Fa yu kan kisi san yu abi fanowdu na yeye fasi

„NA INI den 10 yari di pasa, dan moro leki 300 buku ben skrifi di e sori taki yeye afersi abi krakti tapu a wroko di wan sma e du. Den sortu buku disi lai na ini den bukuwenkri; buku soleki Jesus CEO di e sori fa den tori fu a libi nanga diniwroko fu Yesus kan yepi basi na ini bisnis, èn sosrefi buku leki The Tao of Leadership di e sori fa fu de wan moro bun fesiman”, na so a koranti U.S.News & World Report e taki. A sani disi wawan e sori taki na ini furu gudu kondre moro nanga moro sma wani kisi tiri na yeye fasi na ini den libi. A tijdschrift Training & Development di e taki fu bisnis tori, ben taki fu a tori: „Na ini a ten te moro nanga moro sani na ini wi libi abi fu du nanga nyun wrokosani di sabidensi  e meki, dan wi leki libisma wani sabi san a libi wani taki trutru, wi e suku wan marki na ini a libi, èn wi wani abi moro prisiri na ini wi libi te wi e du wan sani.”

Ma pe yu kan feni a tiri di yu abi fanowdu na yeye fasi? Na ini a ten di pasa, sma ben suku yepi na kerki fu kon sabi „san a libi wani taki trutru” èn fa den man abi „wan marki na ini a libi”. Na ini a ten disi furu sma drai baka gi kerki. Wan ondrosuku di ben du na 90 heihei driktoro, ben sori taki „sma e si wan bigi difrenti na mindri kerki èn sani di abi fu du nanga yeye afersi”, na so a tijdschrift Training & Development taki. Den sma di den ben gebroiki na ini na ondrosuku, ben e si kerki leki „wan sani di e dwengi sma fu hori densrefi na san kerki taki èn den e si kerki leki wan sani di e tyari pratifasi kon na mindri sma”. Na a tra sei den ben e si yeye afersi „leki wan sani pe ala sma kan du san den e bribi èn leki wan sani di e tyari ala sma kon na wán”.

Furu yongusma na ini kondre soleki Australia, Nyun Zeeland, Ingrisikondre, nanga Europa, de na ini wan libimakandra di no abi noti fu du nanga kerki afersi. Na a srefi fasi, den yongusma disi e si wan difrenti na mindri kerki nanga sani di abi fu du nanga yeye afersi. Professor Ruth Webber e fruklari na ini a tijdschrift Youth Studies Australia taki: „Furu yongusma e bribi na ini Gado, noso na ini wan sortu mekisani di hei moro den, ma den no e si kerki leki wan prenspari sani noso leki wan sani di kan yepi den fu sori taki den e du a yoisti sani na yeye fasi.”

A tru bribi e meki sma du san yoisti na yeye fasi

Wi kan frustan fu san ede sma e prakseri so fu kerki. Furu kerki organisâsi de dipidipi na ini den kruka politiek afersi èn den e du nomo leki den e tyari densrefi na wan bun fasi. Den anu lai nanga a brudu fu den someni kerki orloku di kon pe sma kiri trawan di no du nowan sani. Ma aladi furu sma e drai baka gi kerki organisâsi di lai nanga hoigrifasi èn nanga bedrigifasi, toku son sma meki a fowtu fu drai baka gi Bijbel sosrefi, fu di den e denki taki Bijbel no e krutu den sani disi di kerki e du.

Ma te yu e luku en bun, dan Bijbel e krutu hoigrifasi nanga kruktudu. Yesus ben taigi den kerki fesiman fu a ten fu en, taki: „Helu fu unu, un leriman fu Wet nanga Fariseiman, un hoigriman! Bika un gersi grebi di ferfi weti èn di moi na dorosei, ma inisei den lai nanga dedesma bonyo nanga ala sortu morsu sani. Na so a de tu nanga unu; na ini sma ai a gersi leki unu regtfardiki, ma na ini un ati unu e hoigri kefalek èn unu e prakseri soso kruktudu.”—Mateyus 23:27, 28.

