Yehovah bigi pasa marki
Yehovah bigi pasa marki
„Yehovah bigi èn a musu kisi bun furu prèise, èn a glori fu en bigi pasa marki.”—PSALM 145:3.
1, 2. Sortu sma David ben de? Fa a ben e denki fu ensrefi, èn fa a ben e denki fu Gado?
A SKRIFIMAN fu Psalm 145 na wan fu den moro barinen man fu fositen. Di a ben de wan boi ete, a feti nanga wan bun bigi srudati èn a kiri en. Leki fetiman-kownu, a psalm skrifiman ben wini furu feanti. En nen ben de David, èn a ben de a di fu tu kownu fu owruten Israel. Srefi baka di a dede, sma ben e taki fu en, èn te na ini a ten disi srefi, milyunmilyun sma sabi wan sani fu en.
2 Aladi David ben du furu sani di gi en barinen, toku a no ben e meki bigi fu ala den sani dati. Disi na san a ben singi fu Yehovah: „Te mi e si yu hemel, den wroko fu yu finga, a mun nanga den stari di yu sreka, dan san na libisma di man dede, taki yu hori en na prakseri, èn libisma manpikin, taki yu e sorgu gi en?” (Psalm 8:3, 4) Na presi taki David ben e denki taki a bigi, dan a ben sori taki na Yehovah ben frulusu en fu ala den feanti fu en. A ben taki fu Gado: „Yu sa gi mi yu skelt fu frulusu, èn a sakafasi fu yu e meki mi kon bigi” (2 Samuel 22:1, 2, 36). Yehovah e sori sakafasi fu di a e sori sari-ati gi sondu libisma, èn David ben warderi a lobi bun-ati fu Gado.
’Mi sa hei Gado a Kownu’
3. (a) Suma David ben e si leki Kownu fu Israel? (b) O furu David ben wani prèise Yehovah?
3 Aladi David ben de a sma di Gado ben poti leki kownu, toku a ben e si Yehovah leki a trutru Kownu fu Israel. A ben taki: „Fu yu a kownukondre de, o Yehovah, yu di e opo yusrefi tu leki edeman fu ala sani” (1 Kroniki 29:11). Èn trutru, David ben abi bigi lespeki gi Gado leki Tiriman! „Mi sa hei yu, o mi Gado a Kownu”, na so a ben singi, „èn mi sa blesi yu nen te ten di no skotu, iya, fu têgo. Heri dei mi sa blesi yu, èn mi sa prèise yu nen te ten di no skotu, iya, fu têgo” (Psalm 145:1, 2). David ben wani fu prèise Yehovah Gado heri dei èn fu têgo.
4. Sortu lei Psalm 145 e tyari kon na krin?
4 Psalm 145 e sori krin taki Satan ben lei di a taki dati Gado na wan tiriman di e denki ensrefi nomo èn taki a e hori den sani di a meki, na ini katibo (Genesis 3:1-5). A psalm disi e sori tu taki Satan ben lei di a taki dati libisma e gi yesi na Gado soso te den kan kisi wini fu dati, iya, a ben taki dati den no e du dati fu di den lobi Gado (Yob 1:9-11; 2:4, 5). Neleki David, na so tru Kresten na ini a ten disi e sori tu taki Didibri na wan leiman. Den e warderi en trutru taki den abi a howpu fu libi fu têgo na ondro a tiri fu a Kownukondre, fu di den wani prèise Yehovah fu têgo. Nownow kaba, milyunmilyun sma bigin du dati fu di den e sori bribi na ini a frulusu-ofrandi. Boiti dati, den e tan dini Yehovah fu di den lobi en leki anbegiman di gi densrefi abra na en èn di teki dopu.—Romesma 5:8; 1 Yohanes 5:3.
5, 6. Sortu okasi de fu blesi èn fu prèise Yehovah?
5 Prakseri fu den furu okasi di wi abi leki futuboi fu Yehovah fu blesi èn fu prèise En. Wi kan du dati na ini begi te wan sani di wi leisi na ini en Wortu, Bijbel, naki wi ati trutru. Wi kan prèise Gado èn wi kan sori taki wi de nanga tangi te wi e warderi a fasi fa a e handri nanga en pipel, noso te wi e fruwondru fu a kefalek moi fasi fa a meki wan spesrutu sani. Wan tra fasi fa wi e blesi Yehovah Gado tu, na te wi e taki nanga wi Kresten brada nanga sisa na den Kresten konmakandra noso na tra okasi, fu den sani di A abi na prakseri fu du. Fu taki en leti, ala ’den bun di wi e du’ fu horibaka gi Gado Kownukondre e prèise Yehovah.—Mateyus 5:16.
