Ondrofenitori

Mi horidoro fu di mi ben de tevrede nanga a fasi fa Gado sorgu mi

SOLEKI FA BENJAMIN IKECHUKWU OSUEKE FRUTERI

Syatu baka di mi bigin nanga a furuten diniwroko, mi go na a oso fu mi papa nanga mama. Di mi papa si mi, a grabu mi na mi empi, dan a bigin bari: „Fufuruman!” A teki en owru èn a naki mi nanga a plata sei fu na owru. Di tra sma fu a dorpu yere a babari, dan den kon na wi oso fu luku san e pasa. San mi ben fufuru? Kon meki mi fruteri yu.

MI GEBORE na ini 1930, na ini Umuariam, wan dorpu di de krosibei fu a zuid-owstusei fu Nigeria. Mi ben de a fosiwan fu seibi pikin. A moro bigiwan fu den pikin sisa fu mi kon dede di a ben abi 13 yari. Mi papa nanga mi mama ben de fu na Anglikan Kerki. Mi papa ben e du gronwroko, èn mi mama ben e seri sani. Mama ben e waka go na den wowoyo na ini a kontren fu wi, sowan 30 kilometer fu wi dorpu, fu go bai wan blik nyanyan oli, èn dan a ben e drai kon baka latilati a srefi dei dati. Frukufruku mamanten na a tra dei, a ben e waka go teki wan loko fu go seri na oli sowan 40 kilometer moro fara fu a dorpu fu wi. Te a ben e meki moni tapu na oli dati, dan furu tron a ben de soso 15 te go miti 20 Amerkan sensi. Nanga a moni dati a ben e bai nyanyan gi na osofamiri èn dan a ben e drai kon baka a srefi dei. Tinafeifi yari langa a du dati, teleki a dede na ini 1950.

A fosi skoro pe mi bigin teki leri, ben de wan skoro fu na Anglikan Kerki na ini a dorpu fu mi. Ma fu kaba lagi skoro mi ben musu froisi gowe sowan 35 kilometer fu a dorpu fu mi, fu go tan na wan presi pe mi ben musu yuru wan kamra. Mi go suku wan wroko fu di mi papa nanga mama no ben abi moni fu yepi mi fu teki moro skoroleri. Na a bigin, mi wroko na ini na oso fu wan waktiman fu den loko na ini Lagos, na a  westsei fu Nigeria. Baka dati mi wroko gi wan lantiman na ini Kaduna, na a noordsei fu Nigeria. Na ini Benin City, wan foto krosibei fu a westsei fu Nigeria, mi wroko leki yepiman fu wan afkati, èn bakaten mi wroko na wan presi pe den e koti udu. Fu drape mi go na Kamerun na ini 1953, fu go tan nanga wan omu fu mi di yepi mi nanga wan balatawroko. A moni di mi ben e meki ala mun ben de sowan neigi Amerkan dala. Noiti mi feni wan wroko pe mi ben kan meki furu moni, toku mi ben de tevrede, solanga leki mi ben abi nofo nyanyan.

Wan pôtiman gi mi wan tumusi bigi gudu

Mi ben e wroko makandra nanga Silvanus Okemiri, wan Kotoigi fu Yehovah. Silvanus gebroiki ibri okasi di a ben e kisi fu fruteri mi san a ben sabi fu Bijbel; te wi ben e koti grasi èn te wi ben e poti doti lontu den balatabon. Aladi mi ben e arki te a e taki, toku mi no ben du noti nanga den sani di a ben e taigi mi. Ma di na omu fu mi yere taki mi e taki nanga Kotoigi, dan a du ala san a man fu tapu mi. A ben warskow mi, taki: „Benji, yu no musu go na Okemiri. En na wan Yehovah man èn a pôti srefisrefi. Ala sma di e go moksi nanga en, o kon de leki en tu.”

Na a bigin fu 1954 mi drai go na oso baka fu di mi no ben man moro nanga a tumusi hebi wroko di mi ben musu du na a balata pranasi. Na a ten dati na Anglikan Kerki ben e hori ensrefi moro soifri na den markitiki di e sori sma fa den musu libi. Dati meki a fasi fa mi kweki, gi mi wan sortu tegu gi hurudu. Ma heri esi, mi bigin tegu gi a hoigrifasi fu son sma na ini a kerki. Den ben e taki nomo dati den e libi leki fa Bijbel e taki, ma a libi fu den ben sori taki dati no ben de so (Mateyus 15:8). Ibri tron baka mi nanga mi papa ben e krutu nanga makandra, èn a sani dati meki taki wi no ben de so bun nanga makandra. Wan neti mi opo teki mi sani, dan mi gowe.

