Ondrofenitori

Den blesi di wi kisi bigi moro a muiti di wi du

SOLEKI FA GEORGE NANGA ANN ALJIAN FRUTERI

Noiti mi nanga mi wefi ben denki taki wan dei wi ben o meki a fowtu fu taki „moisimoisi” aladi wi ben wani taki „leriman”. Noiti wi ben prakseri taki te wi ben o pasa 60 yari, wi ben o broko wi ede fu leri freimde sortu letter fu man taki nanga sma fu a Fara Owstusei. Ma na disi mi nanga Ann du na ini den yari syatu bifo 1990. Meki wi fruteri yu fa a du kon taki a muiti di wi du na ini ala den yari ben meki taki wi kisi furu blesi.

MI GEBORE na ini wan famiri di de bakapikin fu Armeniasma èn mi ben de fu na Armenia Kerki. Ann ben de wan Lomsusma. Di wi trow na ini 1950, dan wi ala tu bosroiti fu lespeki makandra bribi. Mi ben abi 27 yari èn Ann ben abi 24 yari. Wi go tan na tapusei fu a wrokopresi fu mi pe sma ben e tyari den doti krosi kon fu krin. A wrokopresi fu mi ben de na ini a foto Jersey City, na ini a distrikt New Jersey, na Amerkankondre. Na a ten dati mi ben abi a bisnis disi sowan fo yari kaba.

Na ini 1955 wi bai wan moi oso nanga dri sribi kamra, na ini a foto Middletown, na New Jersey. Na oso disi ben de sowan 60 kilometer fara fu a wrokopresi fu mi, pe mi ben e wroko siksi dei na ini wan wiki. Ibri neti mi ben e kon lati na oso. A wan-enkri fasi fa mi ben e miti nanga Yehovah Kotoigi, na te den ben kon na a wrokopresi fu mi ten na ten èn ben e libi Bijbel publikâsi gi mi. Mi ben e leisi den publikâsi nanga ala mi prakseri. Aladi a bisnis fu mi ben teki pikinmoro ala mi ten nanga mi prakseri, toku mi ben kon kisi bigi lespeki gi Bijbel.

Syatu baka dati mi kon sabi taki a radio station fu a Waktitoren Genootschap, WBBR, ben e drai Bijbel lezing na a ten te mi ben e rei go èn ben e rei komoto fu mi wrokopresi. Mi ben e arki den lezing disi bun, èn fu di mi ben wani kon  sabi moro dei fu dei, meki mi aksi wan Kotoigi fu kon na mi. Na ini november 1957, George Blanton kon na mi oso èn a bigin studeri Bijbel nanga mi.

A famiri fu wi e kon de wán na ini a soifri anbegi

Fa Ann ben feni a sani disi? Meki ensrefi fruteri unu.

„Na a bigin mi ben e gens mi masra srefisrefi. Na a ten te George ben abi en bijbelstudie, dan mi ben e du sani fu espresi so taki a no ben man poti prakseri na a studie, èn fu dati ede a bosroiti fu go studeri na wan tra presi. A du disi aiti mun langa. Na a pisi ten dati, George bigin go na den konmakandra di ben e hori tapu sonde na ini a Kownukondre zaal. A sani dati ben sori mi taki a no ben e meki spotu nanga a bijbelstudie fu en, bika sonde ben de a wan-enkri dei di a no ben abi fu wroko. Ma toku a ben tan de wan bun masra nanga wan bun papa, moro bun leki fosi srefi, èn mi bigin kenki a fasi fa mi ben e tyari misrefi. Fu taki en leti, son leisi te mi ben e figi a tafra na ini a foroisi, dan te nowan sma ben e luku, mi ben e teki na Ontwaakt! di George ben e libi tapu a tafra ala ten, èn mi ben e leisi en. Tra leisi, George ben e leisi artikel na ini na Ontwaakt! gi mi, di no ben abi fu du spesrutu nanga kerkileri, ma di ala ten ben poti prakseri na a Mekiman.

