„Feti a tumusi bun feti fu a bribi”

YU NO denki taki wan srudati di de na ini feti ben o breiti te a kisi a komando: „Yu musu go na oso èn yu musu go na yu wefi nanga yu osofamiri”?

Uria, a Hètsma ben kisi so wan komando. A ben de wan srudati na ini a ten fu Kownu David fu Israel. A kownu srefi ben seni kari Uria èn a ben gi en deki-ati fu drai go na oso baka. Ma Uria ben weigri fu go na en oso. Di a kownu ben aksi en fu san ede a e handri na so wan fasi, dan Uria ben taigi en taki na ark fu a frubontu, di ben e sori taki Gado de na den mindri èn a legre fu Israel ben de na ini orloku. Dan a ben aksi: „Fa mi kan go na mi oso dan fu nyan, èn fu dringi èn fu go didon nanga mi wefi?” Na so wan prenspari momenti Uria no ben e prakseri kwetikweti fu du so wan sani.—2 Samuel 11:8-11.

A fasi fa Uria ben handri e meki wan tu prenspari aksi opo kon, fu di wi e libi na ini wan ten fu orloku sosrefi. Nownowde wan hebi feti e feti, di e difrenti fu ala den orloku fu den nâsi na grontapu. A feti disi e meki den tu grontapufeti gersi soso sani, èn a feti disi abi fu du nanga yu. Yu kan kisi bigi mankeri, èn a feanti abi kefalek bigi makti. Na ini na orloku disi, gon no e sutu, bom no e trowe, ma toku wi musu poti ala wi prakseri na a fasi fa a feti musu feti.

 Fosi yu bigin nanga a feti disi, dan yu musu kon sabi fosi efu a fiti fu feti a feti disi, èn gi san yu e feti. A warti fu feti a feti disi? A brifi di na apostel Paulus ben skrifi gi Timoteyus e meki wi frustan san na a marki fu na aparti strei disi: „Feti a tumusi bun feti fu a bribi.” Iya, na ini na orloku disi wi no e feti fu kibri wan fortresi, ma wi e feti gi „a bribi”, dati wani taki ala sani fu a tru Kresten bribi di tyari kon na krin na ini Bijbel. A de krin taki yu musu bribi a waarheid dorodoro fu kan feti gi en, èn fu kan wini a strei.—1 Timoteyus 6:12.

Wan koni fetiman e pruberi fu kon sabi suma na en feanti. Na ini a feti disi a feanti abi yari langa ondrofeni na ini a fasi fa a e strei. A abi bun furu fetisani di a kan gebroiki. A feanti disi tranga moro libisma. A ogri srefisrefi, èn a no abi trobi fu handri na wan kruktu fasi fu doro en marki. A feanti disi na Satan (1 Petrus 5:8). Den fetisani fu libisma, a koni fu den, nanga den triki fu den no abi krakti na en tapu (2 Korentesma 10:4). San wi kan gebroiki fu feti a feti disi?

A moro prenspari fetisani na „a feti-owru fu a yeye, dati na Gado wortu” (Efeisesma 6:17). Na apostel Paulus e sori o bun a feti-owru disi de: „A wortu fu Gado de libilibi èn a abi krakti èn a srapu moro leki iniwan feti-owru di e koti na tu sei, èn a e boro go srefi so dipi taki a e prati sili nanga yeye, èn den skrufu fu a skin nanga a fatu na ini den bonyo fu den, èn a man fu si krin san na ati e denki èn abi na prakseri” (Hebrewsma 4:11, 12). So wan srapu fetisani no e misi noiti èn a e boro pasa te go na ini den dipi prakseri fu wan sma. Wi musu gebroiki en na wan koni fasi trutru.

