Meki wi alamala fruteri sma fu a glori fu Yehovah
Meki wi alamala fruteri sma fu a glori fu Yehovah
„Gi Yehovah glori nanga krakti. Gi Yehovah a glori di en nen musu kisi.”—PSALM 96:7, 8.
1, 2. Sortu sani e gi Yehovah glori, èn suma e kisi deki-ati fu du dati tu?
DAVID, a manpikin fu Isai, ben gro kon bigi leki wan yongu skapuman na ini a kontren fu Betlehem. A ben musu de so taki te a ben de en wawan e luku den skapu fu en papa na ini den weigron, dan furu tron a ben e tan luku a bigi hemel di ben lai nanga stari te neti te ala sani ben tiri! A no de fu taki, dati a ben abi den tumusi moi sani dati na prakseri di a santa yeye fu Gado meki a skrifi èn singi den moi wortu fu a di fu 19 Psalm: „Den hemel e meki a glori fu Gado bekènti; èn a loktu e fruteri fu a wroko fu en anu. A markitiki fu den doro na ala sei fu grontapu, èn den wortu fu den, te na den moro farawe presi fu grontapu.”—Psalm 19:1, 4.
2 Den hemel di Yehovah meki na so wan wondru fasi e meki a glori fu en bekènti sondro fu taki wan sani, sondro wortu, sondro sten, èn den e du dati ibri dei nanga ibri neti. Den sani di Gado meki, noiti no e kaba fu meki a glori fu en bekènti. Den e gi kotoigi „na ala sei fu grontapu” so taki ala sma kan si a glori dati. Te wi e prakseri taki den e du disi sondro wortu, dan dati e meki wi frustan taki wi leki libisma no prenspari srefisrefi. Ma aladi den mekisani e gi kotoigi kaba sondro wortu, toku dati no sari. Getrow libisma e kisi a deki-ati fu gebroiki den sten fu meki a glori fu Gado bekènti tu. Wan psalm skrifiman di no kari na en nen, e taigi getrow anbegiman den wortu disi na ondro a krakti fu a santa yeye: „Gi Yehovah glori nanga krakti. Gi Yehovah a glori di en nen musu kisi” (Psalm 96:7, 8). Den sma di abi wan bun banti nanga Yehovah e prisiri fu du san a psalm skrifiman taigi den fu du. Ma san wi musu du fu man gi Gado glori?
3. Fu san ede libisma e gi Gado glori?
3 Fu man gi Gado glori, dan wi musu du moro leki fu taki nomo fu a glori fu en. Den Israelsma fu a ten fu Yesaya ben e gi Gado glori nanga den mofo, ma furu fu den no ben du dati nanga den heri ati. Yehovah ben meki Yesaya taki: „A pipel disi kon krosibei na mi nanga a mofo fu den, èn den gi mi glori nanga den mofobuba fu den nomo, èn na ati fu den srefi de farawe fu mi” (Yesaya 29:13). Iniwan sani di den sortu sma dati ben e taki fu prèise Gado no ben wani taki noti gi en. Efu wi wani gi Yehovah prèise na wan fasi di a feni bun, dan wi musu du dati nanga wan ati di furu nanga lobi gi en, èn wi musu agri nanga wi heri ati taki a glori fu en de aparti. Yehovah wawan na a Mekiman. A de na Almaktiwan, a Moro Regtfardikiwan, a moro soifri eksempre fu lobi. Na En sa gi wi frulusu èn a de a Moro Heiwan di ibri libisani na ini hemel nanga grontapu musu saka ensrefi na ondro (Openbaring 4:11; 19:1). Efu wi e bribi den sani disi trutru, dan meki wi gi Yehovah glori nanga wi heri ati.
4. San wi musu du fu man gi Yehovah glori, soleki fa Yesus taigi wi? Fa wi kan du dati?
4 Yesus Krestes ben taigi wi fa fu gi Gado glori. A ben taki: „Mi Tata e kisi glori te unu e tan meki furu froktu èn e sori taki unu na mi disipel” (Yohanes 15:8). Fa wi e meki furu froktu? Wi e du dati te wi e teki prati nanga wi heri ati na a preikiwroko fu a „bun nyunsu fu a kownukondre”, èn na so fasi wi, makandra nanga ala mekisani fu Gado e „fruteri” trawan fu den ’fasi fu en di sma no man si nanga ai’ (Mateyus 24:14; Romesma 1:20). Boiti dati, na so fasi ala mekisani e yepi fu meki nyun disipel, so taki Yehovah Gado e kisi moro bigi prèise. Wan tra fasi fa wi e meki froktu, na te wi e kweki den froktu fu a yeye èn te wi e du muiti tu fu sori den srefi tumusi bun fasi fu Yehovah Gado (Galasiasma 5:22, 23; Efeisesma 5:1; Kolosesma 3:10). Leki bakapisi fu dati, wi e gi Gado glori nanga a fasi fa wi e tyari wisrefi ibri dei.
