No gi libisma glori, ma gi Gado glori

NA INI den mun no so langa pasa, sma na heri grontapu di lobi regtfardikifasi ben leri fa fu gi Gado glori, di den kon makandra na a „Gi Gado glori” Distrikt Kongres fu Yehovah Kotoigi. Meki wi luku a programa baka fu si san den ben leri drape.

A Bijbel programa ben hori dri dei baka makandra gi furu fu den sma di ben go na a kongres disi, èn a ben de fo dei gi den wan di ben man go na den spesrutu internationaal kongres. Ala nanga ala, den arkiman ben yere moro leki 30 lezing di teki puru fu Bijbel. Den lezing disi meki den kisi moro warderi gi yeye afersi. Den yere ondrofenitori tu di tranga a bribi fu den, den si demonstrâsi di poti krakti tapu a fasi fa wi musu gebroiki Bijbel gronprakseri, èn den si wan drama di ben sori sortu tesi den fosi yarihondro Kresten ben kisi. Efu yu ben go na wan fu den kongres disi, dan luku baka san yu ben skrifi na a kongres te yu e leisi na artikel disi. Wi de seiker taki a sa meki yu memre den prisiri sani fu a bigi yeye fesa disi èn taki yu sa leri wan tu sani sosrefi.

Thema fu a fosi dei: „Yu, Yehovah, . . . warti fu kisi a glori”

Baka a fosi singi nanga begi, dan a fosi takiman ben gi ala sma drape wan switikon nanga yepi fu wan lezing pe a ben e poti prakseri na a moro prenspari reide fu san ede a kongres ben hori, namku: „Wi kon makandra fu gi Gado glori”. A takiman ben kari Openbaring 4:11 fu poti krakti tapu a thema fu a heri kongres. Syatu baka dati, a sori san a wani taki fu gi Gado glori. Nanga yepi fu a buku Psalm a sori taki efu wi wani gi Gado glori, dan wi musu „anbegi” en, wi musu ’taki en tangi’, èn wi musu „prèise” en sosrefi.—Psalm 95:6; 100:4, 5; 111:1, 2.

A tra lezing ben nen „Den wan di e gi Gado glori e kisi blesi”. A takiman ben tyari wan moi sani kon na fesi. Fu di moro leki siksi milyun Yehovah Kotoigi de na ini 234 kondre na heri grontapu, meki wi kan taki dati a son noiti no e dongo gi den sma di e gi Yehovah glori (Openbaring 7:15). Wan sani di den arkiman ben warderi trutru na ini a pisi disi èn di naki den ati trutru, na den interview di ben hori nanga wan tu Kresten brada nanga sisa di e du furuten diniwroko na a wan noso tra fasi.

A tra lezing ben nen „Den sani di Gado meki e gi En glori”. Aladi den sani di wi kan si na hemel no abi sten, toku den sani disi e gi Gado bigi glori èn den e yepi wi fu kisi moro warderi gi a lobi-ati fasi fa Gado e sorgu wi. Den sani disi ben tyari kon na krin finifini na ini a lezing.—Yesaya 40:26.

Frufolgu, gens, a krakti di grontapu abi tapu sma, nanga wi eigi sondu firi, na sani di de wan  tesi gi tru Kresten di e suku fu hori den soifri retifasi. Fu dati ede meki a lezing „Waka a pasi fu soifri retifasi”, hari a prakseri fu den arkiman wantewante. Baka dati, wan takimakandra ben hori fu ibri vers fu Psalm 26. Wan interview ben hori sosrefi nanga wan Kotoigi di e go na skoro ete èn di ben teki wan fasti bosroiti fu libi wan krin libi. Wan interview ben hori nanga wan tra Kotoigi tu di ben gebroiki tumusi furu ten fu abi prisiri na wan fasi di no fiti, ma di ben du wan sani fu lusu a problema disi.

A thema taki, di ben abi leki nen „Kefalek moi fisyun fu profeititori e gi wi deki-ati!” ben de a lasti taki fu a mamanten programa. A takiman ben taki fu den eksempre fu a profeiti Danièl nanga den apostel Yohanes nanga Petrus. A bribi fu den man disi ben kon moro tranga fu di den ben si kefalek moi fisyun di ben abi fu du nanga a seti fu a Mesias Kownukondre fu Gado èn nanga a fasi fa a Kownukondre dati e wroko. A takiman ben taki fu iniwan sma di kande ben frigiti den krinkrin buweisi di e sori taki wi e libi na ini a ten fu a kaba. Disi na san a ben taki: „Wi howpu trutru taki den sma disi sa poti prakseri baka na a denoya fu Krestes na ini Kownukondre glori èn taki den sa kisi a yepi fu kon tranga baka na yeye fasi.”