Yu e frustan taki wan legre kan abi den moro bun fetisani, ma den fetisani dati no de noti efu den srudati no sabi fa fu gebroiki den. Na a srefi fasi, yu abi rai fanowdu di sa leri yu fa fu gebroiki a feti-owru fu yu na wan bun fasi. Koloku taki yu kan kisi leri fu den moro bun fetiman. Yesus ben kari den sma disi di e leri trawan fu feti, „a getrow èn koni srafu”, di kisi a frantwortu fu gi den bakaman fu en yeye nyanyan na a yoisti ten (Mateyus 24:45). Yu kan si krin suma na a srafu-grupu disi te yu e ondrosuku den leri fu den fayafaya, èn te yu e ondrosuku den warskow di den e gi sma na a yoisti ten fu meki den de na ai gi den triki fu a feanti. Te yu ondrosuku den sani disi, dan dati e sori taki a grupu disi na den salfu memre fu a Kresten gemeente fu Yehovah Kotoigi.—Openbaring 14:1.

A srafu-grupu disi du moro leki fu gi rai nomo. Den sori taki den abi a srefi fasi fu denki leki na apostel Paulus, di ben skrifi gi a gemeente na ini Tesalonika: „Wi ben kon de nanga switifasi na un mindri, neleki te wan mama di e gi pikin bobi e boboi den eigi pikin fu en. Sobun, fu di wi abi safu firi fu lobi gi unu, meki nanga ala prisiri wi ben prati no wawan a bun nyunsu fu Gado nanga unu, ma sosrefi wi eigi sili, bika unu ben kon de sma di wi lobi” (1 Tesalonikasma 2:7, 8). A de a frantwortu fu ibri Kresten srudati fu meki gebroiki fu a leri di den e kisi na wan lobi-ati fasi.

Ala den fetisani di de fanowdu

Yu kan kisi ala den agersi fetisani di sa kibri yu. Yu kan leisi fu den fetisani disi na ini Efeisesma 6:13-18. Wan koni srudati no sa opo go feti efu a no abi ala den fetisani fu en, noso efu wan tu fu den broko.

Wan Kresten abi ala den fetisani fanowdu di e gi en kibri, ma a bigi skelt fu bribi prenspari srefisrefi. Dati meki Paulus ben skrifi: „Boiti dati, teki a bigi skelt fu bribi, di nanga dati unu sa man kiri ala den faya peiri fu na ogriwan.”—Efeisesma 6:16.

A bigi skelt, di ben kan tapu a heri skin, e prenki a tranga bribi di wan Kresten musu abi.  Yu musu abi tranga frutrow na ini den rai di Yehovah e gi, èn yu musu bribi sondro fu tweifri taki ala den pramisi fu en sa kon tru. Yu musu si den pramisi disi neleki den kon tru kaba. Yu no musu tweifri nowan momenti taki a heri seti fu sani fu Satan sa kon na wan kaba esi-esi, taki grontapu sa tron wan paradijs, èn taki den sma di e tan getrow na Gado sa tron volmaakti baka.—Yesaya 33:24; 35:1, 2; Openbaring 19:17-21.

Na ini a tumusi aparti feti di e feti nownowde, yu abi wan tra sani fanowdu tu; wan mati. Na ini ten fu orloku, dan kompe fetiman e tron bun mati, fu di den e gi makandra deki-ati, èn fu di den e horibaka gi makandra. Son leisi den e kibri a libi fu den kompe fetiman sosrefi. Aladi wi e warderi wan bun mati, toku yu abi a matifasi fu Yehovah fanowdu fu man tan na libi. Fu dati ede, Paulus e taki fu a lasti fetisani di wi abi fanowdu, di a ben skrifi: „Aladi unu musu tan begi ini yeye na ibri okasi, nanga ibri fasi fu begi èn nanga tranga begi.”—Efeisesma 6:18.

Wi e prisiri te wi de nanga wan bun mati. Wi e meki muiti fu abi demakandra nanga en. Te wi e taki nanga Yehovah na ini begi doronomo, dan a e tron wan trutru sma gi wi, wan mati di wi kan frutrow. A disipel Yakobus e gi wi a deki-ati: „Kon krosibei na Gado, èn a sa kon krosibei na unu.”—Yakobus 4:8.

