San wi e leri fu den famiriman di Yesus ben abi na grontapu

SAN yu sabi fu den famiriman fu Yesus, den sma di a ben libi makandra nanga den na ini den fosi 30 yari fu en libi na grontapu, teleki a teki dopu? San den Evangelietori e fruteri wi? San wi kan leri te wi kon sabi sortu sma den famiriman fu en ben de? Yu kan kisi wini fu den piki disi.

Yesus ben gebore na ini wan gudu famiri? Yosef, Yesus en kwekipapa, ben de wan temreman. Disi wani taki dati a ben e du hebi wroko, èn furu tron a ben musu koti bon fu feni udu. Di a papa nanga a mama fu Yesus go na Yerusalem sowan 40 dei baka di a gebore, dan den pristeri wan srakti-ofrandi soleki fa a Wet ben taki dati. Den ben tyari wan manskapu makandra nanga wan doifi, soleki fa a Wet ben e sori dati? Nôno. Soleki fa a sori, dan den no ben man pai gi den sortu ofrandi dati. Toku a Wet ben abi wan seti gi den pôtiwan. Akruderi a seti dati, Yosef nanga Maria tyari wan ofrandi fu „tu stondoifi noso tu yongu osodoifi”. Te wi e luku taki a famiri disi ben teki den moro bunkopu meti disi, dan wi kan frustan taki den ben de wan pôti famiri.​—Lukas 2:22-24; Lefitikus 12:6, 8.

Yu kan si taki Yesus Krestes, a sma di o de Tiriman fu ala libisma, ben gebore na mindri pôti sma, na mindri den sma di ben musu wroko tranga fu man abi den moro prenspari sani na ini a  libi. A gro kon tron wan temreman, neleki en kwekipapa (Mateyus 13:55; Markus 6:3). „Aladi [Yesus] ben gudu” leki wan makti yeye na ini hemel, toku Bijbel e taki dati a „kon pôti” fu a bun fu wi. A lagi ensrefi fu di a tron wan libisma èn a gro kon bigi na ini wan osofamiri di no ben gudu (2 Korentesma 8:9; Filipisma 2:5-9; Hebrewsma 2:9). Yesus no ben gebore na ini wan gudu famiri, èn a kan taki na fu dati ede meki son sma no ben e frede te den ben de makandra nanga en. Den no ben e kon na Yesus fu di a ben gudu noso fu di a ben abi wan hei posisi. Sma ben kan warderi en fu den leri fu en, den moi fasi fu en, èn den wondru di a ben e du (Mateyus 7:28, 29; 9:19-33; 11:28, 29). Wi kan si taki Yehovah na wan koni Gado fu di a meki Yesus gebore na ini wan osofamiri di no ben gudu.

Meki wi poti prakseri now na den famiriman fu Yesus fu si san wi kan leri fu den.

Yosef ben de wan regtfardiki man

Di Yosef kon sabi taki na uma di a ben meki mofo nanga en fu trow ben de nanga bere ’bifo den ben libi nanga makandra’, dan a sani disi musu ben gi en broko-ede. Iya, a ben lobi Maria, ma a ben tegu trutru gi iniwan sortu hurudu. A heri sani disi ben meki taki a ben lasi a reti di a ben abi fu trow nanga wan nyunwenke. Na ini a ten dati, a ben de so taki te wan uma ben meki mofo fu trow nanga wan man, dan sma ben e si na uma dati kaba leki a wefi fu a man. Yosef prakseri a tori bun èn a bosroiti fu broko trow na wan kibrifasi nanga Maria, so taki sma no ben o ston en kiri leki wan uma di ben du sutadu.​—Mateyus 1:18; Deuteronomium 22:23, 24.

Ne wan engel kon na ini wan dren na Yosef èn a taigi en: „No frede fu tyari yu wefi Maria go na oso, bika na santa yeye meki a de nanga bere. A sa kisi wan manpikin di yu musu kari Yesus, bika na en sa puru den sondu fu en pipel.” Di Yosef kisi a rai dati fu Gado, dan a du leti so èn a tyari Maria go na oso.​—Mateyus 1:20-24.

