Trowstu gi den wan di e pina

DI GETROW man nanga uma fu fositen ben e nyan pina, dan nanga den heri ati den begi Gado fu tiri den. Ma aladi den ben du dati, toku densrefi ben du wan sani so taki den no ben e firi a pina so hebi; kande den ben gebroiki koni fu lowe gi den sma di ben e pina den. Fu eksempre, David ben man horidoro di a kisi tesi fu di a ben frutrow tapu Yehovah, ma boiti dati, ensrefi ben meki muiti so taki a ben man horidoro. Fa a de nanga wi na ini a ten disi?

Te yu e nyan pina, dan kande yusrefi e meki muiti fu lusu a problema di yu abi. Fu eksempre, efu yu no abi wan wroko, dan yu e meki muiti fu feni wan wroko so taki yu sa man sorgu gi yusrefi nanga yu osofamiri, a no so? (1 Timoteyus 5:8) Noso, efu yu e pina fu wan siki ede, dan yu e suku yepi na datra, a no so? A de wan moi sani fu si taki Yesus, di ben kisi a krakti fu Gado fu dresi ala sortu siki, ben sabi taki ’den sikiman abi wan datra fanowdu’ (Mateyus 9:12). Ma a no de so taki ala ten yu sa man puru den tesi di yu e kisi; kande yu sa musu tan tyari a tesi disi fu wan langa pisi ten.

Fu san ede yu no e taki na ini begi nanga Yehovah Gado fu a tori disi? Fu eksempre, efu wi e suku wan wroko, dan wi musu frutrow tapu Gado èn wi musu begi en tu; disi sa yepi wi fu no teki nowan wroko di no de akruderi Bijbel gronprakseri. Boiti dati, wi sa wai pasi gi sani di kan meki taki wi e kon gridi noso taki wi e kon lobi moni, bika dati o meki wi „gowe libi a bribi” (1 Timoteyus 6:10). Fu tru, te wi o teki prenspari bosroiti di abi fu du nanga a wroko di wi o du, wi osofamiri, noso wi gosontu, dan wi kan waka baka a frumane fu David: „Trowe yu hebi na tapu Yehovah, èn ensrefi sa horibaka gi yu. Noiti a sa meki taki a regtfardikiwan e degedege.”—Psalm 55:22.

Begi di e komoto fu na ati sa yepi wi sosrefi fu no bruya so taki a pina di wi e pina no e moro wi. Na apostel Paulus di ben de wan trutru Kresten, ben skrifi: „Na ini ibriwan sani, meki Gado kon sabi san unu wani fu di unu e begi èn e aksi en tangitangi aladi unu e taigi en grantangi tu.” Na sortu fasi wi kan kisi trowstu te wi e begi nanga wi heri ati? „A vrede  fu Gado, di pasa ala suma frustan, sa kibri un ati nanga un frustan nanga yepi fu Krestes Yesus” (Filipisma 4:6, 7). A vrede fu Gado e „pasa ala suma frustan”. Fu dati ede a kan meki wi firi korostu te wi abi furu broko-ede di e moro wi. A vrede fu Gado sa ’kibri wi ati nanga wi frustan’; na so fasi a e yepi wi fu no handri esi-esi èn na wan don fasi, bika disi ben sa kan meki taki wi e pina moro.

Begi kan abi furu krakti tapu a fasi fa wan situwâsi e waka. Di na apostel Paulus ben tron wan strafuman na ini Rome, dan na wan sakafasi a ben aksi den Kresten brada nanga sisa fu en fu begi gi en. Fu san ede Paulus ben aksi disi? A ben skrifi den taki: „Mi e frumane unu spesrutu fu du disi, so taki mi kan kon baka na unu moro esi” (Hebrewsma 13:19). Sobun, Paulus ben sabi taki te Yehovah ben o yere taki den brada nanga sisa fu en e begi fayafaya, dan disi ben kan meki taki a ben o lusu moro esi.—Fileimon 22.

Ma te wi e begi, dan Gado sa meki sani waka tra fasi na ini a tesi di wi e kisi? A kan de so. Ma wi musu sabi taki Yehovah Gado no abi fu piki den begi fu wi na a fasi fa wi wani. Paulus ben begi wan tu leisi fu „wan maka na ini a skin”; kande a ben abi wan problema na skin sei. Na presi taki Gado ben puru a problema disi fu Paulus, dan A ben taigi en: „A bun-ati fu mi nofo gi yu, bika a krakti fu mi e kon volmaakti na ini swakifasi.”—2 Korentesma 12:7-9.

Sobun, kande a problema di wi abi no sa gowe wantewante. Ma wi sa kisi na okasi fu sori taki wi e frutrow tapu wi hemel Tata (Yakobus 1:2-4). Wi kan de seiker taki srefi efu Yehovah Gado no e puru a problema fu wi, toku a kan „opo a pasi [gi wi] tu fu komoto so taki [wi] man frudrage en” (1 Korentesma 10:13). A de wan moi sani fu si taki Bijbel e kari Yehovah „a Gado fu ala trowstu, di e trowstu wi na ini ala wi banawtu” (2 Korentesma 1:3, 4). Gado man gi wi san wi abi fanowdu fu horidoro, èn wi abi a howpu fu libi fu têgo.

A Wortu fu Gado, Bijbel, e pramisi wi taki Yehovah „sa figi puru ala watra na den ai, èn dede no sa de moro, nowan sari, nowan babari, nowan pen no sa de moro” (Openbaring 21:3, 4). A muilek gi yu fu bribi taki wan grontapu sondro problema sa de? A kan taki a muilek gi yu fu bribi disi fu di yu kon gwenti fu libi nanga problema. Awansi fa no fa, Gado pramisi wi taki wi no sa frede moro èn rampu no sa miti wi moro, èn den pramisi fu en seiker sa kon tru.—Yesaya 55:10, 11.

[Prenki na tapu bladzijde 9]

Wi kan lasi-ati, ma wi sa kisi frulekti tu