Gado e broko en ede nanga wi?

YU E firi leki wan hebi de na yu tapu fu di yu abi problema na ini yu osofamiri, nanga yu gosontu, nanga yu wroko, noso fu di yu abi tra hebi frantwortu? Furu sma abi a firi disi. Èn suma na ini a ten disi no e ondrofeni kruktudu, ogridu, nanga ogri di sma e du nanga tranga? Fu tru, a de neleki fa Bijbel e taki: „Ala den sani di Gado meki, e tan geme makandra èn e nyan pina makandra te now ete” (Romesma 8:22). A no de fu fruwondru taki furu sma e aksi densrefi: ’Gado e broko en ede trutru? A sa du wan sani fu yepi wi?’

A koni Kownu Salomo ben taigi Gado na ini begi: „Yu wawan sabi na ati fu den manpikin fu libisma heri bun.” Salomo ben abi a frutrow taki Yehovah sabi wi èn taki a e broko en ede nanga ibriwan fu wi. A ben kan aksi Gado fu „yere na ini hemel” èn fu piki den begi fu ibri sma di abi frede gi Gado èn di e fruteri Gado ’en eigi rampu nanga en eigi sari’.—2 Kroniki 6:29, 30.

Na ini a ten disi, Yehovah Gado e broko en ede nanga wi ete, èn a e gi wi a kari fu suku en doronomo na ini begi (Psalm 50:15). A e pramisi wi taki, te wi e begi nanga wi heri ati èn te wi e begi akruderi a wani fu en dan a sa piki den begi fu wi (Psalm 55:16, 22; Lukas 11:5-13; 2 Korentesma 4:7). Iya, Yehovah e arki na ’o sortu begi, o sortu grani di iniwan sma noso a heri pipel fu en ben sa aksi’. Fu dati ede, te wi e poti wi frutrow tapu Gado, te wi e aksi en fu yepi wi, èn te wi e kon krosibei na en, dan wi sa si taki a e sorgu wi èn taki a e tiri wi na wan lobi-ati fasi (Odo 3:5, 6). A Bijbel skrifiman Yakobus e gi wi a dyaranti: „Kon krosibei na Gado, èn a sa kon krosibei na unu.”—Yakobus 4:8.