Mi froisi go tan na Omoba, wan pikin foto pe sma ben e tan di ben e meki pasi gi den loko. Drape mi go miti Yehovah Kotoigi ete wan tron. Priscilla Isiocha, wan uma di mi ben sabi fu a dorpu fu mi, ben gi mi tu pikin buku, namku „Dit goede nieuws van het koninkrijk” nanga Na Armageddon — Gods nieuwe wereld. * Mi leisi den nanga ala mi prakseri; mi ben abi na overtoigi taki mi feni a waarheid. Na ini a kerki fu mi, wi no ben e studeri Bijbel. Wi ben e poti prakseri moro furu na gwenti fu libisma. Ma na ini den buku fu Kotoigi mi si furu pisi di ben teki puru fu Bijbel.

A no doro wan mun srefi fosi mi aksi brada nanga sisa Isiocha o ten den e go na a kerki fu den. A fosi leisi di mi go na wan konmakandra fu Yehovah Kotoigi, mi no frustan noti. A Waktitoren di den ben e luku, ben e taki fu ’Gog fu Magog’ na ini a profeititori fu Esekièl (Esekièl 38:1, 2). Furu wortu di den ben e gebroiki, mi no ben sabi, ma mi ben fruwondru so te fu a switikon di den ben gi mi, taki mi bosroiti fu go baka a tra sonde. Na a di fu tu konmakandra mi yere fu a preikiwroko. Sobun, mi aksi Priscilla o ten den ben e go preiki. A di fu dri sonde, mi go nanga den nanga mi pikin Bijbel na mi anu. Mi no ben abi wan tas èn mi no ben abi nowan buku fu prati. Toku, mi ben tron wan Kownukondre preikiman èn na a kaba fu a mun dati mi gi den mi preikiwroko raportu!

Nowan sma studeri Bijbel nanga mi, ma ibri leisi te mi ben e go na famiri Isiocha, mi ben e leri sani fu Bijbel di ben tranga a bribi fu mi èn di ben e gi mi deki-ati; mi ben e kisi buku tu di abi fu du nanga Bijbel. Fu sori taki mi ben gi misrefi abra na Yehovah, mi teki dopu tapu 11 december 1954, na wan distrikt kongres na ini a foto Aba. A famiriman fu mi pe mi ben e tan èn di ben e leri mi wan wroko, no ben wani gi mi  nyanyan moro èn a no ben wani leri mi a wroko moro. A no pai mi nowan kopro sensi srefi gi den wroko di mi ben du gi en kaba. Toku mi no ben hori en na ati; mi ben breiti nomo taki mi ben kan abi wan banti nanga Gado. A sani disi ben gi mi trowstu nanga wan korostu firi. Den Kotoigi na ini a birti ben yepi mi tu. Famiri Isiocha ben e gi mi nyanyan, èn tra brada leni mi moni fu bigin wan pikin bisnis. Mindrisei fu a yari 1955, mi bai wan baisigri na wan sma, èn na ini maart 1956 mi bigin nanga a gewoon pionierwroko. Syatu baka dati mi pai ala mi paiman. Mi no ben e meki furu moni nanga a pikin bisnis fu mi, ma mi ben man sorgu misrefi. San Yehovah ben e gi mi, ben de nofo gi mi.

