Wi musu tan na ai moro leki oiti bifo
Wi musu tan na ai moro leki oiti bifo
„Fu dati ede, tan na ai, bika unu no sabi sortu dei Masra o kon.”—MATEYUS 24:42.
1, 2. San e sori taki wi e libi na ini a kaba pisi fu a disiten seti fu sani?
„NOWAN tra sani ben abi so furu krakti tapu a di fu twenti yarihondro leki orloku”, na so a skrifiman Bill Emmott taki. Aladi a e agri taki na ini ala pisi ten fu a libisma historia, sma ben nyan pina fu orloku nanga ogridu ede, toku a e taki moro fara: „Na ini ala den tra yarihondro, orloku nanga ogridu ben de tu, ma na ini a di fu twenti yarihondro den sani disi kon moro furu èn moro ogri. Disi ben de a fosi leisi di someni kondre fu grontapu ben e feti teige makandra na ini wán bigi feti . . . Èn efu dati no ben sari ete, dan a no wán, ma tu grontapufeti ben de na ini a di fu twenti yarihondro.”
2 Yesus Krestes ben taki na fesi dati orloku ben o de pe ’a wan pipel ben o opo go feti nanga a trawan, èn a wan kownukondre nanga a trawan’. Ma den sani disi na soso wan pisi fu ’a marki fu a denoya fu Krestes èn fu a kaba fu a grontapu sistema’. Na ini a prenspari profeititori disi, Yesus e taki sosrefi fu angriten, takru siki, nanga gronseki (Mateyus 24:3, 7, 8; Lukas 21:6, 7, 10, 11). Na furu difrenti fasi, den rampu disi kon moro furu èn moro takru. A fasi fa sma e tyari densrefi èn a fasi fa den e denki fu Gado nanga tra sma, e sori krin taki den kon moro ogri. A de krin fu si taki moro nanga moro sma e libi na wan fasi di no fiti èn ogridu e kon moro furu. Libisma kon lobi moni moro leki Gado, èn soso prisiri de na den ede. Ala den sani disi e sori taki wi e libi na ini „muilek ten”.—2 Timoteyus 3:1-5.
3. Sortu krakti „den marki fu a ten” musu abi na wi tapu?
3 Fa yu e si a situwâsi fu libisma di e kon moro takru dei fu dei? Furu sma no e broko den ede nanga den ogri di e pasa na ini a ten disi; den sani disi kon de leki aladei sani gi den srefi. Den heihei man nanga den sabiman fu grontapu no e frustan san „den marki fu a ten” wani taki, èn kerki fesiman srefi no man gi wan bun rai fu a tori disi (Mateyus 16:1-3). Ma Yesus ben gi den bakaman fu en a rai: „Fu dati ede, tan na ai, bika unu no sabi sortu dei un Masra o kon” (Mateyus 24:42). Dyaso, Yesus e gi wi deki-ati taki wi no musu de na ai fu wan pisi ten nomo, ma taki wi musu „tan na ai” ala ten. Efu wi wani tan na ai, dan wi musu sorgu taki wi no fadon na sribi èn wi musu luku bun san e pasa lontu wi. Disi wani taki dati wi musu du moro leki fu agri nomo taki wi e libi na ini den lasti dei, noso taki a ten kon tranga. Wi musu abi a tranga bribi taki „a kaba fu ala sani kon krosibei” (1 Petrus 4:7). Soso te wi abi a tranga bribi dati, dan wi o man tan na ai. Fu dati ede, wi musu denki dipi fu na aksi disi: ’San sa yepi wi fu kisi wan moro tranga bribi taki a kaba de krosibei?’
4, 5. (a) San o meki wi kisi wan moro tranga bribi taki a kaba fu na ogri sistema disi de krosibei, èn fu san ede? (b) San na wan fu den sani na ini a denoya fu a Manpikin fu libisma di de a srefi leki na ini a ten fu Noa?