Wan mofoneti di George ben gowe fu kisi bijbelstudie fu Brada Blanton, dan mi teki a publikâsi di George, a boi fu wi di ben abi tu yari, ben poti na tapu a tafra sei mi bedi. A tori na ini a publikâsi ben abi fu du nanga a howpu gi den dedewan. Aladi mi ben weri, toku mi bigin leisi en, fu di no so langa pasa mi granmama dede èn mi ben brokosaka trutru. Wantronso mi kon si èn frustan a waarheid fu Bijbel di e sori taki den dedewan no e pina na wan presi èn taki den sa kon na libi baka te den sa kisi wan opobaka na ini a ten di e kon. Fosi yu denki mi ben e sidon leti opo na ini mi bedi e leisi èn e poti strepi fayafaya na ondro den penti di mi ben wani sori George te a ben kon na oso baka en bijbelstudie.

Mi masra no ben man bribi taki na mi. Di a ben gowe fu oso mi no ben feni en bun srefisrefi taki a ben e studeri Bijbel, èn now mi ben de fayafaya fu taki fu den tumusi moi waarheid fu Bijbel di mi ben leri! Mindrineti ben pasa kaba, ma wi ben de na ai ete, fu di wi ben e taki fu Bijbel. George fruteri mi san Gado abi na prakseri gi a grontapu. A srefi neti dati mi aksi en efu a ben kan studeri na oso, so taki mi ben kan teki prati tu na a studie.

Brada Blanton gi wi a rai fu meki den tu boi fu wi de tu na a studie. Wi ben feni taki den ben yongu tumusi, fu di wán fu den ben abi tu yari èn a trawan ben abi fo yari nomo. Ma Brada Blanton ben sori wi Deuteronomium 31:12, pe skrifi: ’Tyari a pipel kon na wan, den mansma nanga den umasma nanga den pikinwan . . . , so taki den kan arki èn so taki den kan leri.’ Wi ben warderi a rai dati èn wi seti sani sosrefi taki den pikin ben kan gi piki na a bijbelstudie. Wi alamala makandra ben sreka wisrefi gi a studie fu kon sabi sortu piki wi ben musu gi, ma noiti wi taigi den boi san den ben musu taki. Wi feni taki na disi gi den  pikin fu wi deki-ati fu meki a waarheid de wan pisi fu den libi. Ala ten wi sa de nanga tangi na ati taki Brada Blanton yepi wi fu meki na osofamiri fu wi go na fesi na yeye fasi.”

Tyalensi di meki wi tyari kenki kon

Now wi alamala ben e studeri Bijbel èn wi kon de wán. Ma wi kisi fu du nanga nyun problema. Fu di a wrokopresi fu mi ben de so farawe, meki mi ben gwenti fu kon na oso te neigi yuru na neti. Fu dati ede, mi no ben man go na den konmakandra di ben e hori mindri wiki, ma mi ben man go tapu sonde. Na a pisi ten dati, Ann ben e go na ala den konmakandra èn a ben e go na fesi heri esi. Mi sosrefi ben wani go na ala den konmakandra èn mi ben wani hori wan bun osofamiri studie tu. Mi ben sabi taki mi ben abi fu tyari wan tu kenki kon. Sobun, mi teki a bosroiti fu no wroko so langa moro ibri dei, srefi te dati ben wani taki dati mi ben o lasi wan tu klanti.

A seti disi ben bun srefisrefi. Gi wi na osofamiri studie ben prenspari neleki den feifi tra konmakandra di ben e hori ibri wiki na ini a Kownukondre zaal. Wi ben kari a studie disi a di fu siksi konmakandra fu wi. Na so wi bosroiti fu hori en tapu wan spesrutu dei nanga yuru, namku ibri wiki tapu dridewroko, aiti yuru na neti. Son leisi, baka a neti nyanyan te wi ben kaba wasi den dotisani, dan wán fu wi ben gwenti fu taki: „Dyonsro wi musu hori a ’konmakandra’!” Efu mi no ben doro na oso ete, dan Ann ben e bigin nanga a studie èn te mi ben doro dan mi ben e teki abra fu en.

Wan tra sani di ben tranga wi èn di ben meki wi de wán leki osofamiri, na a deitekst di wi ben e leisi makandra te mamanten. Ma wi no ben sabi o ten wi ben musu du disi. Ala sma ben e wiki na wan tra ten. Wi taki fu a sani disi èn wi bosroiti taki wi alamala ben o wiki na a srefi ten, wi ben o nyan 6.30 mamanten, èn wi ben o luku a deitekst makandra. A seti disi ben de heri bun gi wi. Di den manpikin fu wi kon bigi, dan den bosroiti fu go dini na Bethel. Wi ben feni taki den aladei takimakandra disi ben yepi den fu gro na yeye fasi.

