Frutrow tapu a yeye fu Gado te sani e kenki na ini yu libi

„Du ala san yu man fu sori yusrefi na Gado leki wan sma di a feni bun.”—2 TIMOTEYUS 2:15.

1. Sortu kenki kan de wan tyalensi gi wi na yeye fasi?

A GRONTAPU na wi lontu e kenki doronomo. Wi e si den kefalek sani di sabiman e meki èn wi e si fa moro nanga moro libisma e bigin tyari densrefi na wan fasi di no fiti kwetikweti. Soleki fa wi si na ini a fosi artikel, dan Kresten musu kakafutu gi a yeye fu grontapu, noso gi sma di no wani sabi noti fu Gado kwetikweti. Ma te grontapu e kenki, dan wisrefi e kenki tu na someni difrenti fasi. Wi e bigin leki pikin-nengre èn wi e gro kon tron bigisma. Wi kan kisi gudu, noso wi kan lasi den; wi kan kon moro gosontu, noso wi kan kon siki, wi famiri kan kon moro bigi, noso wan lobiwan fu wi kan dede. Furu fu den kenki dati na sani di wi no man tapu, èn den kan tyari nyun èn moro bigi tyalensi kon gi wi na yeye fasi.

2. Fa a libi fu David ben kon kenki?

 ² Furu sma no e ondrofeni den bigi kenki di David, a manpikin fu Isai, ben ondrofeni na ini en libi. Fosi yu denki, David gro fu wan boi di e luku skapu èn di sma no ben sabi, kon tron wan sma di a heri kondre ben lobi. Bakaten a tron wan loweman, wan sma di wan dyarusu kownu ben e onti leki wan meti. Baka dati David tron wan kownu èn wan sma di e go teki tra kondre abra. A ben abi fu teki den takru bakapisi fu seryusu sondu. A ondrofeni bigi rampu nanga pratifasi na ini en osofamiri. A kisi gudu, a kon owru, èn a ben kon abi den skin-ati fu owru dei. Ma aladi so furu kenki ben de na ini a libi fu en, toku David ben sori en heri libi langa taki a ben e frutrow tapu Yehovah èn tapu a yeye fu En. A du ala san a man fu de wan sma di ’Gado feni bun’, èn Gado blesi en (2 Timoteyus 2:15). Aladi wi libi e difrenti fu a libi fu David, toku wi kan leri fu a fasi fa a lusu den problema na ini en libi. Na eksempre fu en kan yepi wi fu frustan fa a santa yeye fu Gado kan tan yepi wi te sani e kenki na ini wi libi.

A sakafasi di David ben sori—Wan tumusi moi eksempre

3, 4. Fa David, di ben e luku skapu fosi èn di nowan sma ben sabi, ben kon tron wan sma di ala sma na ini a kondre ben lobi?

³ Leki yongu boi, David no ben de wan prenspari sma. Srefi na ini en eigi famiri a no ben de wan prenspari sma. Di a profeiti Samuel kon na Betlehem, dan a papa fu David kari seibi fu den aiti manpikin fu en kon. David, di ben de a moro yongu manpikin, ben tan na baka fu luku den skapu. Ma Yehovah ben wani taki David ben musu tron kownu fu Israel bakaten. Den seni kari David na ini a wei. Dan Bijbel e taki: „Samuel teki a tutu nanga oli, èn a salfu en na mindri den brada fu en. Sensi a dei dati a yeye fu Yehovah bigin wroko tapu David” (1 Samuel 16:12, 13). David frutrow tapu a yeye fu Gado en heri libi langa.

⁴ A no ben o teki langa bifo a boi disi, di ben e luku skapu, ben o bigin kisi barinen na ini a kondre. A ben kisi a kari fu go dini a kownu èn fu prei poku gi en. A ben kiri a fetiman Goliat, wan bigi langa man di ben de so ogri, taki srefi den srudati fu Israel di ben abi bun furu ondrofeni, ben e frede fu go feti nanga en. Te fu kaba David tron a fesiman fu den fetiman, èn a ben wini den Filistiasma. A pipel ben lobi en. Den ben meki singi fu gi en grani. Na fesi kaba, wan raiman fu Kownu Saul ben taki dati David ben „sabi prei” a harpu èn taki a ben de „wan deki-ati man, di ben abi furu makti, wan man fu orloku, wan man di sabi taki èn di en skin bow bun”.—1 Samuel 16:18; 17:23, 24, 45-51; 18:5-7.

