„Na heri grontapu sma yere den”

„Go na ala kondre èn meki sma tron disipel, èn dopu den na ini a nen fu a Tata, fu a Manpikin èn fu a santa yeye.”—MATEYUS 28:19.

1, 2. (a) Sortu wroko Yesus ben gi den disipel fu en? (b) Fa a du kon taki den fosi yarihondro Kresten ben kan du so furu?

SYATU bifo Yesus opo go na hemel, dan a gi den disipel fu en wan wroko fu du. A ben taigi den: „Go na ala kondre èn meki sma tron disipel, èn dopu den na ini a nen fu a Tata, fu a Manpikin èn fu a santa yeye” (Mateyus 28:19). Dati ben de wan bun bigi wroko trutru!

² Denki a sani dati! Na a Pinksterfesa fu 33 G.T., sowan 120 disipel ben kisi santa yeye na den tapu, èn den bigin du a bigi wroko dati. Den ben fruteri sma taki Yesus ben de a Mesias di den ben fruwakti, èn taki nanga yepi fu en den ben kan kisi frulusu (Tori fu den Apostel 2:1-36). Ma fa so wan pikin grupu ben kan doro den ’sma fu ala kondre’? Libisma no ben o man du a sani disi, ma „Gado man du ala sani” (Mateyus 19:26). Den fosi Kresten ben kisi yepi fu a santa yeye fu Yehovah, èn den ben si a preikiwroko leki wan seryusu sani (Sakaria 4:6; 2 Timoteyus 4:2). Sobun, baka wan tu tenti yari nomo, na apostel Paulus ben kan taki dati a bun nyunsu ben preiki „gi ala sma na ondro hemel”.—Kolosesma 1:23.

3. San ben tapu a soifri Kresten „aleisi” na so wan fasi taki sma no ben man si en moro?

³ Na ini a moro bigi pisi fu a fosi yarihondro, a tru anbegi ben tan panya go na ala sei. Ma Yesus ben taki na fesi dati wan ten ben o kon pe Satan ben o sai „takru wiwiri” èn taki den ben o tapu a tru Kresten „aleisi” furu hondrohondro yari, teleki a kotiten doro. Baka di den apostel dede, a profeititori disi kon tru.—Mateyus 13:24-39.

A nomru fu sma e gro esi-esi na ini a ten disi

4, 5. Nanga sortu wroko den salfu Kresten bigin na ini 1919, èn fu san ede dati ben de wan bigi tyalensi?

⁴ Na ini 1919, a ten ben doro fu prati a soifri Kresten aleisi fu a takru wiwiri. Salfu Kresten ben sabi taki a bigi wroko fu Yesus ben musu du ete. Den ben bribi seryusu taki den ben e libi na ini „den lasti dei” èn den ben abi a profeititori fu Yesus na prakseri, namku: „A bun nyunsu disi fu a kownukondre o preiki na ala sma na heri grontapu, so taki ala kondre kan yere dati, èn dan a kaba o kon” (2 Timoteyus 3:1; Mateyus 24:14). Iya, den ben sabi taki furu wroko ben de fu du.

⁵ Ma neleki fa a ben de nanga den disipel na ini 33 G.T., na so den salfu Kresten ben abi fu du nanga wan bigi tyalensi tu. Den ben de nanga wan tu dusun sma nomo na ini wan tu kondre. Fa den ben o preiki a bun nyunsu gi „ala sma na heri grontapu”? Hori na prakseri taki a nomru fu sma na grontapu gro fu kande 300 milyun sma na ini a ten fu den Kèiser, kon miti sowan 2 milyard sma baka a fosi grontapufeti. Èn na ini a di fu a 20 yarihondro, a nomru fu sma na grontapu ben o gro esi-esi.

6. O furu den salfu Kresten ben du kaba na a pisi ten fu 1935 fu preiki a bun nyunsu?

⁶ Ma toku, neleki fa den brada fu a fosi yarihondro ben du, na so den salfu futuboi poti bribi na ini Yehovah dorodoro èn den bigin nanga  a wroko di den ben kisi fu du, èn a yeye fu en ben de nanga den. Na a pisi ten fu 1935, sowan 56.000 preikiman ben preiki a waarheid fu Bijbel na ini 115 kondre. Den ben du furu wroko kaba, ma moro ben de fu du ete.