Mi „fufuru” den brada nanga sisa fu mi

A fosi sani di mi prakseri baka di mi kon abi mi eigi oso, ben de fu yepi mi brada nanga sisa fu kon sabi Gado. Mi papa no ben breiti kwetikweti taki mi tron wan Kotoigi fu di a ben abi wan lo takru denki fu den èn fu di a no ben e frutrow den. Ma dan fa mi ben o man yepi den brada nanga sisa fu mi fu leri den tru tori fu Bijbel? Mi ben aksi mi papa efu mi ben kan sorgu gi mi pikin brada Ernest. Na so mi papa meki a kon tan nanga mi. Heri esi Ernest teki a waarheid èn a teki dopu na ini 1956. A sani dati ben meki mi papa bigin gens mi moro srefi. Toku a sisa fu mi di ben trow kaba, kon na ini a waarheid tu, makandra nanga en masra. Di mi seti sani fu meki Felicia, a di fu tu sisa fu mi, kon nyan fakansi nanga mi, dan nanga furu muiti mi papa gi en primisi fu kon. Heri esi, Felicia dopu leki wan Kotoigi fu Yehovah tu.

Na ini 1959, mi go na oso fu teki Bernice, a di fu dri sisa fu mi, fu tyari en go tan nanga Ernest. We, dati na a momenti di mi papa teki mi skin, èn di a taki dati mi e fufuru den pikin fu en. A no ben man frustan, taki na densrefi teki a bosroiti fu dini Yehovah. Mi papa ben sweri taki a no ben o gi Bernice pasi fu kon nanga mi noiti. Ma na anu fu Yehovah no ben syatu, bika a yari baka dati, Bernice ben kon na Ernest fu nyan skoro fakansi nanga en. Ne a teki a waarheid neleki den tra sisa fu en èn a teki dopu.

’Mi kon sabi san na a tyori’

Na ini september 1957, mi bigin dini leki spesrutu pionier. Ibri mun mi ben e preiki sowan 150 yuru. Brada Sunday Irogbelachi ben de mi pionier patna, èn wi ben e dini na ini a foto Akpu-na-abuo, na ini a distrikt Etche. Na a fosi kring konmakandra di wi fisiti di wi ben de drape, 13 sma fu a grupu fu wi teki dopu. A e gi wi bigi prisiri fu si taki nownowde 20 gemeente de na ini a kontren dati!

Na ini 1958, mi leri sabi Christiana Azuike, wan gewoon pionier sisa fu a gemeente East na ini a kontren fu Aba. Mi ben lobi a faya fu a sisa dati, èn na ini december fu a yari dati, wi ben trow. Na a bigin fu 1959, mi kisi a grani fu dini leki opziener di e go na difrenti gemeente, fu go luku den brada nanga sisa fu wi èn fu gi den deki-ati. Fu bigin nanga a ten dati, teleki 1972, mi nanga mi wefi go na pikinmoro ala den gemeente fu a pipel fu Yehovah na a owstusei te go miti afu fu a westsei fu Nigeria.

Den gemeente ben de fara fu makandra, èn moro furu wi ben e go na den presi dati nanga baisigri. Te wi ben go na den gemeente na ini den bigi foto, dan den brada fu wi ben e pai taxi gi wi fu go na a tra gemeente. Furu tron a gron fu den kamra pe wi ben e tan ben de fu tokotoko èn plafon no ben de. Wi ben e sribi na tapu bedi di meki fu den tiki fu palmbon. Son wan fu den bedi dati ben abi wan matrasi fu drei grasi nanga wan matamata na tapu; tra bedi no ben abi matrasi srefi. Wi no ben e luku o furu nyanyan wi ben e kisi, noso efu a ben de a moro gosontu nyanyan. Fu di wi ben leri na ini a ten di pasa fu de tevrede awinsi wi no ben abi furu sani, meki wi ben breiti nanga iniwan nyanyan di wi ben e kisi, èn den sma pe wi ben tan ben e warderi dati srefisrefi. Na a ten dati son foto no ben abi faya, sobun, ala ten wi ben e waka nanga wan kokolampu. Aladi a libi ben tranga son leisi, toku wi ben abi bun furu prisiri nanga den gemeente pe wi ben e go.

Na ini den yari dati wi kon frustan o warti a rai de di Paulus gi. A ben taki: „Te wi abi nyanyan, krosi, nanga wan presi fu tan, dan wi sa de tevrede nanga den sani disi” (1 Timoteyus 6:8). Na ini  ala den problema di Paulus kisi, a kon si san na a tyori fu kan de tevrede nanga san yu abi. San ben de a tyori dati? A ben fruklari: „Mi sabi san a wani taki fu no abi furu sani, fu tru mi sabi san a wani taki fu abi sani pasa marki. Na ini ala sani mi leri san na a tyori fu nyan teleki a sari mi èn fu libi nanga angri, fu abi sani pasa marki èn fu mankeri sani.” Wi ben leri a srefi koni dati tu. Paulus ben taki sosrefi: „Mi man du ala sani fu di [Gado] e gi mi krakti” (Filipisma 4:12, 13). Wi ondrofeni taki disi de so trutru! Wi ben de tevrede nanga san wi abi, wi ben abi nofo fu du na ini a Kresten diniwroko èn wi ben abi wan korostu firi.

