„Wan fu den moro koni sani di sma meki oiti”

DI SMA ben bow a tempel fu Yehovah na ini Yerusalem sowan 3000 yari pasa na a ten fu a tiri fu Kownu Salomo, dan den meki wan moi watrabeki fu kopro èn den poti en na a doromofo fu a tempel. A watrabeki disi ben e wegi moro leki 30 ton èn a ben kan hori 40.000 liter watra. Sma ben e kari a bigi beki disi a se di smèlter (1 Kownu 7:23-26). Albert Zuidhof, di ben de a fesiman fosi fu wan grupu fu sma di e ondrosuku sabidensi sani na ini Kanada, e taki na ini a buku Biblical Archeologist: „A no de fu taki dati a watrabeki ben de wan fu den moro koni sani di a Hebrew pipel meki oiti.”

Fa sma ben meki a watrabeki disi? Bijbel e taki: „Na ini a Yordandistrikt a ben de so taki a kownu ben e meki [kopro wrokosani] na ini a mal di ben meki fu kleidoti” (1 Kownu 7:45, 46). Zuidhof e taki: „A ben musu de so taki den ben e meki den kopro sani disi na a srefi fasi fa sma e meki den bigi bronsu bel ete na ini a ten disi.” A man disi e fruklari: „Fu taki en leti, sma ben e meki a mindripisi fu a beki fosi nanga kleidoti, so taki den ben kan gebroiki dati leki wan inisei mal. Te a pisi dati ben drei bun, dan den ben e meki wan beki fu kleidoti na tapu a mindripisi dati. . . . Baka dati, den wrokoman ben musu meki wan tapusei mal fu kleidoti abra a beki, èn den ben meki a mal dati drei bun tu. Te fu kaba, den ben e smèlter kopru, èn den ben kanti a smèlter kopro dati go na ini na olo di ben de na mindri den tu mal. Te a kopro ben kon tranga, dan den wrokoman ben naki den mal puru.”

Bun furu koni ben de fanowdu fu meki a bigi hebi se di ben smèlter. Na inisei mal nanga a dorosei mal ben musu man tyari sowan 30 ton kopro di ben smèlter, èn den wrokoman ben musu kanti ala kopro wantewante so taki a beki no ben o abi priti na ini te a ben kon tranga. A kan taki den wrokoman ben poti wan tu onfu sei na sei so taki den ben kan kanti a smèlter bronsu go na ini a mal. Dati na wan bun hebi wroko trutru!

Kownu Salomo ben begi Yehovah Gado di a gi a tempel abra na En, èn na ini a begi disi a gi Yehovah ala grani fu a wroko di ben du fu meki a tempel. A ben taki: „Yu meki a pramisi nanga yu eigi mofo, èn nanga yu eigi anu yu meki a kon tru.”—1 Kownu 8:24.