7. (a) Nanga sortu nyun tyalensi den salfuwan kisi fu du? (b) Fa sani waka te nanga now nanga a wroko di den salfuwan, makandra nanga den tra skapu, du fu tyari sma kon makandra?

⁷ Baka dati, den Kresten disi kon frustan moro krin suma na a „bigi ipi” di kari na ini Openbaring 7:9. Disi tyari wan tra tyalensi kon, ma a ben de wan dyaranti tu gi den Kresten dati di ben e wroko tranga srefisrefi, taki den ben o kisi yepi. Wan bigi ipi „tra skapu”, namku bribiman di abi a howpu fu libi na grontapu, ben musu tyari kon makandra, èn den ben o komoto fu „ala kondre nanga lo nanga pipel nanga tongo” (Yohanes 10:16). Den sma disi ben o ’du santa diniwroko gi Yehovah dei nanga neti’ (Openbaring 7:15). Dati wani taki dati den ben o yepi nanga a preikiwroko èn a leriwroko (Yesaya 61:5). Fu dati ede den salfu Kresten ben breiti fu si fa a grupu preikiman fu a bun nyunsu ben gro nanga tin dusundusun èn baka dati nanga milyunmilyun. Na ini a yari 2003, wi ben abi wan nyun heimarki fu 6.429.351 sma di ben teki prati na a preikiwroko. A moro bigi pisi fu den preikiman disi na fu a bigi ipi. * Den salfu Kresten e warderi a yepi disi, èn den tra skapu e warderi a grani di den abi fu horibaka gi den salfu brada fu den.—Mateyus 25:34-40.

8. San Yehovah Kotoigi du di den kisi hebi kwinsi na a ten fu a di fu tu grontapufeti?

⁸ Di na aleisi grupu ben de krin fu si baka, dan Satan bigin wan hebi feti teige en (Openbaring 12:17). San a du di a bigi ipi kon de fu si? A handri na wan tumusi ogri-ati fasi! A no de fu taki, dati na en ben meki taki sma ben suku fu pori a tru anbegi na heri grontapu na ini a ten fu a di fu tu grontapufeti. Na ala tu sei fu a feti, Kresten ben kisi hebi kwinsi. Furu fu den lobi brada nanga sisa ben ondrofeni hebi tesi, sonwan fu den lasi den libi fu den bribi ede. Nanga a fasi fa den ben handri, den sori taki den ben firi a srefi fasi leki a psalm skrifiman di skrifi: „Na ini wánfasi nanga Gado mi sa prèise a wortu fu en. Tapu Gado mi e frutrow, mi no sa frede. San libisma kan du mi?” (Psalm 56:4; Mateyus 10:28) Nanga yepi fu a yeye fu Yehovah, den salfu Kresten makandra nanga den tra skapu, ben abi a krakti fu tan tanapu kánkan (2 Korentesma 4:7). Leki bakapisi fu dati, „a wortu fu Gado tan gro” (Tori fu den Apostel 6:7). Di orloku broko na ini 1939, dan 72.475 getrow Kresten ben teki prati na a preikiwroko. Ma a raportu fu a preikiwroko na ini 1945, a yari di a feti kon na wan kaba, ben sori taki 156.299 Kotoigi ben preiki a bun nyunsu nanga faya, èn dati na soso den wan di ben man seni a raportu fu den go na a edekantoro. Disi ben de wan bigi lasi gi Satan!

9. Sortu nyun skoro ben seti na a ten fu a di fu Tu Grontapufeti?

⁹ A de krin fu si taki a bruya di a di fu tu grontapufeti ben tyari kon, no ben meki den futuboi fu Yehovah tweifri efu a preikiwroko ben o du trutru. Iya, na ini 1943, di a feti doro wan heimarki, dan nyunsu bari taki tu nyun skoro ben seti. Wan fu den skoro, di wi e kari a Theokrasia Diniwroko-skoro now, ben musu hori na ini ala den gemeente fu leri ibriwan fu den Kotoigi fu preiki èn fu meki disipel. A tra skoro, namku a Waktitoren Bijbelskoro Gilead, ben seti fu gi leri na zendeling di ben o meki a preikiwroko go na fesi na ini tra kondre. Iya, di a feti kon na wan kaba, dan den tru Kresten ben de srekasreka fu du moro wroko.

