Ondrofenitori

Wi kisi furu blesi fu di wi tan du a zendelingwroko

SOLEKI FA TOM COOKE FRUTERI

A ben de wan tiri bakadina. Wantronso wi yere fa gon ben e sutu. Kugru ben boro pasa den bon na ini wi dyari. San ben e pasa? Syatu baka dati, wi kon sabi taki srudati ben teki a makti abra èn taki Uganda ben de na ondro a tiri now fu Legre-edeman Idi Amin. Disi pasa na ini a yari 1971.

FU SAN EDE mi nanga mi wefi Ann ben froisi fu wan presi na ini Ingrisikondre pe vrede ben de, go na a pisi disi fu Afrika pe sma ben e feti èn pe dyugudyugu ben de? Mi denki taki mi lobi span sani, ma na a fosi presi fu di mi papa nanga mi mama ben gi mi na eksempre fu du a Kownukondre diniwroko fayafaya, meki mi ben wani go na tra kondre fu du zendelingwroko.

Mi man memre a waran dei na ini augustus 1946 ete, di Yehovah Kotoigi ben kon na mi papa nanga mi mama fu a fosi leisi. Den ben tanapu na a mofodoro èn den ben e taki fu wan langa pisi ten nanga den tu fisitiman. Den tu fisitiman disi, Fraser Bradbury nanga Mamie Shreve, ben kon baka furu tron. Na ini den mun baka dati, bigi kenki ben kon gi wi leki osofamiri.

Mi papa nanga mama ben sori deki-ati

Mi papa nanga mama ben teki furu prati na sani di abi fu du nanga a libimakandra. Fu eksempre, syatu bifo den bigin studeri Bijbel, dan leki moimoi den ben anga wan tu bigi fowtow fu Winston Churchill na ini wi oso. Na ini a pisi ten baka a grontapufeti di sma fu a kondre ben go stem, dan wi ben e hori konmakandra na wi oso nanga den memre fu a politiek partèi di no ben wani tyari kenki kon. A famiri fu wi ben sabi furu prenspari sma na ini kerki èn na ini a libimakandra.  Aladi mi ben abi neigi yari nomo na a ten dati, toku mi ben frustan taki den famiri fu wi no ben man bribi taki wi ben o tron Yehovah Kotoigi.

Den Kotoigi nanga suma wi ben abi demakandra, ben du a preikiwroko nanga den heri ati èn sondro frede. Na eksempre fu den ben gi mi papa nanga mi mama deki-ati fu de fayafaya na ini a preikiwroko. A no ben teki langa, di mi papa ben e hori lezing na publiki na ini Spondon, a foto pe wi ben e libi. Fu meki sma yere en, dan a ben poti wan boksu na a presi pe furu sma ben e kon fu bai sani. Te mi papa ben e hori den lezing, dan wi leki pikin ben tanapu nanga A Waktitoren nanga Ontwaakt! na presi pe sma ben kan si wi. Mi musu taki dati te den pikin nanga suma mi ben de na skoro ben waka kon na mi, dan mi ben winsi taki mi no ben de drape.

Na eksempre fu mi papa nanga mi mama ben gi mi bigi sisa, Daphne, deki-ati fu bigin du a pionierwroko. Na ini 1955, a go na a Waktitoren Bijbelskoro Gilead èn den seni en go leki zendeling na Yapan. * Ma mi pikin sisa Zoe no e dini Yehovah moro.

