No frede awansi a libi no de seiker

„NA SO A DE TRUTRU!” „A no abi misi!” „Mi e gi yu a dyaranti!” A no de fu taki dati yu yere den wortu disi furu leisi kaba. Ma na ini wi aladei libi furu sani no de seiker. Fu di wi no man sabi fa a libi sa waka, meki nofo tron wi e aksi wisrefi efu wan sani de fu san wi kan de seiker trutru. A gersi leki a libi na wan sani pe wi musu fruwakti taki nowan sani de seiker.

A de krin fu frustan, taki furu sma wani taki sani e go bun nanga den èn den wani sosrefi taki den osofamiri e kisi wan koloku libi. Den e wroko tranga fu kisi den sani di, soleki fa densrefi e denki, kan tyari koloku nanga wan bun libi kon gi den. Nofo tron den sani disi na moni nanga materia sani. Ma wan gronseki, wan bigi ogri winti, wan ongoloku, noso ogridu kan pori den sortu sani disi wantronso. Te wan sma kisi wan hebi siki, a broko trow, noso a lasi en wroko, dan a libi fu en kan kenki wantronso. A tru taki den sortu sani disi no abi fu pasa nanga yu. Ma fu sabi nomo taki so wan takru sani kan pasa nanga yu iniwan ten, kan meki taki yu e bruya èn taki yu e broko yu ede. Ma disi a no ala ete.

Te wan sma no sabi san a musu fruwakti, dan a e bigin tweifri. Wan wortubuku e taki dati te wan sma e tweifri, dan a sma dati no sabi san a musu bribi, noso sortu bosroiti a musu teki. Moro fara, soleki fa a buku Managing Your Mind (Basi a fasi fa yu e denki) e sori, dan „te sma e tweifri fu wan prenspari sani, dan dati e meki taki furu tron den e frede èn den e broko den ede”. Te wan sma e tan tweifri doronomo, dan dati kan abi leki bakapisi taki a sma e frede, a e bruya èn a e kisi atibron. Iya, te wi e broko wi ede tumusi nanga san kan pasa, noso san no kan pasa nanga wi, dan wi no man si sani so bun moro èn wi e kan kon siki na skin sei.

Leki bakapisi fu dati, son sma no man si sani bun moro kwetikweti. Den e du neleki wan yongusma na ini Brasyonkondre di ben taki: „Fu san ede mi musu broko mi ede nanga san o pasa? Tide na tide, èn tamara na tamara.” A takru denki „meki wi nyan èn dringi”, kan tyari soso sari, broko-ede, nanga dede kon, te fu kaba (1 Korentesma 15:32). A moro bun taki wi e suku a Mekiman, Yehovah Gado, fu suma Bijbel e taki: „A skaduw e kenki, ma a Tata no e kenki” (Yakobus 1:17). Te wi e ondrosuku Gado Wortu, a Bijbel, dan wi o feni bun rai di e sori wi taki wi no abi fu frede gi sani di no de seiker na ini a libi. A kan yepi wi tu fu frustan fu san ede so furu sani no de seiker.

Fu san ede sani no de seiker

Den Buku fu Bijbel e sori wi krinkrin fa a libi de èn a e yepi wi fu kisi a yoisti fasi fu denki fu  sani di no de seiker èn fu sani di e kenki. Wan bun famiri banti, wan bun wroko, koni, wan bun gosontu, èn so moro fara kan gi wi pikinso seikerfasi. Ma Bijbel e sori wi taki wi no musu denki taki den sani disi no man kenki, noso taki wi kan fruwakti wan libi sondro problema. A koni Kownu Salomo ben taki: „A no den esi-esiwan e wini a streilon, èn a no den trangawan e wini a feti, sosrefi a no den koniwan abi a nyanyan, èn a no den wan di abi frustan abi a gudu, èn taki srefi den wan di abi sabi, a no den wan di trawan feni bun.” Fu san ede a no de so? „Bika ten nanga sani di e pasa sondro fu fruwakti dati, e miti den alamala.” Dati meki Salomo ben warskow: „Neleki fisi di sma e kisi na ini wan ogri srepi, èn neleki fowru di sma e kisi na ini wan trapu, na so den kisi den manpikin fu libisma srefi na ini wan trapu, na ini wan ten fu rampu, te a e kon na den tapu wantronso.”—Preikiman 9:11, 12.

