Na Avondmaal fu Masra—Fa a musu hori?

FU TYARI kon na krin fa na Avondmaal fu Masra musu hori, a Kresten apostel Paulus e skrifi: „San mi ben kisi fu Masra, na dati mi gi unu sosrefi, taki a neti di den ben o tori Masra Yesus, a teki wan brede, èn baka di a ben taki tangi, a broko en, dan a taki: ’Disi wani taki mi skin di de fu a bun fu unu. Tan du disi fu memre mi.’ Di den kaba nyan, a teki a kan tu èn a taki: ’A kan disi wani taki a nyun frubontu di seti nanga yepi fu mi brudu. Ibri leisi te unu e dringi fu en, unu musu tan du dati fu memre mi.’ Bika ibri leisi te unu e nyan a brede disi èn e dringi fu a kan disi, unu e tan meki a dede fu Masra bekènti, teleki a doro.”—1 Korentesma 11:23-26.

Soleki fa Paulus e taki, dan Yesus ben seti na Avondmaal fu Masra ’na a neti di Yudas Iskariot ben o gi en abra’ na den Dyu kerki fesiman di ben dwengi den Romesma fu spikri Krestes na wan postu. Na Avondmaal fu Masra ben hori lati na neti tapu fodewroko 31 maart 33 G.T. Yesus dede na a pina-udu na mofoneti fu freida 1 april. Tapu a Dyu kalender, wan dei ben e bigin mofoneti èn a ben e kaba a mofoneti baka dati. Sobun, na Avondmaal fu Masra nanga a dede fu Yesus ben pasa na a srefi dei, 14 Nisan 33 G.T.

Den sma di ben e nyan fu a brede èn ben e dringi fu a win ben musu „tan du disi” fu memre Yesus. Soleki fa skrifi na ini wan tra Bijbel, dan Yesus taki: „Du disi fu memre mi” (1 Korentesma 11:24, The Jerusalem Bible). Sma e kari na Avondmaal fu Masra sosrefi a Memrefesa fu a dede fu Krestes.

Fu san ede wi musu memre a dede fu Yesus?

Wi e kisi piki tapu na aksi disi te wi e frustan san a dede fu Yesus wani taki. A ben dede leki a moro prenspari sma di ben sori taki Yehovah abi a reti fu tiri hemel nanga grontapu. Na so wan fasi Yesus sori taki Satan na wan leiman fu di Satan ben taki dati libisma e dini Gado soso fu man kisi wini fu dati (Yob 2:1-5; Odo 27:11). Fu di Yesus dede leki wan volmaakti libisma, meki a ’gi en libi sosrefi leki wan lusu-paiman gi furu sma’ (Mateyus 20:28). Di Adam sondu teige Gado, dan a meki taki libisma no ben man libi wan volmaakti libi moro, èn den lasi na okasi fu man libi fu têgo efu den ben e gi yesi na Gado. Ma „Gado ben lobi grontapu [noso libisma] so te, taki a gi en wan-enkri gebore Manpikin, so taki ibriwan sma di e sori  bribi na ini en, no ben sa kisi pori, ma ben sa abi têgo libi (Yohanes 3:16). Iya, ’a bakapisi fu sondu na dede, ma a presenti di Gado e gi, na têgo libi nanga yepi fu Krestes Yesus, wi Masra”.—Romesma 6:23.

Sobun, a dede fu Yesus abi fu du nanga den tu moro prenspari fasi fa oiti lobi ben sori gi libisma. Dati na a bigi lobi di Yehovah sori gi wi fu di a gi en Manpikin, èn a lobi di Yesus sori gi wi fu di a ben de klariklari fu gi en libisma libi fu a bun fu wi. A Memrefesa fu a dede fu Yesus e sori o bigi a lobi de di Yehovah nanga Yesus abi gi wi. Fu di wi na den sma di e kisi a lobi disi, meki wi musu sori taki wi de nanga tangi, a no so? Wan fasi fa wi kan sori dati, na te wi de na a Memrefesa.