„Na heri grontapu”
5. Fruklari fa Paulus ben poti krakti tapu a frantwortu di Kresten abi fu fruteri trawan fu a bribi fu den so taki Gado kan kisi glori.
5 Na ini a brifi di Paulus ben skrifi gi den Romesma, a ben poti krakti tapu a frantwortu di Kresten abi fu fruteri trawan fu a bribi fu den so taki Gado kan kisi glori. Wan prenspari boskopu na ini a buku Romesma, na taki soso den wan di e poti bribi na ini Yesus Krestes kan kisi frulusu. Na ini kapitel 10 fu a brifi disi, Paulus ben sori taki aladi „Krestes [ben de] a kaba fu a Wet”, toku a pipel fu Israel na ini a ten fu en ben e pruberi ete fu hori densrefi na a Wet fu Moses fu man kisi wan bun nen na Gado. Fu dati ede Paulus e taki: „Efu yu e fruteri sma a ’wortu di de na ini yu eigi mofo’, taki Yesus na Masra, èn yu e bribi na ini yu ati taki Gado gi en wan opobaka, dan yu o kisi frulusu”. Sensi a ten dati, „nowan difrenti no de na mindri Dyu nanga Grikisma, bika den alamala abi a srefi Masra, èn ala sma di e kari en nen, a e gi bogobogo. Bika ’ala sma di e kari a nen fu Yehovah sa kisi frulusu’.”—Romesma 10:4, 9-13.
6. Fa Paulus ben gebroiki Psalm 19:4?
6 Baka dati, Paulus e aksi wan sani di de krin fu frustan. A e taki: „Ma fa den sa kari en efu den no e bribi na ini en? Ma fa den sa bribi na ini en efu den no yere fu en? Ma fa den sa yere sondro fu wan sma e preiki?” (Romesma 10:14) Disi na san Paulus e taki fu Israel: „A no ala sma ben gi yesi na a bun nyunsu.” Fu san ede Israel no ben gi yesi? Dati no kon fu di den no ben kisi okasi fu yere a bun nyunsu, ma fu di den no ben abi nofo bribi. Paulus ben gebroiki Psalm 19:4 fu sori taki disi ben de so. Na ini a tekst dati, a no ben e taki fu a kotoigi di den mekisani e gi sondro wortu, ma a ben e taki fu a preikiwroko di Kresten e du. Paulus ben taki: „Fu taki en leti ’na heri grontapu sma yere den, èn den wortu fu den, te na den moro farawe presi fu grontapu’” (Romesma 10:16, 18). Iya, neleki fa den mekisani di no abi libi e gi Yehovah glori, na so den fosi Kresten ben e preiki a bun nyunsu fu frulusu na ala presi, èn na so fasi den ben e gi Yehovah glori „na heri grontapu”. Na ini a brifi di Paulus ben skrifi gi den Kolosesma, a ben sori sosrefi o fara a bun nyunsu ben panya go. A ben taki dati a bun nyunsu ben preiki „gi ala sma na ondro hemel”.—Kolosesma 1:23.
Kotoigi di e wroko fayafaya
7. Sortu frantwortu Kresten abi, soleki fa Yesus ben taki?
7 A kan taki Paulus skrifi a brifi gi den Kolosesma sowan 27 yari baka di Yesus Krestes dede. Ma fa a du kon taki a preikiwroko ben panya go te na Kolose na ini so wan syatu pisi ten? Dati pasa fu di den fosi Kresten ben e wroko fayafaya, èn Yehovah blesi a wroko fu den. Yesus ben taki na fesi dati den bakaman fu en ben o de fayafaya preikiman, di a taki: „A bun nyunsu musu preiki fosi na ini ala kondre” (Markus 13:10). Boiti taki Yesus ben taki a profeititori dati, a ben gi a komando tu di skrifi na ini den lasti vers fu na Evangelietori fu Mateyus: „Fu dati ede, go na ala kondre èn meki sma tron disipel, èn dopu den na ini a nen fu a Tata, fu a Manpikin èn fu a santa yeye. Leri den fu du ala san mi taigi unu” (Mateyus 28:19, 20). Wan syatu pisi ten baka di Yesus opo go na hemel, dan den bakaman fu en bigin du san den ben kisi leki komando.
