Aksi fu leisiman

Te wi e leisi san skrifi na ini Exodus 4:24-26, dan san ben pasa èn suma ben kan lasi en libi?

Moses ben de na pasi fu go na Egepte, makandra nanga en wefi Sipora, èn den manpikin fu en, Gersom nanga Eliyeser, di a sani di e kon now feni presi: „A ben kon pasa taki di den ben de na pasi, na a presi pe den ben e sribi, dan Yehovah kon miti en èn a ben tan suku wan fasi fu kiri en. Te fu kaba Sipora teki wan fayaston, a besnèi en manpikin, èn nanga a fesisei-buba a fasi a futu fu en èn a taki: ’Dati na fu di yu na wan trowmasra gi mi fu brudu ede.’ Fu dati ede, a no du en noti. Na a ten dati na uma taki: ’Wan trowmasra nanga yepi fu brudu’, fu a besnijdenis ede” (Exodus 4:20, 24-26). Aladi a no de krin san e pasa ini a tekst disi èn wi no kan sabi san a wani taki trutru, toku den Buku fu Bijbel kan meki wi frustan pikinso san skrifi ini den tekst disi.

Den vers no e taki krin suma ben kan lasi en libi. Ma wi kan taki nanga leti dati a no Moses ben o lasi en libi, bika a ben kisi wan komando fu Gado fu tyari den Israelsma komoto fu Egepte (Exodus 3:10). Efu Moses ben de na pasi fu go du a wroko di Gado ben gi en, dan wi no kan fruwakti taki wan engel fu Gado ben o suku fu kiri en. Fu dati ede, a ben musu fu de wan fu den manpikin fu en di ben kan lasi en libi. A wet di Abraham ben kisi na fesi, di e taki fu a besnijdenis, ben sori: „Wan man di no besnèi èn di no wani besnèi a fesisei-bubu fu en, srefi a sili dati yu musu koti puru fu en pipel. A broko a frubontu fu mi” (Genesis 17:14). Soleki fa a sori, dan Moses no ben prakseri fu besnèi a manpikin fu en, èn fu dati ede na engel fu Yehovah ben suku wan fasi fu kiri a boi.

A futu fu suma Sipora ben fasi di a ben koti a fesisei-buba fu en manpikin fu di a ben pruberi fu meki a tori kon bun baka? A ben de na engel fu Yehovah di ben abi a makti fu kiri a manpikin di no besnèi. Fu dati ede wi kan taki, dati Sipora ben meki a fesisei-buba tuka nanga a futu fu na engel èn na so wan fasi a ben sori en taki a hori ensrefi na a frubontu.

Den wortu fu Sipora „yu na wan trowmasra gi mi fu brudu ede” no de fu leisi na nowan tra presi. San den wortu disi e sori fu en? Fu di a ben hori ensrefi na den markitiki fu a frubontu di e taki dati wan man musu besnèi, dan a ben sabi taki a ben sroto wan frubontu nanga Yehovah. A Wetfrubontu di ben sroto bakaten nanga den Israelsma ben sori taki te Yehovah e sroto wan frubontu nanga sma, dan na agersi fasi en na a masra èn a tra sma noso a tra grupu ini a frubontu na a wefi (Yeremia 31:32). Sobun, fu di Sipora ben taki dati Yehovah (di ben gebroiki wan engel) na ’wan trowmasra fu brudu ede’, dan a ben sori taki a e hori ensrefi na den sani fu a frubontu. Sipora ben de leki a wefi ini a frubontu èn Yehovah Gado ben de leki a masra. Awansi fa a no fa, fu di a ben handri sondro draidrai fu gi yesi na den markitiki fu Gado, meki taki a manpikin fu en no ben o lasi en libi moro.