Den Gilead studenti kisi deki-ati fu taki „tumusi moi sani”

WAN bigi grupu fu 6635 sma fu 52 kondre ben arki a programa na a kaba fu a di fu 115 klas fu a Waktitoren Bijbelskoro Gilead, tapu 13 september 2003.

Den ben yere fa den 48 studenti fu a klas, ben kisi deki-ati komoto fu Bijbel, fu fruteri sma na ini 17 kondre fu „den tumusi moi sani di Gado du” (Tori fu den Apostel 2:11). Na ini den 17 kondre disi, den studenti ben o du a zendelingwroko fu den.

Stephen Lett, di de wan memre fu a Tiri Skin fu Yehovah Kotoigi, ben de a fesiman fu a programa disi. A ben bigin fu memre den studenti a sani disi: „Te unu e gowe fu dyaso, awinsi pe unu e go noso awinsi na ini sortu situwâsi unu de, tan memre taki moro sma e horibaka gi unu, leki den wan di de teige unu.” Brada Lett ben gebroiki kapitel 6 fu a Bijbel buku Tu Kownu, fu memre den studenti taki den kan de seiker taki Yehovah nanga furu tin dusun engel e horibaka gi den aladi den e meki sma kon sabi „den tumusi moi sani di Gado du” (2 Kownu 6:15, 16). Den fosi yarihondro Kresten ben kisi fu du nanga frufolgu èn mi-no-ke fasi na ini a preikiwroko nanga a leriwroko fu den, èn den srefi sortu sani e pasa tu nanga Kresten zendeling na ini a ten disi. Ma den kan abi a frutrow taki den sa kisi yepi fu hemel, sosrefi fu Yehovah organisâsi na grontapu.​—Psalm 34:7; Mateyus 24:45.

Taki fu „den tumusi moi sani di Gado du”

Baka den biginwortu fu a fesiman, dan Harold Corkern fu a Bijkantoro Komte fu Amerkankondre, ben hori a lezing „Te yu no e fruwakti tumusi furu, dan yu sa abi prisiri nanga bun bakapisi na ini yu diniwroko”. Brada Corkern ben sori taki te wan sma e fruwakti wan sani di no e kon tru, dan disi kan meki a lasi-ati, soleki fa Odo 13:12 e sori. Ma furu tron wan sma e lasi-ati te a e fruwakti tumusi furu sani. Den studenti musu si densrefi èn den musu si trawan na wan yoisti fasi, dati wani taki, na a fasi fa den de trutru. Den musu fruwakti taki den o meki fowtu, ma dati no musu meki den sari tumusi aladi den e meki muiti fu yepi trawan fu frustan „den tumusi moi sani di Gado du”. Brada Corkern ben gi den nyun zendeling a deki-ati fu frutrow tapu Yehovah, „a sma di e pai den wan di e suku en seryusu”.​—Hebrewsma 11:6.

Baka dati, soleki fa a programa ben sori, dan Daniel Sydlik, wan memre fu a Tiri Skin, ben taki fu a lezing „A Kresten howpu​—San na dati?” A ben taki: „Howpu na wan tumusi moi sani di Kresten musu abi. A de a yoisti markitiki di e meki taki wi abi wan bun banti nanga Gado. Wan sma di no de wan Kresten, noiti kan abi so wan howpu leki san wi abi.” Brada Sydlik ben go moro fara fu fruteri fu den difrenti pisi fu a Kresten howpu di e yepi wi fu man tan abi prisiri aladi a libi lai problema. „Howpu e meki taki ibri dei wi e kisi krakti baka fu du wi wroko nanga faya èn nanga prisiri.” A howpu fu wan Kresten e yepi en fu si Yehovah leki wan Gado di e du san a pramisi èn a e prisiri fu dini en.​—Romesma 12:12.