Boiti dati, Bijbel e gi Kresten deki-ati fu no abi noti fu du nanga politiek afersi. Na presi taki Bijbel e gi Kresten deki-ati fu kiri trawan, dan a e sori taki den musu de klariklari fu dede gi makandra (Yohanes 15:12, 13; 18:36; 1 Yohanes 3:10-12). Na presi taki kerki na „wan sani di e dwengi sma fu hori densrefi na san kerki taki èn wan sani di e tyari pratifasi kon na mindri sma”, dan a tru bribi di e leri sani fu Bijbel, na „wan sani di e tyari ala sma kon na wán”. Na apostel Petrus ben taki: „Gado no e teki sma sei, ma na mindri ala pipel a sma di e frede en èn di e du san de regtfardiki, bun na en ai.”—Tori fu den Apostel 10:34, 35.

Wi kan frutrow taki Bijbel man tiri wi fu de gosontu na yeye fasi

Bijbel e sori wi taki libisma meki akruderi a prenki fu Gado (Genesis 1:26, 27). Disi no wani taki dati libisma gersi Gado na skin fasi, ma a wani taki dati libisma man sori den fasi di Gado e sori, sobun den man sori sosrefi den fasi di abi fu du nanga yeye afersi.

Fu di disi de so, meki wi man bribi taki Gado sa gi wi sosrefi san wi abi fanowdu na yeye fasi. Wi kan bribi sosrefi taki wi sa kisi a yoisti tiri di sa meki taki wi sabi san kan gi wi wini na yeye fasi èn san kan du wi ogri na yeye fasi. Neleki fa Gado meki wi skin na wan tumusi moi fasi fu man feti teige siki èn fu man tan gosontu, na so Gado gi wi wan konsensi di e meki taki wi man teki den yoisti bosroiti èn taki wi man wai pasi gi sani di kan pori wi na skin fasi èn na yeye fasi (Romesma 2:14, 15). Soleki fa wi sabi, dan wi musu nyan bun efu wi wani taki a skin man wroko bun fu feti teige den siki. Na so a de tu, efu wi wani taki a konsensi fu wi wroko bun dan wi musu sorgu gi dati nanga a bun nyanyan di wi e teki na yeye fasi.

 Yesus ben sori sortu nyanyan wi abi fanowdu di sa meki taki wi tan gosontu na yeye fasi. A ben taki: „Sma no musu libi fu brede wawan, ma fu ibri wortu di Yehovah mofo taki” (Mateyus 4:4). Den sani di Yehovah taki skrifi na ini en Wortu, Bijbel èn den sani disi „bun fu gi leri, fu piri-ai gi sma, fu poti sani kon reti” (2 Timoteyus 3:16). Fu dati ede, a de na unu fu meki muiti fu teki a yeye nyanyan disi. Efu wi sa kon sabi moro fu Bijbel èn efu wi o meki moro muiti fu fiti den markitiki na ini wi libi, dan wi o kisi moro wini na yeye fasi èn na skin fasi.—Yesaya 48:17, 18.

A muiti fu wi sa de fu soso?

A tru taki a e teki ten fu de moro gosontu na yeye fasi fu di wi abi fu studeri Bijbel, èn a e gersi leki sma no abi so furu ten fu doro wan spesrutu marki. Ma den bakapisi di wi sa kisi o sori taki wi no meki muiti fu soso! Luku san wan tu sma di sabi du wan spesrutu wroko bun, ben fruklari fu san ede a de prenspari gi den fu teki ten fu sorgu gi den gosontu na yeye fasi, aladi den abi furu fu du.

Marina, di de wan datra, e taki: „Noiti mi ben poti prakseri trutru na den sani di mi abi fanowdu na yeye fasi, teleki mi bigin wroko na ini wan ati-oso pe a ben naki mi ati trutru fu si fa tra sma e pina. Baka dati mi kon frustan taki mi ben abi sabi fu yeye afersi fanowdu efu mi wani de koloku èn efu mi wani firi korostu. Mi abi den sani disi fanowdu fu di sma di e du a wroko san mi e du kan kon weri srefisrefi fu di den abi furu fu du èn fu di den abi fu yepi furu sma di abi broko-ede.