Wi dini den gemeente leki osofamiri

Krosibei fu a kaba fu 1959, Joel, a fosi manpikin fu wi, gebore. A di fu tu boi, Samuel, gebore na ini 1962. Christiana nanga mi tan du a kringwroko, èn wi ben go na den difrenti gemeente makandra nanga den boi. Na ini 1967, a borgufeti fu Nigeria bigin. Skoro ben tapu fu di sma ben e trowe bom doronomo nanga yepi fu opolani. Bifo a wefi fu mi go nanga mi na ini a kringwroko, dan a ben de wan skoromisi. Sobun, na a pisi ten fu na feti, a gi den pikin leri na oso. Di Samuel ben abi siksi yari a ben sabi kaba fa fu leisi èn skrifi. Di a go na skoro baka na feti, a ben de tu klas na fesi den speri fu en.

Na a ten dati, wi no ben sabi o tranga a de fu kweki pikin, aladi yu e du a kringwroko. Ma di den poti wi leki spesrutu pionier na ini 1972, dan dati ben bun gi wi srefisrefi. Disi ben gi wi na okasi fu tan na wán presi, so taki wi ben kan poti nofo prakseri na a yeyefasi fu wi osofamiri. Frukufruku kaba wi leri den manpikin fu wi taki den kan de tevrede nanga san den abi, efu den abi wan bun banti nanga Gado. Na ini 1973, Samuel teki dopu, èn a srefi yari dati Joel tron gewoon pionier. Ala den tu manpikin fu wi trow nanga Kresten uma di de bun eksempre èn now den abi den eigi osofamiri di den e kweki na ini a waarheid.

Den ede-ati fu borgufeti

Di a borgufeti bigin, mi ben e dini leki kringopziener makandra nanga mi osofamiri na ini wan gemeente na a foto Onitsha. Na orloku dati meki wi kon frustan moro bun taki a de wan soso sani fu feti fu kisi gudu, noso fu frutrow na den tapu. Mi si fa sma lon gowe libi ala den gudu fu den na strati, soso fu man tan na libi.

Di na orloku kon moro faya, dan den kari ala tranga man-nengre fu kon feti. Den pina wan lo brada di no ben wani go feti. Wi no ben man go pe wi wani. Fu di nyanyan no ben nofo, meki bruya nanga dyugudyugu ben kon de na ini a kondre. Wan afu kilo kasaba fu 7 Amerkan sensi, ben kostu 14 Amerkan sensi te fu kaba, èn wan kan sowtu fu 8 dala ben tron 42 dala. Merki, botro, nanga sukru no ben de fu feni moro. Fu kan tan na libi wi ben e miri grun papaya, èn dan wi ben e moksi en nanga kasaba blon. Wi ben e nyan sprenka tu, kasaba buba, nanga wiwiri fu wan sortu angalampu; wi ben e nyan wan sortu grasi, iya wi ben e nyan iniwan wiwiri di wi ben kan feni. Fu di meti ben diri srefisrefi, meki mi ben e kisi sani leki lagadisa, so taki den pikin ben kan nyan dati. Ma awinsi fa a libi ben kon tranga, ala ten Yehovah sorgu gi wi.

Ma san ben moro ogri srefi na taki na orloku ben meki taki wi no ben man feni nofo yeye nyanyan. Furu brada ben abi fu lon gi a feti fu go  kibri na ini busi, noso na tra dorpu. Na a fasi dati den lasi furu, èn son leisi ala den buku fu den di ben abi fu du nanga Bijbel. Boiti dati, fu di lanti ben poti srudati na ala sei, meki nyun buku no ben man doro na ini a kontren fu Biafra. Aladi furu fu den gemeente pruberi fu tan hori konmakandra, toku den brada ben go na baka na yeye fasi fu di den no ben man kisi den boskopu di a bijkantoro ben e seni fu sori den san fu du.