Wallace Liverance, a brada di abi a frantwortu fu na administrâsi fu a skoro, ben gi den  studenti deki-ati fu „Tan waka nanga a yeye” (Galasiasma 5:16). A ben sori taki pikinmoro Baruk, a sekretarsi fu Yeremia, ben tapu fu waka nanga a yeye. Wan pisi ten, Baruk ben kon weri èn a bigin suku bigi sani gi ensrefi (Yeremia 45:3, 5). Brada Liverance sori sosrefi taki son sma ben tapu fu waka baka Yesus èn den ben drai baka gi den yeye tru tori, di de fanowdu fu man kisi frulusu. A sani disi ben pasa nanga den fu di den no ben e frustan san Yesus ben e leri, èn a ben hati den fu si taki den sani di den ben fruwakti leki libisma, no ben kon tru na a ten dati (Yohanes 6:26, 27, 51, 66). San zendeling kan leri fu den tori disi, now di den abi a wroko fu meki sma kon sabi a Mekiman èn a prakseri fu en? Den studenti ben kisi leki rai taki den no musu feti fu kisi posisi, den no musu suku fu kisi bigi nen na sma, èn den no musu gebroiki a wroko di den kisi fu Gado, fu suku wini gi densrefi.

„Yu sa de wan sma di e gi, noso wan sma di e teki?” ben de a prenspari aksi na ini a lezing fu a Gilead leriman Markus Noumair. A ben taki fu Krutuman 5:2, pe wan tu Israelsma ben kisi prèise fu di den ben de klariklari fu dini na ini a legre fu Barak. Den Gilead studenti ben kisi prèise fu a fasi fa den ben de klariklari fu gi yesi na a Moro Bigi Barak, Yesus Krestes, fu gi moro yepi na ini a feti na yeye fasi. Srudati fu Krestes musu du ala san den man, so taki a sma di teki den na wroko, kan feni den bun. Brada Noumair ben  memre den studenti: „Te wi bigin du sani soso fu plisi wisrefi, dan wi no e feti moro nanga a feanti . . . A zendeling diniwroko no abi fu du nanga yu. A abi fu du nanga Yehovah, nanga a reti di a abi fu tiri hemel nanga grontapu, èn nanga den sani di musu pasa akruderi en wani. Wi no e dini leki zendeling fu di wi wani taki Yehovah meki wi koloku, ma wi e dini en fu di wi lobi en.”​—2 Timoteyus 2:4.

Baka dati, a Gilead leriman Lawrence Bowen ben de fesiman na ini wan takimakandra, èn a pisi fu en ben nen „Santa den nanga yepi fu waarheid” (Yohanes 17:17). A ben sori taki den studenti fu a di fu 115 klas, na santa dinari fu Gado. Aladi den ben de na a skoro disi, den ben teki prati na a preikiwroko sosrefi fu suku den opregti sma di lobi waarheid. Neleki Yesus nanga den fosi disipel fu en, den studenti no ben taki ’san densrefi e prakseri’ (Yohanes 12:49, 50). Nanga faya den pristeri a wortu fu waarheid di e gi libi èn di e komoto fu Gado. Den demonstrâsi fu san den ondrofeni, sosrefi den ondrofenitori di den ben fruteri, ben sori omeni krakti Bijbel ben abi tapu den sma di den ben miti.

