A Vrede fu Westfalen​—A ten di bigi kenki kon na ini Europa

„TAKI so furu tiriman fu Europa kon makandra, soleki fa wi de makandra dyaso tide, na wan tumusi aparti sani.” Roman Herzog, di fosi ben de presidenti fu a Federaal Republiek fu Doisrikondre, ben taki a sani dati na ini oktober 1998. Di a taki a sani dati, dan na mindri den arkiman fu en yu ben abi fo kownu, fo umakownu, tu kownu manpikin, wan heiheiman fu wan kownu famiri, nanga wan tu presidenti. A Raad fu Europa (wan grupu fu kondre fu Europa) ben sorgu taki a konmakandra disi ben kan hori. A konmakandra disi ben de wan tumusi prenspari wan na ini a historia fu a disiten Doisrikondre. Fu san ede?

Na ini oktober 1998 a ben de a di fu 350 yari taki sma ben meki a Vrede Kruderi fu Westfalen. Furu tron den vrede kruderi disi na prenspari sani di e kenki a historia, èn fu dati ede a Kruderi fu Westfalen ben de wan spesrutu sani. Di sma skrifi den nen na ondro a kruderi disi na ini 1648, dan dati tyari wan kaba kon na a Orloku di feti Dritenti Yari èn a ben de a bigin fu a disiten Europa leki wan kontren fu kondre di abi den eigi tirimakti.

Wan owru sistema kon kenki

Na ini den yari na mindri 500 nanga 1500 G.T., a Lomsu Kerki fu Rome nanga a Santa Gran Kownukondre fu Rome ben de den moro tranga sistema fu Europa. A heri gran kownukondre ben prati na ini hondrohondro bigi gron di ben de fu den gudusma. A kontren fu a gran kownukondre na a srefi kontren pe Oostenrijk, a Tyekia Republiek, na owstusei pisi fu Fransikondre, Doisrikondre, Switserland, Bakrakondre, Belgia, nanga Luxemburg, èn son pisi fu Italiakondre de now. Fu di Doisrikondre ben de a moro bigi pisi fu a kontren disi, meki sma ben kon sabi a gran kownukondre leki a Santa Gran Kownukondre fu Rome di de fu a Doisri pipel. Ibri pisi kontren ben abi wan tiriman di ben kisi primisi fu tiri a kontren dati leki fa a wani. A kèiser srefi ben de wan Lomsu man fu a Habsburg famiri na ini Oostenrijk. Sobun, fu di Europa ben de na ini a makti fu den pawsu nanga a gran kownukondre [ben e tiri Europa], meki Lomsu Kerki ben abi furu makti drape.

Ma na ini a di fu 16 nanga a di fu 17 yarihondro a fasi fa sani ben seti fositen ben kon kenki. Na ini heri Europa, sma ben atibron fu di den ben feni taki den sma fu Lomsu Kerki ben e libi bigi. Man soleki Martin Luther nanga Johannes Calvijn di ben opo densrefi teige kerki, ben wani taki sma hori densrefi baka na san Bijbel e taki. Na ala sei sma ben e horibaka gi Luther nanga Calvijn, èn na so den bribi ben kon di sma e kari a Reformatie bribi nanga na Anitri bribi. A Reformatie bribi ben meki taki a gran kownukondre kon abi dri sortu bribi, namku a Lomsu bribi, a Luther bribi, nanga a Calvijn bribi.

Den Lomsu no ben e frutrow den Anitri, èn den Anitri ben e wisiwasi den Lomsu. Na a bigin fu a di fu 17 yarihondro, a sani disi ben meki taki den Anitri kerki bondru kon na wan èn den Lomsu du a srefi sani. Son tiriman fu a gran kownukondre teki a sei fu den Anitri èn trawan teki a sei fu den Lomsu. Na ini Europa, èn spesrutu na ini a gran kownukondre, sma no ben e frutrow makandra moro, kwetikweti. Wan pikin sani nomo ben o de fanowdu fu tyari wan bigi feti kon. Di a pikin sani dati pasa tu, dan wan feti broko di go doro sowan 30 yari langa.