Baka di wi dopu wi kisi na okasi fu du moro na ini a diniwroko

Mi teki dopu na ini 1962, èn mi seri a bisnis fu mi di mi ben abi 21 yari kaba. Mi go wroko na wan presi na ini a foto pe wi ben e tan, so taki mi ben kan de krosibei fu mi osofamiri èn na so fasi wi ben kan dini Yehovah makandra. A sani disi tyari furu blesi kon gi wi. Wi ben poti leki marki taki wi alamala ben o go na ini a furuten diniwroko. Wi bigin du dati na ini den yari syatu baka 1970, di Edward, a moro bigi boi fu wi, tron wan furuten dinari, noso wan gewoon pionier wantewante baka di a kaba nanga middelbaar skoro. Wan pisi ten baka dati a boi fu wi di nen George bigin pionier, èn heri esi Ann du a srefi tu. Mi kisi furu deki-ati fu den ala dri, te den ben e fruteri mi san den ben ondrofeni na ini a preikiwroko. Leki osofamiri wi taki nanga makandra fa wi ben kan kenki a fasi fa wi ben e libi so taki wi alamala ben kan go na ini a furuten diniwroko. Wi bosroiti fu seri na oso fu wi. Wi ben libi 18 yari na ini na oso dati èn na drape wi kweki den boi fu wi. Wi ben lobi na oso fu wi trutru, ma Yehovah blesi wi di wi teki a bosroiti fu seri na oso.

Na ini 1972, Edward kisi a kari fu go na Bethel, èn George kisi wan kari na ini 1974. Aladi mi nanga Ann ben e misi den, toku wi no ben tan prakseri fa a ben o de wan prisiri sani taki den ben tan krosibei fu wi, te den ben o trow, èn meki pikin. Na presi fu dati, wi ben e prisiri taki den manpikin fu wi ben e dini Yehovah na Bethel. * Wi e agri nanga Odo 23:15, di e taki: „Mi manpikin,  efu yu ati kon koni, dan mi ati sa prisiri, iya di fu mi.”

Wi e go na ini a spesrutu pionierwroko

Di den tu boi fu wi go na Bethel, dan wi tan go doro na ini a pionierwroko. Ne wan dei na ini 1975, wi kisi wan brifi pe wi ben kisi a kari fu go na ini a spesrutu pionierwroko na ini wan kontren pe nowan gemeente e wroko. A kontren disi ben de na ini Clinton County, na ini a distrikt Illinois. Dati ben de wan sani di wi no ben fruwakti srefisrefi! Disi ben wani taki dati wi ben musu gowe libi New Jersey, pe wi ben de krosibei fu den boi fu wi di de na ini New York èn pe wi ben abi wi mati nanga famiriman. Ma wi ben si a wroko disi leki wan wroko di Yehovah ben gi wi, èn di wi bosroiti fu du en, dan dati tyari moro blesi kon gi wi.

Baka di wi wroko wan tu mun na ini a kontren pe nowan gemeente ben e wroko, dan wi bigin hori konmakandra na ini wan zaal di den sma fu a presi Carlyle, na ini Illinois, ben gebroiki fu hori konmakandra. Ma wi ben wani abi wan fasti presi pe wi ben kan kon makandra. Wan brada nanga en wefi di ben de fu a presi drape, ben feni wan pikin oso na wan boiti presi èn wi ben kan yuru na oso dati. Wi krin a heri oso èn sosrefi a toilet di ben de na dorosei, èn na so wi seti en kon tron wan pikin konmakandra presi. Wi e memre fa a ben de wan prisiri sani fu si fa wan asi ben e kon luku san wi ben e du. Furu tron a ben e sutu en ede na a fensre fu luku san ben e pasa na a konmakandra!

Baka wan pisi ten, a gemeente Carlyle ben seti èn wi e prisiri taki wi ben abi wan prati na ini a wroko disi. Wi kisi yepi fu Steve nanga Karil Thompson, wan yongu pionier trowpaar, di ben e kon wroko sosrefi na ini a kontren disi. A brada nanga a sisa disi tan drape wan tu yari èn bakaten den go na a Waktitoren Bijbel Skoro Gilead èn den froisi go na a Owstusei fu Afrika fu di den go wroko drape leki zendeling. Now den e dini drape na ini a kringwroko.