San a brede nanga a win wani taki

Di Yesus ben e seti a Memrefesa, dan a gebroiki wan brede nanga wan kan redi win fu agersi wan sani. Yesus teki a brede, èn „baka di a ben taki tangi, a broko en, dan a taki: ’[A brede] disi wani taki mi skin di de fu a bun fu unu’” (1 Korentesma 11:24). Den ben musu broko a brede fu prati en èn fu nyan en, fu di a brede disi ben drei neleki buskutu èn a ben meki fu blon nanga watra sondro srudeki. Na ini Bijbel, srudeki e agersi sondu (Mateyus 16:11, 12; 1 Korentesma 5:6, 7). Yesus no ben abi sondu. Fu dati ede, a volmaakti libisma skin fu en ben de wan srakti-ofrandi di ben fiti fu frulusu libisma (1 Yohanes 2:1, 2). Iya, a fiti srefisrefi taki Krestes gebroiki wan brede sondro srudeki fu agersi en volmaakti libisma skin!

Yesus begi tu gi a kan soifri redi win, èn baka dati a taki: „A kan disi wani taki a nyun frubontu di seti nanga yepi fu mi brudu” (1 Korentesma 11:25). A redi win na ini a kan, e agersi Yesus brudu. A brudu fu den mankaw nanga den bokoboko di sma ben e tyari leki ofrandi ben meki taki a Wetfrubontu di Gado ben seti nanga a nâsi Israel na ini 1513 b.G.T., ben kon abi krakti. Na a srefi fasi, a brudu fu Yesus ben meki taki a nyun frubontu kon abi krakti.

Suma musu gebroiki a brede nanga a win?

Efu wi wani sabi suma abi reti fu gebroiki a brede nanga a win, dan wi musu frustan fosi san na a nyun frubontu èn suma de na ini a frubontu dati. Bijbel e taki: „’Luku! Dei e kon’, na so den wortu fu Yehovah de, ’èn fu tru mi sa sroto nanga na oso fu Israel èn nanga na oso fu Yuda wan nyun frubontu . . . Mi wani poti mi wet na den inisei, èn na ini den ati mi sa skrifi den. Èn mi wani tron a Gado fu den èn den sa tron mi pipel. . . . Mi sa gi den pardon fu den sondu, èn mi no sa memre den sondu fu den moro.’”—Yeremia 31:31-34.

A nyun frubontu e gi libisma okasi fu abi wan spesrutu banti nanga Yehovah Gado. Nanga yepi fu a frubontu disi, wan spesrutu grupu fu sma e tron en pipel èn a e tron a Gado fu den. A wet fu Yehovah skrifi na ini den, noso na ini den ati, èn srefi sma di no besnèi leki Dyu kan kon na ini a nyun frubontu nanga Gado (Romesma 2:29). A Bijbel skrifiman Lukas e taki dati Gado o ’poti prakseri na den nâsi fu puru na den mindri, wan pipel di sa tyari en nen’ (Tori fu den Apostel 15:14). Soleki fa 1 Petrus 2:10 e taki, dan den ’no ben de wan pipel fosi, ma now den de a pipel fu Gado’. Den Buku fu Bijbel e kari den ’na Israel fu Gado’, dati wani taki Israel na yeye fasi (Galasiasma 6:16; 2 Korentesma 1:21). Sobun, a nyun frubontu, na wan frubontu di Yehovah Gado meki nanga Israel na yeye fasi.

Na a lasti neti di Yesus ben de nanga en disipel, dan ensrefi meki wan tra frubontu nanga  den tu. „Nanga unu mi e meki wan frubontu”, na so a taigi den, „neleki fa mi Tata meki wan frubontu nanga mi gi wan kownukondre” (Lukas 22:29). Disi na a Kownukondre frubontu. A nomru fu sondu libisma di de na ini a Kownukondre frubontu, na 144.000. Baka te den opo baka go na hemel, dan den sa tiri nanga Krestes leki kownu nanga priester (Openbaring 5:9, 10; 14:1-4). Sobun, den wan di de na ini a nyun frubontu nanga Yehovah Gado, de tu na ini a Kownukondre frubontu nanga Yesus Krestes. Na den sma dati wawan abi a reti fu gebroiki a brede nanga a win na a Memrefesa.

