Aksi fu leisiman

Fu san ede 1 Korentesma 10:8 e taki dati 23.000 Israelsma lasi den libi tapu wán dei fu di den ben du hurudu, aladi Numeri 25:9 e taki fu 24.000 sma?

Wan tu sani de di e meki taki den tu vers disi e kari difrenti nomru fu sma di lasi den libi. A moro makriki reide na fu taki dati kande a trutru nomru fu sma di lasi den libi de na mindri 23.000 nanga 24.000 sma. Sobun fu meki a de wan moi nomru wi kan saka a nomru go na 23.000 sma, noso wi kan opo a nomru fu doro 24.000 sma.

Luku wan tra reide. Na apostel Paulus ben taki fu a tori fu den Israelsma na Sitim leki wan warskow gi den Kresten na ini na owruten foto Korente. A foto dati ben abi wan takru nen, fu di den sma di ben libi na ini, ben e libi na wan morsu fasi. Paulus ben skrifi: „No meki wi du hurudu tu, soleki fa sonwan fu den ben du hurudu, nanga a wan-enkri bakapisi taki den ben fadon, tutenti na dri dusun fu den tapu wán dei.” Paulus ben taki fu 23.000 sma di ben lasi den libi. Den sma disi ben de soso den sma di Yehovah ensrefi kiri fu di den ben du hurudu.—1 Korentesma 10:8.

Ma na ini Numeri kapitel 25, wi e leisi taki „Israel ben moksi ensrefi nanga a Bâal fu Peor, èn Yehovah en ati bigin bron nanga Israel”. Baka dati Yehovah ben komanderi Moses fu kiri „ala den edeman fu a pipel”. Moses fu en sei, gi den krutuman a komando fu du san Yehovah ben taki. Te fu kaba ’a strafu ben tapu’, di Pinehas handri gaw fu kiri na Israel man di ben tyari wan Midian uma kon na ini a kampu. A tori e kaba nanga a fruklari: „Den sma di lasi den libi fu a strafu ede ben de tutenti nanga fo dusun sma.”—Numeri 25:1-9.

„Den edeman fu a pipel” di den krutuman kiri èn sosrefi den sma di Yehovah srefi kiri, de na ini a nomru di kari na Numeri. Kande den krutuman kiri sowan dusun edeman, èn disi e meki taki wi kon na a nomru fu 24.000. Efu den edeman disi ben teki prati na den fesa, noso ben agri nanga sma di ben du den sani dati, dan den ben abi fowtu fu di ’den ben abi wan banti nanga a Bâal fu Peor’.

Fu a wortu „banti”, wan buku di e taki fu Bijbel e fruklari taki disi wani taki „fu tai yusrefi na wan sma”. Den Israelsma ben de sma di ben gi densrefi abra na Yehovah, ma di den ben „abi wan banti nanga a Bâal fu Peor”, dan den ben broko a banti di den ben abi nanga Gado. Sowan 700 yari baka dati, Yehovah ben taigi den Israelsma nanga yepi fu a profeiti Hosea: „Na densrefi ben go na Bâal fu Peor, èn den ben tan gi densrefi abra na a syen sani, èn den ben tron wan tegu sani neleki a sani di den ben lobi” (Hosea 9:10). Ala den sma di ben du disi ben frudini hebi strafu fu Gado. Fu dati ede, Moses ben memre den manpikin fu Israel: „Unu si nanga un eigi ai san Yehovah ben du ini a tori fu a Bâal fu Peor; ala mansma di ben waka baka a Bâal fu Peor, Yehovah un Gado pori den na un mindri.”—Deuteronomium 4:3.