Pramisi di yu kan frutrow

MIKA, a profeiti fu Gado, ben sabi taki furu tron sma no e du san den pramisi. Na ini a ten di a ben e libi, sma no ben kan abi a frutrow ala ten taki srefi den moro bun mati fu den ben o du san den ben pramisi. Fu dati ede Mika ben gi sma a warskow disi: „No bribi wan kompe. No poti un frutrow na ini wan bun mati. Hori wakti na yu mofo gi en di e didon na yu borsu.”—Mika 7:5.

A sari situwâsi disi ben meki Mika tweifri na ala sani di sma ben pramisi en? Nôno! A ben taki sani di ben sori taki a ben e frutrow dorodoro tapu den pramisi fu Yehovah, a Gado fu en. Mika ben skrifi: „Fu mi sei, mi sa tan fruwakti Yehovah. Mi sa sori taki mi e tan wakti a Gado fu mi frulusu.”—Mika 7:7.

Fu san ede Mika ben abi so wan frutrow na ini den pramisi fu Yehovah? Fu di a ben sabi taki Yehovah e hori ensrefi na en wortu ala ten. Ibri sani di Gado ben pramisi den fositen tata fu Mika ben kon tru sondro fu misi (Mika 7:20). A getrowfasi di Yehovah ben sori na ini a ten di pasa ben overtoigi Mika taki a ben kan frutrow na tapu taki a  Gado disi ben o hori ensrefi na a wortu fu En na ini a ten di ben o kon.

„No wán wortu . . . tan sondro fu kon tru”

Fu gi wan eksempre, Mika ben sabi taki Yehovah ben puru den Israelsma na ini katibo na Egepte (Mika 7:15). Yosua di ben ondrofeni a frulusu dati, ben gi den Israelsma deki-ati fu frutrow na ini ala den pramisi fu Gado. Fu san ede den ben musu frutrow den pramisi dati? Yosua ben memre den: „Unu sabi heri bun nanga un heri ati èn nanga un heri sili, taki no wán wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu. No wán wortu fu den tan sondro fu kon tru.”—Yosua 23:14.

Den Israelsma ben sabi heri bun taki Yehovah ben du wondru sani gi den. A ben du san a ben pramisi Abraham, a fositen tata fu den di ben abi frede gi Gado. A ben pramisi Abraham taki den bakapikin fu en ben o tron so furu leki den stari, èn taki den ben o teki a kondre fu Kanan abra. Yehovah ben taigi Abraham tu taki den bakapikin fu en ben o nyan pina 400 yari langa, ma taki den ben o drai go baka na Kanan „na ini a di fu fo geslakti”. Ala den sani disi pasa trutru.—Genesis 15:5-16; Exodus 3:6-8.

Den Israelsma ben kisi wan switikon na ini Egepte na a ten fu Yosef, a manpikin fu Yakob. Bakaten den Egeptesma dwengi den na wan ogri-ati fasi fu wroko leki srafu gi den. Ma soleki fa Gado ben pramisi, dan baka fo geslakti, bigin fu a ten di den ben go na ini Egepte, A puru den bakapikin disi fu Abraham na ini a katibo na Egepte. *

Na ini den 40 yari baka dati, den Israelsma ben kisi moro buweisi taki ala ten Yehovah e du san a pramisi. Di den Amaleksma go feti nanga den Israelsma, sondro taki den Israelsma ben du den wan sani, dan Gado feti gi a pipel fu en, èn a kibri den. A gi den ala san den ben abi fanowdu fu man tan na libi na ini den 40 yari di den ben e waka na ini a sabana, èn te fu kaba, a tyari den go na ini a Pramisi Kondre. Di Yosua ben poti prakseri na a fasi fa Yehovah ben handri nanga den bakapikin disi fu Abraham, dan a ben kan taki nanga overtoigi: „Nowan pramisi no ben de di no ben kon tru, fu ala den bun pramisi di Yehovah ben gi na oso fu Israel; den alamala ben kon tru.”—Yosua 21:45.