Yesus Krestes ben taki sosrefi fu wan ten fu bigi banawtu èn fu sani di no de seiker, di ben o pasa nanga wan heri geslakti fu sma. Na wan moi fasi a ben taki: „Marki sa de tu na ini son nanga mun nanga stari, èn na grontapu den nâsi sa frede trutru, aladi den no sabi nowan enkri fasi fu komopo, fu di se e meki bun bigi babari, èn a krasi srefisrefi, aladi sma e kon weri fu frede ede èn fu a fruwakti di den e fruwakti den sani di sa pasa nanga a grontapu pe sma e libi, bika den krakti fu hemel sa kon seki.” Ma Yesus ben sori go na wan sani di e gi opregti sma deki-ati na ini a ten disi: „Te unu e si den sani disi e feni presi, sabi dan taki a kownukondre fu Gado de krosibei” (Lukas 21:25, 26, 31). Na a srefi fasi, na presi taki wi e frede fu di wi no sabi san o pasa na ini a ten di e kon, dan meki wi bribi na ini Gado di e yepi wi fu luku pasa den sani fu a grontapu disi di no de seiker. Wi sa kisi wan moi tamara pe seikerfasi sa de.

’Wi kan de seiker fu a howpu’

Awansi wi no kan bribi ala sani di wi e yere, di wi e leisi, noso di wi e si, toku wi abi bun reide fu frutrow tapu a Mekiman. A de a Moro Heiwan, èn a de wan lobi-ati Tata sosrefi di e sorgu gi en pikin di de na grontapu. Gado ben taki fu en eigi wortu: „A no sa drai kon baka na mi sondro bakapisi, ma seiker a sa du a sani dati di mi abi prisiri na ini, èn fu tru, a sa abi bun bakapisi na ini san mi ben seni en go.”—Yesaya 55:11.

Yesus Krestes ben leri sma a waarheid fu Gado, èn furu sma di ben arki en teki a waarheid fu di den ben bribi en trutru. Fu eksempre, wan grupu opregti Samariasma ben taigi na uma di ben arki Yesus fosi: „Wi no e bribi moro san yu taki, bika wi yere wisrefi èn wi sabi taki a man disi na trutru a frulusuman fu grontapu” (Yohanes 4:42). Na so a de tu na ini a ten disi, awansi wi e libi na ini wan ten pe wi no sabi fa sani sa waka, toku wi kan sabi san wi musu bribi.

Furu sma e denki taki a moro makriki fu bribi sani nomo, na presi taki den du muiti fu frustan san kerki e leri den. Ma a Bijbel skrifiman Lukas no e agri nanga a sani dati. A ben ondrosuku sani èn a ben gi soifri sabi so taki trawan ben kan „kon sabi efu den sani tru” di a ben skrifi (Lukas 1:4). Fu di famiriman nanga mati di no abi a srefi bribi leki wi kan frede taki wi o bruya èn taki wi o lasi-ati te fu kaba, meki a de tumusi prenspari fu man opo taki gi a bribi fu wi (1 Petrus 3:15). Te wi sabi soifri san wi e bribi, dan wi kan yepi trawan fu frutrow tapu Gado. Bijbel e taki fu Yehovah: „A Klepston, den wroko fu en bun dorodoro, bika ala san a e du na retidu. Wan Gado fu getrowfasi, èn na en  kruktudu no de; a de regtfardiki èn opregti.”—Deuteronomium 32:4.