A bakadina programa ben bigin nanga wan lezing di ben nen „Yehovah e sori sma di abi sakafasi a glori fu En”. A takiman ben sori fa Yehovah e gi wi na eksempre fu abi sakafasi, awinsi en na a moro hei Sma fu hemel nanga grontapu (Psalm 18:35). Yehovah e poti spesrutu prakseri na den sma di abi sakafasi trutru, ma a e tan farawe fu den sma di e du neleki den abi sakafasi. Den sortu sma disi e sori sakafasi soso te den de nanga den speri noso den basi fu den, ma den e handri na wan ogri-ati fasi nanga den sma di de na den ondro.—Psalm 138:6.

A symposium di ben kon baka dati, ben abi fu du nanga Bijbel profeititori. A symposium disi ben poti prakseri na difrenti pisi fu a thema: „A profeititori fu Amos—A boskopu fu en gi wi na ini a ten disi”. A fosi takiman ben sori go na a eksempre fu Amos èn a ben poti prakseri na a frantwortu di wi abi fu warskow sma taki Yehovah sa tyari wan krutu kon heri esi. A thema fu a lezing fu en ben de „Preiki a wortu fu Gado sondro frede”. A di fu tu takiman ben poti na aksi: „Oiti Yehovah sa puru ogridu nanga pina fu a grontapu disi?” Na ini a lezing fu en di ben nen „Gado sa krutu den ogriwan”, a ben sori taki ala ten Gado e krutu sma di frudini dati, taki sma no man wai pasi gi a krutu fu Gado, èn taki Gado e krutu soso den sma di musu kisi krutu. A lasti takiman fu a symposium ben poti prakseri na a thema „Yehovah e ondrosuku na ati”. Den sma di e angri fu plisi Yehovah sa du san skrifi na ini Amos 5:15: „Tegu gi san ogri, èn lobi san bun.”

Sani di abi sopi na ini, soleki win di e prisiri na ati, na sani di sma kan gebroiki na wan fowtu fasi. Na ini a lezing „Wai pasi gi a trapu fu dringi sopi pasa marki”, dan a takiman ben sori sortu problema wan sma kan kisi na skin fasi èn na yeye fasi te a e dringi sopi pasa marki, srefi efu a sma no e kon drungu. A ben gi wan gronprakseri di kan yepi, namku: Ibri sma de tra fasi; a wan sma no man dringi so furu leki wan trawan. Fu dati ede, te yu dringi sopi èn yu e bigin firi taki yu no man sori „koni nanga frustan” moro, dan yu sabi kaba taki yu dringi tumusi furu.—Odo 3:21, 22.

Fu di wi e libi na ini muilek ten, meki wi kisi deki-ati fu a lezing di ben kon baka dati, namku „Yehovah, wi ’fortresi na ini ten fu banawtu’”. Begi, santa yeye, nanga wi Kresten brada nanga sisa kan yepi wi fu horidoro.

A lasti lezing fu a dei dati ben nen „’A bun kondre’—A e meki wi tesi fa a Paradijs sa de”. Na a kaba fu a lezing, dan ala sma ben prisiri fu di wi kisi wan nyun publikâsi di abi furu Bijbel karta! A publikâsi disi nen ’Zie het goede land’ (Luku a bun kondre).

Thema fu a di fu tu dei: „Meki a glori fu en bekènti na mindri den pipel”

Baka di wi ben luku a deitekst, dan a di fu tu symposium fu a kongres ben hori, di ben abi leki thema: „De leki wan spikri èn skèin a glori fu Yehovah”. A fosi pisi ben nen „Fu di wi e panya a bun nyunsu go na ala presi”, èn wi si wan tu demonstrâsi fu sani di sma ondrofeni trutru na ini a preikiwroko. Na ini a di fu tu pisi, a takiman ben sori wan demonstrâsi fu wan gobaka, di a taki fu a  thema „Fu di wi e puru a duku di e breni sma”. A lasti lezing fu a symposium ben nen „Fu di wi e tan du disi moro nanga moro na ini wi diniwroko”, èn a takiman ben poti moro krakti tapu a pisi tori disi fu di a ben abi wan takimakandra nanga sma di ben abi moi ondrofenitori na ini a preikiwroko.

A tra lezing fu a programa ben nen „Den abi bita-ati gi wi sondro taki wi du den wan sani”. A takiman ben abi wan takimakandra nanga getrow sma di ben kisi a krakti fu Gado fu man tan hori den soifri retifasi di den kisi gens.