5. San ben kan meki taki David kisi bigifasi? Fa wi du sabi taki a no ben kisi bigifasi?

⁵ Barinen, wan moi skin, krakti fu wan yongu sma, a koni fu taki, a koni fu man prei poku, a koni fu seti srudati afersi, nanga a blesi fu Gado, iya, a gersi leki David ben abi ala bun sani di wan sma ben sa wani. Iniwan fu den sani disi ben kan meki taki a kisi bigifasi, toku nowan fu den sani gi en a firi dati. Luku san David piki Kownu Saul, di ben aksi David fu trow nanga en umapikin. Nanga trutru sakafasi, David taigi en: „Suma na mi èn suma na mi famiriman, den famiriman fu mi papa na ini Israel, taki mi ben sa tron a masra fu na umapikin fu a kownu?” (1 Samuel 18:18) Fu a pisi tori disi wan sabiman ben skrifi: „David ben feni taki a no ben fiti fu kisi a grani fu tron a masra fu na umapikin fu a kownu. A ben feni taki a no ben bun nofo fu dati, taki a no ben de wan prenspari sma na ini a libimakandra, èn taki a no ben komoto fu wan prenspari osofamiri.”

6. Fu san ede wi musu kon abi sakafasi?

⁶ David ben abi sakafasi fu di a ben sabi taki na  ala fasi Yehovah hei moro sondu libisma. David ben fruwondru taki Gado e luku libisma srefi (Psalm 144:3). David ben sabi sosrefi taki iniwan grani di a ben abi ben de soso fu di Yehovah ben sori sakafasi; Yehovah saka ensrefi fu horibaka gi David, fu kibri en èn fu sorgu en (Psalm 18:35). Disi e leri wi wan tumusi moi sani! Noiti den sani di wi man du, den sani di wi du kaba, nanga den grani di wi abi, musu meki wi kisi heimemre. „Iya, san yu abi di yu no ben kisi?” na so Paulus ben skrifi. „Efu yu ben kisi en trutru, fu san ede yu e dyaf neleki yu no ben kisi en?” (1 Korentesma 4:7) Efu wi wani a santa yeye fu Gado èn efu wi wani taki a feni wi bun, dan wi musu kon abi sakafasi èn wi musu tan sori a fasi dati.—Yakobus 4:6.

„No teki refensi”

7. Sortu okasi David ben kisi fu kiri Kownu Saul?

⁷ A barinen di David ben abi no ben meki a kon abi bigifasi. Toku a barinen dati ben meki taki Kownu Saul, di no ben abi a yeye fu Gado moro, ben kon dyarusu srefisrefi, so taki a ben wani kiri David. Aladi David no ben du ogri, toku a lowe fu kibri a libi fu en èn a go tan na ini a gransabana. Wan leisi, di Kownu Saul ben e waka suku David fu kiri en, dan a Kownu go na ini wan bergi-olo, sondro fu sabi taki David nanga den mati fu en ben e kibri drape. Den man di ben de nanga David ben e gi en deki-ati fu teki na okasi dati fu kiri Saul, fu di a ben gersi leki na Gado ben e gi en na okasi dati. Wi kan si kaba fa den sidon nanga David na ini a dungru, aladi den e syusyu nanga en, taki: „Disi na a dei di Yehovah e taigi yu: ’Luku! Mi e poti yu feanti na ini yu anu, èn san yu feni bun, na dati yu musu du nanga en.’”—1 Samuel 24:2-6.

8. Fu san ede David hori ensrefi fu no teki refensi?

⁸ David ben weigri fu du ogri nanga Saul. Fu di a ben abi bribi nanga pasensi, meki a ben de klariklari fu libi na afersi dati gi Yehovah. Baka di a kownu komoto na ini a bergi-olo, dan David bari gi en, taki: „Meki Yehovah koti krutu na mindri mi nanga yu; èn Yehovah sa teki refensi na yu tapu fu mi ede, ma mi eigi anu no sa fasi yu” (1 Samuel 24:12). Aladi David ben sabi taki Saul no ben e du bun, toku David srefi no teki refensi; a no ben taki grofu nanga Saul èn a no taki ogri fu en tu. Na difrenti tra okasi, David hori ensrefi fu no teki refensi. Na presi fu dati, a ben abi a frutrow taki Yehovah ben o poti sani kon reti gi en.—1 Samuel 25:32-34; 26:10, 11.