Meki wi luku den lasti wortu fu a fruklari dati: „A de regtfardiki èn opregti.” Fa wi kan de seiker taki disi tru? Na apostel Petrus ben abi na overtoigi taki a tori dati ben tru. A ben fruteri wan ofsiri fu Rome nanga en osofamiri: „Now mi kon si krin taki Gado no e teki sma sei, ma na mindri ala pipel a sma di e frede en èn di e du san de regtfardiki, bun na en ai” (Tori fu den Apostel 10:34, 35). Petrus ben taki den sani disi bika a ben si fa Gado ben e tiri sani, so taki wan famiri di no ben de Dyu, ben kan kisi a bun ati fu En. Den Dyu ben e si den sma disi fosi leki sma di no krin. Neleki Petrus, wisrefi kan kisi na overtoigi taki Gado no e teki sma sei èn taki a abi regtfardikifasi. Nanga wi eigi ai wi e si fa wan „bigi ipi” fu siksi milyun sma, di komoto fu 230 kondre na heri grontapu, kenki den libi èn den e waka a pasi fu retidu.—Openbaring 7:9; Yesaya 2:2-4.

Leki tru Kresten wi no wani de leki sma di de so fayafaya na ini den eigi bribi dati den no e denki krin moro, noso leki sma di e denki taki den wawan sabi ala sani. Na presi fu dati wi musu sori sakafasi èn wi musu man taki sondro fu haritaki nanga trawan. Toku, wi sabi soifri san wi e bribi èn san wi kan fruwakti na ini a ten di e kon. Na apostel Paulus ben skrifi den fosi yarihondro Kresten: „Ma wi wani taki ibriwan fu unu musu sori a srefi faya fu wroko, fu kan de seiker fu a howpu te na a kaba” (Hebrewsma 6:11). Na a srefi fasi dati, a bun nyunsu di skrifi na ini Bijbel e meki taki wi „kan de seiker fu a howpu”. A howpu dati, di teki puru fu Gado Wortu, „no e meki wi lasi-ati” soleki fa Paulus ben fruklari tu.—Romesma 5:5.

Boiti dati, wi abi na overtoigi dorodoro taki te wi e leri trawan a bun nyunsu fu Bijbel, dan den kan kisi seikerfasi èn wan bun banti nanga Gado. Den kan firi moro bun èn den kan abi wan moro bun gosontu. Wi kan taki sosrefi leki Paulus: „A bun nyunsu di wi e preiki, no ben kon na unu nanga wortu wawan, ma sosrefi nanga krakti èn nanga santa yeye èn tranga overtoigi.”—1 Tesalonikasma 1:5.

Den blesi di wi e kisi nownow kaba fu di wi abi seikerfasi na yeye sei

Awinsi wi no abi trutru seikerfasi na ini a ten disi, toku sani de di wi kan du fu man kisi wan korostu libi pe seikerfasi de. Teki leki eksempre; te wi abi demakandra doronomo na den konmakandra fu a Kresten gemeente, dan wi e kisi seikerfasi, fu di wi e leri san bun, san na bun gronprakseri nanga markitiki. Paulus ben skrifi: „Taigi den sma di gudu na ini a grontapu disi taki den no musu abi bigifasi èn den no musu frutrow tapu gudu di no e gi nowan dyaranti, ma den musu frutrow tapu Gado di e gi wi ala sani bogobogo, so taki wi kan abi prisiri” (1 Timoteyus 6:17). Fu di furu sma e leri fu frutrow tapu Yehovah, èn fu no frutrow tapu materia sani noso prisiriten di e tan fu wan syatu pisi ten nomo, meki den no e frede moro èn den no e bruya moro fu den broko-ede di den ben abi fosi.—Mateyus 6:19-21.

Na ini a gemeente wi abi switi demakandra nanga brada nanga sisa, di e gi yepi èn di e horibaka gi wi na difrenti fasi. Ma wan leisi di na apostel Paulus nanga den kompe fu en nanga suma a ben teki waka, ben e du den diniwroko, dan den ben kisi „bun furu kwinsi” èn den ben „frede srefi taki [den] ben o lasi [den] libi”. Pe Paulus feni yepi? Soleki fa wi kan frustan, dan noiti a lasi a frutrow di a ben abi na ini Gado. Awansi fa no fa, a ben kisi deki-ati, èn a kisi trowstu fu en Kresten brada nanga sisa di ben kon fu yepi en (2 Korentesma 1:8, 9; 7:5-7). Na ini a ten disi te sma abi fu du nanga rampu, dan ibri tron baka den Kresten brada fu wi na den fosi sma di e doro drape fu gi den brada nanga sisa fu den, ma sosrefi tra sma di de na nowtu, yepi na materia sei èn sosrefi na yeye sei.