Na a pisi ten dati, mi ben kaba nanga a skoro pe mi ben leri fu teken sani, fu meki fowtow èn fu poti wortu na prenki. Na ini a ten dati, wan prenspari tori fu san den studenti na mi skoro ben e taki, ben de a plekti fu du srudatiwroko. Di mi fruteri den taki mi ben weigri fu du srudatiwroko fu di mi e hori misrefi na Bijbel gronprakseri, dan den ben denki taki mi ben e meki spotu. A pisi tori disi meki taki mi ben man abi furu Bijbel takimakandra nanga wan tu fu den studenti. Syatu baka dati, mi ben go 12 mun na dungru-oso fu di mi ben weigri fu du srudatiwroko. Wan fu den studenti fu a skoro dati ben wani sabi moro fu a Bijbel boskopu. Bakaten a studenti disi tron mi wefi. Ma mi o meki Ann fruteri fa en kon leri sabi a waarheid.

Fa Ann kon leri sabi a waarheid

„Mi famiri no ben e go na kerki, èn mi no ben dopu na nowan kerki. Ma mi ben lobi Gado tori èn fu dati ede mi ben go na iniwan kerki pe den mati fu mi ben e go. Mi ben wani kon sabi moro fu Bijbel di mi arki den span takimakandra di Tom nanga wan tra Kotoigi ben abi nanga den tra studenti fu a skoro. Mi skreki di Tom nanga a tra Kotoigi ben go na dungru-oso fu di den ben weigri fu du srudatiwroko.

Mi nanga Tom ben tan skrifi brifi gi makandra aladi a ben de na ini dungru-oso, èn mi ben wani kisi moro sabi fu Bijbel. Di mi froisi go na Londen fu studeri go doro na skoro, dan mi agri fu bigin studeri Bijbel nanga Muriel Albrecht. Fosi, Muriel ben dini leki zendeling na ini Estonia. En nanga en mama ben gi mi furu deki-ati. Baka wan tu wiki mi bigin go na den konmakandra èn mi ben tanapu e prati A Waktitoren nanga Ontwaakt! na a Victoria station, wan loko station na ini Londen.

Mi ben e go na a gemeente Southwark di de na a zuidsei fu Londen. Den brada nanga sisa na ini a gemeente dati, ben de fu difrenti kondre èn furu fu den ben pôti. Aladi den no ben sabi mi, toku den ben e handri nanga mi neleki mi na famiri. A lobi na ini a gemeente dati overtoigi mi taki disi ben de a waarheid. Mi teki dopu na ini 1960.”

Wi ben abi den srefi marki, ma sani ben kenki na ini wi libi

Bakaten na ini 1960, mi nanga Ann trow èn wi ben abi a marki fu go na ini a zendelingwroko. Ma sani kenki na ini wi libi di Ann ben kon de nanga bere. Baka di Sara, na umapikin fu wi gebore,  dan mi nanga Ann ben wani go dini ete na wan kondre pe moro Kownukondre preikiman ben de fanowdu. Mi ben suku wroko na wan tu kondre, èn te fu kaba na ini mei 1966 mi kisi wan brifi fu a Ministeria fu Skoroleri na ini Uganda. Na ini a brifi dati ben skrifi taki mi kisi wan wroko. Ma na a pisi ten dati, Ann ben de nanga bere fu a di fu tu pikin fu wi. Son sma ben tweifri efu a ben de wan koni sani fu abi a prakseri srefi fu froisi go so farawe. Wi ben aksi wi datra efu dati ben o de wan bun sani èn a ben taki: „Efu yu o froisi, dan yu musu frei nanga opolani fosi a wefi fu yu de nanga seibi mun bere.” Sobun, wantewante wi froisi go na Uganda. Leki bakapisi fu dati, den papa nanga mama fu wi no ben si a di fu tu umapikin fu wi, Rachel. Den ben si en fu a fosi leisi di a ben abi tu yari. Now di wisrefi abi granpikin, dan wi man frustan heri bun taki trutru den lobi papa nanga mama fu wi no ben e prakseri densrefi nomo, èn wi e warderi dati trutru.