Heri esi a pikin konmakandra presi fu wi kon smara, èn wi ben abi wan moro bigi zaal fanowdu. A srefi brada nanga en wefi di ben de fu a presi drape yepi wi baka nanga a problema disi èn den bai wan gron di ben moro bun fu bow wan Kownukondre zaal na tapu. Baka wan tu yari, wi ben prisiri trutru fu kisi wan kari fu de drape te a nyun Kownukondre zaal fu Carlyle ben o gi abra na Yehovah! Mi ben feni en wan grani taki mi ben musu hori a lezing fu gi a zaal abra na Yehovah. A wroko di wi ben du drape ben de wan tumusi moi ondrofeni gi wi, èn a ben de wan blesi fu Yehovah.

Wi e kisi na okasi fu preiki gi sma di e taki wan tra tongo

Na ini 1979 wi kisi kari now fu go wroko na ini a foto Harrison, na ini New Jersey. Drape wi dini sowan 12 yari. Na a pisi ten dati wi bigin studeri  Bijbel nanga wan Sneisi uma, èn disi meki taki wi hori bijbelstudie nanga furu tra Sneisi sma. Na a srefi ten, wi kon si taki dusundusun studenti nanga famiri di ben komoto fu China ben e libi na ini a kontren fu wi. A sani disi gi wi deki-ati fu go leri Sneisitongo. Aladi disi ben wani taki dati wi ben musu teki ten ibri dei fu leri a tongo, toku a bakapisi ben de taki wi ben prisiri fu studeri Bijbel nanga furu Sneisi di e libi na ini a kontren fu wi.

Na ini den yari dati furu sani pasa nanga wi di ben gi wi fu lafu, spesrutu te wi ben e meki muiti fu taki Sneisitongo. Wan dei Ann ben taki dati en na wan Bijbel „moisimoisi” na presi fu taki dati en na wan Bijbel „leriman”. Na ini Sneisitongo den wortu disi gersi makandra kefalek. Na ososma ben lafu èn a ben taki: „Grantangi kon na inisei. Noiti ete mi taki nanga wan Bijbel moisimoisi.” Te now ete wi e meki muiti fu leri taki a tongo.

Baka dati wi kisi a wroko fu go na wan tra kontren na ini New Jersey pe wi ben man tan wroko doro nanga den Sneisi. Bakaten wi kisi kari fu froisi go na Boston, Massachusetts, pe wan Sneisi grupu de di e go na fesi sowan 3 yari kaba. A de wan grani gi wi fu yepi a grupu disi na ini den seibi yari di pasa èn a e gi wi prisiri sosrefi fu si taki a grupu tron wan gemeente tapu 1 yanuari 2003.

Den blesi di wi kisi fu di wi ben de klariklari fu gi wisrefi

Na ini Maleaki 3:10, wi e leisi a kari di Yehovah e gi a pipel fu en fu tyari den ofrandi nanga den srakti-ofrandi fu den kon na ini en oso, so taki a kan blesi en pipel teleki nowan sani e mankeri moro. Wi seri a bisnis fu mi di mi ben lobi srefisrefi. Wi seri wi oso, di wi ben lobi trutru. Èn moro sani de di wi du. Ma te wi e agersi dati nanga den blesi di wi kisi, dan den sani di wi du na pikinpikin sani nomo.

Iya, Yehovah gi wi bigi blesi trutru! A gi wi prisiri fu si taki den pikin fu wi teki a waarheid, wi prisiri fu di wi go na ini a furuten diniwroko di e kibri sma libi, èn wi si taki Yehovah sorgu gi den sani di wi abi fanowdu. Fu tru, den blesi di wi kisi bigi moro a muiti di wi du!

[Futuwortu]

[Prenki na tapu bladzijde 25]

Louise nanga George Blanton makandra nanga Ann, na ini 1991

[Prenki na tapu bladzijde 26]

A Kownukondre zaal na ini Carlyle, di gi abra na Yehovah tapu 4 yuni 1983

[Prenki na tapu bladzijde 27]

Mi nanga Ann makandra nanga a nyun Sneisi gemeente na ini Boston

[Prenki na tapu bladzijde 28]

Mi nanga Ann, makandra nanga Edward, Connie, George, nanga Grace