4 Luku fa a situwâsi ben de leti bifo wan aparti sani pasa na ini libisma historia, namku a bigi Frudu na ini a ten fu Noa. Den sma ben ogri so te taki disi ’ben broko Yehovah ati’. A ben taki: „Mi sa figi libisma di mi meki puru na grontapu” (Genesis 6:6, 7). Èn a ben du dati trutru. Yesus ben sori taki den srefi sortu sani di ben pasa na a ten dati, ben o pasa na ini a ten disi tu. A ben taki: „Neleki fa sani ben de na ini a ten fu Noa, na so a denoya fu a Manpikin fu libisma o de.”—Mateyus 24:37.
5 Wi kan frustan taki Yehovah e denki a srefi fasi fu a disiten grontapu leki fa a ben e denki fu a grontapu bifo a Frudu. Fu di a ben tyari wan kaba kon na a ogri grontapu fu a ten fu Noa, meki wi kan de seiker taki a sa pori na ogri grontapu fu a ten disi tu. Te wi e frustan krin fa sani na ini a ten fu wi de a srefi leki na ini a ten dati, dan dati musu tranga wi bribi taki a kaba fu a disiten grontapu de krosibei. Sortu sani de a srefi dan? Wi kan kari sowan feifi fu den. A fosi sani, na taki sma ben kisi wan krin warskow taki wan pori ben o kon.
Warskow fu ’sani di no de fu si ete’
6. San Yehovah bosroiti fu du na ini a ten fu Noa?
6 Na ini a ten fu Noa, Yehovah ben taki: „A yeye fu mi no sa handri nanga sma te ten di no skotu, bika en srefi na libisma skin. Dati meki den dei fu en sa tron wan hondro nanga twenti yari” (Genesis 6:3). Den wortu disi di Yehovah ben taki na ini 2490 b.G.T., ben sori taki a kaba fu na ogri grontapu fu a ten dati ben doro kaba. Prakseri san dati ben wani taki gi den sma di ben e libi na ini a ten dati! Ete 120 yari ben o pasa fosi Yehovah ben o tyari „a bigi Frudu kon na tapu grontapu fu tyari pori kon na ala skin di abi libikrakti na ini den, na ondro hemel”.—Genesis 6:17.
7. (a) San Noa du di a kisi a warskow taki a Frudu ben o kon? (b) San wi musu du, now di wi kisi warskow taki a sistema disi o kon na wan kaba?
7 Someni tenti yari na fesi, Noa ben kisi a warskow taki wan bigi rampu ben o pasa, èn a ben gebroiki den yari dati fu sreka sani so taki a ben man tan na libi. „Baka di a ben kisi wan warskow fu Gado fu sani di a no ben si ete”, na so na apostel Paulus e taki, dan „[Noa] ben sori taki a ben abi frede gi Gado èn a ben bow wan ark fu kibri na osofamiri fu en” (Hebrewsma 11:7). Fa a de nanga wi? Sowan 90 yari pasa sensi den lasti dei fu a sistema disi bigin na ini 1914. Wi e libi trutru na ini „a ten fu a kaba” (Danièl 12:4). San wi musu du, now di wi kisi warskow? „A sma di e du a wani fu Gado, sa tan fu têgo”, na so Bijbel e taki (1 Yohanes 2:17). Fu dati ede, now na a ten fu du a wani fu Yehovah nanga moro faya.
8, 9. Sortu warskow sma kisi na ini a ten disi, èn fa den e yere den warskow disi?
8 Na ini a ten disi, fayafaya studenti fu Bijbel kon si na ini den Buku fu Bijbel taki a sistema disi o kisi pori seiker. Wi e bribi disi trutru? Luku san Yesus Krestes ben taki krinkrin: „Wan bigi banawtu o de, di sensi a bigin fu grontapu teleki now no ben de ete, nôno, a no sa kon noiti moro tu” (Mateyus 24:21). Yesus ben taki tu dati a ben o kon leki a Krutuman di Gado poti, èn a ben o prati sma neleki fa wan skapuman e prati den skapu fu den bokoboko. Den sma di no warti o „kisi strafu fu têgo, ma den regtfardiki sma o kisi têgo libi”.—Mateyus 25:31-33, 46.