9. Fu san ede wi no musu pai sma ogri fu ogri te den e gens, noso frufolgu wi?

⁹ Neleki David, yu kan de na ini wan situwâsi tu di de wan tesi gi yu. Kande skoromati, sma na  yu wrokope, famiriman, noso tra sma di no abi a srefi bribi leki yu, e suku fu gens, noso fu frufolgu yu. No pai den ogri fu ogri. Wakti Yehovah, aksi en fu gi yu en santa yeye so taki a kan yepi yu. A kan taki den sma dati di no de na bribi, sa fruwondru fu si a bun fasi fa yu e tyari yusrefi, èn den kan tron bribiman srefi (1 Petrus 3:1). Awinsi fa a no fa, yu kan abi a dyaranti taki Yehovah e si a situwâsi fu yu èn taki a sa du wan sani fu yepi yu na a ten di en feni bun. Na apostel Paulus ben skrifi: „No teki refensi, mi lobiwan, ma gi Gado na okasi fu puru en atibron na sma tapu; bika buku skrifi: ’Na mi o teki refensi; mi o pai sma baka, na so Yehovah taki.’”—Romesma 12:19.

„Gi yesi na trangaleri”

10. Fa a ben du kon taki David fadon na ini sondu? Fa a ben pruberi fu tapu a sondu fu en?

¹⁰ Baka wan tu yari, David ben kon tron wan kownu di ala sma lobi; wan kownu di ben meki wan nen gi ensrefi. En heri libi langa David sori na wan tumusi moi fasi taki a de getrow, èn a skrifi wan tu moi psalm fu prèise Yehovah. Efu yu ben sa luku den sani dati nomo, dan makriki yu ben kan prakseri taki a man disi no ben o du wan seryusu sondu noiti. Toku a fadon na ini seryusu sondu. Wan dei di a kownu ben de na tapu a daki fu en oso, a si fa wan moi uma e wasi en skin. A ben aksi sma suma na uma dati ben de. Di David yere taki na uma ben de Batseiba èn taki en masra, Uria, ben gowe go feti, dan a seni kari na uma èn a didon nanga en. Bakaten a kon yere taki na uma ben de nanga bere. Efu a tori disi ben o kon na krin, dan a ben o tyari bigi dyugudyugu! Na ini a Wet fu Moses, sutadu ben de wan sondu di ben kan meki wan sma kisi dedestrafu. Leki fa a sori, dan a kownu ben prakseri taki a ben kan kibri a sondu fu en. Sobun, a ben seni boskopu go na a legre, èn a ben gi a komando taki Uria ben musu drai kon baka na Yerusalem. David ben howpu taki Uria ben o go sribi nanga Batseiba, ma dati no ben pasa. Now di David no ben sabi moro san fu du, dan a seni Uria go baka na a feti èn a gi en wan brifi gi Yoab, a srudati komandanti. Na ini a brifi a ben skrifi taki den ben musu seti sani so taki Uria ben o dede te a ben o go na ini a feti. Yoab ben gi yesi èn Uria ben lasi en libi. Baka di Batseiba hori row soleki fa a gwenti ben de, dan David teki en leki en wefi.—2 Samuel 11:1-27.

11. Fu sortu situwâsi Natan ben taki nanga David? San David ben taki fu dati?

¹¹ A ben gersi leki a triki fu en ben wroko, ma David ben musu sabi na fesi taki Yehovah ben si ala sani (Hebrewsma 4:13). Baka wan tu mun a pikin ben gebore. Dan Gado seni a profeiti Natan go na David. A profeiti fruteri a Kownu fa wan guduman, di ben abi bun furu skapu, ben teki a wan-enkri skapu fu wan pôti man èn a srakti a skapu dati. A tori dati naki David ati, so taki a krutu a onregtfardiki man, sondro fu sabi fu san ede a profeiti fruteri en a tori dati. David krutu a guduman wantewante. Nanga atibron a taigi Natan: „A man di du dati, musu dede!”—2 Samuel 12:1-6.