A bosroiti disi meki taki a man dati di ben de regtfardiki èn getrow, yepi fu meki a sani di Yehovah ben taki nanga yepi fu a profeiti Yesaya, kisi wan kontru. Yesaya ben taki: „Luku! A yonguwenke srefi sa kon kisi bere trutru, èn a e meki wan manpikin, èn fu tru a sa gi en a nen Imanuel” (Yesaya 7:14). A de sondro tweifri taki Yosef ben de wan man di ben abi yeye fasi èn a ben warderi a grani di a ben kisi fu tron a kwekipapa fu a Mesias, aladi a no ben o de a trutru papa fu a fosi manpikin di Maria ben kisi.

Yosef no ben abi seks demakandra nanga Maria teleki a manpikin fu en ben gebore (Mateyus 1:25). A ben kan de wan tyalensi gi a nyun trowpaar disi fu no abi seks demakandra wan pisi ten, ma soleki fa a sori, dan den no ben wani sma fu tweifri bakaten efu Yehovah ben de trutru a Tata fu a beibi. A sani disi e sori heri moi taki den ben man dwengi densrefi! Yosef ben feni a wani fu Gado moro prenspari leki en eigi seks firi.

Na fo okasi Yosef kisi rai fu engel fa fu kweki Yesus. Na dri fu den okasi disi a kisi rai di ben sori en pe a ben musu kweki a boi. Yosef ben musu gi yesi wantewante efu a ben wani taki a pikin ben musu tan na libi. Ala den dri leisi dati, Yosef no draidrai, ma a tyari a yongu pikin go na Egepte fosi, èn baka dati a tyari en go baka na Israel. A sani disi kibri a yongu Yesus en libi na a ten di Herodes ben e kiri someni beibi di ben de boi. Èn fu di Yosef ben gi yesi, meki den profeititori di abi fu du nanga a Mesias, kisi wan kontru.​—Mateyus 2:13-23.

Yosef ben leri Yesus wan wroko so taki a ben kan sorgu ensrefi. Na so a du kon taki sma no ben sabi Yesus nomo leki a „manpikin fu a temreman”, ma den ben sabi en sosrefi leki „a temreman” (Mateyus 13:55; Markus 6:3). Na apostel Paulus ben skrifi taki Yesus ben „kisi tesi na ala fasi neleki wi”. Fu dati ede, a ben musu de so, taki a ben e wroko tranga fu yepi fu sorgu a famiri.​—Hebrewsma 4:15.

 Te fu kaba, a lasti tori di e taki fu Yosef na ini den Kresten Buku fu Bijbel, e sori krin taki a ben e horibaka fayafaya gi a tru anbegi. Yosef ben tyari en osofamiri go na Yerusalem gi a Paskafesa. Soso mansma ben musu de na a fesa dati, ma Yosef ben teki en leki wan gwenti fu tyari en osofamiri go na Yerusalem „ibri yari”. A ben de klariklari fu du ala san ben de fanowdu fu go na Yerusalem, bika den ben musu waka pikinmoro 100 kilometer fu Nasaret fu man doro drape. Ma soleki fa Bijbel e sori, dan wan fu den leisi disi, a grupu no ben sabi pe Yesus ben de. Den feni en na ini a tempel pe a ben e arki den leriman fu a Wet, èn ben e poti aksi gi den. Aladi Yesus ben abi 12 yari nomo, toku a ben sori taki a ben abi bigi koni èn taki a ben sabi a Wortu fu Gado bun. A sani disi e sori taki a ben musu de so taki Yesus en papa nanga mama ben gi en bun leri èn taki den kweki en kon tron wan boi di ben abi yeye fasi (Lukas 2:41-50). Soleki fa a sori, dan Yosef dede wan pisi ten baka di a sani disi pasa, bika den tra Bijbel tori no e taki moro fu en.

Iya, Yosef ben de wan regtfardiki man di ben sorgu en famiri bun na yeye fasi, èn a ben gi den san den ben abi fanowdu fu man tan na libi. Yu e teki na eksempre fu Yosef, fu di yu e poti yeye afersi na a fosi presi na ini yu libi te yu kon sabi san na a wani fu Gado na ini a ten disi? (1 Timoteyus 2:4, 5). Yu de klariklari fu gi yesi na Gado en sten soleki fa a Wortu fu Gado e sori dati fu Yosef, so taki yu e sori taki yu abi a srefi sakafasi leki en? Yu e gi yu pikin bun leri so taki den kan taki nanga trawan fu yeye afersi?

