben e preiki, ben poti so furu prakseri na den eigi afersi èn na prisiri, taki „den no ben poti prakseri na san ben pasa, teleki a frudu kon èn a wai den alamala puru”.—Mateyus 24:38, 39.
5. Sortu denki den sma fu Sodom na ini a ten fu Lot ben abi?
5 A srefi sani ben pasa na ini den dei fu Lot. Den Buku fu Bijbel e taigi wi: „Den ben e nyan, den ben e dringi, den ben e bai sani, den ben e seri sani, den ben e prani, den ben e bow. Ma a dei di Lot ben komoto na Sodom, faya nanga swarfu ben fadon komoto na hemel leki alen èn ben pori den alamala” (Lukas 17:28, 29). Baka di den engel ben warskow Lot fu a pori di ben de fu kon, dan Lot go na den man di ben o trow nanga den umapikin fu en, fu taigi den san ben o pasa. Ma gi den man dati, „[Lot] ben gersi wan man di ben meki spotu”.—Genesis 19:14.
6. Gi sortu fasi fu denki wi musu luku bun?
6 Neleki den dei fu Noa nanga Lot, „na so a denoya fu a Manpikin fu libisma” ben o de tu, na so Yesus ben taki (Mateyus 24:39; Lukas 17:30). Iya, furu sma na ini a ten disi abi wan mi-no-ke fasi. Wi musu luku bun taki wi no e kisi a fasi fu denki dati tu. A no de wan fowtu sani fu nyan switi nyanyan, noso fu dringi sopi, ma wi no musu du dati pasa marki. Na so a trowlibi no de wan fowtu sani tu, a de wan seti fu Gado. Ma te den sani dati e tron den moro prenspari sani na ini wi libi èn te wi e poti yeye afersi na wan sei, dan wi no kan taki dati wi de srekasreka gi a frede dei fu Yehovah, a no so?
7. Sortu tumusi prenspari sani wi musu aksi wisrefi bifo wi bosroiti fu du wan sani, èn fu san ede?
7 „A ten di tan abra kon syatu”, na so na apostel Paulus ben taki. „Fu dati ede, meki den wan di abi wan wefi, de neleki den no abi wan” (1 Korentesma 7:29-31). Wi abi soso wan syatu pisi ten ete fu klari a Kownukondre preikiwroko di Gado gi wi fu du (Mateyus 24:14). Srefi den sma di trow ben kisi a rai fu Paulus fu no poti so furu prakseri na a patna fu den, taki Kownukondre afersi e kon na a di fu tu presi na ini den libi. A de krin fu si taki Paulus ben wani taki wi musu abi wan heri tra denki leki den sma di abi wan mi-no-ke fasi. Yesus ben taki: „Fu dati ede, tan suku a kownukondre nanga [Gado] En regtfardikifasi fosi èn unu sa kisi ala den tra sani tu” (Mateyus 6:33). Te wi e teki iniwan bosroiti, noso bifo wi e go du wan sani, dan a de tumusi prenspari fu aksi wisrefi: ’Fa disi sa abi krakti tapu a bosroiti di mi teki fu poti Kownukondre afersi na a fosi presi na ini mi libi?’
8. Efu den aladei sani fu a libi e teki ala wi ten nanga prakseri, dan san wi musu du?
8 Efu wi e si taki den aladei sani fu a libi teki so furu fu wi ten kaba taki wi no e poti prakseri moro na yeye afersi, dan san wi musu du? A de so taki a fasi fa wi e libi no e difrenti srefi nanga di fu den grontapusma di no abi wan soifri sabi fu Bijbel èn di no de Kownukondre preikiman? Efu disi de so, dan wi musu taki nanga Yehovah na ini begi fu a tori disi. Yehovah kan meki wi kisi a yoisti fasi fu denki (Romesma 15:5; Filipisma 3:15). A kan yepi wi fu poti Kownukondre afersi na a fosi presi, fu du san bun, èn fu du a wroko di a gi wi fu du.—Romesma 12:2; 2 Korentesma 13:7.