Di wi doro na Uganda na ini 1966, dan wi ben de nanga prisiri, ma wi ben frede pikinso tu. Di wi saka fu na opolani, dan wi ben fruwondru fu si someni kloru lontu wi. Den kloru ben de so krin. A fosi oso pe wi ben tan ben de krosibei fu a pikin foto Iganga, di ben de 50 kilometer fara fu Jinja, wan foto na a bigin fu a Nijl-liba. Den wan-enkri Kotoigi di ben de krosibei fu wi oso ben de wan grupu na ini a farawe presi Jinja. Den zendeling Gilbert nanga Joan Walters èn Stephen nanga Barbara Hardy ben dini na ini a grupu dati. Mi ben aksi efu mi ben kan kisi wan wroko na ini Jinja so taki wi ben kan yepi a grupu disi moro bun. Syatu baka di Rachel gebore, wi froisi go na Jinja. Drape wi ben prisiri fu dini makandra nanga wan pikin grupu fu getrow Kotoigi, di gro teleki a tron a di fu tu gemeente na ini Uganda.

Leki osofamiri wi e dini na ini wan tra kondre

Mi nanga Ann si taki wi ben de na ini a moro bun presi fu kweki den pikin fu wi. Wi ben abi a grani fu wroko makandra nanga zendeling fu difrenti kondre èn fu yepi a nyun gemeente fu gro moro nanga moro. Wi ben lobi fu abi demakandra nanga den brada nanga sisa fu wi fu Uganda. Den ben kon luku wi furu tron na wi oso. Spesrutu Stanley nanga Esinala Makumba ben gi wi furu deki-ati.

Ma a no den brada nanga sisa wawan ben e kon luku wi. A presi lontu wi ben lai nanga someni sortu busimeti. Na neti den nijlpaard (bigi sortu watra bofru) ben gwenti fu komoto na ini a Nijl-liba èn den ben e waka langalanga kon te na wi oso. Mi man memre heri bun ete di wan aboma fu siksi meter ben de na ini wi dyari. Son tron, wi ben e go na spesrutu presi pe sma ben kan go koiri fu luku lew nanga tra busimeti di ben e waka lontu fri.

Te wi ben e du preikiwroko, dan den sma ben fruwondru fu si wi, fu di noiti den no ben si wan beibiwagi. Te wi ben go oso fu oso, dan nofo tron wan lo pikin-nengre ben waka na wi baka. Sma ben e luku wi na wan lespeki fasi, dan den ben fasi a weti beibi. A ben de wan prisiri sani fu preiki,  fu di den sma ben sori trutru switifasi nanga lespeki. Wi ben denki taki ala sma ben o kon na ini a waarheid, fu di a ben makriki fu bigin bijbelstudie nanga sma. Ma a ben de wan hebi sani gi furu fu den sma fu tapu nanga den gwenti di no de akruderi Bijbel. Toku furu sma bigin tyari den libi akruderi den hei markitiki fu Bijbel èn na so a gemeente ben gro. Wan prenspari sani di ben pasa na ini a pisi ten dati, na taki wi ben hori a fosi kring konmakandra na Jinja na ini 1968. Wan tu fu den sma di wi studeri Bijbel nanga den, teki dopu na ini a Nijl-liba. Disi na wan tumusi moi sani di wi sa tan memre. Ma a vrede di wi ben abi drape na ini a kondre ben o kon na wan kaba heri esi.

A preikiwroko tapu—Wi e kisi tesi tapu wi bribi èn wi musu feni nyun fasi fu preiki

Na ini 1971, Legre-edeman Idi Amin teki a makti abra. Ala sma na ini Jinja ben bruya srefisrefi. Wi ben de na ini wi dyari e dringi wan kopi te, di a sani pasa fu san wi ben taki na a bigin fu na ondrofenitori disi. Na ini den tu yari baka di a sani disi pasa, dan den tiriman ben seni den furu sma di ben komoto fu Asia, gowe fu a kondre. Furu trakondre-sma bosroiti fu gowe, èn den skoro, den ati-oso nanga datra-oso ben e go na baka srefisrefi. Lanti ben meki bekènti na wan krin fasi èn na wan ogri-ati fasi taki den ben tapu a wroko fu Yehovah Kotoigi. Fu di a Ministeria fu Skoroleri no ben wani taki ogri miti wi, meki den seni wi go na a mamafoto Kampala. Na tu fasi wi ben kisi wini fu di wi ben froisi. Sma no ben sabi wi na ini Kampala èn fu dati ede wi ben man du sani na wan moro fri fasi. Furu wroko ben de fu du sosrefi na ini a gemeente èn na ini a preikiwroko.

