A Wortu fu Yehovah de libilibi

Edepenti fu a buku Genesis—II

GENESIS e taki fu a ten di Adam, a fosi libisma meki, te go miti a ten di Yosef, a manpikin fu Yakob, dede. Dati na ala nanga ala 2369 yari fu a libisma historia. Den fosi tin kapitel èn sosrefi den neigi vers fu kapitel 11, e taki fu a pisi ten di Gado ben meki sani, te go miti a pisi ten di a toren fu Babel ben meki. Wi ben taki fu den sani disi na ini A Waktitoren di ben kon na doro fosi a wan disi. * Na ini na artikel disi wi sa go luku a lasti pisi fu Genesis, namku fa Gado ben handri nanga Abraham, Isak, Yakob, nanga Yosef.

ABRAHAM E TRON GADO MATI

(Genesis 11:10–23:20)

Sowan 350 yari baka a Frudu, wan spesrutu man na ini Gado ai, e gebore na ini a famirilin fu Sem, a manpikin fu Noa. A nen fu a man disi na Abram, èn bakaten en nen e kenki tron Abraham. Abram e gi yesi na a komando fu Gado èn a e gowe libi a foto Ur na ini a kondre Kaldea, èn a e libi na ini tenti aladi a e teki waka go na a kondre di Yehovah e pramisi fu gi en nanga den bakapikin fu en. Fu di Abraham abi bribi èn fu di a e gi yesi meki Bijbel kari en „Yehovah mati”.—Yakobus 2:23.

Yehovah e pori den ogrisma di e libi na ini a foto Sodom èn na ini den foto di de krosibei, aladi a e hori Lot nanga den umapikin fu en na libi. A pramisi fu Gado e kon tru te Isak, a manpikin fu Abraham, gebore. Baka wan tu yari, Abraham e kisi tesi tapu en bribi fu di Yehovah e taigi en fu gi en manpikin leki srakti-ofrandi. Abraham de klariklari fu gi yesi na a komando disi, ma wan engel e tapu en so taki a no kiri en manpikin. Nowan tweifri no de taki Abraham na wan man di abi bribi, èn a de seiker taki nanga yepi fu en siri ala pipel sa kisi blesi gi densrefi. Te Sara, a lobi wefi fu Abraham, dede, dan Abraham e sari srefisrefi.

Piki tapu den aksi fu Bijbel:

12:1-3​—O ten a frubontu nanga Abraham, bigin wroko èn o langa a tan? A frubontu di Yehovah sroto nanga Abram dati „nanga yepi fu [Abram] ala famiri fu grontapu fu tru sa blesi densrefi”, ben sroto kande di Abram abra na Eufraatliba fu go na Kanan. Disi ben musu fu de  tapu 14 Nisan 1943 b.G.T., dati na 430 yari bifo Israel kisi frulusu fu katibo na ini Egepte (Exodus 12:2, 6, 7, 40, 41). A frubontu di sroto nanga Abraham na „wan frubontu te ten di no skotu”. A frubontu disi e tan teleki ala famiri fu grontapu kisi blesi èn teleki ala den feanti fu Gado kisi pori krinkrin.—Genesis 17:7; 1 Korentesma 15:23-26.

15:13​—Soleki fa a ben taki na fesi dan den bakapikin fu Abram ben o kisi kwinsi 400 yari langa. O ten disi kon tru? A pisi ten di a kwinsi bigin, ben de na ini 1913 b.G.T. di Isak, a manpikin fu Abraham, ben puru na bobi di a ben abi sowan 5 yari. Na a pisi ten dati, dan Ismael, na afu brada fu Isak, di ben abi 19 yari, ben e „spotu” en (Genesis 21:8-14; Galasiasma 4:29). A kwinsi ben kon na wan kaba di den Israelsma ben komoto na ini katibo fu Egepte na ini 1513 b.G.T.

16:2​—A ben de wan yoisti sani taki Sarai gi en uma-futuboi Hagar leki wefi na Abram? A sani di Sarai du ben de akruderi a gwenti fu a ten dati, namku taki efu wan wefi no ben man meki pikin, dan a ben musu gi en masra wan uma so taki na uma dati kan meki wan pikin di ben o de leki erfgenaam. A fosi leisi di a pasa taki wan sma ben abi moro leki wán trowpatna, ben de na ini a famiri fu Kain. Te fu kaba, a sani disi ben kon de wan gwenti èn son wan fu den futuboi fu Yehovah ben teki a gwenti disi abra (Genesis 4:17-19; 16:1-3; 29:21-28). Ma a markitiki di Yehovah ben abi na a bigin, taki wan sma no kan abi moro leki wán trowpatna, noiti no kenki (Genesis 2:21, 22). Soleki fa a sori dan Noa nanga den manpikin fu en, di ben kisi a komando fu ’meki pikin èn furu grontapu’, ben abi wán trowpatna nomo (Genesis 7:7; 9:1; 2 Petrus 2:5). Yesus Krestes ben seti a markitiki disi baka di a taki dati wan sma musu abi wán trowpatna nomo.—Mateyus 19:4-8; 1 Timoteyus 3:2, 12.