6 Wan eksempre fu bun sani di a pipel fu Yehovah du no so langa pasa, na taki den bow furu presi fu anbegi na ini pôti kondre. Furu fu den presi disi bow fu di Kresten brada nanga sisa na ini tra kondre ben gi moni. Son Kresten ben de klariklari fu go na den pôti kondre disi fu man yepi bow Kownukondre zaal. Èn a moro prenspariwan fu ala den bun di wi e du, na taki wi e prèise Yehovah fu di wi e preiki a bun nyunsu fu en Kownukondre (Mateyus 24:14). Soleki fa wan tu vers moro fara na ini Psalm 145 e sori, dan David ben abi warderi nanga bigi lespeki gi a fasi fa Gado ben e tiri èn a ben prèise a kownumakti fu En (Psalm 145:11, 12). Yu abi a srefi warderi tu gi a lobi-ati fasi fa Gado e tiri? Èn yu e taki nanga tra sma fu en Kownukondre doronomo?
Eksempre di e sori taki Gado bigi srefisrefi
7. San na wan prenspari reide fu san ede wi musu prèise Yehovah?
7 Psalm 145:3 e sori wi wan prenspari reide fu san ede wi musu prèise Yehovah. David e singi: „Yehovah bigi èn a musu kisi bun furu prèise, èn a glori fu en bigi pasa marki.” Yehovah bigi pasa marki. Libisma no man kon sabi noso frustan dorodoro o bigi a de, èn den no man marki dati tu. Ma wi sa kisi wini trutru te wi e luku eksempre now di e sori taki Yehovah bigi pasa marki.
8. Fa hemel e sori taki Yehovah bigi srefisrefi èn taki a abi makti?
8 Pruberi fu memre wan krin neti di yu ben de na dorosei èn yu luku go na loktu. Yu no ben fruwondru fu den milyunmilyun stari di yu ben si na a dungru hemel? Yu no ben wani prèise Yehovah taki a bigi trutru fu di a meki ala den sani di de na hemel? Ma a sani di yu si, na wan pikin-noti pisi nomo fu den stari na ini a stari sistema pe grontapu srefi de na ini. Boiti dati, koniman kon si taki kande moro leki wan hondro milyard stari sistema de, èn dri fu den nomo wi kan si nanga ai. Iya, den milyunmilyun stari nanga den stari sistema di de na hemel, na wan buweisi taki Yehovah abi makti fu meki sani èn taki a bigi pasa marki.—Yesaya 40:26.
9, 10. (a) Sortu sani di abi fu du nanga Yesus Krestes e sori taki Yehovah bigi srefisrefi? (b) Sortu krakti na opobaka fu Yesus musu abi tapu a bribi fu wi?
9 Luku tra sani di e sori taki Yehovah bigi. Den abi fu du nanga Yesus Krestes. Wan sani di e sori taki Gado bigi srefisrefi, na taki a ben meki en Manpikin, èn a ben e gebroiki en wan kefalek langa pisi ten leki En „tumusi bun wrokoman” (Odo 8:22-31). Yehovah ben sori bigi lobi di a gi en wan-enkri Manpikin leki frulusu-ofrandi gi libisma (Mateyus 20:28; Yohanes 3:16; 1 Yohanes 2:1, 2). Èn libisma no man frustan kwetikweti fa Yehovah du meki a tumusi moi yeye skin gi Yesus di a opo baka leki wan yeye di no man dede.—1 Petrus 3:18.
10 Na opobaka fu Yesus e sori wi furu aparti sani di e buweisi taki Yehovah bigi pasa marki. A no de fu taki, dati Gado ben meki Yesus memre a wroko di a ben du fu meki sani di wi man si èn sani di wi no man si (Kolosesma 1:15, 16). Wan tu fu den sani disi na den yeye, a hemel nanga ala den stari, a grontapu nanga den someni sani di e gro na tapu, èn sosrefi ala den difrenti sortu sani di e libi na grontapu. Boiti taki Yehovah meki Yesus memre fa den ben e meki sani na hemel nanga grontapu bifo a tron wan libisma, dan Yehovah meki a memre den sani sosrefi di a ondrofeni leki wan volmaakti libisma. Iya, na opobaka fu Yesus e sori krin taki Yehovah bigi pasa marki. Boiti dati, a tumusi moi sani disi e gi wi a dyaranti taki tra sma sosrefi man kisi wan opobaka. Disi musu tranga a bribi fu wi taki Gado man gi libi baka na den milyunmilyun dedesma di a man memre soifri leki fa den ben de.—Yohanes 5:28, 29; Tori fu den Apostel 17:31.