Brian nanga Marion Wallace, makandra nanga den tu pikin fu den, ben de na ini a srefi sortu situwâsi leki di fu wi èn den ben teki a bosroiti tu fu tan na ini Uganda. Wi ben e prisiri trutru taki den ben de drape nanga wi, aladi wi ben e dini makandra nanga den na ini a gemeente Kampala na ini a muilek ten disi. Den ondrofenitori di wi ben leisi fu brada nanga sisa di tan dini na ini tra kondre pe a preikiwroko tapu, ben gi wi spesrutu deki-ati now. Wi ben kon makandra na ini pikin grupu. Wan leisi na ini wan mun wi ben hori moro bigi konmakandra na ini wan moi dyari di nen Entebbe Botanical Gardens, pe wi ben e du neleki wi ben abi wan fesa. Den umapikin fu wi ben feni disi wan tumusi moi prakseri.

Wi ben musu luku bun na sortu fasi wi ben e du a preikiwroko. Sma ben o sabi wantewante san wi ben du efu den ben si taki weti sma e fisiti sma fu Uganda na den oso. Fu dati ede wi ben preiki na wenkri, na den gebow pe sma kan yuru wan kamra, èn sosrefi na son skoro. Wan sani di mi ben e du fu man preiki na ini wenkri, ben de fu aksi a wenkriman wan sani di mi ben sabi taki a  no ben de fu feni moro, sani soleki sukru noso aleisi. Efu a wenkriman ben sori taki a e sari fu den sani di ben e pasa na ini a kondre, dan mi ben bigin fruteri en a Kownukondre boskopu. Mi ben abi bun bakapisi fu di mi taki nanga sma na so wan fasi. Son tron te mi ben gowe fu a wenkri, dan mi ben abi wan gobaka, ma sosrefi pikinso fu wan nyanyan-sani di ben muilek fu feni.

Na a srefi ten, ogridu ben kon moro furu na ala sei. Fu di a banti na mindri Uganda nanga Ingrisikondre ben go na baka moro nanga moro, meki a tirimakti no ben wani meki wan nyun kontrakti moro fu mi ben kan tan wroko drape. Sobun na ini 1974, baka di wi libi aiti yari na ini Uganda, dan wi ben sari fu taigi den brada nanga sisa fu wi adyosi. Ma toku wi ben tan suku fu dini na tra kondre.

Wi e froisi go na Nyun Ginea

Na ini yanuari 1975, wi teki na okasi fu go wroko na ini Papuwa Nyun Ginea. Disi ben de a bigin fu den aiti prisiri yari fu diniwroko na ini a kontren fu a Stille Zuidzee. A banti di wi ben abi nanga den brada nanga sisa èn sosrefi a preikiwroko ben meki a libi fu wi kon warti, èn wi ben e kisi furu wini tu.

Wi leki osofamiri e memre a pisi ten di wi libi na ini Papuwa Nyun Ginea leki wan ten fu Bijbel drama. Ibri yari wi ben e yepi fu sreka den drama gi den distrikt kongres, èn wi ben abi furu prisiri di wi ben du disi! Wi ben e prisiri fu abi demakandra nanga furu osofamiri di ben e poti yeye afersi na a fosi presi, èn disi ben abi wan bun krakti tapu den umapikin fu wi. A moro owru umapikin fu wi, Sara, trow nanga wan spesrutu pionier di nen Ray Smith, èn den ala tu dini leki spesrutu pionier krosibei na a lanki fu Irian Jaya. Drape den ben e tan na ini wan dorpu èn den ben e libi na ini wan kampu di meki fu grasi. Sara e taki dati a leri tumusi bun sani na ini a pisi ten di a wroko drape.