Now Yehovah Kotoigi e studeri Bijbel nanga mi. A bijbelstudie e yepi mi moro bun fu ondrosuku den sani san mi e du èn fu san ede mi e du son sani. A e yepi mi sosrefi fu leri fa mi kan si a bun sei fu son sani, èn na so fasi mi man si den sani na ini mi libi na a yoisti fasi. Mi e prisiri trutru nanga a wroko di mi e du. Ma na a bijbelstudie yepi mi fu firi moro bun; te mi no e firi so switi dan a e yepi mi fu sabi san mi musu du, a e yepi mi fu no broko mi ede so furu, èn a e yepi mi fu abi moro pasensi nanga sari-ati gi trawan. Fu di mi fiti den Bijbel gronprakseri na ini mi libi meki a trowlibi fu mi kon moro bun. San de moro prenspari, na taki mi kon leri sabi Yehovah èn mi kisi pikinso nomo fu a santa yeye fu en di a e gi na wan fri fasi èn a sani disi meki taki mi kon si a libi leki wan moro warti sani.”

Nicholas, di e teken a fasi fa oso musu meki, e taki: „Fosi Yehovah Kotoigi ben e studeri Bijbel nanga mi, dan mi no ben wani sabi sani di abi fu du nanga yeye afersi. A wan-enkri marki di mi ben abi na ini mi libi na fu doro wan marki na ini a wroko fu mi. Di mi studeri Bijbel, dan mi kon leri taki moro prenspari sani de na ini a libi èn mi kon sabi taki te mi e du Yehovah wani dan mi sa de trutru koloku fu ala ten.

A wroko fu mi e gi mi prisiri, ma na Bijbel leri mi taki a de prenspari fu no abi tumusi furu pranpran na ini mi libi so taki mi kan poti moro prakseri na yeye afersi. Fu di mi nanga mi wefi du disi, meki taki wi wai pasi gi furu broko ede di e kon te wan sma e feti fu abi moro gudu na ini en libi. Wi kon abi furu trutru mati sosrefi, fu di wi abi demakandra nanga sma di e si yeye afersi leki wan prenspari sani na ini den libi.”

 Vincent, di de wan afkati, e taki: „Wan bun wroko kan gi wan sma prisiri na ini en libi. Ma mi kon si taki moro de fanowdu fu man kisi trutru koloku èn fu de tevrede. Fosi mi kon leri sabi den sani di e gi trutru koloku soleki fa Bijbel e taki, dan mi kan memre ete taki wantronso mi ben kon frustan taki nowan marki no de na ini a libi. Mi ben prakseri taki wan sma e gebore, a e gro kon bigi, a e trow, a e wroko so taki a kan bai den sani di de fanowdu fu tan na libi èn fu kweki den pikin fu en, a e leri den pikin fu en fu waka baka na eksempre fu en, èn te fu kaba a e kon owru èn a e dede.

Baka di mi studeri Bijbel nanga Yehovah Kotoigi, dan mi kisi bun piki tapu den aksi di mi ben abi, di abi fu du nanga a marki na ini a libi. Fu di mi studeri Bijbel meki mi kon sabi Yehovah leki wan trutru sma èn mi kon kisi dipi lobi gi en. Disi e yepi mi fu tan gosontu na yeye fasi aladi mi e meki muiti fu libi akruderi den markitiki fu en di mi sabi. Now, mi nanga mi wefi de koloku fu di wi sabi taki we e libi na wan fasi di e gi wi wan trutru marki na ini wi libi.”

Te yu e studeri Bijbel, dan yu tu kan kisi wan marki na ini a libi èn yu kan kon sabi san a libi wani taki trutru. Yehovah Kotoigi sa prisiri fu yepi yu. Neleki Marina, Nicholas, nanga Vincent, yu kan kisi prisiri trutru te yu e leri fu Yehovah nanga den marki di a abi gi a libisma famiri èn gi yu. Yu sa abi prisiri now fu di yu e kisi san yu abi fanowdu na yeye fasi, ma boiti dati yu kan fruwakti taki na ini a ten di e kon yu sa prisiri fu libi fu têgo leki wan gosontu sma, èn disi na wan sani di de soso gi den wan di „sabi taki den abi Gado fanowdu”.—Mateyus 5:3.

Wan fasi fa wan sma kan go na fesi na yeye fasi na te a e begi. Yesus ben teki en ten fu leri den disipel fu en fa den kan begi, fu di a leri den a Wi Tata Begi, soleki fa furu sma sabi dati. San a begi disi wani taki gi yu now? Fa yu kan kisi wini fu a begi disi? Yu sa feni a piki tapu den aksi disi na ini den tu artikel di e kon now.

[Prenki na tapu bladzijde 6]

Marina

[Prenki na tapu bladzijde 7]

Nicholas

[Prenki na tapu bladzijde 7]

Vincent