Den wondruwroko nanga den bigi sani di a du
11. Nanga sortu bigi wroko Yehovah bigin na a Pinksterfesa fu 33 G.T.?
11 Sensi di Yesus kisi wan opobaka, Yehovah du furu tra wondruwroko tu (Psalm 40:5). Na a Pinksterfesa fu 33 G.T., Yehovah bigin seti wan nyun nâsi, namku „na Israel fu Gado”. Den sma fu a nâsi disi na den disipel fu Krestes di salfu nanga santa yeye (Galasiasma 6:16). Heri esi a nyun nâsi disi ben kon de na a heri grontapu di sma ben sabi na ini a ten dati. Baka a dede fu den apostel, sma fadon komoto na bribi èn a bakapisi ben de taki Krestenhèit kon de. Ma toku Yehovah tan du wondruwroko fu sorgu taki a prakseri fu en kon tru.
12. Fu di Bijbel de fu leisi na ini ala den tongo di sma na grontapu e taki moro furu, dan san disi e sori?
12 Fu eksempre, Yehovah sorgu taki ala den Buku fu Bijbel tan te now ete, èn te fu kaba a heri Bijbel poti abra na ini ala den tongo di sma na grontapu e taki moro furu na ini a ten disi. Furu tron te sma ben poti a Bijbel abra na ini tra tongo, dan den ben musu du dati na ini muilek situwâsi, èn son leisi sma di ben horibaka gi Satan ben e suku fu kiri den. Wi sabi seiker taki a Bijbel noiti no ben o poti abra na ini moro leki 2000 tongo efu dati no ben de a wani fu Yehovah, a Gado di bigi pasa marki!
13. Te wi e luku den sani di Yehovah du sensi 1914 fu meki den prakseri fu en kon tru di abi fu du nanga en Kownukondre, dan fa dati e sori wi taki a bigi trutru?
13 Wi kan si taki Yehovah bigi srefisrefi te wi e luku den sani di a du fu meki den prakseri fu en kon tru di abi fu du nanga en Kownukondre. Fu eksempre, na ini 1914, a poti en Manpikin, Yesus Krestes, leki Kownu na hemel. Wan syatu pisi ten baka dati, Yesus opo fu du wan sani teige Satan nanga den ogri yeye fu en. A yagi den komoto fu hemel kon na ini a birti fu grontapu, pe den e wakti now fu Yesus trowe den go na ini a dipi peti (Openbaring 12:9-12; 20:1-3). Sensi a ten dati, den salfu bakaman fu Yesus kisi hebi frufolgu. Ma Yehovah gi den a krakti fu man horidoro na ini a ten disi pe wi no man si a denoya fu Krestes nanga wi trutru ai.—Mateyus 24:3; Openbaring 12:17.
14. Sortu wondruwroko Yehovah du na ini 1919, èn san ben de a bakapisi fu dati?
14 Na ini a yari 1919, Yehovah du wan tra wondruwroko di e sori taki a bigi srefisrefi. Den salfu bakaman fu Yesus di no ben man du furu sani di abi fu du nanga yeye afersi, ben kisi krakti baka fu du a wroko fu den fayafaya (Openbaring 11:3-11). Na ini den yari baka dati, den salfuwan ben de fayafaya fu preiki a bun nyunsu fu a Kownukondre di seti na hemel. Tra salfuwan ben tyari kon na ini a grupu fu den, so taki ala nanga ala a nomru fu den ben kon de 144.000 (Openbaring 14:1-3). Èn Yehovah gebroiki den salfu bakaman fu Krestes, fu seti a fondamenti fu „wan nyun grontapu”, noso wan regtfardiki libisma libimakandra (Openbaring 21:1). Ma san o pasa nanga a „nyun grontapu” baka di ala getrow salfuwan e go na hemel?
