Sortu sma den famiriman fu Yesus ben de?

NA INI december, yu kan si na furu presi na grontapu, prenki noso tra sani fu a beibi Yesus makandra nanga en mama Maria èn nanga en kwekipapa Yosef di e sorgu en na wan lobi-ati fasi. Den sortu prenki dati ben kan hari a prakseri sosrefi fu sma di no abi a Kresten bribi. Fu di Yesus na a moro prenspari sma na ini den sortu prenki disi, dan san Bijbel abi fu taki fu den famiriman fu Yesus na grontapu?

A de wan moi sani srefisrefi fu kon sabi suma na den famiriman fu Yesus. Yesus en mama ben de wan nyunwenke di ben nen Maria, èn na so a du kon taki Yesus tron wan libisma. Soleki fa Bijbel e sori, dan Gado poti a libi fu Yesus abra fu hemel kon na ini a muru fu Maria nanga yepi fu santa yeye (Lukas 1:30-35). Bifo Maria ben sabi taki a ben kon de nanga bere na a wondru fasi disi, a ben meki mofo fu trow nanga wan man di ben nen Yosef, èn na so a man dati ben o tron a kwekipapa fu Yesus.

Baka di Yesus gebore, dan Yosef nanga Maria kisi tra pikin, namku den afu brada nanga afu sisa fu Yesus. Wi kan si taki dati ben de so trutru te wi e luku a sani di den sma fu Nasaret ben aksi fu Yesus bakaten: „En a no a manpikin fu a temreman? A no en mama den e kari Maria? A no Yakobus nanga Yosef nanga Simon nanga Yudas na den brada fu en? A no ala den sisa fu en de nanga wi?” (Mateyus 1:25; 13:55, 56; Markus 6:3) A sani disi e sori wi taki Yesus ben abi wan mama, wan papa, fo brada, nanga tu noso moro sisa.

Ma son sma na ini a ten disi no e bribi taki den brada nanga sisa fu Yesus ben de pikin fu Yosef nanga Maria. Fu san ede den no wani bribi dati? A buku New Catholic Encyclopedia e taki: „Fu sensi a bigin di Kerki seti, den leri sma taki Maria ben de wan nyunwenke ala ten. Fu dati ede den sma disi e bribi fayafaya taki Maria no ben abi nowan enkri tra pikin.” A srefi buku disi e taki dati den wortu „brada” nanga „sisa” kan abi fu du nanga „wán, noso moro sma di abi a srefi bribi, noso di de na ini a srefi organisâsi noso grupu”. Den wortu disi kan abi fu du sosrefi nanga sma di de famiri fu makandra, kande den na pikin fu tu sisa noso tu brada.

A sani dati tru na ini a tori fu Yesus? Srefi wan tu Lomsu kerki sabiman no e agri nanga a leri fu a kerki fu den, fu di den feni taki Yesus ben abi tra brada nanga sisa. John P. Meier di ben de presidenti fosi fu a Catholic Bible Association of America (wan Lomsu organisâsi na ini Amerkankondre), ben skrifi: „Na ini a Nyun Testamenti a de so taki te a Griki wortu adelphos [brada] gebroiki na wan fasi di e sori taki sma na famiri fu makandra, dan a wortu dati wani taki noti moro leki trutru brada noso afu brada.” * Iya, Bijbel e sori taki Yesus ben abi brada nanga sisa, di ben de pikin fu Yosef nanga Maria.

Den Evangelietori e taki sosrefi fu tra famiriman fu Yesus, ma meki wi poti prakseri na a papa, a mama, èn na den brada nanga sisa fu Yesus fu si san wi kan leri fu den sma dati.

[Futuwortu]