Den triki di a feanti e gebroiki

Son leisi, a grontapu pe wi e libi kan de leki wan pisi gron di lai nanga pikinpikin bom di sma e beri na ondro a doti. A feanti kan feti nanga yu fu ala sei, èn a e pruberi fu du yu ogri te yu no e fruwakti en. Ma yu kan abi a frutrow taki Yehovah gi wi ala den sani di wi abi fanowdu fu kisi kibri.—1 Korentesma 10:13.

A feanti sa pruberi fu gi yu mankeri, fu di a e krutu den tru tori di skrifi na ini Bijbel, tori di de prenspari gi a bribi fu wi. Sma di fadon komoto na bribi kan gebroiki switi, noso moi wortu, nanga kruktu denki fu meki yu lasi a strei. Ma den sma disi no abi a tanbun fu yu na prakseri. Odo 11:9 e taki: „Nanga en mofo wan sma di fadon komoto na bribi e tyari tra sma go na pori, ma nanga sabi den regtfardikiwan e kisi frulusu.”

Na wan bigi fowtu fu denki taki yu musu arki, noso leisi den sani fu den wan di fadon komoto na bribi, soso fu kon sabi fa fu sori den taki den abi wan fowtu denki fu sani. Den kruktu, èn takru sani di den e taki kan gi yu mankeri na yeye fasi, èn den kan pori a bribi fu yu neleki wan takru siki di e panya esi-esi (2 Timoteyus 2:16, 17). Na presi fu dati, yu musu du leki fa Yehovah e du nanga den sma di fadon komoto na bribi. Yob ben taki fu Yehovah: „Na fesi En, nowan sma sa kon di fadon komoto na bribi.”—Yob 13:16.

A feanti kan gebroiki wan tra trapu, wan di meki taki wan tu sma fadon kaba. Te wan tu srudati ben o hari densrefi puru fu a heri grupu, fu di den wani libi wan yayolibi, dan dati kan tyari bruya kon.

Grontapu sani soleki doti felem, morsu telefisi programa, nanga poku di e prei tranga èn di no fiti, na sani di e hari sma prakseri. Son sma e  denki taki den kan luku sekskino, noso leisi seksbuku sondro taki a e du den wan sani. Ma wan sma di ben e luku seksfelem doronomo ben taki: „Noiti moro yu e frigiti den felem dati. O moro yu e prakseri fu den, o moro yu wani du den sani di yu ben si . . . Den kino e meki yu denki taki yu e misi wan sani na ini yu libi.” Den sani disi kan gi yu mankeri sondro taki yu sabi dati. Yu wani taki a sani dati pasa nanga yu?

Ete wan tra peiri di a feanti kan gebroiki, na a krakti di gudu abi tapu sma. A no de makriki fu si a kefar, fu di wi alamala abi materia sani fanowdu. Wi abi wan oso fanowdu, wi abi nyanyan nanga krosi fanowdu èn a no fowtu fu wani moi sani. Ma a fasi fa wan sma e si den sani disi, kan de wan problema. Wan sma kan kisi a denki taki moni de moro prenspari leki yeye afersi. Wi kan tron sma di lobi moni. Wi musu memre taki materia gudu a no ala sani. A e tan fu wan syatu pisi ten nomo, ma na a tra sei yeye gudu e tan fu têgo.—Mateyus 6:19, 20.

Efu wan legre lasi-ati, dan a kan lasi a strei makriki. „Yu sori taki yu lasi-ati tapu a dei fu banawtu? A krakti fu yu sa de pikinso nomo” (Odo 24:10). Wan fasi fa Satan kisi sma furu tron na fu meki den lasi-ati. Te wi e weri „a howpu fu frulusu leki wan fetimusu”, dan dati sa yepi yu fu no lasi-ati (1 Tesalonikasma 5:8). Pruberi fu tan abi wan tranga howpu leki Abraham. Di Gado ben aksi Abraham fu gi a wan-enkri manpikin fu en leki wan srakti-ofrandi, dan a no ben draidrai. Abraham ben e bribi taki Gado ben o blesi ala nâsi nanga yepi fu den bakapikin fu en, soleki fa a ben pramisi. A ben bribi sosrefi taki efu a ben de fanowdu, dan Gado ben kan gi Isak libi baka, so taki a pramisi dati ben kan kon tru.—Hebrewsma 11:17-19.