19:8​—A ben de wan fowtu sani taki Lot ben wani gi den umapikin fu en na den man fu Sodom? Soleki fa a gwenti ben de na den kondre na Owstusei, dan a sma di e kisi fisitiman na en oso abi a frantwortu fu kibri den fisitiman fu en, srefi efu a ben sa wani taki dati a musu dede gi den. Lot ben de klariklari fu du dati. Nanga deki-ati a ben go na dorosei na a bigi grupu fu sma, a ben tapu a doro na en baka èn en wawan ben de drape fu taki nanga den sma. Di Lot ben wani gi den umapikin fu en, dan a ben sabi taki den fisitiman fu en ben de boskopuman fu Gado. Kande a ben prakseri taki Gado ben kan kibri den umapikin fu en neleki fa Gado ben kibri en tanta Sara na ini Egepte (Genesis 12:17-20). Fu tru, soleki fa sani ben waka moro fara, dan Lot nanga den umapikin fu en ben kisi kibri.

19:30-38​—Yehovah ben feni en bun taki Lot ben kon drungu èn taki a ben gi den tu umapikin fu en bere? Yehovah no e feni en bun te wan sma abi seks demakandra nanga en famiri èn a no e feni en bun taki wan sma e drungu (Lefitikus 18:6, 7, 29;1 Korentesma 6:9, 10). Fu taki en leti, dan Lot ben krutu den sma fu Sodom fu di den ben du „kruktudu” (2 Petrus 2:6-8). A de krin fu si taki, den umapikin fu Lot ben drungu en, fu di den ben sabi taki Lot no ben o wani abi seks demakandra nanga den efu a no ben drungu. Ma leki freimdesma na ini a kondre, dan den umapikin ben feni taki disi ben de a wan-enkri fasi fa Lot ben kan kisi bakapikin. A tori disi de na ini Bijbel fu sori san den Moabsma (den bakapikin fu Moab) nanga den Amonsma (den bakapikin fu Ben-Ami) abi fu du nanga den bakapikin fu Abraham, namku den Israelsma.

Sani di wi kan leri:

13:8, 9. Abraham e gi wan tumusi moi eksempre di e sori wi san wi musu du te kesekese de! Noiti wi musu meki a bun banti di wi abi nanga trawan kon pori fu moni ede, fu di wi wani sani pasa soleki fa wi wani, noso fu di wi abi heimemre.

15:5, 6. Di Abraham kon owru èn a no ben abi wan manpikin ete, dan a taki nanga en Gado fu a tori disi. Yehovah fu en sei, ben sori Abraham taki a ben kan de seiker taki disi ben o kon tru. San ben de a bakapisi? Abraham ben „bribi na ini Yehovah”. Te wi e sori Yehovah na ini begi san de tapu wi ati, te wi e frutrow tapu den pramisi di skrifi na ini Bijbel, èn te wi e gi yesi na en, dan a bribi di wi abi na ini en sa kon tranga.

15:16. Fo geslakti baka makandra, Yehovah no ben tyari pori kon tapu a pipel di den e kari  den Amoriet (noso Kanansma), aladi a ben krutu a pipel disi. Fu san ede a no ben du dati? Fu di en na wan Gado di abi pasensi. A ben wakti teleki nowan howpu ben de moro taki den sma ben o kenki. Neleki Yehovah, dan wi sosrefi musu abi pasensi.

18:23-33. Yehovah no e pori ala sma. A e kibri den regtfardikiwan.

19:16. Lot ben „tan draidrai” èn pikinmoro den engel ben abi fu srepi en nanga en osofamiri komoto fu a foto Sodom. A sa de wan koni sani gi wi fu hori na prakseri na ini sortu ten wi e libi aladi wi e wakti a kaba fu na ogri grontapu.

19:26. A de wan don sani efu den sani di wi libi na baka na ini a grontapu e puru wi prakseri, noso efu wi wani go baka na den sani dati!

