Den sani di Yehovah meki moi srefisrefi

’A glori fu yu bigi moro di fu den bergi’

TE YU e si fa a son e opo baka a Fujibergi, dan dati na wan sani di yu no man frigiti noiti moro. Wan moi geri son e panya a leti fu en na hemel, èn a e skèin a faya fu en tapu a weti snew nanga den greisi pisi fu a bergi. Te a son e opo na a bigin fu wan nyun dei, dan esi-esi a krin skaduw fu a bergi e panya kilometer moro fara abra den pikin bergi nanga den lagipresi.

Neleki a Fujibergi, san wani taki „bergi sondro speri”, dan ala ten bigi bergi e meki wi fruwondru. Fu taki en leti, fu di den bergi bigi so, meki wi kan firi leki wi na noti! Fu di furu sma ben e fruwondru fu den bigi bergi disi, meki den ben e bribi taki den gado ben e tan na tapu den moro hei bergi-ede di tapu nanga wolku, èn nanga dow.

A wán-enkri Gado di den hei bergi e gi glori na a koni Mekiman fu den, Yehovah. En wawan na „a Mekiman fu den bergi” (Amos 4:13). Pikinmoro wán di fu fo pisi fu grontapu abi bergi, èn di Gado meki grontapu, dan a poti spesrutu krakti na ini, di sorgu taki te fu kaba tumusi moi bergi-ede nanga difrenti bergi kontren kon de (Psalm 95:4). Fu eksempre, sma e bribi taki den Himalayabergi nanga den Andesbergi kon de fu di spesrutu krakti dipi na ini a gron ben meki taki a doti pusu kon na loktu.

Libisma no man frustan krinkrin fa èn fu san ede bergi kon de. Fu tru, wi no man gi piki na den aksi disi di Gado ben poti gi a regtfardiki man Yob: „Pe yu ben de di mi [Yehovah] ben seti a fondamenti fu grontapu? . . . Na tapu san den fondamenti fu en seti?”—Yob 38:4-6.

Ma wi sabi taki wi no man libi sondro den bergi. Sma e taki dati den na den watra fonten fu a naturu, fu di ala den bigi liba e kisi den watra fu bergi, èn fu di afu fu den sma na grontapu e gebroiki watra di komoto fu den bergi (Psalm 104:13). Soleki fa a tijdschrift New Scientist e taki, dan „siksi fu den tutenti moro prenspari sani di sma e nyan, e gro tapu bergi”. Na ini a nyun grontapu di Gado pramisi wi èn pe sani na ini a naturu sa kon bun baka, dan „siri-nyanyan sa de bogobogo na grontapu; na tapu na ede fu den bergi sani sa de pasa marki”.—Psalm 72:16; 2 Petrus 3:13.

Te yu e taki fu bergi, dan furu sma e prakseri a hei bergi kontren fu Europa di den e kari, den Alpen. Den hei bergi-ede disi, nanga a Civettabergi di de fu si dyaso, na kefalek moi buweisi taki wan Mekiman de (Psalm 98:8). Den e gi Yehovah glori, a sma di „e seti den bergi steifi nanga en makti”.—Psalm 65:6. *

Wi e fruwondru trutru te wi e si o moi den Alpen de, te wi e si na ijs tapu den bergi-ede èn tapu den pikinpikin bergi di de sei nanga sei, te wi e si fa den skin fu den bergi tapu nanga snew, te wi e si den lagipresi nanga den kriki na ini a kontren fu den bergi, èn te wi e si den moi weigron fu den. Kownu David ben taki dati Yehovah na „a Sma di e meki grun grasi sproiti na tapu den bergi”.—Psalm 147:8.

Kande son grupu fu lagi bergi, soleki den wan disi na ini Gui-lin, China, no moi so kefalek leki den Alpen, ma toku den  moi na den eigi fasi. Na a syoro fu a Li-liba, yu abi langa weti ston di tanapu sei nanga sei èn di e meki sma di e go drape fruwondru srefisrefi fu a moifasi fu den. Te yu ben o luku fa a krin watra e lon na mindri den lagibergi di tapu nanga dow, dan dati e meki yu memre den wortu fu a psalm skrifiman, di taki: „En [Yehovah] e seni den liba go na ini den lagipresi; na mindri den bergi den e lon pasa.”—Psalm 104:10.

Wi abi leti fu fruwondru fu den bergi, fu di wi e si den leki wan pisi fu den tumusi moi sani di wi lobi Mekiman seti gi a tanbun nanga a prisiri fu libisma. Ma awinsi o moi den bergi de, toku a glori fu den no bigi leki a glori fu Yehovah. Fu tru, ’a glori fu en bigi moro a di fu den bergi’.—Psalm 76:4.

[Futuwortu]

[Faki/​Prenki na tapu bladzijde 9]

Tin procent fu den sma na grontapu e libi na bergi kontren. Ma dati a no wan problema srefisrefi gi den wan di e meki a bun nyunsu fu Gado Kownukondre bekènti. Den Kresten dinari disi e wroko tranga na furu bergi kontren. Iya, „o switi na tapu den bergi den futu fu a sma de di e tyari bun nyunsu kon, a sma di e meki vrede bekènti, a sma di e tyari bun nyunsu kon fu wan moro bun sani, a sma di e meki frulusu bekènti!”—Yesaya 52:7.

„Den hei bergi de gi den stonbokoboko”, a psalm skrifiman ben singi (Psalm 104:18). Stonbokoboko, soleki a stonbokoboko di den e kari na ibex fu Nubia di abi moi langa tutu, na wan fu den meti di kan waka sondro muiti na tapu bergi. Den e waka tapu lanki di smara so te, taki a gersi leki a no man pasa drape. Na ibex abi den yoisti sani di e yepi en fu libi na presi di muilek fu doro. Wan fu den sani dati, na a fasi fa den futu fu en meki. Te na ibex e tanapu, dan den futu fu en e bradi opo, so taki a kan hori steifi te a e tanapu, noso te a e waka na tapu den lanki fu den bergi. Trutru, na ibex meki na wan tumusi fruwondru fasi!

[Prenki na tapu bladzijde 9]

Fujibergi na Honshu, Yapan