10. Fa wi kan si taki a pipel fu Yehovah ben wroko fayafaya na ini 2003?

¹⁰ Den du wan tumusi bun wroko! Yonguwan  nanga owruwan, papa nanga mama èn den pikin fu den, ma sosrefi sma di no gosontu so, kisi leri na a Theokrasia Diniwroko-skoro. Den gebroiki a leri disi fu du a bigi wroko di Yesus gi wi fu du, èn den e tan du a wroko disi go doro (Psalm 148:12, 13; Yoèl 2:28, 29). Na ini a yari 2003, wan sani fu 825.185 sma sori ibri mun taki den sabi na ini sortu prenspari ten wi e libi, fu di den go na ini a pionierwroko wan pisi ten, noso ala mun baka. Na ini a srefi yari dati, Yehovah Kotoigi gebroiki 1.234.769.477 yuru fu fruteri trawan fu a bun nyunsu fu a Kownukondre. Fu tru, a e plisi Yehovah taki a pipel fu en de fayafaya!

A preikiwroko na ini tra kondre

11, 12. Sortu eksempre e sori taki den zendeling e du bun wroko srefisrefi?

¹¹ Na ini den yari di pasa, sma di klari a Gileadskoro èn no so langa ete, sosrefi sma di klari a Dinariskoro, du kefalek furu wroko. Teki leki eksempre Brasyonkondre. Na ini 1945, di den fosi zendeling doro drape, dan moro mendri leki 400 preikiman ben de nomo. Den zendeling disi èn sosrefi den wan di kon na den baka, wroko tranga makandra nanga den fayafaya Brasyon brada nanga sisa, èn Yehovah blesi den gi den muiti di den du. Gi den sma di man memre fa a ben de na a bigin, a de wan prisiri fu si taki wan heimarki fu 607.362 sma ben de na ini 2003!

¹² Poti prakseri na Yapan. Bifo a di fu tu grontapufeti, dan wan sani fu wán hondro Kownukondre preikiman ben de na ini a kondre dati. Na a ten fu a feti, hebi frufolgu ben meki taki den preikiman kon moro mendri, èn di a feti kon na wan kaba, dan wan tu Kotoigi nomo ben de na libi na yeye fasi èn na skin fasi (Odo 14:32). Den sma disi di hori den soifri retifasi na wan tumusi bun fasi, ben breiti trutru na ini 1949 fu gi wan switikon na den fosi 13 zendeling di ben kisi leri na a Gileadskoro. Wantewante den zendeling disi ben lobi den brada fu Yapan di ben abi switifasi èn di ben de fayafaya. Moro leki 50 yari baka dati, na ini a yari 2003, Yapan abi wan heimarki fu sowan 217.508 preikiman! Trutru, Yehovah blesi en pipel na ini a kondre dati. A srefi sani disi wi e si na ini furu tra kondre. Den wan di man preiki na ini kontren pe sma e taki wan tra tongo, ben de wan bigi yepi trutru fu prati a bun nyunsu. A bakapisi ben de taki na ini 2003 a bun nyunsu ben de fu yere na ini 235 kondre, èilanti, nanga kontren na heri grontapu. Iya, a bigi ipi e komopo fu „ala kondre”.

„Komopo fu ala . . . lo nanga pipel nanga tongo”

13, 14. Fa Yehovah sori taki a de tumusi prenspari fu preiki a bun nyunsu na ini „ala . . . tongo”?

¹³ Baka di den disipel ben salfu nanga santa yeye na a Pinksterfesa fu 33 G.T., dan den ben man taki na ini difrenti tongo nanga den ipi sma di ben kon makandra. Dati ben de a fosi wondru di ben pasa na a ten dati, soleki fa Bijbel e sori. A kan taki ala den sma di ben yere den, ben e taki wan tongo di sma ben taki na ini furu kondre, kande a Grikitongo. Fu di den ben de ’man di ben anbegi Gado’, meki a ben kan de so tu taki den ben frustan a Hebrewtongo di sma ben e taki na den seremonia di ben e hori na a tempel. Ma den sma bigin arki trutru di den yere a bun nyunsu na ini a tongo di den ben leri sensi den ben de beibi.—Tori fu den Apostel 2:5, 7-12.