Maria ben de wan dinari fu Gado di no ben e prakseri ensrefi nomo

Maria, Yesus en mama, ben de wan tumusi bun dinari fu Gado. Di na engel Gabrièl taigi Maria taki a ben o kisi wan pikin, dan a sani dati fruwondru en. A ben de wan nyunwenke di no ben „sribi ete nanga wan man”. Di Maria kon sabi taki a ben o kisi wan pikin nanga yepi fu santa yeye, dan a teki na boskopu nanga sakafasi, èn a taki: „Luku! Na umasrafu fu Yehovah! Meki sani waka nanga mi soleki fa yu taki” (Lukas 1:30-38). A ben warderi a spesrutu grani disi so te, taki a no ben frede den problema di ben kan miti en fu di a ben teki a bosroiti disi.

Iya, a bosroiti di Maria teki fu tron a mama fu Yesus, kenki en heri libi. Di a go na Yerusalem fu krin ensrefi na yeye fasi, dan wan lespeki owru man di nen Simeon taigi en: „Wan langa feti-owru o boro yu ati” (Lukas 2:25-35). Soleki fa a sori, dan Simeon ben taki fa Maria ben o firi te a ben o si fa furu sma ben o drai baka gi Yesus èn fa sma ben o spikri en poti na wan postu te fu kaba.

 Di Yesus ben e gro kon bigi, Maria hori den sani na prakseri di ben e pasa na ini en libi, iya, a „hori ala den sani na ini en ati” (Lukas 2:19, 51). Neleki Yosef, a ben de wan sma di ben abi yeye fasi. A tan prakseri ala den sani di ben pasa èn di sma ben taki, èn den sani disi ben de a kontru fu profeititori. A ben musu de so taki a ben tan hori den sani na prakseri di a profeiti Gabrièl ben taigi en: „A o abi biginen èn den o kari en a Manpikin fu a Moro Heiwan: Yehovah Gado o gi en a kownusturu fu en papa David; a o tiri fu têgo leki kownu fu a famiri fu Yakob èn en kownukondre no sa kaba” (Lukas 1:32, 33). Iya, a teki en leki wan seryusu sani taki a ben kisi a grani fu de a mama fu a Mesias.

A yeye fasi fu Maria ben de krin fu si ete wantron, di a miti Elisabet, wan famiri fu en di ben kon de nanga bere na wan wondru fasi tu. Di Maria si na uma disi, dan a prèise Yehovah èn a taki fa a ben lobi a Wortu fu Gado. Den sani di a ben taki ben komoto fu a begi fu Hana di skrifi na ini 1 Samuel kapitel 2, èn a ben taki sosrefi fu sani di skrifi na ini tra buku fu den Hebrew Buku fu Bijbel. A sabi disi di Maria ben abi fu den Buku fu Bijbel, e sori taki trutru a ben o tron wan mama di ben de getrow en di ben o abi frede gi Gado. A ben o wroko makandra nanga Yosef fu kweki a boi fu en na yeye fasi.​—Genesis 30:13; 1 Samuel 2:1-10; Maleaki 3:12; Lukas 1:46-55.

Maria ben abi a fasti overtoigi taki a boi fu en ben de a Mesias, èn a tan nanga na overtoigi dati srefi baka di Yesus dede. Syatu baka di Yesus kisi wan opobaka, Maria ben de wan fu den getrow disipel di ben kon makandra fu begi makandra nanga den apostel (Tori fu den Apostel 1:13, 14). Maria tan getrow, aladi a ben hati en trutru fu si fa en lobi-ati manpikin dede na wan pina udu.

Fa yu kisi wini fu den sani di yu leri fu Maria en libi? Yu e teki a grani fu dini Gado awansi san dati e aksi fu yu? Yu e prakseri o prenspari a grani disi de na ini a ten disi? Yu e hori na prakseri san Yesus ben taki na fesi èn yu e agersi dati nanga san e pasa na ini a ten disi, iya, yu e ’denki bun fu den sani disi’? (Mateyus, kapitel 24 nanga 25; Markus, kapitel 13; Lukas, kapitel 21) Yu e du muiti fu kon sabi a Wortu fu Gado bun, neleki fa Maria ben sabi dati, èn yu abi a gwenti fu taki fu a wortu disi nanga trawan? Yu ben o tan bribi na ini Yesus, awansi sortu broko-ede yu ben kan kisi fu di yu na wan bakaman fu en?