Rai nanga ondrofenitori e gi deki-ati

Anthony Pérez nanga Anthony Griffin, na memre fu a Dienst Afdeling fu a Bijkantoro na Amerkankondre. Den ben du wan tu interview nanga brada di de na ini den Bijkantoro Komte fu difrenti kondre na heri grontapu. Den brada disi ben taki fu problema di kan miti nyun zendeling, èn nanga yepi fu den eigi ondrofenitori, den sori den nyun zendeling san den kan du. Wan tu fu den problema abi fu du nanga a kulturu fu den sma, kondre di waran ala ten, noso a fasi fa kerki nanga politiek e drai na ini a libimakandra; den sani disi kan de heri tra fasi leki fa den studenti gwenti. San kan yepi den nyun zendeling fu horidoro na ini a nyun situwâsi fu den? Lobi gi Yehovah, èn lobi gi den sma fu a kondre. Sosrefi, den no musu prakseri fa den libi ben de fosi, èn den no musu du sani sondro fu denki fosi. Wan memre fu wan Bijkantoro Komte ben taki: „Hondrohondro yari fosi wi go na a kondre, sma ben e libi drape kaba. We efu den man libi drape, dan wi sosrefi man libi drape tu èn wi kan fiti wisrefi na a situwâsi drape. Ala leisi te problema ben miti wi, dan wi ben e si den leki okasi fu kenki den fasi fu wi so taki wi kan tron moro bun sma. Na den ten dati yu e begi fayafaya èn yu e frutrow tapu a yeye fu Yehovah, dan yu e ondrofeni taki den wortu fu Yesus de tru di a taki: ’Mi sa de nanga unu.’”​—Mateyus 28:20.

A heimarki fu a programa ben de di Samuel Herd, wan memre fu a Tiri Skin, ben hori a lezing „Tan taki fu den tumusi moi sani di Gado du”. Di santa yeye kon na tapu den disipel fu Yesus na a Pinksterfesa na ini 33 G.T., dan den kon kisi a faya fu taki fu „den tumusi moi sani di Gado du”. San kan yepi den nyun zendeling fu taki fu Gado Kownukondre nanga a srefi sortu faya dati? A srefi santa yeye. Brada Herd ben gi den studenti di ben kaba a skoro, a deki-ati fu „de fayafaya na ini a yeye”, fu tan abi prisiri na ini a wroko di den kisi fu du, èn fu no frigiti san den leri na a skoro (Romesma 12:11). „Bijbel na wan tumusi moi sani fu Gado”, na so Brada Herd ben taki. „Noiti no si en leki wan sani di no de so prenspari. A boskopu fu en de libilibi. A e tyari a moro prenspari pisi fu wan tori kon na krin. Gebroiki en fu poti sani na ini yu libi kon reti. Meki a kenki a fasi fa yu e denki. Sorgu taki yu e tan denki na wan yoisti fasi fu sani fu di yu e studeri, leisi, èn denki dipi fu den sani di skrifi na ini den Buku fu Bijbel . . . Poti en leki marki èn abi a fasti bosroiti fu gebroiki a leri di yu kisi na a Gileadskoro, fu tan taki fu ’den tumusi moi sani di Gado du’.”

Baka dati, den leisi den boskopu di brada nanga sisa na heri grontapu seni, fu gi odi èn fu winsi den studenti wan bun ten na den kondre pe den ben o go wroko. Den studenti ben kisi a diploma fu den, èn wan fu den ben leisi wan brifi pe a klas ben sori taki den e warderi a leri di den kisi na a skoro. Ne Brada Lett ben tapu a prisiri konmakandra disi na wan moi fasi, fu di a taki fu 2 Kroniki 32:7 nanga Deuteronomium 20:1, 4. A ben sori go baka na san a ben taki na a bigin, èn a taki: „Sobun, lobi brada nanga sisa, te unu komoto dyaso fu go feti a yeye strei na ini den nyun kontren pe unu sa go, memre taki Yehovah e waka nanga unu. Noiti no frigiti taki moro sma e horibaka gi unu, leki den wan di de teige unu.”

[Faki na tapu bladzijde 25]

WAN TU SANI FU A KLAS

A nomru fu kondre di ben de drape: 7

A nomru fu kondre pe den e go: 17

A nomru fu studenti: 48

Gemiddeld yari di den abi: 33,7

Gemiddeld yari di den de na ini a waarheid: 17,8

Gemiddeld yari di den e du furuten diniwroko: 13,5

[Prenki na tapu bladzijde 26]

A di fu 115 klas fu a Waktitoren Bijbelskoro Gilead di klari a skoro nanga bun bakapisi

Den nen di de fu si na ondrosei, poti na ini rei di nomru fu fesisei go na bakasei, èn den nen poti fu a kruktu-anusei go na a reti-anusei na ini ibri rei.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.