Du muiti fu no dyonko na yeye fasi
9. Fu san ede wi musu du muiti fu no dyonko na yeye fasi, soleki fa skrifi na ini Openbaring 16:14-16?
9 A profeititori di e taki fu „a feti fu a bigi dei fu Gado na Almaktiwan” di o de dyonsro na Armagedon, e warskow sosrefi taki son sma no sa tan na ai. „Luku! Mi e kon leki wan fufuruman”, na so Masra Yesus Krestes e taki. „Koloku fu a sma di e tan na ai èn e tan weri en tapusei krosi, so taki a no sa waka nanga sososkin èn sma e si a syenfasi fu en” (Openbaring 16:14-16). Den tapusei krosi di kari dyaso abi fu du nanga den sani di e sori taki wi na Kresten Kotoigi fu Yehovah. A abi fu du nanga wi wroko leki Kownukondre preikiman èn nanga a fasi fa wi e tyari wisrefi leki Kresten. Efu wi e fadon na sribi na yeye fasi, dan wi kan lasi a tapusei krosi fu wi leki Kresten. Dati o meki wi kisi syen èn wi kan lasi ala sani srefi. Wi musu du muiti fu no dyonko na yeye fasi, noso fu no kon weri na yeye fasi. Fa wi kan meki taki disi no pasa?
10. Fu san ede a leisi di wi e leisi Bijbel e yepi wi fu tan na ai na yeye fasi?
10 Ibri tron baka, Bijbel e sori taki a de prenspari fu tan na ai èn fu de nanga krin frustan. Fu eksempre, den Evangelietori e memre wi: „Tan na ai” (Mateyus 24:42; 25:13; Markus 13:35, 37); „de srekasreka” (Mateyus 24:44; Lukas 12:40); „tan luku, tan na ai” (Markus 13:33). Baka di Paulus taki dati a dei fu Yehovah o kon sondro taki a grontapu disi fruwakti dati, dan a e gi den Kresten brada nanga sisa fu en a deki-ati disi: „No meki wi sribi go doro soleki fa den trawan e du, ma meki wi tan na ai èn de nanga krin frustan” (1 Tesalonikasma 5:6). Na ini a lasti buku fu Bijbel, Yesus Krestes di kisi bigi makti, e sori krinkrin taki a o kon wantronso; a e taki: „Mi e kon esi” (Openbaring 3:11; 22:7, 12, 20). Furu fu den Hebrew profeiti ben fruteri fa a bigi krutudei fu Yehovah ben o de, èn den ben warskow sma gi a dei dati tu (Yesaya 2:12, 17; Yeremia 30:7; Yoèl 2:11; Sefanya 3:8). Te wi e leisi Gado Wortu, Bijbel, ibri dei èn te wi e denki dipi fu san wi leisi, dan dati sa de wan bigi yepi gi wi fu tan na ai na yeye fasi.
11. Fu san ede a de prenspari fu studeri Bijbel efu wi wani tan na ai na yeye fasi?
11 Iya, wi e kisi furu krakti fu man tan na ai na yeye fasi te wi e studeri Bijbel fayafaya èn te wi e gebroiki den Bijbel publikâsi di a „getrow èn koni srafu” e gi! (Mateyus 24:45-47) Ma fu man kisi wini te wi e studeri, dan wi musu suku fu kon sabi moro èn wi musu du disi doronomo (Hebrewsma 5:14–6:3). Wi musu teki tranga yeye nyanyan doronomo. Na ini a ten disi a no makriki fu feni ten fu du disi (Efeisesma 5:15, 16). Ma toku, a no sari fu leisi Bijbel nanga den Bijbel publikâsi soso te wi e feni ten fu du dati. Efu wi wani tan „abi wan tranga bribi” èn efu wi wani tan na ai, dan a de prenspari taki wi studeri doronomo.—Titus 1:13.
12. Fa den Kresten konmakandra, kring konmakandra, nanga kongres, e yepi wi fu no dyonko na yeye fasi?
12 Kresten konmakandra, kring konmakandra, nanga kongres, e yepi wi tu fu no dyonko na yeye fasi. Fa so? Nanga yepi fu den leri di wi e kisi. Den sani di wi e yere na den konmakandra disi, e memre wi doronomo taki a dei fu Yehovah de krosibei. Den alawiki Kresten konmakandra e gi wi okasi tu fu ’tranga makandra fu sori lobi èn fu du bun wroko’. Te wi e tranga makandra, noso te wi e gi makandra deki-ati na a fasi dati, dan dati e yepi wi tu fu tan na ai na yeye fasi. Dati meki a no e fruwondru wi taki wi kisi a komando fu kon makandra doronomo, now di wi „e si a dei e kon krosibei”.—Hebrewsma 10:24, 25.