Wan prenspari pisi fu a kongres di sma e fruwakti fayafaya, na a dopu lezing èn baka dati a dopu fu ala den sma di doro den markitiki. Te wan sma e teki dopu na ini watra, dan en heri skin e dukrun go na ondro watra, èn dati wani taki dati a sma e gi en heri libi abra na Yehovah fu  dini en. Fu dati ede a thema ben fiti heri bun: „Wi e gi Gado glori te wi e libi soleki fa wi pramisi en.”

A bakadina programa ben bigin nanga wan lezing di ben gi wi a deki-ati fu ondrosuku wisrefi. A lezing disi ben nen „O ten wan sma bigi trutru?—Fa wan Kresten musu si a tori disi”. A takiman ben tyari a moi penti disi kon na fesi: Wan sma bigi te a e sori sakafasi neleki Krestes. Sobun, wan Kresten no musu suku fu kisi moro frantwortu soso fu di a wani taki trawan musu si en leki wan prenspari sma. A musu aksi ensrefi: ’Mi de klariklari fu du pikinpikin wroko di tra sma no sa si wantewante?’

Oiti yu firi taki yu weri? A no de fu taki dati wi alamala e kon weri son leisi. Ala sma ben lobi a lezing „Wi e kon weri, ma wi e tan go doro”. Den takimakandra di a takiman ben hori nanga wan tu Kotoigi di e dini wan langa pisi ten kaba, ben sori taki Yehovah kan meki wi „kon tranga . . . nanga a krakti fu en yeye”.—Efeisesma 3:16.

A lobi fu gi sani no de wan fasi di wi e kisi te wi e gebore, ma a de wan sani di wi musu leri. A prenspari penti disi ben tyari kon na fesi na ini a lezing „’Lobi fu prati sani nanga trawan’, de klariklari fu gi”. A takiman ben poti wan aksi di musu meki wi go denki. Na aksi ben de: „Wi de klariklari fu teki wan tu miniti fu a dei fu yepi owru brada nanga sisa, noso den wan di siki, di brokosaka, noso di e firi taki den de den wawan?”

„Luku bun nanga ’a sten fu freimdesma’” ben hari a prakseri fu den arkiman. A lezing disi ben agersi den bakaman fu Yesus nanga skapu di e arki en sten wawan leki „a bun skapuman”. Den no e arki „a sten fu freimdesma” di e komoto fu den someni libisma seti di de na ondro a makti fu Didibri.—Yohanes 10:5, 14, 27.

Wan grupu fu singiman musu singi makandra, so taki sma kan frustan san den e singi. Fu man gi Gado glori, dan tru anbegiman na heri grontapu musu de na ini wánfasi. Fu dati ede a lezing „Gi Gado glori ’nanga wán mofo’” ben gi wi bun rai di e sori fa wi alamala kan taki a wan „soifri tongo” èn fa wi kan dini Yehovah „leki wán man”.—Sefanya 3:9.

Papa nanga mama, spesrutu den wan di abi yongu pikin, ben prisiri trutru nanga a lasti taki fu a dei dati, di ben abi leki nen „Den pikin fu wi—Wan tumusi warti gudu”. Den arkiman ben fruwondru, ma den ben breiti srefisrefi tu di a nyun publikâsi nanga 256 bladzijde tyari kon na doro. Lessen van de Grote Onderwijzer (Teki leri fu a Bigi Leriman) na wan buku di sa gi wini, fu di a e yepi papa nanga mama fu poti prakseri na yeye afersi makandra nanga den pikin fu den, di Gado ben gi den leki presenti.

Thema fu a di fu dri dei: „Du ala sani fu gi Gado glori”

A lasti dei fu a kongres ben bigin nanga wan prakseri fu Bijbel nanga yepi fu a deitekst. A fosi pisi fu a programa fu a dei disi ben poti furu prakseri na osofamiri. A fosi lezing „Papa nanga mama, meki yu osofamiri kon moro tranga”, ben sreka den arkiman gi den sani di den ben o yere.  Baka di a takiman sori taki papa nanga mama abi a frantwortu fu sorgu gi den osofamiri na skin sei, dan a sori taki a moro prenspari frantwortu di papa nanga mama abi, na fu sorgu gi den sani di den pikin fu den abi fanowdu na yeye fasi.

