Den wondru sani di Yehovah meki

„Den bon fu Yehovah de tevrede”

OITI yu tanapu na ini wan busi, di a faya fu a son skèin kon na mindri den hei bon? Yu ben yere fa a winti e wai pasa na ini den wiwiri fu den bon dati?—Yesaya 7:2.

Na ini son kontren fu grontapu, a e pasa na ini spesrutu pisi ten fu a yari, taki den wiwiri fu difrenti bon e kenki kloru kon redi, alanya, geri, nanga tra sortu kloru. Iya, a gersi leki den busi e teki faya! A sani disi e fiti a prakseri fu Yesaya trutru: „Meki prisiri, un bergi, bari nanga prisiri, yu busi nanga ala un bon di de na ini en!”—Yesaya 44:23. *

Pikinmoro a di fu dri pisi fu grontapu na soso busi. Den busi nanga ala den libisani na ini e gi glori na a Mekiman fu den, namku Yehovah Gado. A psalm skrifiman di ben skrifi den wortu disi nanga yepi fu a santa yeye ben singi: „Prèise Yehovah, un froktubon nanga ala un sedre.”—Psalm 148:7-9.

A buku The Trees Around Us (Den bon di de lontu wi) e taki: „Libisma abi bon fanowdu fu man tan na libi, fu di bon e gi libisma nyanyan, èn bon na moi sani fu si sosrefi.” Den busi e kibri sma, den e hori sma na libi, èn den e sorgu taki libisma e kisi krin watra na ini liba, kriki, nanga peti. Bon e meki sosrefi taki a loktu e kon soifri. Na wan wondru fasi den cel na ini den bon wiwiri e kenki son stof kon tron zuurstof nanga tra sani di e yepi den bon gro.

A busi na wan moi sani di meki na wan tumusi koni fasi. Furu tron den bun bigi bon na den moro kefalek moi sani na ini a busi. Na mindri den bon disi yu abi bun furu pikin safu prani soleki varens [Filicineae] èn difrenti sortu grungrun di e gro na tapu a doti. Yu kan si pikin busibusi sosrefi, wiwiri di e gro na bonskin èn furu moro tra pikin bon nanga bromki. Den sortu sani disi di e gro abi den bigi bon fanowdu fu man tan na libi, fu di den e gro na ini a kowrupe fu den bon dati, èn den e teki a foktu di a busi dati e gi.

Na ini son busi pe den wiwiri fu den bon e fadon na a kaba fu a yari, pikinmoro tin milyun wiwiri kan fadon na tapu wan pisi gron fu wán hectare. San e pasa nanga den wiwiri disi? Te fu kaba, insekt, sani soleki todoprasoro, woron, nanga tra sortu pikin libisani di de na ini a busi e kenki ala den wiwiri disi kon tron blaka doti. A doti disi prenspari srefisrefi fu meki sani gro bun. Iya, sondro taki sma e si dati, den sortu libisani disi e sreka a doti so taki nyun sani kan gro. Na so fasi noti no e frumorsu.

Wan lo libisani de na ondro den wiwiri di didon na tapu a gron fu a busi. Soleki fa a buku The Forest (A busi) e taki, dan „sowan 1350 libisani . . . kan libi na ini wan pisi gron fu 30 fokanti centimenter di dipi tu nanga afu centimeter. Dan wi no e teri den someni trilyun difrenti libisani di de na ini ibri anu doti èn di sma no man si nanga ai.” Boiti dati, a busi lai nanga sneki, fowru, insekt, nanga meti. Suma musu kisi grani gi den someni difrenti moi sani disi? A Mekiman fu den sani disi e taki nanga leti: „Ibri werdri meti fu a busi na fu mi, sosrefi den meti na tapu dusun bergi.”—Psalm 50:10.

Son meti meki nanga wan tumusi aparti koni fu sribi a heri kowru pisi ten fu a yari. A sani disi e meki taki den no e dede leki bakapisi fu a hebi kowru, noso fu di den no sa man feni nyanyan gi wan langa pisi ten. Ma a no ala meti e sribi a heri kowru pisi ten fu a yari. Srefi te a kowru pisi ten fu a yari pasa afu nomo, dan yu kan si wan grupu dia e dyompo na ini wan gron. Dia no e sribi na ini a heri kowru pisi ten fu a yari èn den no e kibri nyanyan gi wan tra ten. Den meti disi e suku nyanyan, èn den e nyan yongu taki nanga bromki soleki fa yu kan si dati na tapu a fowtow fu Doisrikondre di de fu si na tapu a bladzijde disi.

 Den Buku fu Bijbel e taki furu fu bon èn fu sani di e gro na busi. Soleki fa sma teri, dan Bijbel e taki fu sowan 130 spesrutu sani di e gro, èn sosrefi fu 30 difrenti sortu bon. Disi na san Micheal Zohary, sabiman fu bon, e taki fu den sortu sani dati di skrifi na ini Bijbel: „Srefi na ini aladei grontapu buku, wan sma no e feni so furu tori di e taki fu sani di e gro èn di abi fu du nanga difrenti afersi fu a libi, soleki fa dati de fu feni na ini Bijbel.”

Bon nanga busi na tumusi moi presenti fu wan lobi-ati Mekiman. Efu yu sabi fa a de na ini a busi, dan a no de fu taki dati yu e agri nanga den wortu fu a psalm skrifiman: „Den bon fu Yehovah de tevrede, den sedre fu Libanon di a prani, pe den fowru srefi e meki den oso.”—Psalm 104:16, 17.

[Futuwortu]

[Faki na tapu bladzijde 9]

Wan fu den moro moi froktubon fu den kondre na a Mindri-owstusei, na a amandrabon [Amygdalus communis]. Frukufruku na ini a yari, a bon disi e bigin gi bromki, èn dati na wan heri pisi ten bifo furu tra bon e gi bromki. Den Hebrewsma fu owruten ben kari na amandrabon a bon di e wiki, fu di a e meki bromki frukufruku na ini a yari. Fu taki en leti, te a bon disi e wiki dan a lai nanga wan sortu rediredi bromki noso weti bromki.—Preikiman 12:5.

Fu den pikinmoro 9000 difrenti pikin fowru di libisma sabi, sowan 5000 fu den na singifowru. Te den pikin fowru disi e singi, dan dati de fu yere na ini a heri bigi busi (Psalm 104:2). Fu gi wan eksempre, wan spesrutu sortu pikin fowru [Melospiza melodia] e singi wan heri moi singi. Den sortu singifowru leki a wan di de fu si tapu a fowtow disi [Oporornis philadelphia], na pikin singifowru di abi kefalek moi kloru soleki greisi, geri, nanga wan sortu grungrun kloru.—Psalm 148:1, 10.

[Prenki na tapu bladzijde 9]

Busi na ini Normandia, na Fransikondre