Wi du muiti fu tan na libi na yeye fasi

Den kringopziener ben tan du muiti fu go na ibriwan fu den difrenti gemeente. Fu di furu brada ben lowe komoto na ini den difrenti foto, meki mi go suku den awinsi pe den ben de. Na wan okasi, mi libi mi wefi nanga den pikin na wan presi pe ogri no ben o miti den, dan mi wawan gowe siksi wiki langa fu go suku den brada na difrenti dorpu èn na difrenti presi na ini busi.

Di mi ben de na wan gemeente na ini a foto Ogbunka, dan mi kisi fu yere taki wan bigi grupu Kotoigi ben de na ini a kontren fu Isuochi na ini a distrikt Okigwe. Sobun, mi ben aksi sma fu go taigi den brada na ini a kontren dati fu kon makandra na wan kasyu pranasi na ini a dorpu Umuaku. Nanga baisigri mi nanga wan owru brada teki waka sowan 15 kilometer fu doro a pranasi dati, pe sowan 200 Kotoigi, dati wani taki umasma nanga pikin sosrefi, ben kon makandra. Wan pionier sisa ben yepi mi fu feni wan tra grupu fu pikinmoro wán hondro Kotoigi di ben go kibri na ini a busi na Lomara.

Lawrence Ugwuegbu ben de wan fu den deki-ati brada di ben e libi na ini a foto Owerri pe a feti ben hebi srefisrefi. A ben fruteri mi taki furu Kotoigi ben de na ini a kontren fu Ohaji. Den no ben man go pe den wani fu di srudati ben teki a presi abra. Netiyuru mi nanga a brada go drape nanga baisigri èn wi miti sowan 120 Kotoigi na tapu a prasi fu wan fu den brada fu wi. Wi ben teki na okasi dati sosrefi fu go luku wan tu tra Kotoigi na den difrenti presi pe den ben go kibri.

Brada Isaac Nwagwu ben yepi mi fu suku wan tu tra brada di wi no ben sabi pe den de. A sani dati ben kan meki a brada lasi en libi srefi, toku a ben tyari mi abra na Otamiriliba na ini wan kruyara fu go miti moro leki 150 Kotoigi di ben kon makandra na Egbu-Etche. Wan fu den brada drape ben bari: „Disi na a moro bun dei fu mi libi! Noiti mi ben denki taki mi o libi fu si wan kringopziener baka. Awinsi mi dede, now di a feti kon faya so, mi no abi trobi.”

Na difrenti okasi a legre ben wani kari mi fu go feti, ma ibri tron mi si fa Yehovah kibri mi. Wan bakadina mi ben e drai go baka na a gemeente di mi ben e fisiti. Mi ben komoto na wan konmakandra nanga 250  brada. Ne wan tu srudati stop mi na wan presi pe den ben tapu a pasi. „Fu san ede yu no de na ini a legre?” den aksi mi. Mi fruteri den taki mi na wan sma di e preiki fu Gado Kownukondre. Mi ben sabi taki den ben de fu go sroto mi nomonomo. Baka wan syatu, esi-esi begi, mi taigi a basi fu den: „Lusu mi grantangi.” Mi ben fruwondru di a taki: „San dati wani taki? Yu wani gowe?” „Iya”, mi piki, „lusu mi meki mi gowe”. Dan a taki: „Yu kan gowe.” Nowan fu den tra srudati taki wan sani.—Psalm 65:1, 2.

Fu di mi ben de tevrede nanga san mi abi meki mi kisi moro blesi

Di na orloku kaba na ini 1970, mi tan du a kringwroko. Mi ben abi a grani fu yepi seti  den gemeente baka so taki den ben kan drai bun. Dan mi nanga Christiana dini leki spesrutu pionier teleki 1976, di den poti mi leki kringopziener ete wan tron. Mindrisei fu a yari dati, den poti mi fu du a distriktwroko. Seibi yari baka dati, mi nanga mi wefi kisi a kari fu go dini na a bijkantoro fu Yehovah Kotoigi na ini Nigeria, pe wi e libi nownowde. Dyaso na a bijkantoro, a e gi wi prisiri fu si brada nanga sisa baka di wi ben miti na a ten fu a borgufeti èn na tra momenti; wi e firi bun fu si taki den e dini Yehovah na wan getrow fasi te now ete.