12. Sortu strafu Yehovah ben o tyari kon na David tapu?

¹² A profeiti ben piki David: „Yusrefi na a man dati!” David ben krutu ensrefi. Wi kan frustan taki David di ben kisi so wan bigi atibron ben  bigin firi syen now èn a ben firi sari trutru. Sondro fu taki wan sani, a arki Natan di ben e fruteri en san na a strafu di Yehovah ben o tyari kon na en tapu. David ben abi fu teki a strafu dati. Natan no ben suku fu trowstu David, bika David ben wisiwasi a wortu fu Yehovah fu di a du ogri. A no en ben meki den feanti kiri Uria nanga a feti-owru? We, a feti-owru no ben o dribi komoto na a oso fu David. A ben teki a wefi fu Uria kibrikibri, a no so? We, wan srefi sortu ogri ben o teki en tu, ma a sani dati no ben o tan kibrikibri, ala sma ben o yere a tori dati.—2 Samuel 12:7-12.

13. San David du di Yehovah gi en trangaleri?

¹³ Koloku taki David no du leki a no ben du noti. A no rigeri nanga a profeiti Natan. A no gi trawan a fowtu, èn a no go suku fu fruklari fu san ede a ben du so wan sani. Di Natan sori David tapu en fowtu, dan wantewante David teki a frantwortu fu en fowtu, fu di a taki: „Mi sondu teige Yehovah” (2 Samuel 12:13). Psalm 51 e taki fu a pen di a ben e firi fu di a ben abi konsensi fonfon èn a e sori taki a ben abi berow trutru. A ben begi Yehovah, taki: „No puru mi trowe na yu fesi; èn a santa yeye fu yu, o Gado, no puru en na mi tapu.” A ben e bribi taki Yehovah na wan Gado fu sari-ati, èn taki a no ben o wisiwasi wan sma di en ’ati broko èn di masi’ fu di a sondu (Psalm 51:11, 17). David tan frutrow tapu a yeye fu Gado. Yehovah ben gi David pardon fu a sondu fu en, ma a no ben kibri en gi den takru bakapisi fu dati.

14. Fa wi musu tyari wisrefi te Yehovah e gi wi trangaleri?

¹⁴ Wi alamala na sondusma (Romesma 3:23). Son tron wi kan fadon na ini seryusu sondu tu, neleki David. Neleki fa wan lobi-ati papa e gi trangaleri na den pikin fu en, na so Yehovah e gi trangaleri na den wan di wani dini en. Ma aladi trangaleri de fanowdu, toku a no makriki fu teki en. Te yu luku en bun, dan son leisi a „no de wan prisiri sani” (Hebrewsma 12:6, 11). Toku a de so taki efu wi „gi yesi na trangaleri”, dan wi kan kon bun baka nanga Yehovah (Odo 8:33). Fu tan kisi blesi fu a yeye fu Yehovah, dan wi musu teki a trangaleri di a e gi wi, èn wi musu du sani na so wan fasi, taki a kan feni wi bun.

No poti yu frutrow tapu gudu di no e gi yu nowan dyaranti

15. (a) Fa son sma e gebroiki den gudu fu den? (b) Fa David ben wani gebroiki den gudu fu en?

¹⁵ Nowan buweisi no de di e sori taki David ben de wan prenspari man na ini a libimakandra, noso taki a famiri fu en ben gudu. Ma na a pisi ten di a ben de kownu, David kon kisi furu gudu. Leki fa yu sabi, dan furu sma e kibri den gudu fu den; na wan gridi fasi den e suku moro gudu, noso den e gebroiki en gi densrefi nomo. Tra sma e gebroiki a moni fu den fu meki bigi (Mateyus 6:2). David gebroiki den gudu fu en na wan tra fasi. A ben e angri fu gi Yehovah grani. David ben taigi Natan taki a ben wani bow wan tempel gi Yehovah, pe a ben kan poti na ark fu na frubontu, bika na a ten dati den ben poti na ark „na mindri tenti krosi” na ini Yerusalem. Yehovah ben prisiri nanga san David ben wani du, ma nanga yepi fu Natan A taigi David taki en manpikin Salomo ben o bow a tempel.—2 Samuel 7:1, 2, 12, 13.

16. San David ben seti na fesi so taki a tempel ben kan bow?

 ¹⁶ David ben tyari sani kon na wán di sma ben kan gebroiki bakaten fu bow a tempel. A ben taigi Salomo: „Mi sreka wan hondro dusun talenti gowtu gi na oso fu Yehovah, nanga wan milyun talenti solfru, èn mi no man wegi a kopro nanga na isri, bika a furu tumusi; mi sreka udu nanga ston sosrefi, ma yu sa tyari moro fu den sani disi kon na wán.” Fu en eigi gudu a ben gi 3000 talenti gowtu èn 7000 talenti solfru (1 Kroniki 22:14; 29:3, 4). * David no ben e gi ala den sani disi fu sori fa a kefalek, ma fu sori taki a ben abi bribi na ini Yehovah Gado èn taki a ben e dini Gado nanga en heri ati. Fu di a ben sabi Suma ben meki taki a kisi den gudu dati, meki a taigi Yehovah: „Ala sani e kon fu yu, èn fu yu eigi anu srefi wi gi yu disi” (1 Kroniki 29:14). Fu di David ben lobi fu gi sani, meki a du ala san a man fu meki a soifri anbegi go na fesi.