Den brada fu Yesus na wan buweisi taki sma kan kenki

Soleki fa a sori, dan den brada fu Yesus no ben bribi na ini en na a ten di a ben de na libi, ma  dati pasa baka di a dede. A kan, taki na fu dati ede den no ben de drape di a dede na a pina udu, èn kande na fu dati ede sosrefi meki a ben musu gi na apostel Yohanes a frantwortu fu sorgu gi en mama. Den famiriman fu Yesus ben sori taki den no ben warderi en, èn na wán okasi den ben taki sosrefi taki Yesus ben „lasi en frustan” (Markus 3:21). Fu di Yesus ben abi famiriman di no ben de na bribi, meki den sma na ini a ten disi di abi sma na ini den osofamiri di no de na bribi, kan abi a dyaranti taki Yesus e frustan fa den e firi te famiriman e spotu den fu di den e bribi na ini Gado.

Ma soleki fa a sori, dan den brada fu Yesus bigin poti bribi na ini en baka di a kisi wan opobaka. Den ben de na mindri den sma di ben kon makandra fosi a Pinksterfesa fu 33 G.T., èn den begi fayafaya makandra nanga den apostel (Tori fu den Apostel 1:14). A krin fu si taki na opobaka fu na afu-brada fu den ben kenki den ati, so taki den tron disipel fu en. Noiti wi musu lasi howpu taki den famiriman fu wi di no de na bribi, o tron bribiman wan dei.

Yesus ben go na en afu-brada Yakobus, èn Bijbel e taki dati a man disi ben du bun furu fu yepi seti a Kresten gemeente. Gado ben meki a skrifi wan brifi gi den Kresten brada nanga sisa fu en, èn na ini a brifi disi a e gi den deki-ati fu tan abi wan tranga bribi (Tori fu den Apostel 15:6-29; 1 Korentesma 15:7; Galasiasma 1:18, 19; 2:9; Yakobus 1:1). Wan tra afu-brada di ben nen Yudas, ben skrifi wan brifi na ondro a krakti fu a santa yeye fu gi tra brada nanga sisa deki-ati fu tan feti fayafaya gi a bribi (Yudas 1). A bun fu si taki Yakobus nanga Yudas no ben skrifi noti na ini a brifi fu den fu sori taki den ben de famiriman fu Yesus, soso fu meki bigi na tra brada nanga sisa. Disi na wan tumusi moi fasi fa den e leri wi taki wi no musu meki bigi, ma wi musu sori sakafasi!

We, san na wan tu fu den sani di wi e leri fu den famiriman fu Yesus? A no de fu taki dati den e leri wi fu de getrow èn fu sori dati na den fasi disi: (1) Du a wani fu Gado na wan getrowfasi, èn kakafutu gi ala den tesi di e kon nanga dati. (2) Poti a wani fu Gado na a fosi presi na ini yu libi, srefi te dati e aksi furu fu yu. (3) Kweki den pikin fu yu soleki fa Bijbel e sori dati. (4) No lasi howpu gi famiriman di no abi a srefi bribi leki yu. (5) No meki bigi taki sma di e teki fesi na ini a Kresten gemeente na famiriman noso mati fu yu. Iya, den sani di wi e leri fu den famiriman fu Yesus e tyari wi kon moro krosibei na en, èn den e meki wi kisi moro warderi gi Yehovah fu di a teki wan osofamiri di no gudu fu kweki Yesus di a ben de pikin.

[Prenki na tapu bladzijde 4, 5]

Yosef teki Maria leki en wefi èn a yepi fu meki den profeititori fu a Mesias kon tru

[Prenki na tapu bladzijde 6]

Yosef nanga Maria leri den pikin fu den san na den markitiki fu Gado èn den leri den sosrefi taki a de prenspari fu wroko

[Prenki na tapu bladzijde 7]

Aladi Yesus ben kweki na ini wan osofamiri di ben abi yeye fasi, toku den brada fu en no ben poti bribi na ini en, teleki baka di a dede

[Prenki na tapu bladzijde 8]

Den afu-brada fu Yesus, namku Yakobus nanga Yudas, ben gi tra Kresten brada nanga sisa deki-ati