15. Na ini sortu wroko den salfu Kresten e teki fesi, èn san na den bakapisi fu dati?
15 The Watchtower (A Waktitoren) fu 1 augustus nanga 15 augustus 1935, ben abi wan tu artikel na ini di ben e taki fu a „bigi ipi” di kari na ini Openbaring kapitel 7. Den salfu Kresten ben bigin meki furu muiti fu suku den anbegiman disi di ben komoto fu ala kondre, lo, pipel nanga tongo, fu wroko makandra nanga den. A „bigi ipi” disi sa pasa a „bigi banawtu” di de fu kon, èn den abi a howpu fu libi fu têgo na ini Paradijs pe den o de memre fu a „nyun grontapu” fu ala ten (Openbaring 7:9-14). Den e wroko makandra nanga den salfu Kresten di e teki fesi na ini a wroko fu preiki a Kownukondre èn fu meki disipel. A bakapisi de taki moro leki siksi milyun sma abi a howpu now fu libi fu têgo na ini wan paradijs na grontapu. Suma musu kisi grani fu a fasi fa sani e go na fesi so esi, aladi Satan nanga en ogri grontapu e gens wi? (1 Yohanes 5:19) Na Yehovah wawan man du ala den sani disi fu di a e gebroiki en santa yeye.—Yesaya 60:22; Sakaria 4:6.
A kefalek bigi glori fu Yehovah
16. Fu san ede libisma no man si ’a kefalek bigi glori fu Yehovah’ nanga den trutru ai?
16 Awinsi sortu „wondruwroko” nanga „bigi sani” Yehovah du, noiti sma sa frigiti den. David ben skrifi: „Pikin nanga bakapikin sa prèise den wroko fu yu, èn den sa taki fu den bigi sani di yu du. Mi sa poti prakseri na a kefalek bigi glori fu yu èn na den wondruwroko fu yu. Èn den sa taki fu a krakti fu den sani fu yu di e meki sma frede; èn mi sa meki bekènti o bigi yu de” (Psalm 145:4-6). Fu di „Gado na wan yeye”, meki libisma no man si en. Sobun, san David ben kan sabi fu a kefalek bigi glori fu Yehovah?—Yohanes 1:18; 4:24.
17, 18. Fa David ben kan kisi moro lespeki gi ’a kefalek bigi glori fu Yehovah’?
17 Aladi David no ben man si Gado, toku difrenti fasi ben de fa a ben kan kisi moro lespeki gi a glori fu Yehovah. Fu eksempre, a ben kan leisi na ini den Buku fu Bijbel sortu bigi sani Gado ben du, sani soleki di a ben tyari wan bigi frudu kon fu pori wan ogri grontapu. Soleki fa a sori, dan David ben kon sabi tu fa den falsi gado fu Egepte ben kisi syen di Gado frulusu den Israelsma fu katibo na ini Egepte. Den tori disi e sori krin taki Yehovah warti fu kisi glori èn taki a bigi srefisrefi.
18 A no de fu taki dati David ben kisi moro lespeki gi a glori fu Gado fu di a ben leisi den Buku fu Bijbel, ma sosrefi fu di a ben e denki dipi fu den sani di a ben leisi. Fu eksempre, kande a denki dipi fu den sani di pasa na a ten di Yehovah ben gi Israel a Wet. Dondru ben e bari, faya ben e koti na hemel, wan bigi wolku ben saka kon, èn wan tutu ben e bari bun tranga. A Sinaibergi ben e seki èn a ben e puru smoko. Den Israelsma ben kon makandra na a futu fu a bergi èn den ben yere srefi fa wan sten ben taki „den Tin Wortu” komoto na mindri fu a faya nanga a wolku. Dati ben de Yehovah di ben e taki nanga yepi fu wan engel (Deuteronomium 4:32-36; 5:22-24; 10:4; Exodus 19:16-20; Tori fu den Apostel 7:38, 53). Fu tru, den wondru dati e sori krin taki Yehovah bigi srefisrefi! Den wan di lobi Gado Wortu èn di e denki dipi fu den sortu tori disi e kisi dipi lespeki gi ’a kefalek bigi glori fu Yehovah’. Soleki fa wi sabi, dan wi abi a heri Bijbel na ini a ten disi èn difrenti kefalek moi fisyun de na ini di e meki wi frustan taki Yehovah bigi srefisrefi.—Esekièl 1:26-28; Danièl 7:9, 10; Openbaring, kapitel 4.
19. San sa meki wi kisi moro lespeki gi a glori fu Yehovah?
19 Kande wan tra fasi fa David ben kisi moro lespeki gi a glori fu Gado, na fu di a ben e studeri den wet di Gado ben gi den Israelsma (Deuteronomium 17:18-20; Psalm 19:7-11). Te a pipel fu Israel ben e gi yesi na den wet fu Yehovah, dan den ben e tyari densrefi na wan lespeki fasi èn den wet disi ben meki taki den ben de aparti fu ala tra pipel (Deuteronomium 4:6-8). Neleki fa a ben de nanga David, na so wi sa kisi moro lespeki tu gi a glori fu Yehovah te wi e leisi Bijbel doronomo, te wi e denki dipi fu san wi leisi, èn te wi e studeri Bijbel fayafaya.