17. Fa a rai di skrifi na ini 1 Timoteyus 6:17-19 e fiti gudusma nanga pôtisma?

¹⁷ Meki wi gebroiki den gudu fu wi tu fu du bun. Na presi fu feti baka gudu nomo, dan a moro bun fu suku fu meki Gado feni wi bun; dati na a fasi fa wi e kisi trutru koni nanga trutru koloku. Paulus ben skrifi: „Taigi den sma di gudu na ini a grontapu disi taki den no musu abi bigifasi èn taki den no musu frutrow tapu gudu di no e gi nowan dyaranti, ma den musu frutrow tapu Gado di e gi wi ala sani bogobogo, so taki wi kan abi prisiri; den musu du bun, den musu du furu bun wroko, den no musu gridi fu gi sma sani, den musu lobi fu prati sani nanga trawan; na so fasi den e kibri gudu gi densrefi di de wan bun fondamenti gi a tamara, so taki den kan grabu a trutru libi, hori en bun steifi” (1 Timoteyus 6:17-19). Awinsi fa na ekonomia situwâsi fu wi de, meki wi tan frutrow tapu a yeye fu Gado èn meki wi suku fu libi wan libi di sa meki taki wi kon „gudu na Gado ai” (Lukas 12:21). Noti no de so prenspari leki te wi lobi-ati Tata na hemel e feni wi bun.

Sori yusrefi na Gado leki wan sma di a feni bun

18. Na sortu fasi David ben de wan bun eksempre gi Kresten?

¹⁸ En heri libi langa, David du sani so taki Yehovah ben kan feni en bun. Na ini wan singi a ben bari taki: „Sori mi yu bun-ati, o Gado, sori mi yu bun-ati, bika mi sili lon go kibri na yu” (Psalm 57:1). A frutrow di a ben abi na ini Yehovah ben abi bun bakapisi. David ben kon owru, èn „a ben libi langa èn a ben kisi furu blesi” (1 Kroniki 23:1). Aladi David meki bigi fowtu, toku sma e memre en leki wan fu den someni kotoigi fu Gado di sori taki a ben abi wan tranga bribi.—Hebrewsma 11:32.

19. Fa wi kan sori taki wi na sma di Gado feni bun?

¹⁹ Te sani e kenki na ini yu libi, dan memre taki Yehovah kan horibaka gi yu, èn taki a kan gi yu krakti nanga trangaleri, neleki fa a ben du dati nanga David. Na apostel Paulus ben kisi fu du nanga furu kenki na ini en libi, neleki David. Toku a ben tan getrow tu, fu di a ben e frutrow tapu a yeye fu Gado. A ben skrifi: „Mi man du ala sani fu di en e gi mi krakti” (Filipisma 4:12, 13). Efu wi frutrow tapu Yehovah, dan a sa yepi wi fu abi bun bakapisi, bika A wani taki wi musu abi bun bakapisi. Efu wi gi yesi na en èn efu wi kon krosibei na en, dan a sa gi wi a krakti fu du en wani. Iya, efu wi tan frutrow tapu a yeye fu Gado trutru, dan wi sa man ’sori wisrefi na Gado leki sma di a feni bun’, now èn fu têgo.—2 Timoteyus 2:15.

[Futuwortu]

San yu ben sa piki?

• Fa wi kan kibri wisrefi gi bigimemre?

• Fu san ede wi no musu teki refensi?

• Fa wi musu si trangaleri?

• Fu san ede wi musu frutrow tapu Gado èn no tapu gudu?

[Aksi fu a tori disi]

[Prenki na tapu bladzijde 16, 17]

David ben e frutrow tapu a yeye fu Gado èn a du sani so taki Gado ben kan feni en bun. Yu e du a srefi tu?

[Prenki na tapu bladzijde 18]

„Ala sani e kon fu yu, èn fu yu eigi anu srefi wi gi yu disi”