9 Yehovah e tan memre en pipel na den warskow disi, èn a e du dati nanga yepi fu a yeye nyanyan di „a getrow èn koni srafu” e gi (Mateyus 24:45-47). Boiti dati, ibri nâsi, lo, tongo, nanga pipel e kisi a kari ’fu frede Gado èn fu gi en glori, bika a yuru doro te a sa tyari krutu kon’ (Openbaring 14:6, 7). Wan prenspari pisi fu a Kownukondre boskopu di Yehovah Kotoigi e preiki na heri grontapu, na a warskow taki heri esi Gado Kownukondre sa puru ala libisma tirimakti (Danièl 2:44). Wi no musu si a warskow disi leki wan lawlaw sani. Ala ten na Almakti Gado e du san a e pramisi (Yesaya 55:10, 11). A ben du so na ini a ten fu Noa, èn a sa du so na ini a ten disi tu.—2 Petrus 3:3-7.
Moro nanga moro sma e libi wan doti sekslibi
10. San wi kan taki fu a doti sekslibi fu den sma na ini a ten fu Noa?
10 Wan tra sani na ini a ten fu wi de a srefi leki na ini a ten fu Noa. Yehovah ben gi a fosi man nanga uma a komando fu „furu grontapu” nanga libisma. Gado ben meki den na so wan fasi taki den ben kan abi seks demakandra na ini a trowlibi na wan fasi di fiti (Genesis 1:28). Na ini a ten fu Noa, trangayesi engel pori libisma fu di den bigin abi seks nanga uma, aladi Gado no ben meki den fu du a sani dati. Den saka kon na grontapu, den teki libisma skin, èn den go libi nanga moi uma. Te fu kaba den uma ben kisi pikin di ben de afu libisma, afu ogri yeye; sma ben e kari den pikin disi Nefilim (Genesis 6:2, 4). Bijbel e agersi a sondu fu den engel disi di ben abi gridi seks lostu, nanga a doti sekslibi fu den sma fu Sodom nanga Gomora (Yudas 6, 7). Na so a doti sekslibi ben panya na heri grontapu na ini a ten dati.
11. Fa sma na ini a ten disi e tyari densrefi leki den sma na ini a ten fu Noa?
11 Fa sma e tyari densrefi na ini a ten disi? Na ini den lasti dei disi, a moro prenspari sani na ini a libi fu furu sma, na seks. Paulus ben sori krin taki den sortu sma dati „lasi ala syen firi” èn furu fu den gi densrefi abra na „wan lusu fasi fu tyari densrefi, fu libi ala sortu doti libi na wan gridi fasi” (Efeisesma 4:19). A de leki wan aladei sani gi furu sma fu luku seks buku noso seks felem, èn sma no e si en leki wan ogri sani fu abi seks bifo den trow, fu abi seks nanga pikin-nengre, noso fu libi wan homo sekslibi. Sonwan fu den kisi strafu kaba „di fiti den ogri di den du”: den kisi siki leki bakapisi fu a hurudu fu den, na osofamiri-libi fu den pori, noso den kisi tra problema na ini a libimakandra.—Romesma 1:26, 27.