¹⁴ Sosrefi na ini a ten disi, sma e taki furu difrenti tongo na ini a preikiwroko. Profeititori taki dati a bigi ipi no ben o komoto fu kondre wawan, ma sosrefi fu „lo nanga pipel nanga tongo”. Nanga yepi fu Sakaria, Yehovah ben taki wan profeititori di e kruderi nanga dati. A ben taki: „Tin man fu ala tongo fu den nâsi sa grabu hori, iya, fu tru den sa grabu hori a mofokanti fu a krosi fu wan man di de wan Dyu, èn taki: „Wi  wani go nanga unu, fu di wi yere taki Gado de nanga unu’” (Sakaria 8:23). Aladi Yehovah Kotoigi no abi a presenti moro fu taki difrenti tongo, toku den sabi o prenspari a de fu gi sma leri na ini den eigi tongo.

15, 16. San zendeling nanga trawan du fu man preiki na ini den tongo fu a kondre pe den e dini?

¹⁵ A tru, na ini a ten disi wan tu tongo de di sma e taki na ini furu kondre, soleki Ingrisitongo, Fransitongo, nanga Spanyorotongo. Ma den sma di gowe libi den mamakondre fu go dini na tra kondre e du muiti fu leri taki den tongo fu a kondre dati, so taki den sma „di abi a yoisti denki fu a têgo libi” kan frustan a bun nyunsu moro makriki (Tori fu den Apostel 13:48). Disi kan de wan tyalensi. Di den brada na ini a kondre Tufalu na ini a Stille Zuidzee ben abi buku fanowdu na ini den eigi tongo, dan wan fu den zendeling teki a wroko na en tapu fu doro a marki disi. Ma fu di nowan enkri wortubuku ben de na ini a tongo dati, meki a bigin poti den wortu fu a Tufalutongo na tapu papira. Baka wan pisi ten, a buku Joe kan libi foe têgo na ini wan paradijs na grontapoe * ben tyari kon na doro na ini a Tufalutongo. Di zendeling doro na Korsow, dan nowan enkri Bijbel publikâsi èn nowan enkri wortubuku ben de na ini Papiamento, a tongo fu a kondre dati. Boiti dati, furu sma no ben agri nanga makandra fu a fasi fa den musu skrifi a tongo. Aladi den problema disi ben de, toku tu yari baka di den fosi zendeling kon na ini a kondre dati, a fosi Kresten Bijbel traktaat ben kon na doro na ini a tongo dati. Tide na dei, Papiamento na wan fu den 133 tongo na ini san A Waktitoren e tyari kon na doro na a srefi ten leki a wan na ini Ingrisitongo.

¹⁶ Na ini Namibia, den fosi zendeling no ben man feni nowan enkri Kotoigi fu a kondre dati fu yepi den fu poti sani abra na ini tra tongo. Boiti dati, wán tongo fu a kondre dati, namku a Namatongo, no ben abi wortu gi spesrutu prakseri di wi e gebroiki furu na ini den publikâsi fu wi, soleki a wortu „volmaakti”. Wan zendeling ben taki: „Te mi ben musu poti sani abra na ini wan tra tongo, dan furu tron mi ben aksi den skoromisi noso skoromeester di ben e studeri Bijbel. Fu di den no ben abi furu sabi fu waarheid, meki mi ben sidon nanga den fu luku efu den ben e poti ibri prakseri abra na wan soifri fasi.” Ma toku a traktaat Leven in een Nieuwe Wereld (Libi na ini wan nyun grontapu) ben poti abra na ini fo fu den tongo di sma e taki na ini Namibia. Na ini a ten disi, A Waktitoren e tyari kon na doro doronomo na ini Kwanyamatongo nanga Ndongatongo. Disi e tyari kon na doro na a srefi ten leki den tijdschrift di skrifi na ini Ingrisitongo.

17, 18. Nanga sortu tyalensi den brada abi fu du na ini Meksikow èn na ini tra kondre?

¹⁷ Na ini Meksikow, Spanyorotongo na a moro  prenspari tongo. Ma bifo den Spanyorosma ben kon na a kondre dati, dan sma ben taki furu difrenti tongo drape, èn sma e taki wan tu fu den tongo disi ete. Fu dati ede, den publikâsi fu Yehovah Kotoigi e tyari kon na doro na ini seibi tongo fu Meksikow now, èn sosrefi na ini a dofusma-tongo fu Meksikow. A Wi Kownukondre diniwroko na ini a Mayatongo, ben de a fosi publikâsi di skrifi na ini wan Ingitongo fu Amerika. Iya, furu dusun Mayasma, Asteksma, nanga tra sma de na mindri den 572.530 Kownukondre preikiman di de na ini Meksikow.