8, 9. San den Kresten du di den kisi den komando fu Yesus, soleki fa Tori fu den Apostel e sori?
8 Baka di den getrow bakaman fu Yesus ben kisi a santa yeye tapu a Pinksterfesa 33 G.T., dan a fosi sani di den du, na taki den go preiki, èn den fruteri den sma na ini Yerusalem „fu den bigi sani di Gado du”. A preikiwroko fu den ben abi bun bakapisi trutru, èn „sowan dri dusun sma” teki dopu. Den disipel tan prèise Gado fayafaya na fesi sma èn disi ben abi bun bakapisi.—Tori fu den Apostel 2:4, 11, 41, 46, 47.
9 Heri esi den kerki fesiman kon si den sani di den Kresten dati ben e du. Petrus nanga Yohanes no ben frede fu taki krin fa sani ben de trutru, èn den kerki fesiman no ben lobi dati kwetikweti. Fu dati ede den taigi den tu apostel fu no preiki moro gi sma. Den apostel piki: „Wi no kan tapu fu taki fu den sani di wi si èn yere.” Baka di den tapu skreki gi Petrus nanga Yohanes, dan den lusu den, èn baka dati den apostel disi go baka na den brada fu den èn den alamala makandra begi Yehovah. Den teki deki-ati fu aksi Yehovah: „Meki den srafu fu yu tan taki a wortu fu yu sondro frede.”—Tori fu den Apostel 4:13, 20, 29.
10. Sortu gens den tru Kresten bigin kisi, èn san den du di dati pasa?
10 A begi dati ben kruderi nanga a wani fu Yehovah, èn dati ben de krin fu si baka wan syatu pisi ten. Sma ben grabu den apostel, ma baka dati wan engel fri den na wan wondru fasi. Na engel ben taigi den: „Un go na ini a tempel, èn tan fruteri a pipel ala sani di abi fu du nanga a libi disi” (Tori fu den Apostel 5:18-20). Fu di den apostel ben gi yesi, meki Yehovah tan blesi den. Fu dati ede, „ibri dei den ben tan gi sma leri na ini a tempel èn sosrefi na ibri oso, aladi den ben fruteri sma a bun nyunsu fu Yesus, a Mesias” (Tori fu den Apostel 5:42). A de krin fu si taki den bakaman no ben o tapu kwetikweti fu gi Gado glori na fesi tra sma, awansi den ben e kisi hebi gens.
11. Fa den fosi Kresten ben si a preikiwroko?
11 Syatu baka dati, sma grabu Stefanus èn den ston en kiri. A sani disi meki taki sma bigin frufolgu den Kresten na ini Yerusalem na wan ogri-ati fasi, èn fu dati ede ala den disipel, boiti den apostel, gowe libi Yerusalem. Den lasi-ati fu di den ben e kisi frufolgu? Kwetikweti. Wi e leisi: „Den wan di ben lowe go na ala sei ben waka a heri kondre fu preiki a bun nyunsu” (Tori fu den Apostel 8:1, 4). Den disipel ben sori ibri leisi baka taki den ben de fayafaya fu meki a glori fu Gado bekènti. Na ini Tori fu den Apostel kapitel 9, wi e leisi taki a Fariseiman Saulus fu Tarsus ben de na pasi e go na Damaskus fu gi sma deki-ati fu frufolgu den disipel fu Yesus di ben de drape. Na a ten dati, a si wan fisyun fu Yesus èn a kon breni. Na ini Damaskus, Ananias dresi Saulus na wan wondru fasi, so taki a ben kan si baka. San na a fosi sani di Saulus, di sma ben sabi bakaten leki Paulus, ben du? A buku e taki: „Wantewante a bigin preiki na ini den snoga taki Yesus na a Manpikin fu Gado.”—Tori fu den Apostel 9:20.
Ala sma ben e teki prati na a preikiwroko
12, 13. (a) San na wan prenspari sani di a fosi Kresten gemeente ben e du, soleki fa historia skrifiman e sori? (b) Fa Tori fu den Apostel e kruderi nanga den sani di historia skrifiman taki?