Wan pikin sani meki taki wan bigi feti broko na ini Europa

Den tiriman fu den Anitri pruberi fu abi krakti tapu a Habsburg famiri di ben de Lomsu, so taki  sma ben kan anbegi Gado fa den wani. Ma sma no ben de so esi fu agri nanga a tori dati, èn na ini a pisi ten fu 1617 te go miti 1618, den ben tapu tu fu den Luther kerki na ini Bohemia (a Tyekia Republiek) nanga tranga. A sani disi ben meki den heihei Anitrisma atibron so kefalek taki den hari go na ini wan palèisi na ini a foto Praag, pe den grabu dri Lomsu fesiman, di den trowe komoto fu wan fensre na wan tapu sodro. A sani disi ben meki taki wan bigi feti broko na ini Europa.

Aladi den memre fu den tu kerki disi ben e taki dati den ben de bakaman fu Yesus Krestes, a Granman fu Vrede, toku den ben e suku fu feti nanga makandra (Yesaya 9:6). Na ini wan prenspari feti di den e kari a Feti na a Weti Bergi, den Lomsu wini den Anitri, so taki a heri grupu disi panya. Den Lomsu kiri wan tu heihei Anitri na a wowoyo fu a foto Praag. Na ini heri Bohemia, den ben e teki den gudu fu den Anitrisma te den disi no ben wani gowe libi a bribi fu den, èn den ben e prati den gudu dati gi den Lomsusma. A buku 1648—Krieg und Frieden in Europa (1648—Orloku nanga vrede na ini Europa) e taki dati di den teki den gudu fu den Anitrisma, dan dati ben de „wan fu den moro bigi kenki na ini a mindrisei pisi fu Europa fu di furu gudu fu sma, fadon na ini anu fu trawan”.

San ben bigin na ini Bohemia leki wan trobi na mindri kerki, ben gro kon tron wan feti pe difrenti kondre ben e suku fu kisi makti. Na ini den 30 yari baka dati, Deinsikondre, Fransikondre, Bakrakondre, Spanyorokondre, nanga Sweden kon na ini a feti tu. Furu tron, a gridifasi nanga na angri di den ben abi fu kisi moro makti ben e meki taki den Lomsu tiriman nanga den Anitri tiriman ben e du ala sortu kruka sani soso fu kan abi moro makti leki trawan èn fu kisi wini na ini bisnis afersi. Na Orloku di feti Dritenti Yari langa, ben prati na difrenti pisi. Ibriwan fu den pisi disi kisi a nen fu den moro bigi feanti fu a kèiser di ben e tiri na a momenti dati. Difrenti buku e kari den fo pisi disi: a Bohemia nanga Palatijn Orloku, a Deinsi-Nedersaksen Orloku, a Sweden Orloku, nanga a Fransi-Sweden Orloku. Furu fu den feti dati feti na ini kontren fu a Santa Gran Kownukondre Rome.

Na ini a ten dati, sma ben e feti nanga sani soleki syatu-mofo gon, onti gon, pikin kanu fu sutu bom, èn moro bigi kanu sosrefi. Furu fu den fetisani disi ben e komoto fu Sweden. Lomsu nanga Anitri ben abi bigi trobi. Te srudati ben e go na ini a feti, dan den ben e bari „Santa Maria” noso „Gado de nanga wi”. Te den srudati ben e hari pasa na ini a kontren fu den Doisri, dan den ben fufuru ala den gudu di den ben feni. Den ben handri den feanti fu den leki dagu, èn na so den ben e du tu nanga den sma di ben libi drape. Na orloku ben kon so ogri taki a ben gersi leki na meti e feti nanga makandra. We, disi e difrenti krinkrin fu a Bijbel profeititori di e taki: „Den no sa opo feti-owru moro, èn den no sa leri feti moro!”—Mika 4:3.

Furu Doisri pikin di gebore na a pisi ten dati, ben gro kon bigi nanga soso feti. Sobun, a pipel ben kon weri fu a feti, dati meki den ben e angri fu vrede. Efu a no ben de so taki den tiriman ben e prakseri soso den sani di den ben o lasi na politiek sei, dan vrede ben o man kon. Moro nanga moro a feti ben e kenki fu wan feti na mindri kerki, kon tron wan politiek feti. Ma a moro moi fu a tori, na taki a man di meki taki a kenki disi feni presi ben de wan heiheiman fu Lomsu Kerki.

 Kardinaal Richelieu e gebroiki a makti fu en

Sma ben e kari Armand-Jean du Plessis, Kardinaal de Richelieu. Fu 1624 te go miti 1642 a ben de a fosi minister sosrefi fu Fransikondre. Richelieu ben wani meki Fransikondre tron a moro bigi tirimakti fu Europa. Fu du dati, a suku fu broko a makti fu den Lomsusma di ben de lontu en, namku den sma fu na Habsburg famiri. Fa a ben du dati? A ben e horibaka gi den legre fu den Anitrisma di ben e libi na den Doisri kontren, Deinsikondre, Bakrakondre, nanga Sweden, bika ala den grupu disi ben e feti nanga a Habsburg famiri.