A tra takiman ben poti prakseri na pikin, èn a ben taki fu a tori „A fasi fa yonguwan e prèise Yehovah”. A ben taki dati den yonguwan de leki „dowdropu” fu di den de so furu, èn den e gi trawan deki-ati fu di den de fayafaya. Den bigisma breiti fu wroko makandra nanga den na ini a diniwroko fu Yehovah (Psalm 110:3). Na ini a pisi disi, a takiman ben abi moi takimakandra nanga yonguwan di e gi wan bun eksempre.

Den Bijbel drama na wan span pisi fu den distrikt kongres ala ten, èn dati ben de so tu na a kongres disi. A drama „Tan kotoigi sondro frede aladi sma e gens wi”, ben prenki den bakaman fu Yesus fu a fosi yarihondro. A ben de wan prisiri sani fu luku a drama, ma san moro prenspari na taki wi ben leri wan sani fu en. Baka a drama, a lezing di ben nen „Preiki a bun nyunsu ’sondro fu tapu’” ben poti krakti tapu den moro prenspari penti fu a drama.

Ala den arkiman di ben drape ben angri fu yere a heimarki fu a programa fu sonde, namku a publikitaki di ben nen „Suma e gi Gado glori na ini a ten disi?” A takiman ben tyari wan tu buweisi kon na fesi di sori krin taki moro furu fu den sabidensiman nanga den kerkisma no e gi Gado glori. Soso den sma di e tyari en nen, den wan di e preiki èn e leri sma a waarheid fu Yehovah, e gi trutru glori na en nen na ini a ten disi.

Baka a publikitaki wi ben luku syatu san wi ben kan leri fu A Waktitoren fu a wiki dati. Baka dati, a lasti lezing ben hori di ben nen „’Tan meki furu froktu’ fu gi Yehovah glori’”. A takiman ben leisi tin bosroiti gi ala den sma di ben de drape. Den bosroiti disi ben abi fu du nanga den difrenti fasi fa wi kan gi glori na Yehovah, a Mekiman. Na ala den kongres di ben hori, fu a wan sei te go miti a tra sei fu grontapu, den arkiman sori taki den agri nanga den bosroiti dati, fu di den piki leki wán man: „Iya”.

Na so a kongres ben kon na wan kaba, èn a meki ibri sma poti prakseri na a thema: „Gi Gado glori”. Nanga a yepi fu Yehovah en santa yeye èn a pisi fu en organisâsi na grontapu, wi musu luku bun taki wi no e gi libisma glori, ma taki ala ten wi e meki muiti fu gi Gado glori.

[Faki/​Prenki na tapu bladzijde 23]

Internationaal kongres

Internationaal kongres ben hori fo dei langa na ini Afrika, Asia, Australia, Europa, Noord-Amerika nanga Zuid-Amerika. Kotoigi fu ala sei fu grontapu ben kisi wan kari fu go na den kongres disi. Na so fasi, den fisitiman nanga den sma di ben gi den wan kari, ben „kan gi makandra deki-ati” (Romesma 1:12). Sma ben miti baka nanga den mati di den ben abi kaba, èn den ben kisi nyun mati sosrefi. Wan spesrutu sani na den internationaal kongres ben de a pisi fu a programa di ben nen „Ondrofenitori fu tra kondre”.

[Faki/​Prenki na tapu bladzijde 25]

Nyun publikâsi di e gi Gado glori

Tu nyun publikâsi ben kon na doro na a „Gi Gado glori” Distrikt Kongres. A Bijbel publikâsi ’Zie het goede land’ abi wan steifi kafti, èn 36 bladzijde abi karta nanga fowtow fu presi na ini Bijbel ten. Ibriwan fu den bladzijde abi kloru èn a abi karta fu den gran kownukondre Asiria, Babilon, Medo-Persia, Grikikondre, nanga Rome. A abi tra karta sosrefi di e sori pe Yesus ben du en diniwroko èn o fara a Kresten bribi ben panya go.

Lessen van de Grote Onderwijzer na wan buku di abi 256 bladzijde èn sowan 230 prenki. Sma kan abi furu prisiri momenti nanga pikin-nengre te den e luku den prenki na ini a buku èn te den e gi piki tapu aksi na ini a buku di poti fu meki den denki. A nyun publikâsi disi meki fu feti teige den sani di Satan e gebroiki fu kisi den yonguwan fu wi, sani di a e gebroiki spesrutu fu pori a bun fasi fa den e tyari densrefi.

[Prenki na tapu bladzijde 23]

Den zendeling ben fruteri ondrofenitori di tranga wi bribi

[Prenki na tapu bladzijde 24]

Wan prenspari sani na den „Gi Gado glori” kongres ben de a dopu

[Prenki na tapu bladzijde 24]

Yonguwan nanga owruwan e nyan bun fu den Bijbel drama