Yu e fruwondru te now ete?

YU SI taki ibri tron baka Bijbel skrifiman e sori taki den e fruwondru te den e taki fu den wroko nanga den fasi fu Gado? „Yu meki mi na wan tumusi fruwondru fasi”, na so a psalm skrifiman ben taki (Psalm 139:14). A profeiti Yesaya ben skrifi: „Ke Yehovah, yu na mi Gado. Mi e hei yu, mi e prèise yu nen, bika yu du wondru sani” (Yesaya 25:1). Noso prakseri fa na apostel Paulus ben fruwondru srefisrefi di a ben taki den wortu disi: „O, fa Gado abi bun furu gudu, nanga koni, nanga sabi!”​—Romesma 11:33.

A wortubuku The Oxford Encyclopedic English Dictionary e fruklari san a wani taki te wan sma e fruwondru. A e taki dati disi „na wan firi di wan sma e kisi te wan sani pasa di a no fruwakti, te a si wan sani di a no sabi, noso te a si wan sani di a no man fruklari. A firi disi abi fu du spesrutu nanga wan sani di a sma e si leki wan bigi sani, noso wan nyun sani.”

A de wan prisiri sani fu si fa pikin nengre e piri den ai fu di den e fruwondru fu si, firi, noso yere sani di de nyun gi den, a no so? A de wan sari sani taki a firi di wan sma e kisi te a e fruwondru fu wan moi sani noso fu wan sani di nyun gi en, furu tron no de so tranga moro te a sma e kon owru.

Ma gi den Bijbel skrifiman di skrifi den sani di wi kari na tapusei, a firi disi taki den ben e fruwondru fu sani, na wan firi di ben de dipi ini den ati. A firi disi ben tan aladi den ben kon owru. Fa a du kon taki den ben tan abi a firi disi? Den ben tan fruwondru fu sani fu di den ben abi warderi te den ben e denki dipi fu den wroko fu Gado. A psalm skrifiman ben begi: „Mi e memre den dei fu granwe, mi prakseri ala yu wroko; mi e prakseri furu fu den wondru fu den mekisani fu yu.”​—Psalm 143:5, The New English Bible.

A de wan sani fu prèise taki den anbegiman fu Gado na ini a ten disi e fruwondru fu sani na so wan fasi tu! Yu abi a firi disi? Yu e meki muiti fu tan abi a firi disi?