Na ini 1635, Richelieu seni Fransi srudati go na ini a feti fu a fosi tron. A buku vivat pax—Es lebe der Friede! (Meki vrede tan fu ala ten!) e fruklari taki na a kabapisi fu „na Orloku di feti Dritenti Yari, dan a no ben de wan feti moro na mindri kerki. . . . Ma a ben kon tron wan feti pe kondre ben e suku fu tron a moro bigi politiek makti na ini Europa”. San ben bigin leki wan pikin trobi na mindri Lomsu nanga Anitri, ben tron wan feti pe Lomsu nanga Anitri ben e yepi makandra fu feti nanga tra Lomsu. A Lomsu Grupu, di ben kon swaki kaba na ini 1630, ben kon na wan kaba na ini 1635.

A konmakandra fu vrede di hori na Westfalen

Na ini heri Europa, sma ben e fufuru ala san den kan feni, sma ben e kiri makandra, sma ben e go didon na uma nanga tranga, èn siki ben lai. Ma baka di a ben kon de krin taki nowan sma ben kan wini a feti disi, dan safrisafri moro nanga moro sma ben wani vrede. A buku vivat pax—Es lebe der Friede! e taki dati „krosibei fu 1640 den tiriman di ben e tiri na a momenti dati ben agri te fu kaba taki den legre no ben man yepi den moro fu doro a marki fu den”. Ma efu a de so, taki ala sma ben wani vrede, dan fa den ben kan doro dati?

Kèiser Ferdinand III fu a Santa Gran Kownukondre fu Rome, Kownu Lodewijk XIII fu Fransikondre, nanga na Umakownu Christina fu Sweden ben agri fu hori wan konmakandra pe ala grupu di ben de na ini na orloku, ben o kon makandra fu taki fa den ben kan meki vrede. Tu presi ben de pe den ben kan hori a konmakandra, namku na ini den foto Osnabrück nanga Münster na ini a Doisri distrikt Westfalen. Den ben teki den foto disi fu di den ben de leti na mindri den mamafoto fu Sweden nanga Fransikondre. Fu bigin nanga 1643, dan sowan 150 grupu fu sma ben kon na den tu foto dati. Sonwan fu den ben kon nanga wan heri ipi raiman. Den Lomsusma kon makandra na ini Münster, èn den Anitrisma kon makandra na ini Osnabrück.

Na a fosi presi, den taki fa den ben o du sani na a konmakandra fu kon si sortu posisi den sma fu den difrenti grupu ben abi, pe den ben o sidon, èn fa sani ben musu waka. Baka dati den tu grupu bigin taki fu a vrede. Den gebroiki mindriman fu fruteri makandra fa den ben prakseri fu tyari vrede kon. Baka sowan feifi yari, den meki wan kruderi fu libi na ini vrede baka. Na a ten dati a feti ben e go nanga langa. A Kruderi fu Westfalen no ben skrifi na ini wán dokumenti nomo. Na ini Osnabrück, Kèiser Ferdinand III ben meki wan kruderi nanga Sweden, wan tra kruderi ben meki na ini Münster, na mindri a kèiser nanga Fransikondre.

Furu sma bigin meki prisiri di a nyunsu ben panya taki a kruderi ben meki. Na ini difrenti foto a loktu ben moi nanga ala den finpeiri di sma ben e sutu. Den gengen fu den kerki ben e loi, sma ben e sutu kanu fu sori taki den ben e agri nanga a kruderi, èn den ben e singi na den strati. Ma den sma fu Europa ben kan fruwakti now taki den ben o abi vrede fu ala ten?

Libisma man tyari vrede di e tan fu ala ten?

A Kruderi fu Westfalen ben sori taki ala kondre ben abi a reti fu poti den eigi tirimakti. Dati wani taki dati ibriwan grupu na ini a kruderi ben e agri taki den ben o lespeki a reti di den tra grupu abi tapu a kondre fu den, èn taki den no ben o moksi densrefi na ini den inibere tori fu a kondre dati. Na a fasi dati a disiten Europa kon de soleki fa a de nownow, nanga difrenti kondre di abi den eigi tirimakti. Sonwan fu den kondre dati ben kisi moro wini fu a kruderi leki trawan.