Na ini ala den yari di pasa teleki now, Christiana ben de wan bigi yepi gi mi èn a tan horibaka gi mi na ini ala sani. Sensi 1978 a abi problema nanga a gosontu fu en, ma fu di a no e kragi èn fu di a e tan go doro, meki a yepi mi fu kan tan tyari den frantwortu fu mi. Wi ondrofeni taki a psalm skrifiman ben abi leti di a taki: „Yehovah srefi sa yepi en na tapu wan kanape fu siki.”—Psalm 41:3.

Te mi sidon prakseri ala den yari di wi wroko gi Gado, dan mi e taki Yehovah tangi trutru gi a tumusi moi fasi fa a blesi wi. Fu di mi de tevrede nanga san Yehovah e gi mi, meki mi kan taki dati mi koloku srefisrefi. Mi e si en leki wan tumusi bigi blesi taki den pikin brada nanga den pikin sisa fu mi, èn sosrefi mi pikin nanga den osofamiri fu den, e dini Yehovah tu, makandra nanga mi nanga mi wefi. Yehovah gi mi wan libi pe mi ondrofeni furu sani, wan libi di no ben de fu soso. Ala san mi ben wani, kon tru.

[Futuwortu]

[Faki na tapu bladzijde 27]

Wan sani di seti na a reti ten, e tyari wini gi den brada fu wi

Na mindrisei fu den yari 1960 te go miti 1970, feantifasi na mindri difrenti grupu fu sma na noordsei èn na owstusei fu Nigeria, ben tyari bruya kon na ini a kondre. Sma bigin opo densrefi teige tiri, kruktudu ben lai, èn sma fu difrenti ras ben e du ogri nanga makandra. Den sani disi ben de wan tesi gi den Kotoigi fu Yehovah di ben teki a fasti bosroiti fu no teki sei na ini a feti dati. Na a ten dati, sma kiri sowan 20 Kotoigi. Furu fu den lasi ala den gudu.

Tapu 30 mei 1967, den distrikt di ben de na owstusei fu Nigeria teki srefidensi, fu tron a Republiek Biafra. Ne lanti gebroiki a legre fu tapu a kondre, so taki noti no ben kan komoto fu Nigeria go na Biafra, noso fu Biafra kon na ini Nigeria. Wan tumusi ogri feti bigin leki bakapisi fu dati èn furu sma lasi den libi.

Fu di Kotoigi fu Yehovah na ini a kontren fu Biafra no ben e teki sei na ini a feti, meki sma bigin du ogri nanga den. Den koranti ben e skrifi ala sortu takru nyunsu fu Kotoigi, fu meki a libimakandra drai teige den. Toku Yehovah sorgu taki den futuboi fu en tan kisi yeye nyanyan. Fa a du dati?

Na a bigin fu 1968 tu lantiman di ben de Kotoigi ben kisi prenspari frantwortu. A wan ben e wroko na ini Europa, a trawan ben e wroko na a presi pe opolani ben e saka na ini Biafra. Den ben e wroko na wan prenspari presi. Ala sani di ben musu go noso komoto na ini Biafra, ben musu pasa na den fosi. Den tu Kotoigi disi teki a frantwortu fu sorgu taki yeye nyanyan ben kan go na ini Biafra, aladi dati ben kan meki den lasi den libi srefi. Den ben yepi tu fu sorgu taki den brada fu wi di ben de na ini bigi nowtu, ben kan kisi yepi. Den tu brada disi ben man tan du a tumusi prenspari wroko dati te na a kaba fu na orloku na ini 1970. Bakaten wan fu den taki: „A seti disi ben pasa iniwan sani di wan libisma ben kan seti.”

Prenki na tapu bladzijde 23]

Na ini 1956

[Prenki na tapu bladzijde 25]

Na ini 1965, nanga den manpikin fu wi, Joel nanga Samuel

[Prenki na tapu bladzijde 26]

A de wan bigi blesi fu man dini Yehovah leki osofamiri!

[Prenki na tapu bladzijde 27]

Now mi nanga Christiana de na a bijkantoro fu Nigeria