YAKOB E KISI 12 MANPIKIN

(Genesis 24:1–36:43)

Abraham e seti sani so taki Isak kan trow nanga Rebeka, wan uma di e bribi na ini Yehovah. A e meki wan twelengi, namku Esau nanga Yakob. Esau no e warderi a reti di a abi leki fosi geborewan èn a e seri a reti dati gi Yakob. Bakaten Yakob e kisi blesi fu en papa. Yakob e lowe go na a presi Paddam-Aram pe a e trow nanga Lea èn nanga Rakel, èn a e luku den ipi skapu fu a papa fu den, sowan 20 yari langa. Baka dati a e komoto fu drape makandra nanga en osofamiri. Yakob e meki 12 manpikin èn a e meki umapikin sosrefi; a e meki den pikin disi nanga Lea, Rakel, nanga den tu uma-futuboi fu den. Yakob e aswa nanga wan engel èn a e kisi blesi. A nen fu en e kenki kon tron Israel.

Piki tapu den aksi fu Bijbel:

28:12, 13​—San de prenspari na ini a dren fu Yakob di ben abi fu du nanga „wan trapu”? A „trapu” disi, di ben gersi wan ston trapu kande, e sori taki na a wan noso tra fasi den yeye na hemel e wroko makandra nanga libisma na grontapu. Den engel fu Gado di ben e kren go na loktu èn di ben e saka kon na gron, e sori taki den engel e du wan prenspari wroko fu hori a kontakti na mindri Yehovah nanga den libisma di a feni bun.—Yohanes 1:51.

30:14, 15​—Fu san ede Rakel ben wani den lobi-apra na presi fu teki na okasi fu didon nanga en masra? Na ini owruten, sma ben e gebroiki a froktu disi leki wan drugs di den ben e poti na ini dresi. Den ben e gebroiki en sosrefi fu no kisi krampu, noso fu dresi wan sma di abi krampu. Boiti dati, den sma ben e bribi taki a froktu disi ben man wiki den sekslostu fu wan sma èn taki a ben kan meki wan sma hori bere moro makriki (Heisingi 7:13). Bijbel no e taki fu san ede Rakel ben du a sani disi, ma kande a ben denki taki den lobi-apra ben o yepi en fu hori bere èn na so fasi a no ben o abi fu tan sondro fu meki pikin. Ma a ben de baka wan tu yari fosi di Yehovah „ben opo en muru”.—Genesis 30:22-24.

Sani di wi kan leri:

25:23. Yehovah man sabi fa wan sma sa de bifo a gebore èn a man sabi san o pasa na fesi. Fu di a abi a sabi disi meki a man frukisi na fesi suma a o gebroiki fu meki den prakseri fu en kon tru. Ma a no e seti na fesi fa sani o waka nanga ibri sma te fu kaba.—Hosea 12:3; Romesma 9:10-12.

25:32, 33; 32:24-29. Yakob ben broko en ede fu kisi a reti di a fosi geborewan abi èn a ben strei wan heri neti langa nanga wan engel so taki a ben kan kisi blesi. Den sani disi e sori taki Yakob ben e warderi santa sani trutru. Yehovah gi wi wan tu sani soleki a banti di wi abi nanga en èn en organisâsi, a lusu-paiman, Bijbel, nanga a howpu fu a Kownukondre. Meki wi de neleki Yakob fu di wi e sori warderi gi den sani disi.

34:1, 30. Yakob ben tyari fluku kon na en tapu. A problema disi ben bigin soso fu di Dina ben abi mati di no ben lobi Yehovah. Na wan koni fasi wi musu suku suma wi o teki leki mati.

YEHOVAH E BLESI YOSEF NA INI EGEPTE

(Genesis 37:1–50:26)

Den manpikin fu Yakob e dyarusu tapu den brada Yosef èn den e seri en leki wan srafu. Na ini Egepte, Yosef e go na strafu-oso fu di a e hori ensrefi na den hei markitiki fu Gado na wan getrow fasi èn nanga deki-ati. Baka wan pisi ten a teki puru fu strafu-oso fu fruklari san den dren fu Farao wani taki. Den dren disi e sori na fesi  taki seibi yari sa kon pe furu nyanyan sa de èn baka dati seibi yari sa kon pe angriten sa de. Den e poti Yosef leki na edeman di musu luku den nyanyan sani. Den brada fu en e kon na Egepte fu suku nyanyan fu di angriten de. A famiri e kon na wán baka èn den e go libi na a fatu gron na ini Gosen. Te Yakob de fu dede, dan a e blesi den manpikin fu en èn a e taki wan profeititori di e gi wan trutru howpu taki bigi blesi sa kon na ini a ten di e kon. Den e tyari a dedeskin fu Yakob go na Kanan fu beri en. Te Yosef abi 110 yari a e dede èn sma e sreka a dedeskin so taki a no e pori; te fu kaba den e tyari a dedeskin go na a Pramisi Kondre.—Exodus 13:19.