12 Furu sma e agri taki ala sma na ini a fosi Kresten gemeente ben e teki prati na a preikiwroko. Disi na san Philip Schaff ben skrifi fu Kresten na ini a ten dati: „Ibri gemeente ben abi leki marki fu du a preikiwroko, èn ibri Kresten bribiman ben de wan zendeling” [Fu a buku History of the Christian Church (A Historia fu a Kresten Kerki)]. W.S. Williams ben skrifi: „Furu sma e taki dati ala Kresten na ini a fosi Kerki, spesrutu den wan di ben kisi a makti [den presenti fu a yeye] fu du wondru sani, ben e preiki a bun nyunsu” [Fu a buku The Glorious Ministry of the Laity (A tumusi Moi Diniwroko fu den Kerkisma)]. A e taki nanga overtoigi sosrefi: „Yesus Krestes noiti no ben wani taki soso spesrutu memre fu a Kerki ben musu teki prati na a preikiwroko.” Srefi Celsus, wan owruten feanti fu a Kresten bribi, ben skrifi: „Sma di ben e meki sani fu skapu wiwiri, sma di ben e meki susu, sma di ben e meki leer, iya, aladei sma di no ben kisi skoro kwetikweti, ben e preiki a bun nyunsu fayafaya.”
13 A historia na ini a buku Tori fu den Apostel e sori taki a situwâsi ben de trutru soleki fa den historia skrifiman taki. Tapu a Pinksterfesa fu 33 G.T., ala den disipel, man nanga uma, fruteri trawan fu den wondru sani fu Gado, baka di a santa yeye ben kon na den tapu. Di frufolgu kon, baka di sma kiri Stefanus, dan ala den Kresten di ben lowe go na tra kondre ben panya a bun nyunsu na ala sei. Sowan 28 yari baka dati, Paulus ben skrifi wan sani di no ben de gi wan pikin grupu fu kerki fesiman nomo, ma gi ala Hebrew Kresten. A ben taki: „Nanga yepi fu en, meki wi tyari wan srakti-ofrandi fu prèise gi Gado ala ten, dati wani taki, a froktu fu wi mofobuba di e meki en nen bekènti na publiki” (Hebrewsma 13:15). Paulus ben taki fa ensrefi ben si a preikiwroko: „We, efu mi e preiki a bun nyunsu, dan mi no kan meki bigi fu dati, bika a plekti de na mi tapu fu du dati. Fu tru, helu fu mi efu mi no preiki a bun nyunsu!” (1 Korentesma 9:16) A de krin fu si taki ala getrow Kresten fu a fosi yarihondro ben abi a srefi denki disi.
14. San bribi abi fu du nanga a preikiwroko?
14 Iya, wan trutru Kresten musu teki prati na a preikiwroko fu di dati na wan prenspari fasi fa a kan sori a bribi fu en. Paulus ben taki: „Nanga na ati wan sma e bribi, so taki a kan kon de regtfardiki, ma nanga a mofo a e meki bekènti na sma fa fu kisi frulusu” (Romesma 10:10). A de so taki wan pikin grupu nomo na ini a gemeente, soleki wan pikin grupu fu fesiman, e sori bribi, so taki na den wawan abi a frantwortu fu preiki? Kwetikweti! Ala tru Kresten abi wan tranga bribi na ini Masra Yesus Krestes, èn fu dati ede den e fruteri trawan fu a bribi fu den. Efu den no e du dati, dan a bribi fu den na wan dede sani (Yakobus 2:26). Fu di ala getrow Kresten na ini a fosi yarihondro Gewoon Teri ben sori a bribi fu den na a fasi disi, meki sma yere fa Yehovah en nen ben e kisi prèise na wan bun krakti fasi.
15, 16. Gi wan tu eksempre di e sori taki a preikiwroko go na fesi, aladi problema ben de.
15 Na ini a fosi yarihondro, Yehovah blesi en pipel fu di a meki a nomru fu den gro, aladi problema ben de na ini a gemeente èn na dorosei fu a gemeente. Fu gi wan eksempre, Tori fu den Apostel kapitel 6 e taki fu wan trobi di ben de na mindri den nyun Kresten di ben e taki Hebrewtongo nanga den wan di ben e taki Grikitongo. Den apostel ben lusu a problema disi. Leki bakapisi fu dati, wi e leisi: „A bakapisi fu en ben de taki a wortu fu Gado tan gro, èn moro nanga moro sma na ini Yerusalem ben tron disipel; sosrefi bun furu priester ben teki a bribi.”—Tori fu den Apostel 6:7.
