Fu san ede Yehovah Kotoigi e tan kon na yu oso?

SMA na heri grontapu sabi taki Yehovah Kotoigi e horidoro na ini na oso fu oso preikiwroko fu den. Son sma e aksi densrefi fu san ede Kotoigi e tan kon na den ibri tron baka, spesrutu efu den ben sori na fesi kaba taki den no wani yere a boskopu fu den Kotoigi. Tu brifi di komoto na Rosiakondre e sori fu san ede.

„Fu taki en leti, dan na ini a ten di pasa mi ben e meki ala muiti fu no taki nanga Yehovah Kotoigi”, na so Masha, wan meisje fu 19 yari na ini a presi Khabarovsk ben taki. Ma di a ben leisi wan tu fu den tijdschrift di Kotoigi e tyari kon na doro, dan a ben kenki a fasi fa a ben e denki. Masha ben skrifi: „Ala den sani di mi ben leisi na ini den tijdschrift na moi sani èn den ben yepi mi fu kon frustan sani moro bun. Ma san de moro prenspari na taki den e yepi yu fu si den sani di e pasa na grontapu na wan tra fasi. Safrisafri mi ben kon frustan fu san ede wi de na libi. Ma a gersi taki now mi no e miti Yehovah Kotoigi so furu moro, ma toku mi abi den tijdschrift fu unu fanowdu.”

Svetlana e libi na ini a foto Ussuriysk di de sowan 80 kilometer na a noordsei fu a foto Vladivostok. A ben skrifi: „No solanga pasa mi bigin leisi A Waktitoren nanga Ontwaakt! Na ini a ten disi wi abi den tijdschrift disi fanowdu trutru. Mi e prisiri fu leisi ala den artikel. Den artikel moi srefisrefi, den e leri mi furu sani, èn den e meki mi frustan sani moro krin. Grantangi! Grantangi taki unu e libi na ini a grontapu disi èn taki unu e du wan wroko di bun, èn di de fanowdu.”

Yehovah Kotoigi na heri grontapu e teki a frumane fu na apostel Paulus leki wan seryusu sani te a e taki: „Ma fa den sa yere sondro fu wan sma e preiki?” (Romesma 10:14). Fu san ede yu no e teki a ten fu arki wan tu miniti, te den Kotoigi e kon na yu wan tra leisi? Yusrefi kan prisiri fu a boskopu di e gi trowstu èn di de fu feni na ini a Wortu fu Gado, Bijbel.