Den fasi fu Gado e sori taki a bigi srefisrefi!
20, 21. (a) Sortu fasi fu Yehovah e sori taki a bigi srefisrefi, soleki fa skrifi na ini Psalm 145:7-9? (b) Sortu krakti den fasi fu Gado di kari dyaso, abi tapu den sma di lobi en?
20 Soleki fa wi ben taki kaba, dan den fosi siksi vers fu Psalm 145 e gi wi nofo reide fu prèise Yehovah gi den sani di e sori taki a bigi pasa marki. Vers 7 te go miti vers 9 e prèise Gado gi den fasi fu en di e sori taki a bigi srefisrefi. David e singi: „Den sa taki fayafaya fu yu bun-atifasi di de pasa marki, èn fu yu regtfardikifasi ede, den sa bari wan prisiri babari. Yehovah abi switifasi nanga sari-ati, a no e atibron esi-esi èn a e sori lobi bun-ati pasa marki. Yehovah bun gi ala sma, èn a e sori sari-ati gi ala sani di a meki.”
21 Den fosi tu fasi fu Yehovah di David e kari dyaso, na bun-ati nanga regtfardikifasi. Satan ben feni taki Yehovah no abi den fasi disi. Ma sortu krakti den fasi disi abi tapu den wan di lobi Gado èn di e saka densrefi na ondro a tiri fu en? We, a bun-ati fu Yehovah èn a regtfardiki fasi fa a e tiri, e gi den anbegiman fu en so furu prisiri taki den no kan tapu fu prèise en. Boiti dati, Yehovah e sori bun-ati gi „ala sma”. Wi howpu taki disi sa meki moro sma abi berow fu a fasi fa den e libi, so taki den kan tron anbegiman fu a tru Gado bifo a lati.—Tori fu den Apostel 14:15-17.
22. Fa Yehovah e handri nanga den futuboi fu en?
22 David ben e warderi den tra fasi fu Gado tu. Gado srefi ben taki fu den fasi disi, di a ben „pasa na fesi [Moses] èn ben taki: ’Yehovah, Yehovah, wan Gado di abi sari-ati nanga switifasi, di no e atibron esi-esi èn di abi lobi bun-ati nanga waarheid pasa marki’” (Exodus 34:6). Fu dati ede, David ben man taki: „Yehovah abi switifasi nanga sari-ati, a no e atibron esi-esi èn a e sori lobi bun-ati pasa marki.” Aladi Yehovah bigi pasa marki, toku a e sori lespeki gi den libisma futuboi fu en fu di a e handri na wan switi fasi nanga den. Yehovah abi furu sari-ati; a de klariklari fu gi sondu sma pardon te den e sori berow èn te den e bribi na ini a frulusu-ofrandi fu Yesus. Yehovah no e atibron esi-esi tu, bika a e gi den futuboi fu en na okasi fu wini den swakifasi fu den di ben kan tapu den fu kon na ini a nyun regtfardiki grontapu fu en.—2 Petrus 3:9, 13, 14.
23. Fu sortu tumusi prenspari fasi fu Yehovah wi sa taki na ini na artikel di e kon?
23 David e prèise a lobi bun-ati, noso a loyaal lobi fu Yehovah. Fu taki en leti, a tra pisi fu Psalm 145 e fruteri fa Yehovah e sori a fasi disi èn sortu krakti a lobi bun-ati fu en abi tapu den getrow futuboi fu en. Wi sa taki fu den sani disi na ini na artikel di e kon.
San yu ben sa piki?
• Sortu okasi de fu prèise Yehovah „heri dei”?
• Sortu eksempre e sori taki Yehovah bigi pasa marki?
• Fa wi kan kisi moro lespeki gi a bigi glori fu Yehovah?
[Aksi fu a tori disi]
[Prenki na tapu bladzijde 10]
Den stari sistema na hemel e buweisi taki Yehovah bigi srefisrefi
[Sma di abi a reti fu a prenki]
Courtesy of Anglo-Australian Observatory, photograph by David Malin
[Prenki na tapu bladzijde 12]
Fa den sani di abi fu du nanga Yesus Krestes e sori taki Yehovah bigi srefisrefi?
[Prenki na tapu bladzijde 13]
Di den Israelsma ben kisi a Wet na a Sinaibergi, dan den ben kisi buweisi fu a bigi glori fu Yehovah