Fa den wan di abi a reti fu nyan fu a brede èn fu dringi fu a win na a Memrefesa, sabi taki den abi wan spesrutu banti nanga Gado èn taki den o tiri makandra nanga Krestes? Paulus e taki: „A [santa] yeye srefi e buweisi makandra nanga wi yeye [a fasi fa wi e denki] taki wi na pikin fu Gado. Fu dati ede, efu wi na pikin, dan wi o kisi a gudu tu, iya, wi o kisi wan gudu fu Gado, ma wi o kisi en makandra nanga Krestes, ma soso te wi e nyan pina neleki en, so taki wi kan kisi glori tu makandra nanga en.”—Romesma 8:16, 17.

Nanga yepi fu en santa yeye, noso wroko krakti, Gado e salfu den kompe tiriman fu Krestes. Disi e gi den a dyaranti taki den o tiri na ini a Kownukondre. Leki bakapisi fu dati den salfu Kresten abi a howpu fu go na hemel. Den e firi taki ala san Bijbel e taki fu a libi na ini hemel, abi fu du nanga den. Boiti dati, den no abi muiti fu lasi ala sani di abi fu du nanga grontapu, sosrefi a libi fu den na grontapu nanga ala den mati nanga famiri fu den. Aladi den Kresten di salfu nanga santa yeye e frustan taki a libi na ini Paradijs grontapu o switi srefisrefi, toku den no abi a howpu fu libi drape (Lukas 23:43). A no wan falsi kerkileri, ma na a yeye fu Gado e meki taki den abi wan howpu di no e kenki, namku a howpu fu go na hemel. Èn fu dati ede den e gebroiki a brede nanga a win na a Memrefesa.

Kon meki wi taki dati wan sma no sabi seiker efu a de na ini a nyun frubontu nanga a Kownukondre frubontu. Fa a de te a no e firi tu taki Gado yeye e sori en taki a de wan kompe tiriman fu Krestes? Efu disi de so, dan a no musu nyan fu a brede èn dringi fu a win. Iya, Gado no ben o feni en bun kwetikweti efu wan sma ben o du fu espresi neleki a kisi a kari fu de wan kownu nanga wan priester na hemel, aladi dati no de so.—Romesma 9:16; Openbaring 22:5.

Omeni leisi wi musu hori en?

Wi musu hori a Memrefesa fu a dede fu Yesus ibri wiki noso ibri dei srefi? We, Krestes ben seti a Memrefesa èn aladi a no ben du nowan ogri, toku den kiri en na a dei fu a Paskafesa. Den Israelsma ben e hori a Paskafesa wán leisi wan yari, tapu 14 Nisan, èn nanga dati den ben memre a dei di den ben kon fri fu katibo na ini Egepte (Exodus 12:6, 14; Lefitikus 23:5). Sobun, a Memrefesa fu a dede fu „Krestes, a pikin skapu fu wi Paska” musu hori wán leisi wan yari nomo; a no musu hori ibri wiki, noso ibri dei (1 Korentesma 5:7). Te Kresten e hori a Memrefesa, dan den musu du dati soleki fa Yesus ben seti en.

Ma san Paulus ben wani taki nanga den wortu disi: „Ibri tron te unu e nyan a brede disi èn e dringi fu a kan disi, unu e tan meki a dede fu Masra bekènti, teleki a doro”? (1 Korentesma 11:26) Na ini a tekst disi Paulus gebroiki wan wortu di wani taki „ibri leisi te” noso „te”. Sobun, a ben taki dati te den salfu Kresten ben e  nyan fu a brede èn ben e dringi fu a win, dan den ben e meki bekènti taki den e bribi na ini a frulusu ofrandi fu Yesus.

