Den futuboi fu Gado de leki bon—Na sortu fasi?

A PSALM skrifiman ben e taki fu wan sma di abi prisiri fu leisi Bijbel, èn fu fiti Bijbel gronprakseri na ini en libi, di a ben skrifi: „Fu tru a sa tron leki wan bon di prani na libawatra, di e gi en eigi froktu te en ten doro èn den wiwiri fu en no e kon flaw, èn ala san a e du sa waka bun” (Psalm 1:1-3). Fu san ede na agersitori disi fiti?

Bon kan libi bun langa. Fu eksempre, son olèifbon na ini a kontren fu a Mindrikondre Se kan owru wán te go miti tu dusun yari. Den baobab-bon di e gro na ini Centraal Afrika e libi bun langa, èn wan fu den pinabon [Pinus aristata] di de na ini Kalifornia e libi sowan 4600 yari kaba. Ini busi furu tron den sani di de lontu den bigi bon e feni wini fu dati. Fu eksempre, den langa bon e gi kowrupe di e kibri den pikinpikin bon, èn den wiwiri di e fadon fu den bon, e fatu a gron.

Den moro langa bon na grontapu, furu tron e gro na ini busi pe den difrenti bon disi e yepi makandra. Fu di den rutu frekti nanga makandra, dan son bon e tanapu moro steifi leki wan bon di e tanapu en wawan na wan pisi gron. Efu wan bon abi furu rutu, dan dati e meki taki a kan hari nofo watra nanga nyanyan fu a gron. Son tron den rutu kan langa moro a heri bon srefi, noso den panya moro bradi leki den wiwiri fu a bon.

Kande na apostel Paulus ben abi wan bon na prakseri di a ben taigi Kresten taki den musu „tan waka na ini wánfasi nanga en (Krestes), meki rutu èn bow kon tranga na ini en èn kon stanfaste na ini a bribi” (Kolosesma 2:6, 7). Fu tru, Kresten kan tan tanapu kánkan soso te den e hori steifi na Krestes leki wan bon di abi langa rutu di beri na ini a gron.—1 Petrus 2:21.

Na sortu tra fasi den futuboi fu Gado de leki bon? We, leki fa bon di e gro krosibei fu makandra e yepi densrefi, na a srefi fasi den wan di e tan krosibei fu a Kresten gemeente e kisi yepi fu tra bribiman (Galasiasma 6:2). Getrow èn lepi Kresten di abi langa yeye rutu, e yepi den nyun bribiman fu tanapu steifi na ini a bribi, srefi te den e kisi gens di de leki bigi winti (Romesma 1:11, 12). Den wan di tron Kresten no so langa pasa kan gro na yeye fasi, fu di den e kisi kibri na ondro a „kowrupe” fu den dinari fu Gado di abi moro ondrofeni (Romesma 15:1). Èn ala den memre fu a Kresten gemeente di de na heri grontapu e kisi krakti fu a yeye nyanyan di den e kisi fu den „bigi bon fu regtfardikifasi”, a fikapisi fu den salfuwan.—Yesaya 61:3.

Èn a switi srefisrefi taki ala den dinari fu Gado abi a howpu fu si a kontru fu a pramisi di skrifi na ini Yesaya 65:22, pe skrifi: „Den dei fu mi pipel sa de leki den dei fu wan bon.”

[Sma di abi a reti fu a prenki na tapu bladzijde 28]

Godo-Foto