Piki tapu den aksi fu Bijbel:

43:32​—Fu san ede a ben de wan tegu sani gi den Egeptesma fu nyan makandra nanga den Hebrewsma? Kande disi ben de so moro furu fu di den Egeptesma ben e denki takru fu a bribi fu den Hebrewsma, noso fu di den ben e denki taki den Egeptesma ben hei moro den Hebrewsma. Den Egeptesma ben e tegu sosrefi gi den sma di ben e luku skapu (Genesis 46:34). Fu san ede? Kande fu di den sma di ben luku skapu ben de pikinmoro ini a moro lagi posisi na ini Egepte. A ben kan de so tu taki fu di fatu gron no ben de so furu, meki taki den Egeptesma ben e wisiwasi den wan di ben e suku weigron gi den ipi meti.

44:5​—A de so trutru taki Yosef ben gebroiki wan kan fu suku marki fu sani di o pasa? A solfru kan nanga a sani di ben taki fu a solfru kan ben abi fu du nanga wan fasi fu kori den brada fu en. Yosef ben de wan getrow anbegiman fu Yehovah. A no ben gebroiki a kan trutru fu suku marki fu sani di o pasa, neleki fa Benyamin no ben fufuru a kan trutru.

49:10​—San „a kownu-tiki” nanga „a tiriman-tiki” wani taki? Wan kownu-tiki na wan tiki di wan tiriman abi, fu sori taki a abi a makti fu wan kownu. A tiriman-tiki na wan langa tiki di e sori taki wan tiriman abi a makti fu gi komando. Yakob e taki fu den sani disi fu sori taki na ini a lo fu Yuda, wan sma sa kisi bigi tirimakti teleki Silo kon. A bakapikin fu Yuda na Yesus Krestes. Yehovah gi en a makti fu tiri na hemel. Krestes abi a makti fu tiri leki kownu èn a abi a makti fu gi komando.—Psalm 2:8, 9; Yesaya 55:4; Danièl 7:13, 14.

Sani di wi kan leri:

38:26. Yuda ben handri na wan fowtu fasi nanga Tamar, a wefi fu en manpikin di dede. Ma di a kon na krin taki Yuda ben gi na uma disi bere, dan na wan saka fasi Yuda taki dati a du wan fowtu sani. Wi musu de klariklari sosrefi fu taki dati wi meki wan fowtu.

39:9. A fasi fa Yosef ben handri nanga a wefi fu Potifar, e sori taki den sani di a ben prakseri ben de akruderi a prakseri fu Gado, di abi fu du nanga a fasi fa wan sma musu tyari ensrefi. Boiti dati, Yosef ben tyari ensrefi akruderi a konsensi fu en di kisi leri fu den markitiki fu Gado. Wi musu meki muiti sosrefi fu du a srefi sani aladi wi e teki moro nanga moro soifri sabi fu a waarheid, a no so?

41:14-16, 39, 40. Yehovah kan meki wan situwâsi kenki heri tra fasi gi den wan di e frede en. Te wi e kisi gens, dan a sa de wan koni sani gi wi fu poti wi frutrow tapu Yehovah èn fu tan getrow na en.

Den ben abi wan tranga bribi

Abraham, Isak, Yakob, nanga Yosef, trutru ben de man di abi frede gi Gado èn di ben abi bribi. A tori fu a libi fu den, di de na ini a buku fu Genesis, na trutru tori di e tranga wi bribi èn di e leri wi furu warti sani.

Yu kan kisi wini fu den tori disi te yu sa leisi na alawiki leisipisi fu Bijbel di yu musu leisi na a Theokrasia Diniwroko-skoro. Te yu e poti prakseri na den tori di skrifi na tapusei, dan dati sa yepi yu fu si den tori leki den de wan trutru sani gi yu.

[Futuwortu]

[Prenki na tapu bladzijde 26]

Abraham ben de wan man di ben abi bribi

[Prenki na tapu bladzijde 26]

Yehovah e blesi Yosef

[Prenki na tapu bladzijde 26]

A regtfardiki man Lot nanga den umapikin fu en ben tan na libi

[Prenki na tapu bladzijde 29]

Yakob ben sori warderi gi santa sani. Yu e du dati tu?