Wan tra fasi fu man yepi wi fu no frede den sani na ini wi libi di no de seiker, na begi. Ala leisi baka wi kan taki nanga wi hemel Tata te wi de na banawtu di wi no ben fruwakti. „Yehovah  sa tron wan hei kibripresi gi iniwan sma di masi, wan hei kibripresi na ini ten fu banawtu” (Psalm 9:9). Papa nanga mama kande no man kibri den pikin fu den gi sani di ogri. Ma Gado de klariklari fu yepi wi fu basi a firi di wi e kisi te wi e frede gi sani di no de seiker. Te wi e begi èn te wi e poti den sorgu fu wi tapu Yehovah, dan wi kan de seiker taki a kan „du sani pasa ala den sani di wi e aksi noso di wi kan prakseri fu dati”.—Efeisesma 3:20.

Yu e begi Gado doronomo? Yu abi na overtoigi taki Gado e yere den begi fu yu? „Mi mama ben taigi mi fu begi Gado”, wan yongu umapikin na ini São Paulo ben taki. „Ma mi ben aksi misrefi: ’Fu san ede mi musu taki nanga wan sma di mi no sabi srefisrefi?’ Ma Odo 18:10 ben yepi mi fu frustan taki wi abi yepi fu Gado fanowdu èn taki wi musu taki nanga en na ini begi.” A bijbeltekst dati e taki: „A nen fu Yehovah na wan tranga toren. Na drape a regtfardikiwan e lon go èn e kisi kibri.” Iya, fa wi wani frutrow tapu Yehovah efu wi no abi a gwenti fu taki nanga en? Fu man kisi den blesi di yeye seikerfasi e gi, dan wi musu meki en wan gwenti fu begi Gado ibri dei. Yesus ben taki: „We, tan na ai, èn begi ala ten taki unu kan pasa ala den sani disi di sa feni presi seiker, èn fu tanapu na fesi a Manpikin fu libisma.”—Lukas 21:36.

Wan tra sani fu san wi kan de seiker, na a howpu di wi abi na ini a Kownukondre fu Gado. Luku den wortu di skrifi na ini Danièl 2:44: „A Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na no wan tra pipel. A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu.” A howpu dati tru èn wi kan de seiker dati a o pasa. Furu tron libisma no man du san den pramisi, ma wi kan frutrow a wortu fu Yehovah doronomo. Gado de leki wan klepston tapu san wi kan frutrow. Wi kan abi a firi leki David di ben taki: „Mi Gado na mi klepston. Mi sa lon go kibri na en, na en mi sa suku kibri, mi skilt èn mi tutu fu frulusu, a hei kibripresi fu mi, a presi pe mi kan lon go kibri, mi Frulusuman; fu ogri di sma e du nanga tranga yu e frulusu mi.”—2 Samuel 22:3.

A buku Managing Your Mind, di ben kari na fesi kaba, e taki: „O moro wan sma e broko en ede nanga takru sani di kan pasa, o moro a gersi taki den sani disi e kon tru, èn o moro tranga a de fu kakafutu gi den.” Sobun, fu san ede wi e broko wi ede nanga den hebi èn nanga sani di e meki sma tweifri na ini a grontapu? Na presi taki wi poti frutrow tapu den sani fu grontapu di no de seiker, dan meki wi poti frutrow tapu den pramisi fu Gado di de seiker. Te wi abi wan tranga bribi na ini den pramisi fu Yehovah, di de seiker, dan wi e kisi a dyaranti disi: „Nowan sma di e poti en bribi na en tapu, a sa meki en fesi fadon.”—Romesma 10:11.

[Prenspari pisi na tapu bladzijde 29]

Gado Wortu e gi a dyaranti taki a libisma famiri sa kisi blesi na ini a ten di e kon

[Prenspari pisi na tapu bladzijde 30]

„Nowan sma di e poti en bribi na en tapu, a sa meki en fesi fadon”

[Prenki na tapu bladzijde 31]

A bun nyunsu fu a Kownukondre e gi sma seikerfasi