Poti frutrow na ini den pramisi fu Gado

Fa yu kan kisi frutrow na ini den pramisi fu Yehovah, soleki fa Mika nanga Yosua ben abi dati? We, fa yu kan kisi frutrow na ini tra sma? Yu e leri sabi den heri bun. Fu gi wan eksempre, te yu e si taki den sma disi ala ten e pruberi fu du san den pramisi, dan dati kan yepi yu fu kon sabi efu yu kan frutrow na den tapu. O moro yu e kon sabi den sma disi, o moro yu sa frutrow den. Yu kan du a srefi sani disi te yu wani kisi frutrow na ini den pramisi fu Gado.

Wán fasi fa yu kan du disi, na fu denki dipi fu den sani di Gado meki èn fu den wet di e tiri den sani disi. Sabiman e poti frutrow tapu den wet disi, soleki den wet di e tiri a fasi fa wán-enkri libisma cel e prati kon tron difrenti cel di e meki den bilyunbilyun tra cel di de wan pisi fu wi skin. Fu taki en leti, a musu de so taki a Sma di e meki den wet di e tiri a heri universum, na wan sma di de fu frutrow dorodoro. A no de fu  taki dati yu kan frutrow na ini den pramisi fu en, neleki fa yu e frutrow na ini den wet di e tiri den sani di a meki.—Psalm 139:14-16; Yesaya 40:26; Hebrewsma 3:4.

Nanga yepi fu a profeiti Yesaya di ben e libi na ini a ten fu Mika, Yehovah sori sma taki den ben kan frutrow na ini a wortu fu en. Fu du dati, a gebroiki den yariten di ben e kenki doronomo èn sosrefi a wondru fasi fa a watra di e fadon komoto fu hemel, e opo go baka hemel. Ibri yari alenten ben e kon. Alen ben e nati a gron èn ben e meki taki sma ben man sai siri èn koti a nyanyan fu a gron. Fu dati ede Yehovah ben taki: „Neleki fa alen nanga a snew e saka kon fu hemel èn no e drai go baka na a presi dati, boiti efu trutru a e nati grontapu èn e meki a gi froktu èn e meki a sproiti, èn siri e gi trutru na a saiman, èn brede na a sma di e nyan, na so mi wortu di e komoto na mi mofo, sa sori taki a de. A no sa drai kon baka na mi sondro bakapisi, ma seiker a sa du a sani dati di mi abi prisiri na ini, èn fu tru, a sa abi bun bakapisi na ini san mi ben seni en go.”—Yesaya 55:10, 11.

Wi kan frutrow na ini den pramisi fu a paradijs

A tru taki te yu e ondrosuku den sani di Gado meki, dan dati kan yepi yu fu kisi frutrow na ini a Mekiman. Ma yu musu du ete wan tra sani efu yu wani kon sabi den pramisi di abi fu du nanga a „wortu di e komoto na [en] mofo”. Fu man kon sabi den pramisi disi so taki yu kan poti yu frutrow na ini den, dan yu musu ondrosuku den Santa Buku fu Gado di skrifi na ondro a krakti fu a santa yeye fu En. Den buku disi e fruteri fu den sani di Gado abi na prakseri fu du nanga grontapu, èn fu den fasi fa a handri nanga libisma.—2 Timoteyus 3:14-17.

