Sortu pramisi yu kan frutrow?

„DEN pramisi fu en ben bigi, neleki fa ensrefi ben bigi na a ten dati; ma den no warti noti, neleki fa ensrefi no warti noti now.”—A buku Koning Hendrik de Achtste, di William Shakespeare skrifi.

Shakespeare ben e taki fu den bigi pramisi di Thomas Wolsey, a hei kerki fesiman fu Ingrisikondre, ben meki. A man disi ben abi bigi politiek makti na ini Ingrisikondre na a ten fu a di fu 16 yarihondro. Son sma feni taki a sani di Shakespeare taki e fiti furu fu den pramisi di den e yere na ini a ten disi. Doronomo sma e pramisi trawan sani, ma furu tron den sma disi no e du san den pramisi. Fu dati ede, a no muilek fu frustan fu san ede sma e tweifri ibri leisi te wan trawan e pramisi den wan sani.

Furu tron sma no e hori densrefi na den pramisi

Fu gi wan eksempre, na ini den yari baka 1990, bigi problema ben de na ini den Balkan Staten. Fu dati ede a VN-Veiligheidsraad meki bekènti taki Srebrenica, wan foto fu Bosnia, ben de wan „presi pe sma ben o feni kibri”. A sani disi di den VN kondre ben pramisi, ben gersi wan dyaranti di sma ben kan frutrow. Na so dusundusun Moslim loweman na ini Srebrenica ben prakseri. Ma te fu kaba, a pramisi di den ben kisi taki den ben o feni kibri na a presi drape, no kon tru kwetikweti (Psalm 146:3). Na ini yuli 1995, srudati legre broko go na ini a kontren dati, den wini den VN legre, èn den teki a foto abra. Moro leki 6000 Moslimsma gowe libi a foto dati, èn den srudati kiri pikinmoro 1200 tra Moslimsma di ben e libi drape.

Na tapu ala kontren fu a libi a e pasa furu tron taki sma no e du san den pramisi. Sma feni taki trawan e bedrigi den nanga yepi fu den „someni difrenti falsi reklame” di den e si èn e yere na ini a ten disi. Sma no wani frutrow trawan moro fu di „bun furu politiekman di wani makti, no e hori densrefi na den pramisi di den ben meki” (The New Encyclopædia Britannica, Volume 15, page 37). Kerki fesiman di sma e frutrow e pramisi fu sorgu gi den skapu fu den, aladi den e mesbroiki den sma disi na ala sortu takru fasi. Srefi leriman nanga ati-oso wrokoman di musu broko den ede nanga sma èn di musu abi sari-ati nanga den, du sani di meki taki sma lasi frutrow na ini den. Iya, den mesbroiki sma, èn sonwan fu den kiri sma sosrefi. Fu dati ede a no musu fruwondru wi taki  Bijbel e warskow wi fu no bribi ibri wortu di sma e taki!—Odo 14:15.

Pramisi di e kon tru

A no de fu taki dati furu sma e du san den pramisi, aladi dati e aksi furu fu den son leisi (Psalm 15:4). Te den sortu sma dati e pramisi trawan wan sani, dan den e hori densrefi na a pramisi dati. Tra sma wani du trutru san den pramisi trawan fu di den ben wani du den wan bun. Aladi den de klariklari fu du san den pramisi, toku den no man hori densrefi na a pramisi dati. Son leisi sani e waka so, taki wi no man du san wi ben abi na prakseri fu du.—Preikiman 9:11.

Awansi fa a no fa, a de so trutru taki a muilek srefisrefi gi furu sma fu frutrow tapu den pramisi fu iniwan sma. Fu dati ede na aksi disi e opo kon: Pramisi de di wi kan frutrow? Iya. Wi kan frutrow tapu den pramisi di de fu feni na ini Gado Wortu, Bijbel. Fu san ede yu no e luku san na artikel di e kon e taki fu a tori disi? Kande yu sa si taki wi kan frutrow trutru tapu den pramisi fu Gado, neleki fa milyunmilyun sma e ondrofeni dati kaba.

[Prenki na tapu bladzijde 3]

AP Photo/Amel Emric