16 Bakaten, politiek afersi meki taki Kownu Herodes Agrepa fu Yudea, kisi problema nanga a pipel fu Tirus nanga Sidon. Den sma fu den foto dati begi Herodes na ala sortu fasi fu meki vrede nanga den, èn fu di Herodes ben lobi so, meki a taki nanga a pipel. Den sma di ben kon makandra bigin bari: „Disi a no a sten fu wan libisma, ma na a sten fu wan gado!” Wantewante na engel fu Yehovah naki Herodes Agrepa, èn a dede „bika a no ben gi Gado glori” (Tori fu den Apostel 12:20-23). Den sma di ben poti a howpu fu den tapu libisma tiriman skreki trutru fu a sani disi! (Psalm 146:3, 4) Ma den Kresten go doro fu gi glori na Yehovah. A bakapisi ben de taki „moro nanga moro sma na ala sei ben kon sabi a wortu fu Yehovah”, aladi dyugudyugu ben de na politiek sei.—Tori fu den Apostel 12:24.
Fosi nanga now
17. San moro nanga moro sma ben e du na ini a fosi yarihondro?
17 Iya, na ini a fosi yarihondro a Kresten gemeente ben abi sma na heri grontapu di ben e wroko tranga èn di ben e prèise Yehovah Gado fayafaya. Ala getrow Kresten ben e yepi fu prati a bun nyunsu. Wan tu fu den ben miti sma di ben arki den, èn soleki fa Yesus ben taki, den leri den fu gi yesi na ala den sani di a ben taigi den fu du (Mateyus 28:19, 20). A bakapisi ben de taki a gemeente ben kon moro bigi, èn moro nanga moro sma ben e prèise Yehovah soleki fa Kownu David fu owruten ben du dati. Den alamala ben taki den wortu di skrifi nanga yepi fu santa yeye: „Mi e prèise yu, o Yehovah, mi Gado, nanga mi heri ati, èn mi sa gi yu nen glori te ten di no skotu, bika yu sori lobi bun-ati gi mi trutru.”—Psalm 86:12, 13.
18. (a) Sortu difrenti wi e si na mindri a fosi Kresten gemeente nanga Krestenhèit na ini a ten disi? (b) San wi sa luku na ini na artikel di e kon?
18 Te wi e luku den tori dati, dan den wortu fu Allison A. Trites, professor fu kerki afersi, e poti wi na prakseri trutru. A man disi ben agersi Krestenhèit fu a ten disi nanga a Kresten bribi fu a fosi yarihondro, èn a taki: „Na ini a ten disi, furu tron a de so taki a nomru fu sma na ini den kerki e gro fu di den pikin e teki a bribi fu a famiri fu den, noso fu di wan memre e froisi go na wan tra kerki na ini a kontren. Ma na ini Tori fu den Apostel, a gemeente ben e gro fu di soso nyun sma ben e kon na ini a bribi. A gemeente ben nyun ete na a ten dati. Sobun, tra fasi no ben de fu meki a gemeente gro.” A sani disi wani taki dati tru Krestendom no e gro moro na a fasi fa Yesus ben taki dati a ben o gro? Kwetikweti. Tru Kresten na ini a ten disi e gi Gado glori na fesi trawan, èn den e du dati nanga a srefi faya di den Kresten na ini a fosi yarihondro ben abi. Wi sa si dati na ini na artikel di e kon.
Yu kan tyari disi kon na krin?
• Na sortu fasi wi e gi Gado glori?
• Fa Paulus gebroiki Psalm 19:4?
• San bribi abi fu du nanga a preikiwroko?
• San na wan tumusi prenspari sani di a Kresten gemeente fu a fosi yarihondro ben e du?
[Aksi fu a tori disi]
[Prenki na tapu bladzijde 8, 9]
Den hemel e gi kotoigi doronomo fu a glori fu Yehovah
[Sma di abi a reti fu a prenki]
Courtesy of Anglo-Australian Observatory, photograph by David Malin
[Prenki na tapu bladzijde 10]
Fu man du a preikiwroko, dan a de prenspari trutru fu begi Gado