Salfu Kresten ben o hori a Memrefesa fu a dede fu Krestes „teleki a doro”. Den ben o tan hori a fesa disi teleki Yesus ben o kon fu teki den salfu bakaman fu en fu go na hemel. A ben o du disi na a ten fu en „denoya” te a ben o gi den salfuwan wan opobaka fu go libi leki wan yeye na hemel (1 Tesalonikasma 4:14-17). Disi e kruderi nanga san Krestes ben taigi den 11 apostel fu en: „Te mi gowe, èn mi sreka wan presi gi unu kaba, dan mi o kon baka èn mi o teki unu na mi oso, so taki unu kan de tu pe mi de.”—Yohanes 14:3.

San a wani taki gi yu?

A de so taki wi musu nyan fu a brede èn dringi fu a win efu wi wani kisi wini fu a srakti-ofrandi fu Yesus èn efu wi wani kisi têgo libi na grontapu? Nôno. Noti na ini Bijbel e sori taki sma di ben e frede Gado, soleki Noa, Abraham, Sara, Isak, Rebeka, Yosef, Moses nanga David, o nyan fu a brede èn dringi fu a win te den kisi wan opobaka. Ma toku, den sma disi èn sosrefi ala tra sma di wani kisi têgo libi na grontapu, sa abi fu sori bribi na ini Gado nanga Krestes, èn na ini a frulusu-ofrandi fu Yesus di Yehovah ben seti (Yohanes 3:36; 14:1). Efu yu wani kisi têgo libi, dan yu sosrefi abi fu sori a srefi sortu bribi dati tu. Te yu de na a alayari Memrefesa fu a dede fu Krestes, dan disi sa memre yu na a prenspari srakti-ofrandi fu Yesus, èn a sa meki yu kisi moro warderi gi dati.

Na apostel Yohanes ben sori o prenspari a srakti-ofrandi fu Yesus de, di a taki: „Mi e skrifi unu [kompe salfuwan] den sani disi, so taki unu no e du wan sondu. Ma toku, efu wan sma e du wan sondu, dan wi abi wan yepiman na a Tata, dati na Yesus Krestes, wan regtfardiki sma. En na wan ofrandi di e meki wi kon bun baka nanga Gado, ma a no e tapu den sondu fu wi wawan, ma sosrefi den sondu fu heri grontapu” (1 Yohanes 2:1, 2). Den salfuwan kan taki nanga leti dati a srakti-ofrandi fu Yesus fiti fu tapu den sondu fu den. Ma a srakti-ofrandi fu Yesus e tapu den sondu fu sma na heri grontapu sosrefi, so taki den sma di e gi yesi, kan kisi têgo libi!

Yu sa de na a Memrefesa tapu 4 april 2004, fu memre a dede fu Yesus? Yehovah Kotoigi sa hori a Memrefesa disi na den konmakandra presi fu den na heri grontapu. Te yu de na a fesa disi, dan yu sa kisi wini te yu e arki wan tumusi prenspari Bijbel lezing di sa hori na a neti dati. A lezing disi sa memre yu omeni sani Yehovah Gado nanga Yesus Krestes du gi wi. Yu sa kisi deki-ati sosrefi, te yu kon makandra nanga sma di abi bigi warderi gi Gado nanga Krestes, èn gi a frulusu-ofrandi fu Yesus. Kande na okasi disi sa meki yu du moro muiti fu de wan fu den sma di e kisi a no frudini bun-ati fu Gado, èn têgo libi te fu kaba. No meki noti no tapu yu fu go. Sorgu taki yu de na a prisiri Memrefesa di e gi wi hemel Tata, Yehovah Gado grani èn di e plisi en sosrefi.

[Prenki na tapu bladzijde 5]

A dede fu Yesus abi fu du nanga den tu moro prenspari fasi fa oiti lobi ben sori gi libisma

[Prenki na tapu bladzijde 6]

A brede sondro srudeki nanga a win na den yoisti sani fu agersi a volmaakti skin fu Yesus nanga a brudu fu en