Aksi fu leisiman

Fu san ede soleki fa a skrifi na ini Genesis 38:15, 16, Yuda ben abi seks demakandra nanga wan uma di a ben e si leki wan huru-uma?

Yuda ben abi seks demakandra nanga wan uma, di a ben e si leki wan huru-uma, ma te yu e luku en bun na uma no ben de wan huru-uma. Soleki fa Genesis kapitel 38 e sori, dan disi na san pasa.

Bifo a fosi gebore manpikin fu Yuda ben kisi pikin nanga en wefi Tamar, dan Gado kiri en fu di a „ben takru na ini Yehovah ai” (Genesis 38:7). Na a ten dati, swagri-trow ben de wan gwenti. Disi ben wani taki dati te wan man dede sondro fu kisi pikin, dan a brada fu en ben abi a plekti fu trow nanga a wefi fu en brada di dede, so taki a ben kan meki pikin gi en brada. Ma a di fu tu manpikin fu Yuda, Onan, ben weigri fu du a plekti disi. Fu dati ede, a dede, fu di Gado ben strafu en. Ne Yuda seni Tamar, a wefi fu a manpikin fu en, go baka na en papa oso teleki a ten ben doro taki Sela, a di fu dri manpikin fu Yuda, ben owru nofo fu trow nanga en. Ma den yari ben e pasa, èn Yuda no meki Sela trow nanga Tamar. Sobun di Yuda en wefi dede, dan Tamar seti sani fu kisi wan pikin nanga Yuda, a man fu Israel di ben de a papa fu en masra di dede. A weri krosi leki wan tempel huru-uma èn a go sidon na a pasi pe a ben sabi taki Yuda ben o pasa.

Yuda ben abi seks demakandra nanga Tamar, sondro fu sabi taki na en. Na wan koni fasi Tamar kisi wan tu presenti fu en fu di a ben sribi nanga en. Nanga den presenti disi a ben kan sori bakaten taki na Yuda ben gi en bere. Di a tori kon na doro taki Yuda ben gi en bere, dan Yuda taki dati Tamar no ben abi fowtu, èn nanga sakafasi Yuda ben taki: „A regtfardiki moro mi, fu di mi no gi en Sela, mi manpikin.” Èn a fiti srefisrefi taki „a no ben abi demakandra moro nanga en”.—Genesis 38:26

Yuda no ben handri bun fu di a no meki Sela, a manpikin fu en, trow nanga Tamar soleki fa a ben pramisi. Sosrefi a ben abi seks demakandra nanga wan uma, di a ben e si leki wan tempel huru-uma. Disi ben de kontrari a prakseri fu Gado taki wan man kan abi seks demakandra soso te a trow (Genesis 2:24). Ma te yu e luku en bun, dan Yuda no ben abi demakandra nanga wan huru-uma. Na presi fu dati, sondro fu a sabi, a du san Sela, a manpikin fu en ben musu du akruderi a swagri-wet èn na so a tron a papa fu wan trutru bakapikin.

A demakandra di Tamar ben abi nanga Yuda no ben de hurudu. Sma no ben e si den twelengi manpikin fu en leki pikin fu hurudu. Di Boas fu Betlehem ben teki a Moab uma, Rut, leki en wefi na ini wan swagri-trow, dan den owruman fu Betlehem ben taki bun fu Tamar en manpikin Peres. Den ben taigi Boas: „Meki yu oso tron neleki na oso fu Peres, di Tamar ben meki gi Yuda, fu den bakapikin di Yehovah sa gi yu nanga yepi fu na yongu uma disi” (Rut 4:12). Peres nen e kari sosrefi na mindri den afo fu Yesus Krestes.—Mateyus 1:1-3; Lukas 3:23-33.