’Gado no e tan na ini tempel di libisma meki’

NA APOSTEL Paulus ben sabi den tempel fu Ateina, fu di furu fu den foto di a ben e fisiti na a ten fu den preikiwaka fu en, ben abi den tempel disi. Soleki fa The Encyclopædia Britannica e taki, dan sma no ben sabi Ateina leki na umagado fu orloku nanga koni wawan, ma sosrefi leki wan gado „fu moimoi sani di sma ben e meki nanga anu, èn leki wan gado fu tra moi sani di sma ben e meki te orloku no ben de”.

A moro pôpi tempel fu Ateina ben de a Partenon, di den ben bow na ini a foto Ateine. A foto disi ben e tyari a nen fu na umagado. A Partenon, di sma ben e si leki a moro bigi tempel fu a grontapu fu owruten, ben abi wan popki fu Ateina. A popki disi ben meki fu gowtu nanga ivoor, èn a ben langa twarfu meter. Di Paulus ben fisiti Ateine, dan a weti marmer tempel disi ben de a moro barinen sani ini a foto sowan feifi hondro yari kaba.

Yu ben kan si a Partenon fu a presi pe Paulus ben e preiki gi wan grupu fu Ateinesma fu a ’Gado di no e tan na ini tempel di libisma meki’ (Tori fu den Apostel 17:23, 24). Kande den sma di ben e arki Paulus ben lobi a glori fu den tempel fu Ateina, noso den moi popki fu en, moro leki wan Gado di den no ben man si, èn di den no ben sabi. Soleki fa Paulus ben sori den, dan wi no kan prakseri taki a Mekiman fu libisma „de leki wan sani di meki fu gowtu, solfru, noso ston, noso leki wan popki di libisma meki nanga den eigi koni”.—Tori fu den Apostel 17:29.

Den gado nanga umagado leki Ateina, di e feni glori nanga yepi fu tempel, nanga popki, e tan fu wan syatu pisi ten nomo. Na ini a di fu feifi yarihondro G.T., a popki fu Ateina no ben de fu feni na ini a Partenon moro, èn soso den brokopresi fu wan tu fu den tempel fu en de ete. Nowan sma na ini a ten disi e suku yepi na Ateina.

Yehovah, „a têgo Gado”, di nowan sma si ete, de heri tra fasi (Romesma 16:26; 1 Yohanes 4:12). Den manpikin fu Korak ben skrifi: „A Gado disi na wi Gado te ten di no skotu, iya fu têgo. Ensrefi sa tiri wi” (Psalm 48:14). Wan fasi fu kan nyan bun fu a tiri fu Yehovah Gado, na fu studeri a Wortu fu en, Bijbel, èn fu fiti den rai dati na ini wi libi.