12. Fu san ede a de prenspari taki wi leri fu tegu gi sani di no bun?
12 Na ini den dei fu Noa, Yehovah ben tyari a bigi Frudu kon èn na so a grontapu dati, pe sma ben e prakseri soso seks nomo, ben kon na wan kaba. Wi no musu frigiti taki a ten fu wi de soifri leki a ten fu Noa. A „bigi banawtu” di de fu kon sa krin grontapu fu ’sma di e huru, sma di e du sutadu, man di tra man e hori fu abi seks nanga den, nanga man di e didon nanga man’ (Mateyus 24:21; 1 Korentesma 6:9, 10; Openbaring 21:8). Now a de tumusi prenspari taki wi e leri fu tegu gi sani di no bun èn wi musu wai pasi gi iniwan situwâsi di kan meki taki wi du hurudu!—Psalm 97:10; 1 Korentesma 6:18.
Grontapu e kon „furu nanga ogridu”
13. Fu san ede grontapu ben „furu nanga ogridu” na ini a ten fu Noa?
13 Bijbel e taki fu ete wan tra sani di ben pasa na ini a ten fu Noa: „Grontapu ben kon pori na ini na ai fu a tru Gado, èn grontapu ben kon furu nanga ogridu” (Genesis 6:11). Fu taki en leti, ogridu no ben de wan nyun sani na a ten dati. Kain, a manpikin fu Adam, ben kiri en regtfardiki brada (Genesis 4:8). Lamek di ben abi den srefi ogri fasi leki den sma fu a ten dati, ben meki wan puwema pe a ben e meki bigi taki a kiri wan yonkuman fu di, soleki fa ensrefi ben taki, a yonkuman ben suku fu du en ogri (Genesis 4:23, 24). Ma na ini a ten fu Noa, ogridu ben kon moro furu èn sma ben e du moro takru sani. Sensi a ten di den trangayesi yeye manpikin fu Gado trow nanga uma na grontapu èn ben kisi pikin, namku den Nefilim, dan ogridu ben kon lai moro leki iniwan ten na fesi. Den ogri-ati, bigi-skin man disi ben de „den Falaman”, noso „den man di e meki trawan fadon” (Genesis 6:4). A bakapisi ben de taki grontapu ben „furu nanga ogri” (Genesis 6:13). Prakseri omeni muiti Noa ben musu meki fu kweki den pikin fu en na ini so wan situwâsi! Ma toku Noa ben de ’regtfardiki na mindri a geslakti dati’.—Genesis 7:1.
14. Fa a grontapu na ini a ten disi kon „furu nanga ogridu”?
14 Na ini a heri libisma historia, sma du ogridu. Ma neleki fa a ben de na ini a ten fu Noa, na so ogridu kon moro furu na ini a ten disi tu. Nofo tron wi e yere fa sma e du ogri nanga trawan na ini na osofamiri, èn fa sma e du ogri-ati sani fu gens tirimakti. Boiti dati, sma e kiri ipi-ipi trawan soso fu di den de fu wan tra lo noso kondre, èn sma e sutu trawan kiri fu pikinpikin sani ede. Dan wi no e taki ete fu den sma di lasi den libi na ini orloku. Grontapu kon lai nanga ogridu baka. Fu san ede? San meki moro nanga moro ogri e pasa? A piki tapu na aksi disi e sori wi wan tra sani di de a srefi leki a ten fu Noa.
15. (a) San meki taki moro ogri e pasa na ini den lasti dei? (b) Sortu sani o pasa seiker te fu kaba?
15 Di a Mesias Kownukondre fu Gado ben seti na ini 1914, dan a sma di a ben poti leki Kownu, namku Yesus Krestes, ben du wan prenspari sani di noiti no ben pasa ete. A ben trowe Satan Didibri nanga den engel fu en komoto fu hemel kon na ini a birti fu grontapu (Openbaring 12:9-12). Bifo a Frudu, den trangayesi engel srefi ben teki a bosroiti fu gowe libi a presi fu den na ini hemel; ma na ini a ten fu wi, Yesus puru den komoto fu hemel nanga tranga. Boiti dati, den no abi a makti moro fu teki libisma skin na grontapu fu man gi densrefi abra na lostu fu a skin di no fiti srefisrefi. Now den bruya, den ati e bron, èn den e frede a krutu di e wakti den. Fu dati ede, den e meki libisma nanga organisâsi du tumusi ogri-ati sani, èn den sani dati moro furu srefi leki na ini a ten fu Noa. Yehovah ben pori a grontapu bifo a Frudu, baka di den trangayesi engel nanga den pikin fu den ben furu grontapu nanga ogridu. No kori yusrefi, a o du a srefi sani tu na ini a ten disi! (Psalm 37:10) Ma den sma di de na ai na ini a ten disi sabi taki heri esi den sa kisi frulusu.