A profeiti Mika ben abi frutrow na ini den pramisi fu Yehovah. Yu abi moro leki san Mika ben abi. Yu abi Gado en Wortu di a meki sma skrifi nanga yepi fu en santa yeye. Te yu e leisi Bijbel èn te yu e denki dipi fu en, dan yu tu kan kisi a frutrow taki Gado sa du san a pramisi. Den pramisi disi no abi fu du nomo nanga den trutru bakapikin fu Abraham, ma den abi fu du sosrefi nanga ala libisma. Disi na san Yehovah ben pramisi a famiri-edeman disi di ben abi frede gi Gado: „Nanga yepi fu yu siri ala nasi fu grontapu fu tru sa blesi densrefi, fu di yu arki mi sten” (Genesis 22:18). A moro prenspari pisi fu a „siri”, noso fu den bakapikin, fu Abraham na a Mesias, Yesus Krestes.—Galasiasma 3:16.

Nanga yepi fu Yesus Krestes, Yehovah sa sorgu taki libisma di e gi yesi, sa kisi blesi. Èn san Gado pramisi fu du na ini a ten disi? Mika 4:1, 2 e piki na aksi dati nanga yepi fu den profeiti wortu disi: „A musu pasa na ini a lasti pisi fu den dei, taki a bergi fu na oso fu Yehovah sa poti steifi na tapu na ede fu den bergi, èn trutru a sa opo hei na tapu den pikin bergi; èn na drape ipi-ipi sma musu go. Èn furu kondre sa go fu tru èn den sa taki: „Kon un pipel, èn meki wi go na a bergi fu Yehovah èn na a oso fu a Gado fu Yakob; èn a sa leri wi fu den pasi fu en, èn wi sa waka den pasi fu en.’”

Den sma di e kon sabi den pasi fu Yehovah e „naki den feti-owru fu den kon tron plugu èn den lansri fu den kon tron grasinefi”. Den sma disi no e suku fu feti orloku moro kwetikweti. Heri esi grontapu sa lai nanga opregti sma, èn nowan sma no sa meki den beifi fu di den frede (Mika 4:3, 4). Iya, Gado Wortu e pramisi wi taki te Yesus Krestes sa tiri a Kownukondre, dan Yehovah sa puru ala sma na grontapu di e kwinsi trawan.—Yesaya 11:6-9; Danièl 2:44; Openbaring 11:18.

Srefi den sma di pina èn di dede fu di libisma opo densrefi teige Gado, sa kisi wan opobaka nanga a howpu fu libi fu têgo na grontapu  (Yohanes 5:28, 29). Satan nanga den ogri yeye fu en, den wan di e meki taki ogri de na grontapu, no sa de moro, èn a frulusu-ofrandi fu Yesus sa puru den bakapisi fu a sondu fu Adam (Mateyus 20:28; Romesma 3:23, 24; 5:12; 6:23; Openbaring 20:1-3). Èn san o pasa nanga libisma di e gi yesi? We, den sa kisi a blesi fu libi fu têgo na tapu wan paradijs grontapu leki sma di gosontu dorodoro!—Psalm 37:10, 11; Lukas 23:43; Openbaring 21:3-5.

Dati na moi pramisi trutru! Ma yu kan bribi den pramisi disi? Iya, trutru. Den pramisi disi a no pramisi fu libisma di abi bun marki, aladi den no abi a makti fu du san den pramisi. Den pramisi disi na pramisi fu na Almakti Gado, di no man lei èn di „no e draidrai nanga a pramisi fu en” (2 Petrus 3:9; Hebrewsma 6:13-18). Yu kan poti ala yu frutrow na ini ala den pramisi di skrifi na ini Bijbel, bika den pramisi disi e komoto fu „Yehovah, a Gado fu waarheid”.—Psalm 31:5.

[Futuwortu]

[Prenspari pisi na tapu bladzijde 6]

„No wán wortu fu ala den bun wortu di Yehovah, un Gado, taigi unu, tan sondro fu kon tru.”—YOSUA 23:14

[Prenki na tapu bladzijde 4, 5]

Yehovah du san a ben pramisi Israel na a Redi Se èn na ini a sabana

[Prenki na tapu bladzijde 7]

Yehovah du san a ben pramisi Abraham. A Siri fu en, Yesus Krestes, sa tyari blesi kon gi libisma