666​—A no wan kibritori nomo

„Nowan sma no ben sa man bai, noso seri, boiti wan sma di abi a marki, a nen fu a werdri meti noso a nomru fu en nen. Disi na pe koni de fanowdu: Meki a sma di abi frustan, suku fu kon sabi a nomru fu a werdri meti, bika a de a nomru fu wan libisma; èn a nomru fu en na siksi hondro siksitenti na siksi.”—Openbaring 13:17, 18.

A NO furu tori na ini Bijbel e hari so furu prakseri èn e gi so furu broko-ede leki a profeititori fu a freimde marki, noso a nen fu „a werdri meti”, namku a nomru 666. Tapu telefisi nanga Internet, sosrefi na ini felem, buku nanga tijdschrift, sma e kon nanga ala sortu denki fu san a marki fu a meti wani taki.

Son sma e bribi taki 666 na a marki fu den feanti fu Krestes fu san Bijbel e taki. Trawan e taki dati a e sori go na wan trutru marki di den futuboi fu a meti musu kisi, wan marki leki wan tatoeage, noso wan sortu pikin-noti sani di den e poti na ini a skin fu den futuboi fu a meti so taki sma man si tapu computer suma na den. Yu abi trawan tu di e bribi taki 666 na a marki fu a tirimakti fu a Pawsu fu Lomsu kerki. Den teki den nomru di den sma fu Rome ben e gebroiki èn den poti den na ini a presi fu den letter fu a nen di wan sma e kisi te a e tron pawsu, namku Vicarius Filii Dei (A Wan di e teki presi gi a Manpikin fu Gado). Baka dati den kenki wan tu sani na den nomru, so taki te fu kaba den kon na a nomru 666. Son sma e taki tu dati a srefi nomru dati kan poti na ini a presi fu a nen fu Kèiser Diocletianus fu Rome na ini Latijntongo, nanga a nen Nero Caesar na ini Hebrewtongo. *

Sma e kon nanga ala sortu denki fu san a nomru disi wani taki èn den e si en soleki fa densrefi wani, ma Bijbel srefi e fruteri fu a marki fu a meti, soleki fa wi sa si na ini na artikel di e kon baka a disi. Wan sani di Bijbel e sori, na taki te Gado o tyari wan kaba kon na a disiten seti fu sani, dan a sa puru atibron tapu den sma di abi a marki fu a meti (Openbaring 14:9-11; 19:20). Fu dati ede, te wi e frustan san 666 wani taki, dan wi sa kon sabi taki a tori fu a nomru disi, wani taki moro leki fu lusu wan dangra problema nomo. Koloku taki Yehovah Gado na a moro moi eksempre fu wan sma di e sori lobi èn taki En na a Sma pe leti na yeye fasi de fu feni, bika a tyari a prenspari tori disi kon na krin gi den futuboi fu en.—2 Timoteyus 3:16; 1 Yohanes 1:5; 4:8.

[Futuwortu]