A boskopu e meki bekènti
16, 17. San na a di fu fo sani na ini a ten disi di de a srefi leki na ini a ten fu Noa?
16 A di fu fo sani na ini a disiten grontapu di de a srefi leki na ini a grontapu bifo a Frudu, de fu si na ini a wroko di Noa ben kisi fu du. Noa ben bow wan bun bigi ark. A ben de „wan preikiman” sosrefi (2 Petrus 2:5). Sortu boskopu a ben preiki? Soleki fa a sori, dan Noa ben e taigi den sma taki den ben musu abi berow èn a ben e warskow den taki wan pori ben o kon. Yesus ben taki dati den sma fu a ten fu Noa „no ben poti prakseri na san ben pasa, teleki a Frudu kon èn a wai den alamala puru”.—Mateyus 24:38, 39.
17 Na a srefi fasi, Kotoigi fu Yehovah e du a preikiwroko fu den fayafaya, èn a bakapisi de taki a boskopu fu Gado Kownukondre e meki bekènti na heri grontapu. Na ini pikinmoro ibri pisi fu grontapu, sma kan yere èn leisi a Kownukondre boskopu na ini den eigi tongo. A Waktitoren na wan tijdschrift di e meki a Kownukondre fu Yehovah bekènti. Moro leki 25.000.000 fu a tijdschrift disi e meki, èn a de fu leisi na ini moro leki 140 tongo. Fu tru, a bun nyunsu fu Gado Kownukondre e preiki gi „ala sma na heri grontapu, so taki ala kondre kan yere dati”. Te a wroko dati du kaba soleki fa Gado wani, dan a kaba sa kon trutru.—Mateyus 24:14.
18. Te wi e preiki gi sma, dan fa furu fu den e handri leki someni fu den sma na ini a ten fu Noa?
18 Den sma di ben e libi bifo a Frudu no ben wani sabi nowan sani di abi fu du nanga Gado, èn den no ben e libi wan krin libi kwetikweti. Dati meki wi kan frustan fu san ede den birtisma di no ben abi bribi, ben e spotu èn kosi Noa nanga en osofamiri. Ma toku a kaba ben kon. Na so den lasti dei lai tu nanga ’spotuman nanga den spotu fu den’. „Ma toku a dei fu Yehovah sa kon leki wan fufuruman”, na so Bijbel e taki (2 Petrus 3:3, 4, 10). A sa kon trutru na a dei di Gado poti. A no sa kon lati (Habakuk 2:3). Trutru, a de wan koni sani fu tan na ai!
Wan tu sma nomo e tan na libi
19, 20. Sortu sani de a srefi te wi e luku a Frudu nanga a pori fu a disiten seti fu sani?
19 Na ini a ten disi, sma e du ogri èn den o kisi pori neleki fa a ben de na ini a ten fu Noa. Ma a no dati wawan de a srefi. Neleki fa sma ben pasa a Frudu libilibi, na so sma o pasa a kaba fu a disiten seti fu sani libilibi tu. Den sma di ben pasa a Frudu libilibi ben de den safri-ati sma di no ben e libi leki moro furu fu den sma na ini a ten dati. Den ben gi yesi na a warskow di Gado ben gi den èn den ben e hori densrefi aparti fu na ogri grontapu fu a ten dati. „Noa ben feni bun na ini Yehovah ai”, na so Bijbel e taki. „[Noa] ben sori fu de sondro fowtu na mindri den sma fu en ten” (Genesis 6:8, 9). Fu ala den libisma di ben de na grontapu, dan wán osofamiri, „wan tu sma nomo, namku aiti sili, ben tyari pasa a watra sondro fu wan ogri miti den” (1 Petrus 3:20). Èn Yehovah Gado ben gi den wan komando, taki: „Un meki pikin èn un kon furu èn un furu grontapu.”—Genesis 9:1.