¹⁸ Na ini a ten disi, milyunmilyun sma lowe go na tra kondre, noso den froisi gowe fu di den abi problema na ekonomia sei. Leki bakapisi fu dati, a de so taki fu a fosi leisi furu kondre lai now nanga bigi grupu fu sma di e taki wan tra tongo. Yehovah Kotoigi teki a bigi wroko na den tapu. Fu eksempre, na ini Italiakondre yu abi gemeente nanga grupu di e hori konmakandra na ini 22 tongo, boiti den wan di e hori na ini Italiatongo. Fu man yepi den brada nanga sisa fu preiki gi sma di e taki tra tongo, dan no so langa pasa wan tu les ben orga fu leri sma taki 16 tongo, sosrefi a dofusma-tongo fu Italiakondre. Na ini furu tra kondre, Yehovah Kotoigi e meki a srefi muiti fu doro bigi grupu sma di froisi kon fu tra kondre. Iya, nanga yepi fu Yehovah a bigi ipi e komoto trutru fu bun furu grupu fu sma di e taki difrenti tongo.

„Na heri grontapu”

19, 20. Sortu wortu fu Paulus e kon tru na wan tumusi moi fasi na ini a ten disi? Tyari disi kon na krin.

¹⁹ Na ini a fosi yarihondro, na apostel Paulus ben skrifi: „Den no ben yere dan? Iya, den yere; fu taki en leti ’na heri grontapu sma yere den, èn den wortu fu den, te na den moro farawe presi fu grontapu’” (Romesma 10:18). Efu dati ben de so na ini a fosi yarihondro, dan o moro dati de so na ini a ten fu wi! Milyunmilyun sma, kande moro leki iniwan ten na ini historia, e taki: „Mi sa blesi Yehovah ala ten; a prèise fu en sa de na ini mi mofo doronomo.”—Psalm 34:1.

²⁰ Boiti dati, a wroko no e go na baka. Den Kownukondre preikiman e kon moro furu. Den e gebroiki moro nanga moro ten na ini a preikiwroko. Den e tyari milyunmilyun gobaka èn hondro dusundusun sma e kisi bijbelstudie. Èn moro sma e tan kon fu di den wani sabi moro. A yari di pasa, wan nyun heimarki fu 16.097.622 sma kon na a Memrefesa fu a dede fu Yesus. A de krin fu si taki furu wroko de fu du ete. Meki wi tan waka baka na eksempre fu den brada fu wi, di tan hori den soifri retifasi aladi den ben abi fu du nanga hebi frufolgu. Meki wi de fayafaya leki ala den brada fu wi di gi densrefi na ini a diniwroko fu Yehovah sensi 1919. Kon meki wi alamala singi den wortu fu a psalm skrifiman: „Iya, ibri sani di e bro, meki a prèise Yah. Prèise Yah, un pipel!”—Psalm 150:6.

[Futuwortu]

Yu kan tyari disi kon na krin?

• Sortu wroko den brada bigin du na ini 1919, èn fu san ede a ben de wan tyalensi?

• Suma ben tyari kon makandra fu yepi nanga a preikiwroko?

• San na wan tu sani di zendeling nanga trawan du aladi den dini na ini tra kondre?

• Sortu buweisi yu kan kari di e sori taki Yehovah e blesi a wroko fu en pipel na ini a ten disi?

[Aksi fu a tori disi]

 [Raportu na tapu bladzijde 18-21]

2003 DINIWROKO RAPORTU FU YEHOVAH KOTOIGI NA HERI GRONTAPU

 (Luku a tijdschrift)

[Prenki na tapu bladzijde 14, 15]

A bruya di a di fu tu grontapufeti tyari kon no ben meki Kresten tweifri efu a bun nyunsu ben o preiki trutru

[Sma di abi a reti fu a prenki]

Explosion: U.S. Navy photo; others: U.S. Coast Guard photo

[Prenki na tapu bladzijde 16, 17]

A bigi ipi ben o komoto fu ala lo nanga tongo