Wi fiti wisrefi di sani kenki na ini wi libi

Baka aiti yari di wi dini na ini Papuwa Nyun Ginea, dan mi papa nanga mi mama ben musu kisi sorgu. Na presi taki mi papa nanga mi mama meki wi drai go baka na Ingrisikondre, dan den agri fu kon libi nanga wi. Na ini 1983, wi alamala froisi go na Australia. Den ben tan wan pisi ten sosrefi nanga mi sisa Daphne, di ben de na ini Yapan ete. Baka di mi papa nanga mi mama dede, dan mi nanga Ann teki a bosroiti fu go na ini a gewoon pionierwroko. Disi ben meki taki mi kisi wan spesrutu grani di ben de wan tyalensi gi mi trutru.

A no langa baka di wi bigin pionier, wi kisi a kari fu dini na ini a kringwroko. Sensi mi pikin-nengreten, mi ben si a fisiti fu a kringopziener leki wan spesrutu sani. Now na mi ben de wan kringopziener. Disi ben de a moro muilek wroko fu iniwan fu den wroko di wi du te na a momenti dati. Ma ibri tron baka, Yehovah yepi wi na fasi di wi no ben fruwakti srefisrefi.

Na ini 1990, Brada Theodore Jaracz ben kon na Australia leki zoneopziener. Di a ben de drape, dan wi aksi en efu a ben denki taki wi owru tumusi fu du a furuten diniwroko na tra kondre. A ben taki: „San unu e denki fu den Solomon-èilanti?” Sobun te fu kaba, di mi nanga Ann ben abi moro leki 50 yari, dan wi go na san wi kan kari a fosi zendelingwroko di wi kisi fu du.

Wi e go dini na den „Koloku-èilanti”

Sma sabi den Solomon-èilanti leki den Koloku-èilanti, èn diniwroko di wi du dyaso moro leki  tin yari kaba, ben de wan prisiri ten trutru. Di mi ben e dini drape leki distriktopziener, dan mi nanga Ann kon miti nanga den brada nanga sisa fu den Solomon-èilanti di abi trutru switifasi. A fasi fa den ben e handri nanga wi di wi kon drape, ben waran wi ati srefisrefi. A tongo di den sma fu den Solomon-èilanti e taki na wan fu den tongo na grontapu di abi soso wan tu wortu nomo. Te mi ben meki muiti fu brokobroko den sani na ini a tongo dati, dan ala sma ben hori na prakseri taki mi no ben man taki a tongo so bun.

Syatu baka di wi doro na den Solomon-èilanti, dan gensman ben pruberi fu tapu wi fu gebroiki a kongreshal fu wi. Na Anglikan kerki ben tyari wan kragi teige Yehovah Kotoigi go na krutubangi. Den ben taki dati wan pisi fu a gron pe wi bow a nyun kongreshal fu wi na ini Honiara, ben de fu den. A tirimakti ben horibaka gi den, sobun wi tyari a krutu-afersi disi na fesi a Hei Krutubangi. A bosroiti fu a krutu-afersi disi ben o sori efu wi ben o abi fu broko a nyun kongreshal fu wi di abi 1200 sidon presi.