20 Gado Wortu e gi wi a dyaranti taki „wan bigi ipi” sa „komoto na a bigi banawtu” (Openbaring 7:9, 14). Omeni sma sa de na ini a bigi ipi? Yesus srefi ben taki: ’A doro pikin di e tyari sma go na libi, èn a pasi smara, èn wan tu sma nomo e feni en’ (Mateyus 7:13, 14). Nownow sowan siksi milyard sma e libi na grontapu. Te wi e teki a nomru dati gersi nanga den wan di o tan na libi baka a bigi banawtu di de fu kon, dan a no furu sma o pasa a bigi banawtu libilibi. Ma a kan taki den sma disi sa kisi wan srefi sortu grani leki den sma di ben pasa a Frudu libilibi. A kan taki wan pisi ten langa den sa kisi na okasi fu meki pikin di sa tron wan pisi fu a nyun libisma libimakandra na grontapu.—Yesaya 65:23.
„Tan na ai”
21, 22. (a) Sortu wini yu kisi fu di wi luku a tori fu a Frudu? (b) San na a yaritekst fu 2004, èn fu san ede wi musu gi yesi na a rai di a e gi?
21 Aladi a Frudu pasa langa ten kaba, toku a de wan krin warskow gi wi, èn wi no musu tapu wi yesi gi a warskow dati (Romesma 15:4). Now di wi kon si na sortu fasi a ten fu wi de a srefi leki a ten fu Noa, dan disi musu meki wi frustan moro bun o prenspari den sani de di e pasa now, èn den musu meki wi tan na ai fu si te Yesus o kon neleki wan fufuruman fu krutu den ogrisma.
22 Na ini a ten disi, Yesus Krestes e tiri wan bun bigi bow-wroko na yeye fasi. Fu man kisi kibri èn fu man tan na libi, dan tru anbegiman kan go na ini wan yeye paradijs di wi kan agersi nanga wan ark (2 Korentesma 12:3, 4). Efu wi wani pasa a bigi banawtu dati, dan wi musu tan na ini a paradijs dati. A grontapu fu Satan de lontu a yeye paradijs, èn a de klariklari fu hari iniwan sma di e dyonko na yeye fasi. A de tumusi prenspari taki wi „tan na ai” èn taki wi de srekasreka gi a dei fu Yehovah.—Mateyus 24:42, 44.
Yu e memre disi ete?
• Sortu rai Yesus ben gi fu a kon di a o kon?
• Nanga san Yesus e agersi a denoya fu en?
• Na sortu fasi a ten fu wi de a srefi leki a ten fu Noa?
• Te wi e prakseri fa den sani na ini a ten fu wi de a srefi leki den sani na ini a ten fu Noa, dan fa dati o meki wi frustan taki a de tumusi prenspari fu tan na ai?
[Aksi fu a tori disi]
[Prenspari pisi na tapu bladzijde 18]
A yaritekst fu 2004 sa de: „Tan na ai . . . De srekasreka.”—Mateyus 24:42, 44.
[Prenki na tapu bladzijde 15]
Noa ben gi yesi na a warskow fu Gado. Wi e du a srefi sani tu?
[Prenki na tapu bladzijde 16, 17]
„Neleki fa sani ben de na ini a ten fu Noa, na so a denoya fu a Manpikin fu libisma o de”