Sma musu abi bribi fosi den kan kon betre?
Sma musu abi bribi fosi den kan kon betre?
TE WI e siki, dan wi e suku fasi fu kon betre baka. Kande yu leisi na ini Bijbel taki furu tron Yesus Krestes ben e dresi ala sortu siki èn taki a ben yepi wan lo sikisma di ben e pina. Fa Yesus ben kan dresi den na so wan fasi? Nanga yepi fu a „krakti fu Gado”, Bijbel e taki (Lukas 9:42, 43; Tori fu den Apostel 19:11, 12). Sobun, na a santa yeye fu Gado ben meki den sma kon betre baka, èn no a bribi wawan fu den sma (Tori fu den Apostel 28:7-9). Fu dati ede Yesus no ben e aksi sikisma fu sori bribi, bifo a dresi den.
Kande yu e aksi yusrefi: ’Sma e kon betre na wan wondru fasi ete, noso wan ten o kon baka pe sma sa kon betre baka na a fasi fa Yesus ben e dresi sma? Sortu howpu de gi den wan di abi wan takru siki di e pina den srefisrefi, noso den wan di abi wan siki di den no man dresi?’
Bijbel e sori taki na ini Gado en nyun grontapu pe regtfardikifasi sa de, nanga yepi fu a krakti fu Gado, sma sa kon betre baka na wan wondru fasi leki fa Yesus ben e du dati na grontapu. Yehovah Kotoigi na ini yu birti sa breiti fu sori yu fa, èn o ten Gado sa du san nowan sma di e dresi trawan man du. A sa puru ala siki krinkrin, èn sosrefi dede. Iya, Gado „sa swari dede trutru fu têgo”.—Yesaya 25:8.