A krutu-afersi ben hori wan heri wiki. Nanga ala overtoigi èn nanga bigifasi na afkati fu den sma di tyari wi na fesi krutu, ben e fruteri san ben de a kragi teige wi. Baka dati, na afkati fu wi, Brada Warren Cathcart fu Nyun Zeeland, ben e tyari a wan buweisi baka a trawan kon na fesi. A meki sma kon si taki ibri sani fu san den sma ben krutu wi, no ben tru. Tapu freida, a nyunsu fu a span krutu-afersi disi ben panya go na ala sei. A presi pe a krutu ben hori, ben de spanspan nanga sma di abi wan hei posisi na ini kerki, heihei tiriman, èn den brada fu wi. Mi man memre ete taki wan fowtu ben de na tapu a bord pe den ben skrifi sortu krutu ben o hori. Na presi taki den skrifi ’teige Yehovah Kotoigi’, dan den skrifi: „A Tirimakti fu den Solomon-èilanti nanga a kerki fu Melanesia teige Yehovah.” Wi wini a krutu-afersi disi.

Vrede ben de na den Koloku-èilanti efu wi agersi dati nanga tra presi, ma a vrede disi no ben tan fu wan langa pisi ten. Agen, mi nanga Ann ben de leti na mindri a bigi dyugudyugu nanga na ogridu di ben pasa na a pisi ten di srudati ben teki a makti abra. Wan borgu orloku ben kon fu di sma fu difrenti lo ben tron feanti fu makandra. Tapu 5 yuni 1999, a tirimakti ben fadon èn a mamafoto ben kon na ondro a makti fu srudati. Wan tu wiki langa a kongreshal fu wi ben de wan presi pe sma ben kon te den no ben abi nowan presi fu tan. Den tiriman ben fruwondru taki den Kresten brada nanga sisa fu wi ben e libi na a kongreshal na ini vrede leki wan famiri, aladi den ben de fu difrenti lo. Disi ben de wan bun kotoigi trutru!

Den srudati srefi ben e lespeki a bosroiti di Yehovah Kotoigi ben teki fu no teki sei na ini a feti. Fu dati ede wi ben man overtoigi wan fu den komandanti fu meki wan truck di ben lai nanga publikâsi èn nanga tra sani, pasa go na a kontren pe a legre fu den feanti fu den ben de, so taki wan pikin grupu fu brada nanga sisa ben kan kisi den sani disi. Wi alamala ben krei di wi miti baka nanga den osofamiri di ben prati fu wi wan tu mun langa.

Wi de nanga tangi gi furu sani

Te wi e prakseri a libi fu wi na ini a diniwroko fu Yehovah, dan wi de nanga tangi gi furu sani. Wi leki papa nanga mama abi a prisiri fu si taki den tu umapikin fu wi nanga den masra fu den, Ray nanga John, e tan dini Yehovah getrow. Den yepi wi trutru na ini a zendelingwroko fu wi.

Mi nanga Ann abi a grani fu dini 12 yari kaba na a bijkantoro na den Solomon-èilanti. Na ini den yari dati, wi si fa a nomru fu Kownukondre preikiman na den Solomon-èilanti kon tu tron moro furu. Now moro leki 1800 preikiman de drape. No so langa pasa, mi ben kisi a grani tu fu go na Patterson, New York, pe wan skoro ben hori gi den memre fu den Bijkantoro Komte. Fu tru, wi kisi furu blesi na ini wi libi fu di wi ben poti leki marki fu tan du a zendelingwroko.

[Futuwortu]

[Prenki na tapu bladzijde 23]

A trowdei fu wi na ini 1960

[Prenki na tapu bladzijde 24]

Na ini Uganda, pe Stanley nanga Esinala Makumba ben gi a famiri fu wi furu deki-ati

[Prenki na tapu bladzijde 24]

Sara e waka go na ini a kampu fu wan birtisma

[Prenki na tapu bladzijde 25]

Mi ben e teken sani fu man gi leri na den sma fu den Solomon-èilanti

[Prenki na tapu bladzijde 25]

Wi e miti nanga wan gemeente na ini wan farawe presi fu den Solomon-èilanti

[Prenki na tapu bladzijde 26]

A famiri fu wi now