Tan feti a feti

Son sma strei hebi gi wan langa pisi ten, èn fu dati ede den no e feti nanga a srefi faya moro. Na eksempre fu Uria, di kari na a bigin fu na artikel, kan yepi ala sma di e feti a feti fu a bribi, fu tan abi a yoisti fasi fu si sani. Furu fu den kompe Kresten srudati fu wi e pina, den e kisi tesi, noso den e nyan pina na ini kowru, èn den e pina fu angribere. Neleki Uria, wi no musu poti prakseri na den moimoi sani di wi kan kisi now, èn wi no musu kisi a firi fu libi wan switi libi. Wi wani tan na ini a legre fu loyaal fetiman fu Yehovah di de na heri grontapu, èn wi wani tan strei a strei teleki wi sa prisiri fu den tumusi moi blesi di wi sa kisi na ini a ten di e kon.—Hebrewsma 10:32-34.

Wi kan lasi wi libi efu wi no tan na ai, fu di kande wi e prakseri taki a lasti feti de fara ete. Na eksempre fu Kownu David e sori taki a sani disi no bun kwetikweti. Wi no sabi fu san ede a no go na ini a feti makandra nanga a legre fu  en. Leki bakapisi a ben du wan seryusu sondu, di ben meki taki a ben abi hebi pen nanga sari-ati, en heri libi langa.—2 Samuel 12:10-14.

A de wan warti sani fu feti a feti disi, fu nyan pina ini a strei, fu ondrofeni taki sma e spotu yu, èn fu tan fara fu den prisiriten fu a grontapu di no fiti? Den wan di e feti na wan bun fasi sabi taki den sani fu a grontapu kan gersi moi sani, neleki gowtu di e brenki, ma te yu ben o luku moro fini, dan yu e si taki a no warti noti (Filipisma 3:8). Boiti dati, furu tron den sortu prisiriten disi, e meki taki yu e kisi mankeri, èn yu e kon si taki a no de leki fa yu ben e fruwakti.

Wan Kresten di de ini a strei disi na yeye fasi, e prisiri fu abi demakandra nanga trutru mati, fu abi wan krin konsensi, èn fu abi wan tumusi moi howpu. Den Kresten di salfu nanga santa yeye abi a howpu fu libi fu têgo, makandra nanga Krestes Yesus na ini hemel (1 Korentesma 15:54). A moro bigi pisi fu den Kresten fetiman abi a howpu fu libi wan volmaakti libi na ini wan paradijs grontapu. A no de fu taki, dati a warti fu du ala san wi man fu kisi den sani disi. Èn tra fasi leki den orloku fu libisma, wi de seiker taki wi o wini a strei, solanga wi tan getrow (Hebrewsma 11:1). Ma na a tra sei, a sistema disi di de na ondro a tiri fu Satan sa kisi pori srefisrefi.—2 Petrus 3:10.

Aladi yu e tan feti a feti disi, dan hori den wortu fu Yesus na prakseri te a e taki: „Hori deki-ati! Mi wini grontapu kaba” (Yohanes 16:33). Yesus wini grontapu fu di a ben tan na ai, èn fu di a ben tan hori en soifri retifasi aladi a ben kisi tesi. Wi kan du a srefi sani tu.

[Prenspari pisi na tapu bladzijde 27]

Gon no e sutu, bom no e trowe, ma toku wi musu poti ala wi prakseri na a fasi fa a feti musu feti

[Prenspari pisi na tapu bladzijde 30]

Wi de seiker taki wi o wini a strei, solanga wi tan getrow

[Prenki na tapu bladzijde 26]

Te wi e weri a howpu fu frulusu leki wan fetimusu, dan dati sa yepi wi fu no lasi-ati

Gebroiki a bigi skelt fu bribi fu naki den „faya peiri” fu Satan puru

[Prenki na tapu bladzijde 28]

„Kon krosibei na Gado, èn a sa kon krosibei na unu”

[Prenki na tapu bladzijde 29]

Wi musu si den pramisi fu Gado neleki den kon tru kaba