13. Fa a Kresten diniwroko e yepi wi fu tan na ai na yeye fasi?
13 Wan tra sani di e yepi wi fu tan na ai, na te wi e teki prati na a Kresten diniwroko nanga wi heri ati. A moro bun fasi fu memre wisrefi na den marki fu a ten èn na san den marki dati wani taki, na fu taki nanga trawan fu den sani dati, a no so? Te wi e studeri Bijbel nanga sma èn wi e si fa den e go na fesi èn fa den e bigin du den sani di den leri, dan wi e kisi moro faya fu du a wroko fu wi. ’Sreka un denki fu du wroko’, na so na apostel Petrus taki, ’de nanga krin frustan dorodoro’ (1 Petrus 1:13). Wan heri bun fasi fu no dyonko na yeye fasi, na te ’ala ten wi abi furu fu du na ini a wroko fu Masra’.—1 Korentesma 15:58.
Luku bun nanga iniwan fasi fu libi di kan pori a yeyefasi fu yu
14. Gi sortu fasi fu libi Yesus e warskow na ini Lukas 21:34-36?
14 Yesus ben gi ete wan warskow na ini a tumusi prenspari profeititori fu a marki fu en denoya. A ben taki: „Poti prakseri na unsrefi taki noiti un ati musu kon hebi nanga nyan pasa marki èn dringi pasa marki èn den broko-ede fu a libi, èn a dei dati e kon na un tapu wantronso, na ini wán momenti leki wan trapu. Bika a sa kon na tapu ala den sma di e libi na grontapu. We, tan na ai, èn begi ala ten taki unu kan pasa ala den sani disi di sa feni presi seiker, èn fu tanapu na fesi a Manpikin fu libisma” (Lukas 21:34-36). Yesus ben fruteri krin na sortu fasi fu libi furu sma e gi densrefi abra: nyan pasa marki, dringi pasa marki, èn wan fasi fu libi di e gi broko-ede.
15. Fu san ede wi no musu nyan èn dringi pasa marki?
15 A no de akruderi Bijbel gronprakseri te wan sma e nyan èn e dringi pasa marki, èn wi no musu du den sani dati kwetikweti. „No kon na mindri sma di e dringi win pasa marki, na mindri den wan di e nyan meti na wan gridi fasi”, na so Bijbel e taki (Odo 23:20). Ma wan sma no abi fu nyan noso dringi pasa marki fosi, fu kisi problema. Langa ten bifo wan sma nyan noso dringi pasa marki, a kan bigin dyonko kaba, noso a kan kon lesi na yeye fasi. Wan odo fu Bijbel e taki: „A lesiman e sori taki a wani furu sani, ma en sili no abi noti” (Odo 13:4). Kande so wan sma wani fu du san Gado wani, ma lesi meki a no man du dati.
16. Fa wi kan meki taki broko-ede di abi fu du nanga wi osofamiri, no tron leki wan hebi gi wi?
16 Gi sortu broko-ede fu a libi Yesus ben warskow wi? Den abi fu du nanga problema fu wisrefi di e gi wi broko-ede, fa fu sorgu gi na osofamiri, nanga den sortu sani dati. A no de wan koni sani kwetikweti fu meki den broko-ede disi tron leki wan hebi gi wi! „Suma fu unu di e broko en ede nanga sani, kan meki en libi kon pikinso moro langa?”, na so Yesus ben aksi. A ben gi den arkiman a deki-ati: „Noiti no broko un ede nanga sani èn no taki: ’San wi o nyan?’ noso ’San wi o dringi?’ noso ’San wi o weri?’ Bika ala den sani disi na san den grontapu sma e feti fu kisi. Bika un Tata na hemel sabi taki unu abi ala den sani disi fanowdu.” Te wi e poti Kownukondre afersi na a fosi presi na ini wi libi èn te wi abi a frutrow taki Yehovah sa sorgu wi, dan wi no sa broko wi ede tumusi nanga sani, èn dati sa yepi wi fu tan na ai.—Mateyus 6:25-34.
17. Fa wi kan kisi broko-ede te wi e suku fu kon gudu?
17 Wi kan kisi broko-ede tu te wi e suku fu kon gudu. Fu eksempre, son sma e meki den libi kon moro muilek, fu di den wani libi leki gudusma aladi den no abi a moni fu du dati. Trawan fadon na ini a trapu fu du kruka sani di ben musu meki den kon gudu esi-esi, èn trawan baka du bisnis pe den lasi furu moni. Gi trawan a de tumusi prenspari fu teki moro hei skoroleri so taki den kan feni wan wroko di e pai moro furu moni. A tru taki skoroleri kan de wan yepi fu feni wroko. Ma son sma gebroiki so furu ten fu kisi moro hei skoroleri taki den kon swaki na yeye fasi. Disi no bun gi den srefisrefi, now di a dei fu Yehovah e kon moro krosibei! Bijbel e warskow: „Den sma di abi a fasti bosroiti fu kon gudu, e kon na ini wan tesi èn wan trapu èn furu don èn takru lostu, di e meki sma fadon go na ini pori.”—1 Timoteyus 6:9.