Fransikondre ben kon tron wan fu den moro bigi tirimakti, èn Bakrakondre nanga Switserland ben kisi srefidensi. Ma gi den Doisri kontren a kruderi  disi ben e tyari wan tu lasi kon, fu di furu gudu na ini a kondre ben pori leki bakapisi fu na orloku. Te yu luku en bun, dan tra kondre ben o taki now san ben musu pasa nanga Doisrikondre. Wan buku The New Encyclopædia Britannica e taki: „A ben de den prenspari tirimakti soleki Fransikondre, Sweden, nanga Oostenrijk, di ben e taki san den Doisri granman ben o kisi, noso san den no ben o kisi.” Na presi fu tyari ala den difrenti kontren fu Doisrikondre kon na wán fu den tron wán pipel, dan den prati den kontren neleki fa den ben prati na fesi kaba. Boiti dati, dan sma ben gi son kontren fu Doisrikondre na tiriman fu tra kondre. Na so den ben prati difrenti pisi fu den bigi liba fu Doisrikondre, namku a Rijnliba, Elbeliba, nanga na Oderliba.

Den Lomsu, den sma fu a Luther bribi, nanga den di fu a Calvijn bribi ben kisi den srefi reti. A no ala sma ben prisiri nanga dati. Pawsu Innocentius X no ben agri kwetikweti nanga a kruderi, èn a ben feni taki a kruderi no ben warti notinoti. Toku a pratifasi di ben de na mindri den kerki, no ben kenki furu na ini den dri hondro yari baka dati. Aladi a no ben de so ete taki ala sma ben de fri fu teki awinsi sortu bribi den ben wani, toku a no ben o teki tumusi langa moro bifo dati ben o pasa.

A kruderi ben meki taki wan kaba kon na a Orloku di feti Dritenti Yari, èn na a fasi dati furu fu den ogri di sma ben e du kon na wan kaba tu. Disi ben de a lasti bigi feti di kerki feti na ini Europa. A no de so taki orloku no ben de moro, ma now sma no ben e feti moro fu kerki ede, ma fu politiek noso bisnistori ede. Ma dati no wani taki dati kerki no ben abi noti fu du moro nanga den ogri di ben e pasa na ini Europa. Na ini a Fosi Grontapufeti nanga a Di fu Tu Grontapufeti, Doisri srudati ben e weri wan leribuba na den bere. Tapu na isri pisi fu a leribuba den ben skrifi wortu di sma ben gebroiki kaba: „Gado de nanga wi.” Na a ten fu den ogri-ati feti dati, Lomsu nanga Anitri bondru densrefi baka fu go feti nanga den Lomsu èn Anitri di ben de na a tra sei.

A de krin taki a Kruderi fu Westfalen no tyari vrede kon di e tan fu ala ten. Toku den libisma di e gi yesi na Gado, sa ondrofeni heri esi san na a vrede dati. Yehovah Gado o gebroiki a Mesias Kownukondre fu en Manpikin, Yesus Krestes, fu tyari vrede kon di e tan. Te a Kownukondre dati o tiri, dan a wan-enkri tru anbegi di o de ete, o meki taki ala sma libi na ini wánfasi, èn taki pratifasi no sa de moro. Nowan sma o go feti, awinsi na fu kerkitori, noso fu tra sani ede. Libisma sa firi frulekti trutru te a Kownukondre o tiri heri grontapu èn te ’vrede o de di no sa kaba noiti’!—Yesaya 9:6, 7.

[Prenspari pisi na tapu bladzijde 21]

San bigin leki wan pikin trobi na mindri Lomsu nanga Anitri ben tron wan feti pe Lomsu nanga Anitri ben e yepi makandra fu feti nanga tra Lomsu

[Prenspari pisi na tapu bladzijde 22]

Te srudati ben e go na ini a feti, dan den ben e bari „Santa Maria”, noso „Gado de nanga wi”

[Prenki na tapu bladzijde 21]

Kardinaal Richelieu

[Prenki na tapu bladzijde 23]

Wan skedrei fu a di fu 16 yarihondro di e sori a feti na mindri Luther, Calvijn, nanga a pawsu

[Sma di abi a reti fu a prenki na tapu bladzijde 20]

From the book Spamers Illustrierte Weltgeschichte VI

[Sma di abi a reti fu a prenki na tapu bladzijde 23]

Religious leaders struggling: From the book Wider die Pfaffenherrschaft; map: The Complete Encyclopedia of Illustration/J. G. Heck