18. Sortu sani wi musu leri efu wi no wani taki gudu e tron a moro prenspari sani na ini wi libi?
18 Efu wi no wani taki gudu e tron a moro prenspari sani na ini wi libi, dan a de tumusi prenspari taki wi e leri fu si san bun èn san ogri te wi e teki bosroiti. Wi kan leri fu du disi te doronomo wi e teki ’tranga nyanyan di de gi lepi sma’ èn te wi e ’gebroiki a koni fu wi fu man si sani krin’ (Hebrewsma 5:13, 14). Te wi e ondrosuku „san na den moro prenspari sani” di wi musu poti na a fosi presi na ini wi libi, dan dati sa kibri wi tu fu no teki bosroiti di kan abi takru bakapisi.—Filipisma 1:10.
19. San wi musu du efu wi kon si taki wi abi pikinso ten nomo gi yeye afersi?
19 Te gudu de a moro prenspari sani na ini wi libi, dan dati kan meki taki wi no e si krin moro san de prenspari trutru. A bakapisi de taki wi no abi ten moro gi yeye afersi. Fa wi kan ondrosuku wisrefi èn sorgu taki wi no e kisi so wan fasi fu libi? Wi musu begi fu kon sabi fa èn san wi kan du fu kenki wi libi na so wan fasi taki wi no du sani di e teki furu fu wi ten. Kownu Salomo fu owruten Israel ben taki: „A sribi fu a sma di e dini, switi, awansi a e nyan pikinso noso furu; ma den furu sani di a guduwan abi, e meki taki a no e sribi” (Preikiman 5:12). A de so taki wi e gebroiki furu fu wi ten nanga krakti fu luku den gudu di wi no abi fanowdu trutru? O moro gudu wi abi, o moro ten wi abi fanowdu fu hori den bun, èn wi o abi fu pai moro moni fu kibri den èn fu sorgu taki nowan sani no pasa nanga den. Yu no denki taki yu o kisi wini te yu e seti sani fu no abi so furu moro?
De srekasreka, awinsi san e pasa
20, 21. (a) Sortu dyaranti na apostel Petrus e gi fu a dei fu Yehovah? (b) Sortu sani wi musu tan du aladi wi de srekasreka gi a dei fu Yehovah?
20 A grontapu na ini a ten fu Noa ben kon na wan kaba, èn a srefi sani o pasa tu nanga a disiten seti fu sani. Na apostel Petrus e gi wi a dyaranti: „A dei fu Yehovah sa kon leki wan fufuruman, pe den hemel sa pasa gowe nanga wan bigi babari, ma den elementi di faya srefisrefi, sa smèlter èn grontapu nanga den wroko fu en sa bron krinkrin.” Den hemel wani taki den ogri tirimakti, èn grontapu wani taki den libisma di no sabi Gado. Nowan fu den sa man pasa a bigi, faya atibron fu Gado libilibi. Petrus e sori fa wi kan de srekasreka gi a dei dati. A e taki: „Fu di ala den sani disi o smèlter gowe na so wan fasi, dan unu musu tyari unsrefi na wan santa fasi èn sori taki unu e dini Gado na wan getrow fasi; unu musu fruwakti a denoya fu a dei fu Yehovah èn hori a dei dati bun na prakseri!”—2 Petrus 3:10-12.
21 Te wi e go na den Kresten konmakandra doronomo èn te wi e preiki a bun nyunsu, dan wi e sori taki wi e dini Gado na wan getrow fasi. Meki wi tan du den sani disi nanga wi heri ati gi Gado, aladi wi e wakti nanga pasensi tapu a bigi dei fu Yehovah. Meki wi ’du ala muiti fu Gado feni wi sondro flaka èn sondro fowtu èn na ini vrede’.—2 Petrus 3:14.
Yu e memre disi ete?
• Fu san ede wi musu de srekasreka gi a dei fu Yehovah?
• Efu den aladei sani fu a libi e teki ala wi ten nanga prakseri, dan san wi musu du?
• San sa yepi wi fu no dyonko na yeye fasi?
• Nanga sortu fasi fu libi wi musu luku bun, èn fa wi kan du dati?
[Aksi fu a tori disi]
[Prenki na tapu bladzijde 20, 21]
Den sma na ini a ten fu Noa no ben poti prakseri na a krutu di ben de fu kon — yu e du dati?
[Prenki na tapu bladzijde 23]
Yu kan kenki yu libi, so taki yu abi moro ten gi yeye afersi?